1. Kusigikirra ha Matayo 28:18-20, Yesu akaha abegeswa be kiragiro ki?

HANYUMA ya Yesu kuhumbuuka, akeyoleka hali abegeswa be abaali besoroliize omu Galiraya. Akaba aine obutumwa obw’amaani obw’okubagambira. Bwali butumwa ki? Ebigambo bye nibisangwa omu Matayo 28:18-20.​—Soma.

2. Bikaguzo ki ebiturukwija kubazaaho?

² Ekiragiro kya Yesu eky’okufoora abantu abegeswa nikikwataho buli muheereza wa Ruhanga wena kasumi kanu. Nahabweki leka tubazeeho ebikaguzo bisatu ebirukukwata ha mulimo Yesu y’atuhaire. Eky’okubanza, oihireho kwegesa abegeswa abahyaka Ruhanga eby’arukubetaagisa, kiki ekindi ekitusemeriire kukora? Ekyakabiri, abatebezi boona omu kitebe nibasobora bata kukonyera abeegi ba Baibuli kukurakurana omu by’omwoyo? Ekyakasatu, nitusobora tuta kukonyera abatebezi bagenzi baitu abafukire omu by’omwoyo kwongera kwejumbira omu mulimo ogw’okufoora abantu abegeswa?

3. Kiki kyonyini Yesu ekiyaturagiire kukora omu kiragiro kye?

³ Yesu ebiyaturagiire nibyetegerezebwa kurungi. Tusemeriire kwegesa abantu Yesu ebiyaragiire. Baitu, titusemeriire kwebwa ensonga enkuru. Yesu atagambe ngu: ‘Mubegese byona ebinabaragiire.’ Oihireho, akagamba ati: Mubegese “okukwata byona ebinabaragiire.” Kusobora kuhondera ekiragiro eki tusemeriire kwegesa omwegi wa Baibuli eky’okukora kandi n’okumwoleka omulingo asobora kukikora. (Eng. 8:31) Habwaki eki nikyetaagisa?

4. Kukwata ekiragiro nikimanyisa ki? Bazaaho ekyokurorraho.

 ⁴ “Kukwata” ekiragiro nikimanyisa kukyorobera. Katubazeeho ekyokurorraho ekirukwoleka omulingo tusobora kwegesa omuntu kworobera ebiragiro bya Kristo. Omutendeki ow’okuvuga motoka ayegesa ata omwegi we kukwata ebiragiro ebya ha nguudo? Omutendeki nasobora kubanza kurabiramu omwegi ebiragiro ebya ha nguudo bali omu kilaasi. Baitu kusobora kwegesa omwegi we kworobera ebiragiro ebi, asemeriire kukora ekintu ekindi. Asemeriire kugenda n’omwegi nukwo amuhabule obwarukuba n’avuga kandi n’alengaho kuteeka omu nkora ebiyayegere. Kiki ekitusobora kwegera ha kyokurorraho kinu?

5. (a) Kusigikirra ha Yohana 14:15 na 1 Yohana 2:3, kiki ekitusemeriire kwegesa abeegi baitu aba Baibuli kukora? (b) Bazaaho ebyokurorraho ebirukwoleka omulingo tusobora kuhabura abeegi baitu.

⁵ Obutwegesa abantu Baibuli, tubegesa Ruhanga eby’arukutwetaagisa tukole. Baitu haroho kindi ekitusemeriire kukora. Tusemeriire kwegesa abeegi baitu ba Baibuli kuteeka omu nkora ebintu ebibarukwega omu bwomeezi bwabo obwa buli kiro. (Soma Yohana 14:15; 1 Yohana 2:3.) Kurabira omu kyokurorraho kyaitu, nitusobora kwoleka abeegi baitu nk’oku basobora kuteeka omu nkora emisingi ya Baibuli obubarukuba bali ha isomero, ha mulimo, rundi omu by’okwesemeza. Nitusobora kubagambira ekintu eky’atubaireho ekirukwoleka nk’oku kuteeka omu nkora obuhabuzi bwa Baibuli ky’atukonyire kutahikwaho akabi rundi kukora encwamu ey’ehikire. Nitusobora kusaba hali Yahwe abeegi baitu bahuliriize ngu abahe omwoyo ogurukwera gubahabule.​—Yoh. 16:13.

6. Kwegesa abantu kukwata ebiragiro bya Yesu, nikitwarramu ki?

⁶ Kwegesa abantu kukwata ebiragiro bya Yesu, nikitwarramu ki? Nikitwarramu kukonyera abeegi baitu aba Baibuli kutunga ekihika eky’okufoora abantu abegeswa. Abeegi abamu nibasobora kutiina kutebeza. Nahabweki tusemeriire kuba n’okugumiisiriza obuturaaba nitubakonyera kwetegereza kurungi amananu ag’omu Baibuli nukwo okwikiriza kwabo kugume. Amananu obugarabahika ha mutima, nigaija kubaletera kutandika kutebeza. Kiki ekitusobora kukora kukonyera abeegi kutunga ekihika eky’okutebeza amakuru amarungi?

7. Nitusobora tuta kukonyera omwegi kutunga ekihika eky’okutebeza amakuru amarungi?

⁷ Nitusobora kukaguza omwegi waitu ebikaguzo nka binu: “Ogasiirwe ota habw’okuteeka omu nkora eby’orukwega kuruga omu Baibuli? Notekereza abandi nabo nibetaaga kuhurra obutumwa bunu? Kiki ekyosobora kukora kubakonyera?” (Nfu. 3:27; Mat. 9:37, 38) Yoleka omwegi turakiti ezirukusangwa omu Bikwato Byaitu Ebitukozesa Kwegesa hanyuma mugambire akomemu ezo ezarukutekereza ngu abanyabuzaale be, abanywani, rundi abakozi bagenzi be basobora kugonza kusoma. Muhe zimu ha turakiti ezo. Hanyuma omwoleke omulingo ogw’amagezi nk’oku asobora kuzigabamu. Baitu omwegi hanyuma y’okwikirizibwa kufooka omutebezi ow’atakabatiziibwe, nitwija kwetaaga kutebezaaga na uwe nukwo tumuhabule​—Mug. 4:9, 10; Luk. 6:40.

8. Habwaki kikuru abeegi baitu kukurakuraniza okugonza okubainiire Ruhanga hamu n’abantu? (Rora na kasanduuko “ Nk’oku Tusobora Kukonyera Abeegi Baitu Kweyongera Okugonza Ruhanga.”)

⁸ Oikale noijuka ngu Yesu akaturagira kwegesa abantu “okukwata byona” ebiyaragiire. Eki nikitwarramu ebiragiro bibiri ebirukukirayo obukuru​—kugonza Ruhanga hamu na mutaahi waitu, kandi ebiragiro binu biine akakwate n’omulimo ogw’okutebeza n’okufoora  abantu abegeswa. (Mat. 22:37-39) Akakwate ako nikaha? Ensonga enkuru ey’eretera omuntu kwejumbira omu kutebeza nukwo okugonza okwaniire Ruhanga hamu n’abantu abandi. Ky’amananu ngu abeegi ba Baibuli abamu, batiina obubatekerezaho kwejumbira omu kutebeza. Baitu nitusobora kugumya abeegi abo ngu Yahwe naija kubakonyera mpora mpora kuleka kutiina abantu. (Zab. 18:1-3; Nfu. 29:25) Akasanduuko akali omu kicweka kinu nikasoborra biki ebitusobora kukora kukonyera omwegi waitu kweyongera kugonza Ruhanga. Kwongerraho, ekitebe nikisobora kukora ki kukonyera omwegeswa omuhyaka kukurakurana omu kwoleka okugonza?

9. Omu kyokurorraho ky’omwegi ow’arukwega kuvuga, omwegi ayega amasomo amakuru omu miringo ki?

⁹ Yongera otekerezeeho ekyokurorraho eky’omwegi ow’arukwega kuvuga motoka. Omwegi obwarukuba navuga motoka ali n’omutendeki we, ayega omu miringo ki? Naaba n’ahuliiriza eby’omutendeki we arukumugambira kandi n’ayegera na h’abavugi abandi abarungi. Ekyokurorraho, omutendeki n’asobora kumwoleka omuvugi ondi ow’aikirize motoka endi kumugenda omu maiso. Rundi nasobora kumwoleka omuvugi ow’akeheze amataara ag’omu maiso nukwo aleke kwita amaiso g’abavugi abandi. Ebyokurorraho nk’ebi nibisobora kwegesa omwegi amasomo amakuru agasobora kuteeka omu nkora.

10. Kiki ekirakonyera omwegi wa Baibuli kukurakurana omu by’omwoyo?

¹⁰ Omu mulingo nugwo gumu, omwegi wa Baibuli ow’atandika kurubatira omu muhanda gw’obwomeezi tayegera ha mwegesa we wenka baitu na ha byokurorraho ebirungi eby’abaheereza ba Yahwe abandi. Nahabweki, kiki ekirakira kukonyera abeegi ba Baibuli kukurakurana omu by’omwoyo? Kwija omu nsorrokano. Habwaki? Ebibahurra omu nsorrokano bibakonyera kwega bingi, bigumya okwikiriza kwabo, kandi bibakonyera kweyongera kugonza Ruhanga. (Eng. 15:30-32) Ekindi, omwegi obwarukuba aizire omu nsorrokano, omwegesa we nasobora kumwanjura hali ab’oruganda na banyaanya itwe abarukuraba omu nyikara nk’eze. Bikorwa ki eby’okugonza okw’Ekikristaayo omwegi eby’asobora kurora omu kitebe? Tekerezaaho ebyokurorraho binu.

11. Byokurorraho ki omwegi asobora kurora omu kitebe, kandi nibisobora kumukwataho bita?

¹¹ Omwegi wa Baibuli ow’arukukuza abaana ataine busagiki bwa isebo, arora munyaanya itwe ow’ali omu nyikara nk’eye. Akwatwaho muno habw’okurora amaani munyaanya itwe atamu kusobora kwija ha Kyombeko ky’Obukama n’abaana be abato. Omwegi ow’arukulengaho kuleka kunywa etaaba anywana omutebezi ow’akaba aine ekizibu nikyo kimu baitu yahika yakisingura. Omutebezi agambira omwegi ngu habw’okugonza kwe hali Yahwe kweyongera, nikyo kyamuletiire kworobera ebiragiro bya Ruhanga. (2 Kol. 7:1; Baf. 4:13) Hanyuma y’okuhuliriza eby’omutebezi yarabiremu, omwegi atunga obumanzi ow’oruganda obw’amugambira ngu, “Naiwe nosobora kuleka kunywa etaaba.” Omwisiki ow’arukwega Baibuli arora munyaanya itwe ensinganto n’ayegondeza omu kuba omu h’Abakaiso ba Yahwe. Omwegi wa Baibuli obwarora ngu munyaanya itwe aine okusemerewa, kimuletera kugonza kumanya habwaki munyaanya itwe ogu aikara asemeriirwe.

12. Habwaki nitugamba ngu buli omu wena omu kitebe aine eky’asobora kukora kukonyera abeegi ba Baibuli?

¹² Abeegi ba Baibuli obubamanya abatebezi abesigwa ab’embaganiza, abeegi begera ha byokurorraho byabo omulingo basobora kworobera ekiragiro kya Kristo eky’okugonza Ruhanga n’abantu abandi. (Yoh. 13:35; 1 Tim. 4:12) Ekindi, nk’oku tusangirwe turozere,  omwegi wa Baibuli nasobora kwegera h’abatebezi abarukuraba omu bizibu nk’ebye. Ebyokurorraho by’abo bimukonyera kumanya nk’oku nikisoboka kukora empindahinduka ez’aine kukora kusobora kufooka mwegeswa wa Kristo. (Bir. 30:11) Buli omu wena omu kitebe aine eky’asobora kukora kukonyera omwegi wa Baibuli kukurakurana omu by’omwoyo. (Mat. 5:16) Kiki iwe eky’okora kugarramu amaani abeegi ba Baibuli abaija omu nsorrokano?

13-14. Yesu akatwaza ata abakwenda be abaali bahoirwemu amaani?

¹³ Nitugonza kukonyera ab’oruganda na banyaanya itwe abafukire omu by’omwoyo kwongera kwejumbira omu kuhikiriza ekiragiro kya Kristo eky’okufoora abantu abegeswa. Omulingo Yesu yatwaizeemu abakwenda be abaali bahoirwemu amaani nigutwoleka kiki ekitusobora kukora kasumi kanu.

¹⁴ Yesu obwakaba ali haihi kufa kandi n’okumalirra obuheereza bwe omu nsi, abakwenda be ‘boona bakamusigaho bairuka.’ (Mar. 14:50; Yoh. 16:32) Kiki Yesu ekiyakozere abakwenda be obubahoirwemu amaani? Harabireho obwire buke Yesu amazire kuhumbuuka, akagambira bamu ha bahondezi be ati: “Mutatina: mugende mugambire bagenzi bange [ngu mpumbuukire].” (Mat. 28:10a) Yesu atanobe abakwenda be. Nobukiraaba ngu bakairuka bamulekaho, akongera yabeeta ‘bagenzi be.’ Nka Yahwe, Yesu yali aine embabazi kandi n’aganyira.​—2 Bakam. 13:23.

15. Nitwehurra tuta hali abo abalekere kwejumbira omu buheereza?

¹⁵ Omu mulingo nugwo gumu, tukwatwaho muno habwabo abalekere kwejumbira omu buheereza. Bakyali b’oruganda na banyaanya itwe kandi nitubagonza! Nitukyaijuka emirimo ey’amaani Abakristaayo banu bakoliire Yahwe. Kandi abamu bakekamba kumara emyaka nyingi. (Baheb. 6:10) Nitwegomba kwongera kuba nabo! (Luk. 15:4-7) Nitusobora tuta kuhondera ekyokurorraho kya Yesu, tukabooleka ngu nitubafaaho?

16. Nitusobora tuta kwoleka ngu nitufaaho ab’oruganada na banyaanya itwe abafukire omu by’omwoyo?

¹⁶ Omu mulingo ogw’embabazi, baraalize kwija omu nsorrokano. Omulingo ogumu Yesu yagarwiremu abakwenda be amaani gwali kubaraaliza kugenda omu rusorrokano. (Mat. 28:10b; 1 Kol. 15:6) Nikyo kimu naitwe kasumi kanu, nitusobora kwekambisa abafukire omu by’omwoyo kwija omu nsorrokano z’ekitebe obubaraaba bataija. Tumanyire ngu nikisobora kwetaagisa kubaraaliza emirundi nyingi kurora baija. Yesu aine kuba yasemeriirwe habw’abegeswa be kwikiriza okuraalizibwa kwe.​—Lengesaniza Matayo 28:16 na Luka 15:6.

17. Tusemeriire kwetwaza tuta kakuba omuntu ow’afukire omu by’omwoyo aija omu nsorrokano?

¹⁷ Batangirre n’okusemererwa. Yesu obuyabatangatangaine abegeswa be akabaletera kwehurra ngu n’aky’abagonza. Omu kiikaro ky’okulinda baije hali uwe, akagenda nambere bali yabaza nabo. (Mat. 28:18) Turakora ki omuntu ow’afukire omu by’omwoyo obw’araija ha Kyombeka ky’Obukama? Niitwe tusemeriire kugenda nambere ali tukamutangirra n’okusemererwa. Nitusobora kubanza kutiina ngu titumanyire ekituramubaliza. Baitu omu mulingo ogutamuleetere kuswara, nitusobora kumugambira ngu tusemeriirwe kumurora.

18. Nitusobora tuta kugarramu amaani abafukire omu by’omwoyo?

¹⁸ Bagarremu amaani. Nikisobora kuba ngu abegeswa ba Yesu bakatekereza ngu tibarukwija kusobora kutebeza omu nsi yoona. Yesu akagumya abahondezi be n’agamba ati: “Ndi  hamu nainywe ebiro byona.” (Mat. 28:20) Ebigambo ebi bikakonyera abegeswa be? Ego. Hanyuma y’obwire buke, bakatandika kwekamba omu ‘kwegesa n’okutebeza.’ (Eng. 5:42) Abatebezi abafukire nibetaaga kugarurwamu amaani. Nibasobora kwehurra nibatiina kwongera kutandika kutebeza. Tubagumye ngu tibarukwija kutebeza bonka. Obubaraaba betekaniize, nitusobora kugenda nabo omu buheereza. Hataro kugurukyagurukya, nibaija kusemererwa habw’okubakonyera kwongera kutandika kutebeza amakuru amarungi. Abafukire omu by’omwoyo obutubatwaza nk’ab’oruganda na banyaanya itwe, nibasobora kwongera kutandika kutebeza kandi bakaletera ekitebe kusemererwa.

19. Kiki ekiturukugonza kukora, kandi habwaki?

¹⁹ Nitwija kugumizaamu kukora omulimo ogw’okutebeza n’okufoora abantu abegeswa kuhikya di? Kuhikya ha mpero y’ensi enu embi. (Mat. 28:20) Turasobora kugumizaamu nitutebeza kandi nitufoora abantu abegesa kuhikya ha mpero? Twehaireyo kugukora! Tuhayo obwire bwaitu, amaani, na sente twegondiize kuserra abo ‘abaine entekereza enungi ey’esobora kubaletera kutunga obwomeezi obutahwaho.’ (Eng. 13:48, NW) Obutukora kinu, tuhondera ekyokurorraho kya Yesu. Akagamba ati: “Ebyokulya byange nukwo kukora ayantumire ebyagonza, nokuhikiriza emirimoye.” (Yoh. 4:34; 17:4) Naitwe, ekyo nikyo turugonza kukora. Nitugonza kumalirra omulimo Yesu y’atuhaire. (Yoh. 20:21) Kandi nitugonza n’abandi otwaliiremu abafukire omu by’omwoyo, kugumizaamu nibakorra hamu naitwe omulimo gunu.​—Mat. 24:13.

20. Kusigikirra ha Abafiripi 4:13, habwaki nitusobora kuhikiriza omulimo Yesu y’aturagiire kukora?

²⁰ Tikyanguhire kukora omulimo Yesu y’aturagiire kukora. Baitu omulimo gunu, titugukora itwenka. Yesu akaraganiza ngu naija kuba naitwe. Obutuba nitukora omulimo ogw’okufoora abantu abegeswa tuba “bakozi hamu na Ruhanga” kandi na Kristo aba naitwe. (1 Kol. 3:9; 2 Kol. 2:17) Nahabweki, omulimo gunu nitusobora kuguhikiriza. Ka mugisa gw’amaani kukora omulimo gunu kandi n’okukonyera n’abandi kugukora!​—Soma Abafiripi 4:13.