NKHANI YAKUSAMBIRA 45
Umo Tingawovwilira Ŵanji Kusungilira Ivyo Khristu Wali Kutiphalira
“Ntheura, lutaninge mukazgore ŵanthu . . . kuŵa ŵasambiri, mukaŵasambizge kusungilira vinthu vyose ivyo namuphalirani.”—MAT. 28:19, 20.
SUMU 89 Pulikirani Mutumbikike
CHILATO CHA NKHANI IYI *
1. Kuyana na Mateyu 28:18-20, kasi Yesu wakaŵaphalira vichi ŵasambiri ŵake?
YESU wati wawuskika ku ŵakufwa, wakawonekera ku ŵasambiri ŵake awo ŵakawungana ku Galileya. Wakaŵa na mazgu ghakuzirwa chomene ghakuti waŵaphalire. Kasi ghakaŵa mazgu wuli? Mazgu ghake tikughasanga pa Mateyu 28:18-20.—Ŵazgani.
2. Kasi tiwonenge mafumbo wuli?
2 Dango la Yesu la kuzgora ŵanthu kuŵa ŵasambiri, likugwiraso ntchito kwa muteŵeti waliyose wa Chiuta mazuŵa ghano. Tiyeni sono tiwone mafumbo ghatatu ghakukhwaskana na mulimo uwo Yesu wali kutipa. Lakwamba, padera pakusambizga ŵanthu awo tikusambira nawo Baibolo ivyo Chiuta wakukhumba, kasi tikwenera kuchitaso vichi? Lachiŵiri, kasi ŵapharazgi wose mu mpingo ŵangawovwirapo wuli kuti awo tikusambira nawo Baibolo ŵakure mwauzimu? Lachitatu, kasi tingawovwira wuli ŵakulopwa kuti ŵambeso kupharazga?
MUKAŴASAMBIZGE KUSUNGILIRA IVYO NAMUPHALIRANI
3. Kasi ni ulongozgi wuli wakudunjika uwo Yesu wakaphalira ŵasambiri ŵake?
3 Ulongozgi wa Yesu ngwakupulikikwa makora. Tikwenera kusambizga ŵanthu vinthu ivyo wakayowoya. Ndipouli, tikwenera yayi kuluwa fundo yakuzirwa. Yesu wakayowoyapo yayi kuti: ‘Mukaŵasambizge vinthu vyose ivyo namuphalirani.’ M’malo mwake wakati: Mukaŵasambizge “kusungilira vinthu vyose ivyo namuphalirani.” Tingalongora kuti tikupulikira ulongozgi wa Yesu uwu, para tikovwira awo tikusambira nawo Baibolo kumanya ivyo ŵakwenera kuchita kweniso umo ŵangalondezgera ivyo ŵakusambira. (Mil. 8:31) Chifukwa wuli tikwenera kuchita nthena?
4. Kasi tingamovwira wuli uyo tikusambira nayo Baibolo kusungilira ivyo Khristu wali kutiphalira? Yowoyani chiyelezgero.
4 Kasi tingamusambizga wuli munthu kusungilira vinthu ivyo Khristu wali kutiphalira? Chiyelezgero chakulondezgapo ichi chingatovwira umo tingachitira. Kasi uyo wakusambizga munthu kwendeska galimoto wakuchita wuli kuti wamusambizge msambiri kusungilira malango gha pa msewu? Chakwamba msambizgi wakumusambizga dankha msambiri malango gha pa msewu mu kilasi. Kweni wakwenera kuchitaso chinthu chinyake kuti wamusambizge umo wangaghalondezgera malango agha. Wakwenera kuluta nayo pa msewu mwakuti para msambiri wakwendeska wamulongozgenge na kumovwira kuti walondezgenge ivyo wangumusambizga mu kilasi. Kasi tikusambirako vichi ku chiyelezgero ichi?
5. (a) Kuyana na Yoh. 14:15 na 1 Yoh. 2:3, kasi ŵasambiri ŵithu ŵa Baibolo tikwenera kuŵasambizga kuti ŵachitenge vichi? (b) Kasi tingaŵaphalirako vichi awo tikusambira nawo Baibolo?
5 Para tikusambizga ŵanji Baibolo, tikuŵasambizga ivyo Chiuta wakukhumba kwa ise. Kweni tikwenera kuchita vinandi. Tikwenera kuwovwira awo tikusambira nawo Baibolo kuti zuŵa na zuŵa ŵalondezgenge ivyo ŵakusambira. (Ŵazgani Yohane 14:15; 1 Yohane 2:3.) Ivyo tikuchita vingawovwira awo tikusambira nawo Baibolo kuti nawo ŵalondezgenge ivyo ŵakusambira mu Baibolo kwali ŵali ku sukulu, ku ntchito panji para ŵakuchita vyakusanguluska. Tingaŵaphalirako ivyo vikatichitikirapo kuti tiŵalongore umo fundo za mu Baibolo zikatovwilira kuti tileke kupwetekeka kweniso kuti tisankhe vinthu mwamahara. Uku msambiri withu walipo, tingamulombera kwa Yehova kuti wamulongozgenge na mzimu wake utuŵa.—Yoh. 16:13.
6. Kasi tikweneraso kuchita vichi para tikusambizga ŵanji kuti ŵasungilirenge malango gha Yesu?
6 Kasi tikweneraso kuchita vichi para tikusambizga ŵanji kuti ŵasungilirenge malango gha Khristu? Tikwenera kovwira ŵasambiri ŵithu ŵa Baibolo kuti nawo ŵaŵe na khumbo lakuchitako mulimo wakuzgora ŵanthu kuŵa ŵasambiri. Ŵasambiri ŵanyake ŵangachita wofi kupharazga. Ntheura tikwenera kuzikira nawo apo tikuŵawovwira kuti ŵalipulikiske makora Baibolo kuti ŵaŵe na chipulikano chakukhora. Ndipo ivi vingawovwira kuti nawo ŵachitepo kanthu. Kasi tingachita wuli kuti tovwire awo tikusambira nawo Baibolo kuti ŵaŵe na khumbo la kupharazga uthenga uwemi?
7. Kasi tingamovwira wuli uyo tikusambira nayo Baibolo kuti waŵe na khumbo la kupharazga makani ghawemi ku ŵanji?
7 Tingafumba msambiri withu wa Baibolo mafumbo nga ni agha: “Kasi umoyo winu wasintha wuli chifukwa chakuti mukulondezga ivyo Baibolo likusambizga? Kasi mukughanaghana kuti ŵanyake nawo ŵakwenera kupulika uthenga wa mu Baibolo uwu? Kasi mungachita vichi kuti muŵawovwire?” (Zinth. 3:27; Mat. 9:37, 38) Mulongorani msambiri winu mathirakiti agho tikupharazgira, ndipo mupemphani kuti wasankhepo ilo wakuwona kuti ŵabali ŵake, ŵabwezi ŵake, panji awo wakugwira nawo ntchito ŵangatemwa kuŵazga. Para wasankhapo, mupani mathirakiti ghanandiko. Mungayezgelera umo wangachitira pakugaŵira ŵanji mathirakiti agha mwaluso. Para msambiri withu waŵa mupharazgi wambura kubatizika, tikwenera kupharazgira nayo lumoza kuti timovwire makora.—Muph. 4:9, 10; Luka 6:40.
UMO MPINGO UNGAWOVWILIRA AWO TIKUSAMBIRA NAWO BAIBOLO
8. Chifukwa wuli awo tikusambira nawo ŵakwenera kutemwa chomene Yehova na ŵazengezgani? (Wonaniso bokosi lakuti “ Umo Tingawovwilira Awo Tikusambira Nawo Baibolo Kuti Ŵatemwenge Chomene Chiuta.”)
8 Kumbukani kuti Yesu wakati tikwenera kusambizga ŵanji “kusungilira vinthu vyose” ivyo wakayowoya. Vinthu ivi vikusazgapo malango ghaŵiri ghakuru chomene. Malango agha ni kutemwa Chiuta kweniso kutemwa ŵazengezgani ŵithu, ndipo ghakukolerana chomene na mulimo wakupharazga na kuzgora ŵanthu kuŵa ŵasambiri. (Mat. 22:37-39) Kasi ghakukolerana wuli? Icho chikutituma kuti tipharazgenge ntchitemwa. Tikupharazga chifukwa chakuti tikutemwa Chiuta kweniso ŵazengezgani ŵithu. Mbunenesko kuti ŵasambiri ŵanyake ŵangaŵa na wofi kupharazgira ŵanji. Kweni tingaŵasimikizgira kuti Yehova waŵawovwirenge ndipo mwapachokopachoko nawo ŵalekenge kopa ŵanthu. (Sal. 18:1-3; Zinth. 29:25) Bokosi la mu nkhani iyi likulongosora ivyo tingachita kuti tovwire msambiri withu kutemwa chomene Chiuta. Kweni kasi mpingo ungachitaso vichi kuti uwovwire awo tikusambira nawo kutemwa chomene Yehova?
9. Mu chiyelezgero cha munthu uyo wakusambira kwendeska galimoto, kasi msambiri wangasambira wuli vinthu vyakuzirwa?
9 Ghanaghaniraniso chiyelezgero cha munthu uyo wakusambira galimoto. Apo wakwendeska galimoto uku msambizgi wake walipo, kasi ni nthowa wuli izo wangasambilira? Wakwenera kutegherezga kwa msambizgi wake na kuwona umo madilayivara ghanyake ghakuchitira. Mwachiyelezgero, msambizgi wake wangamulongora umo dilayivala munyake wakupelekera m’pata kwa dilayivala munyake kuti wadangire. Panji wangamulongora dilayivala uyo wachepeskako ungweru wa nyali za galimoto kuti ŵanyake ŵawonenge makora ndipo msambizgi wangamuchiska kuti ndimo nayo wachitirenge. Viyelezgero ivi vingamovwira uyo wakusambira galimoto kusambira vinthu vyakuzirwa ivyo vingamovwira para wakwendeska.
10. Kasi ni vichi vingawovwira msambiri wa Baibolo kukura mwauzimu?
10 Mwakuyana waka, msambiri wa Baibolo uyo wamba kuteŵetera Yehova, wakusambira kufuma kwa msambizgi wake pera yayi kweniso ku ŵateŵeti ŵa Yehova awo ni viyelezgero viwemi. Ipo kasi ntchivichi chingamovwira chomene uyo wakusambira Baibolo kuti wakulenge mwauzimu? Ni maungano gha mpingo. Chifukwa wuli? Ivyo wazamupulika pa maungano vingamovwira kumanya vinandi, kukhozga chipulikano chake, kweniso kwamba kutemwa chomene Chiuta. (Mil. 15:30-32) Kweniso ku maungano, msambizgi wangawovwira msambiri kumanyana na ŵabali na ŵadumbu awo ŵangaŵa kuti ŵali kukumanapo na vinthu ivyo msambiri uyu wakukumana navyo. Ndipo msambiri wawonengeso chiyelezgero chiwemi cha ŵabali na ŵadumbu awo ŵakulongorana chitemwa mu mpingo. Ghanaghanirani viyelezgero ivi.
11. Kasi msambiri wa Baibolo wangawona vichi mu mpingo, ndipo vingamovwira wuli?
11 Msambiri wa Baibolo uyo wakulera yekha mwana wakuwona mudumbu munyake uyoso wakulera yekha mwana. Msambiri wa Baibolo vikumukhwaska chomene mumtima para wakughanaghanira kuyezgayezga uko mudumbu uyu wakuchita kuti wizenge ku Nyumba ya Ufumu nyengo zose na mwana wake. Msambiri wa Baibolo uyo vikumusuzga kuleka kukhweŵa hona, wamanyana na mubali uyo wali kutonda suzgo la kukhweŵa hona. Ndipo mubali uyu wakumuphalira umo kutemwa Yehova kukamovwilira kupulikira malango ghake. (2 Kor. 7:1; Fil. 4:13) Mubali uyu wati wayowoya umo wakalekera kukhweŵa, wakuphalira msambiri kuti: “Naweso ungaleka kukhweŵa.” Msambiri uyu wakhozgeka ndipo nayo wakugomezga kuti wangaleka kukhweŵa. Msungwana uyo wakusambira Baibolo, wakuwona mudumbu uyo ni msungwana kuti wakukondwa na umoyo wake pakuŵa Kaboni. Ndipo msambiri uyu wati wawona umo mudumbu msungwana uyu wakukondwera, wakukhumba kumanya chifukwa icho mudumbu uyu wakukondwera nthena.
12. Chifukwa wuli tingayowoya kuti waliyose mu mpingo wangawovwira awo tikusambira nawo Baibolo?
12 Para msambiri wamanyana na ŵapharazgi ŵakugomezgeka ŵakupambanapambana, wakusambirako umo wangachitira kuti wasungilire dango la Khristu la kutemwa Chiuta na ŵazengezgani. (Yoh. 13:35; 1 Tim. 4:12) Nga umo tasambilira kale, msambiri wa Baibolo wangasambirako ku ŵabali na ŵadumbu awo ŵali kukumanapo na masuzgo agho nayo wakukumana nagho. Msambiri wakusambirako ku ŵanthu aŵa ndipo wakusintha apo pakukhumbikwira kuti waŵe msambiri wa Khristu. (Doto. 30:11) Waliyose mu mpingo wangawovwirapo kuti awo tikusambira nawo Baibolo ŵakure mwauzimu. (Mat. 5:16) Kasi imwe pamwekha mukuchitapo vichi kuti movwire awo tikusambira nawo Baibolo awo ŵakuwungana?
KOVWIRA ŴAKULOPWA KUTI ŴAMBESO KUPHARAZGA
13-14. Kasi Yesu wakachita wuli na ŵapositole ŵake ŵakati ŵagongowa?
13 Tikwenera kovwira ŵabali na ŵadumbu ŵithu awo ŵali kulopwa kuti ŵambeso kuchitako mulimo uwo Khristu wali kutituma wakuzgora ŵanthu kuŵa ŵasambiri. Umo Yesu wakachitira na ŵapositole ŵake awo nawo ŵakagongowa, vikutovwira umo nase tingachitira mazuŵa ghano.
14 Yesu wati wakhala pachoko waka kukomeka, ŵapositole “wose ŵakamuleka na kuchimbira.” (Mrk. 14:50; Yoh. 16:32) Kasi Yesu wakachita nawo wuli ŵapositole ŵake? Wati wawuskika waka, Yesu wakaphalira ŵalondezgi ŵake kuti: “Kopa chara! Lutani mukaphalire ŵabali ŵane [kuti nawuskika ku ŵakufwa].” (Mat. 28:10a) Yesu wakaŵakana yayi ŵapositole ŵake. Nangauli ŵakamuleka, kweni iyo wakalutilira kuŵachema kuti “ŵabali ŵane.” Nga ni Yehova, Yesu nayo wakaŵa walusungu na wakugowokera.—2 Mathe. 13:23.
15. Kasi tikujipulika wuli na awo ŵali kuleka kupharazga?
15 Mwakuyana waka, nase tikuŵafipira mtima chomene awo ŵali kuleka kupharazga. Mbabali na ŵadumbu ŵithu ndipo tikuŵatemwa chomene. Tichali kukumbuka kulimbikira uko ŵabali na ŵadumbu aŵa ŵakachitanga pakuteŵetera Yehova, ndipo ŵanyake ŵakamuteŵetera Yehova vyaka vinandi. (Heb. 6:10) Ndipo tikuŵasoŵa chomene. (Luka 15:4-7) Pakuti tikuyezga Yesu, kasi tingalongora wuli kuti tikuŵafipira mtima?
16. Kasi tingalongora wuli kuti tikuŵafipira mtima ŵabali na ŵadumbu ŵithu awo ŵali kulopwa?
16 Ŵachemeraniko ku maungano. Nthowa yimoza iyo Yesu wakaŵakhozgera ŵapositole ŵake awo ŵakagongowa njakuti wakaŵachema kuti wakumane nawo. (Mat. 28:10b; 1 Kor. 15:6) Mwakuyana waka, nase mazuŵa ghano awo ŵali kulopwa tingaŵachemerako ku maungano gha mpingo. Tikumanya kuti tingakhumbikwira kuŵachemerako kanandi waka kuti ŵize ku maungano. Tikukayika yayi kuti Yesu wakakondwa chomene kuti ŵapositole ŵake ŵakazomera ntchemo yake.—Yaniskani na Mateyu 28:16 na Luka 15:6.
17. Kasi tikwenera kuchita wuli para wakulopwa wiza ku maungano?
17 Ŵapokelerani na mtima wose. Yesu wakapangiska ŵasambiri ŵake kujipulika kuti ŵapokelereka apo ŵakakumana nayo. Wakalindilira kuti iwo ndiwo ŵize kwa iyo yayi, kweni iyo ndiyo wakaluta kwa iwo na kuyowoya nawo. (Mat. 28:18) Kasi nase tikwenera kuchita wuli para wakulopwa wafika pa Nyumba ya Ufumu? Tikwenera kuchitapo kanthu ndise na kumupokelera na mtima wose. Pakwamba tingafipa mtima kuti tingasoŵa chakuyowoya. Kweni tingamuphalira waka kuti takondwa chomene kumuwonaso. Tikwenera kuchita nthena mwambura kumukhozga soni.
18. Kasi tingaŵakhozga wuli ŵakulopwa?
18 Ŵakhozgani. Ŵasambiri ŵa Yesu ŵakwenera kuti ŵakaghanaghananga kuti ŵangafiska yayi kupharazga pa charu chose. Kweni Yesu wakaŵakhozga ŵalondezgi ŵake pakuŵaphalira kuti: “Ine nili namwe mazuŵa ghose.” (Mateyu 28:20) Kasi ivi vikaŵawovwira ŵasambiri ŵake? Enya. Nyengo yichoko waka yikati yajumphapo ŵakamba kutangwanika chomene “kusambizga na kupharazga makani ghawemi.” (Mil. 5:42) Ŵakulopwa nawo tikwenera kuŵakhozga. Nyengo zinyake ŵangachita wofi kwambaso kupharazga. Tingaŵakhozga na kuŵaphalira kuti ŵapharazgenge ŵekha yayi. Para mbakunozgeka tinganjira nawo lumoza mu upharazgi. Tikukayika yayi kuti ŵangawonga chomene chifukwa cha kuŵawovwira kuti ŵambeso kupharazga makani ghawemi. Para tikulongora kuti tikuŵaghanaghanira ŵabali na ŵadumbu ŵithu ŵakulopwa, ŵangayambaso kulimbikira ndipo mpingo wose ungaŵa wakukondwa.
TIKUKHUMBA KUFISKA MULIMO UWO YESU WAKATIPA
19. Kasi nase tikukhumba vichi, ndipo chifukwa wuli?
19 Kasi tilutilirenge kupharazga na kuzgora ŵanthu kuŵa ŵasambiri m’paka pawuli? M’paka umaliro wa charu ichi. (Mat. 28:20) Kasi tifiskenge mulimo wakupharazga na kuzgora ŵanthu kuŵa ŵasambiri m’paka nyengo iyo? Enya, taŵikapo mtima kuchita nthena. Mwambura kuchichizgika, tikupeleka nyengo yithu, nkhongono zithu na chuma chithu kuti tisange awo ŵali na “maghanoghano ghakwenelera umoyo wamuyirayira.” (Mil. 13:48) Para tikuchita nthena ndikuti tikulondezga chiyelezgero cha Yesu. Iyo wakati: “Chakurya chane ntchakuti nichite khumbo la uyo wakanituma na kufiska mulimo wake.” (Yoh. 4:34; 17:4) Ivi ndivyo nase tikukhumba. Tikukhumba kufiska mulimo uwo Yesu wali kutipa. (Yoh. 20:21) Ndipo tikukhumbaso ŵanji, kusazgapo ŵakulopwa, kuti tilutilire kuchita mulimo uwu.—Mat. 24:13.
20. Kuyana na Ŵafilipi 4:13, kasi ntchivichi chingatovwira kufiska mulimo uwo Yesu wali kutipa?
20 Ntchipusu yayi kuchita ivyo Yesu wakatiphalira. Nangauli vili nthena, kweni mulimo uwu tikuchita tekha yayi. Yesu wakalayizga kuti waŵenge nase. Para tikuchitako mulimo wa kuzgora ŵanthu kuŵa ŵasambiri, tikuŵa “ŵantchito ŵanyake na Chiuta” kweniso tikuŵa pamoza na Yesu. (1 Kor. 3:9; 2 Kor. 2:17) Ntheura tingafiska nadi mulimo uwu. Ni mwaŵi wapadera chomene kuchitako mulimo uwu na kovwira ŵanji kuti nawo ŵachitengeko.—Ŵazgani Ŵafilipi 4:13.
SUMU 79 Ŵawovwirani Kuti Ŵatchinthe
^ ndime 5 Yesu wakaphalira ŵasambiri ŵake kuti ŵakazgore ŵanthu kuŵa ŵasambiri na kuŵasambizga kusungilira vinthu vyose ivyo wakaŵaphalira. Nkhani iyi yitovwirenge umo tingalondezgera ivyo Yesu wakayowoya. Nkhani iyi yikukolerana chomene na nkhani iyo yili mu Gongwe la Mulinda la Julayi 1, 2004 peji 25-29.
^ ndime 66 MAZGU GHAKULONGOSORA CHITHUZI: Mudumbu uyo wakuchitiska sambiro la Baibolo wakulongosora ivyo msambiri wakwenera kuchita kuti wakuzge chitemwa chake pa Chiuta. Pamanyuma, msambiri wakulondezga masachizgo ghatatu agho ŵangudumbiskana na msambizgi wake.
