1. E ‵tusa mo te Mataio 28:18-20, se a te fakatonuga ne fai atu ne Iesu ki ana soko?

I TE otiga ne fakatu a Iesu mai te mate, ne fakasae atu a ia ki ana soko kolā ne maopoopo i Kalilaia. E isi se mea tāua e fia fakailoa ne ia ki a latou. Se a? E maua ana pati i te Mataio 28:18-20.—Faitau.

2. Ne a fesili ka sau‵tala tatou ki ei?

² A te fakatonuga a Iesu ke fai a soko e aoga foki ki tavini taki tokotasi a te Atua i aso nei. Tela la, ke onoono tatou ki fesili e tolu e uiga ki te galuega telā ne tuku mai ne Iesu ki a tatou. Muamua la, i tafa o te akoako atu ki soko ‵fou a mea kolā e manako te Atua ke fai ne latou, se a te mea e ‵tau o fai ne tatou? Te lua, e fesoasoani atu pefea a tino talai katoa i te fakapotopotoga ke ga‵solo ki mua a tino a‵koga i te feitu faka-te-agaga? Te tolu, e fesoasoani atu pefea tatou ki taina mo tuagane kolā ko ‵mate faka-te-agaga ke mafai o toe ‵kau mai ki te galuega ko te faiga o soko?

3. Se a te mea tāua ne faka‵mafa ne Iesu i tena fakatonuga?

³ E manino ‵lei a fakatonuga a Iesu. E ‵tau o akoako ne tatou ki tino a mea ne fakatonu mai ne ia. Kae e se ‵tau o puli i a tatou se manatu tāua. Ne seki fai mai a Iesu: ‘Akoako latou ki mea katoa ne fakatonu atu ne au ki a koutou.’ Kae ne fai mai a ia: Akoako latou “ke faka‵logo ki mea katoa ne fakatonu atu ne au ki a koutou.” Ke fakagalue aka te fakatonuga tenā i te akoakoatuga o se tino akoga ki te Tusi Tapu, e se ‵tau fua o fai tatou pelā me ne faiakoga kae ‵tau foki o fakaasi atu ne tatou te auala ke fai ei. (Galu. 8:31) Kaia e ‵tau ei o fai penā?

4. Fakamatala mai te auala e mafai o akoako ne tatou se tino akoga ki te Tusi Tapu ke fakalogo ki fakatonuga a Keliso.

 ⁴ E akoako pefea ne tatou se tino ke “fakalogo” ki mea ne fakatonu mai ne Keliso? Ka fesoasoani mai te fakaakoakoga tenei ke malamalama tatou i mea kolā e ‵tau o fai. E akoako pefea ne se faiakoga o tino fakatele‵tele ana tama‵liki a‵koga ke faka‵logo ki tulafono o te auala? Te mea muamua kāti ka akoako ne te faiakoga a tulafono katoa o te auala ki ana tamaliki a‵koga. Kae e isi se suā mea e ‵tau o fai ne ia ko te mea ke akoako ana tama‵liki a‵koga ki te auala ke faka‵logo ki tulafono konā. E ‵tau o olo fakatasi a ia mo tama‵liki a‵koga kae fakaasi ki a latou a mea e ‵tau o fai māfai ko ‵tele i te auala, ko te mea ke fakagalue olotou mea ne tauloto. Ne a mea e mafai o tauloto ne tatou mai te fakaakoakoga tenā?

5. (a) E ‵tusa mo te Ioane 14:15 mo te 1 Ioane 2:3, ne a mea e ‵tau o akoako ne tatou ki ‵tou tino a‵koga ke fai ne latou? (e) Taku mai ne fakaakoakoga ki te auala e mafai o takitaki ne koe au tino a‵koga.

⁵ Kafai ko suke‵suke tatou ki te Tusi Tapu mo nisi tino, e akoako ne tatou ki a latou a mea e manako te Atua ke fai ne tatou katoa. Kae e isi foki ne nisi mea e ‵tau o fai. E ‵tau o akoako ne tatou ki ‵tou tino a‵koga ke fakagalue ne latou i olotou olaga i aso takitasi olotou mea ne tauloto. (Faitau te Ioane 14:15; 1 Ioane 2:3.) E auala i ‵tou mea e fai, e mafai o fakaasi atu ne tatou ki ‵tou tino a‵koga a te auala ke fakagalue aka a nisi mea kolā ne tauloto ne latou mai te Tusi Tapu i te akoga, i te galuega io me i taimi o fakafiafiaga. E mafai o fakamatala atu se tala ki se mea ne tupu i ‵tou olaga ke fakaasi atu ki a latou te auala ne aoga ei a fakatakitakiga mai te Tusi Tapu ke puipui ei koe mai mea fakama‵taku, io me ko te auala ne fesoasoani atu ki a koe ke fai ne koe se fakaikuga poto. Kafai e ‵kau fakatasi tatou mo ‵tou tino a‵koga, e mafai o ‵talo tatou ki a Ieova ke takitaki ne tena agaga tapu a ‵tou tino a‵koga.—Ioa. 16:13.

6. Ne a mea e aofia i te akoakoga o nisi tino ke faka‵logo ki fakatonuga a Iesu?

⁶ Ne a mea e aofia i te akoakoga o nisi tino ke faka‵logo ki fakatonuga a Iesu? E ‵tau o fesoasoani tatou ki ‵tou tino a‵koga ke ati aka i a latou a te manakoga ke fai a soko. Nisi tino a‵koga e ma‵taku māfai e ‵kau ki te galuega talai. Tela la, e ‵tau o kufaki tatou i te taimi e akoako ei latou ke malamalama faka‵lei i muna‵tonu mai te Tusi Tapu kolā ka mafai o fakamalosi ei te lotou fakatuanaki, tenā ko otia ei olotou loto kae fai ei latou ke olo atu o talai. Ne a ‵tou mea e mafai o fai ke fesoasoani atu ki tino a‵koga ke ati aka i a latou a te manakoga ke talai te tala ‵lei ki nisi tino?

7. E fesoasoani atu pefea tatou ki se tino akoga ke ati aka ne ia te manakoga ke talai te tala ‵lei ki nisi tino?

⁷ E mafai o fesili atu ne tatou a vaegā fesili penei ki ‵tou tino a‵koga: “Ne ‵fuli pefea ne te taliaga ne koe a te fekau o te Malo, a tou olaga ke tai ‵lei atu? E mata, e mafaufau koe me e ‵tau foki o lagona ne nisi tino a te fekau tenei? Ne a au mea e mafai o fai ke fesoasoani atu ki a latou?” (Faata. 3:27; Mata. 9:37, 38) Fakaasi atu a tamā pepa mai te ‵tou Pusa o Mea Faigaluega mō Fai Akoakoga kae tuku ke fili ne ia a mea kolā e mafaufau a ia me ka fia‵fia ki ei ana kāiga, taugasoa io me ko tino e ga‵lue tasi mo ia. Tuku atu ki te tino akoga a tamā pepa konei. Ke fakaakoako ki te auala ke ofo atu a tamā pepa i se auala apo. Kafai ko talia a te ‵tou tino akoga ke fai pelā me se tino talai seki papatiso, ka fia ga‵lue eiloa tatou fakatasi mo ia i te galuega talai ke fesoasoani atu ki a ia.—Fai. 4:9, 10; Luka 6:40.

8. Kaia e tāua ei ke ati aka ne ‵tou tino a‵koga se alofa telā e malosi ki te Atua mo tuakoi? (Onoono foki ki te pokisi “ Te Auala ke Faka‵poko ne ‵Tou Tino A‵koga te Lotou A‵lofa ki te Atua.”)

⁸ Ke masaua, me ne fakatonu mai a Iesu ki a tatou ke akoako a nisi tino “ke faka‵logo ki mea  katoa” ne fakatonu mai ne ia. E aofia i ei a tulafono sili e lua, ko te alofa ki te Atua mo te alofa ki tuakoi, kae ko mea e lua konā e isi se lā sokoga ki te faiga o te galuega talai mo te faiga o soko. (Mata. 22:37-39) Se a te sokoga i ei? A te pogai tāua e ‵kau atu ei tatou ki te galuega talai ko te alofa—ko te ‵tou a‵lofa ki te Atua mo te ‵tou a‵lofa ki tuakoi. E maina tatou me i nisi tino a‵koga e ma‵taku māfai e mafaufau ke olo i te galuega talai. E mafai o fakamaoni ne tatou ki tino a‵koga konā me mai te fesoasoani o Ieova ka mafai eiloa ne latou o manumalo i te mataku ki tino. (Sala. 18:1-3; Faata. 29:25) A te pokisi i te mataupu tenei ka fakamatala mai ei a mea kolā e mafai o fai ne tatou ke fesoasoani ki ‵tou tino a‵koga ke gasolo o a‵lofa malosi ki te Atua. I tafa i ei, ne a mea e mafai o fai ne te fakapotopotoga ke fesoasoani atu ki soko ‵fou ke momea aka te lasi o te lotou a‵lofa?

9. I te fakaakoakoga o te tamaliki akoga telā e fakaakoako ke fakateletele, i te auala fea e tauloto ei ne ia a akoakoga tāua?

⁹ Toe mafaufau ki te fakaakoakoga o te tamaliki akoga telā e fakaakoako o fakateletele. I te taimi e ‵tele fakatasi a ia mo tena faiakoga telā e sagasaga i ana feitu i se motoka, e tauloto pefea a te tamaliki akoga i te taimi tenā? Mai te fakalogologo ki tena faiakoga mo te kilokilo atu ki nisi tino fakatele‵tele. E pelā me se fakaakoakoga, e mafai o fakasino atu a te faiakoga ki te suā tino fakateletele telā e tuku ne ia te avanoaga ki te suā tino ke mafai o tele i ana mua. Io me fakasino atu a ia ki se tino fakateletele telā e fakaasi ne ia te āva mai te tuku ifo te ‵ka o ana moli ke mo a ma faka‵segi ne ia a mata o nisi tino fakatele‵tele. A vaegā fakaakoakoga penā e tāua ‵ki eiloa ki te tamaliki akoga ke fakagalue ne ia i te taimi e fakateletele ei a ia.

10. Ne a mea ka fesoasoani atu ki se tino akoga faka-te-Tusi Tapu ke gasolo ki mua i te feitu faka-te-agaga?

¹⁰ I se auala tai ‵pau, a te tino akoga ki te Tusi Tapu telā ko kamata o faimalaga i te auala ki te ola, e se tauloto fua ne ia a mea mai tena faiakoga kae penā foki loa mai i nisi tavini a Ieova kolā e fai pelā me ne fakaakoakoga ‵lei. Tela la, se a te mea ka fesoasoani atu ki tino a‵koga ke ga‵solo ki mua i te feitu faka-te-agaga? Ko te ‵kau atu ki ‵tou fakatasiga Kelisiano. Kaia? A fakatonuga faka-te-Tusi Tapu kolā e maua i fakatasiga ka fai ei ke lasi te lotou iloa, fakamalosi ei te lotou fakatuanaki, kae fai ei ke gasolo o lasi te lotou a‵lofa ki te Atua. (Galu. 15:30-32) E se gata i ei, e mafai foki ne te faiakoga o fakamasani te tino akoga ki taina mo tuagane kolā e tai ‵pau a mea e fia‵fia latou ki ei. Ne a fakaakoakoga ‵lei o te alofa faka-Kelisiano e mafai o lavea ne te tino akoga i te fakapotopotoga? Ke mafau‵fau ki tala konei.

11. Ne a fakaakoakoga e mafai o lavea ne se tino akoga i loto i te fakapotopotoga, kae mafai o aoga pefea a mea konā ki se tino akoga?

¹¹ A te tino akoga ki te Tusi Tapu telā se mātua e seai sena avaga e kilokilo atu ki se tuagane Kelisiano telā e ‵pau a lā tulaga. E otia te loto o te tino akoga ma kilo atu ki te uke o taumafaiga e fai ne te tuagane ke ‵mai ki te Fale Tapuaki mo ana tama‵liki fo‵liki. A te tino akoga telā e taumafai o ‵kati tena ‵pusi e fakamasani mo se tino talai telā ne fepaki foki mo se tulaga faigata penā kae ne manumalo i ei. E fakamatala atu ne te tino talai ki te tino akoga a te auala ne fakamalosi aka ei a ia ne tena alofa ki a Ieova ke fakalogo a ia ki fakatonuga a te Atua. (2 Koli. 7:1; Fili. 4:13) I te otiga ne fakalogologo ki te tala a te tino talai, ko maua ne te tino akoga a te loto malosi i te taimi ne fai atu ei a te taina ki a ia, “E mafai foki ne koe o ‵kati tau ‵pusi.” E lavea ne se tino akoga telā se tamafine, a se tuagane talavou telā e fiafia malosi ki tena olaga e pelā me se Molimau. A te fiafia o te tuagane talavou telā ne lavea ne te tino akoga ki te Tusi Tapu, ne fakamalosi atu ki tou fafine ke fia iloa ne ia a mea e uke atu ki te pogai e fiafia faeloa ei te tuagane tenei.

12. Kaia e fai atu ei tatou me i tino taki tokotasi i te fakapotopotoga e isi se lotou tiute ke fesoasoani ki tino a‵koga ki te Tusi Tapu?

 ¹² Kafai ko masani se tino akoga ki tino talai fakamaoni e tokouke, ka mafai o tauloto ne te tino akoga mai fakaakoakoga a latou a te uiga o te fakalogo ki te tulafono a Keliso ke a‵lofa ki te Atua mo tuakoi. (Ioa. 13:35; 1 Timo. 4:12) E se gata i ei, e pelā mo mea ne ‵sae mai muamua, e mafai o tauloto ne se tino akoga a mea aoga mai i tino talai kolā ne fe‵paki mo tulaga faiga‵ta e tai ‵pau mo mea ne fepaki mo ia. Mai fakaakoakoga a tino konei, ko iloa ei ne te tino akoga me mafai eiloa o fai ne ia a ‵fuliga ke mafai o fai a ia e pelā me se soko o Keliso. (Teu. 30:11) E mafai o fesoasoani a tino katoa i te fakapotopotoga i auala kese‵kese, ke ga‵solo ki mua a tino a‵koga i te feitu faka-te-agaga. (Mata. 5:16) Ne a taumafaiga totino e fai ne koe ke fakamalosi atu ki tino a‵koga kolā e ‵mai ki fakatasiga?

13-14. Ne a mea ne fai ne Iesu ki ana apositolo kolā ne loto vāi‵vai?

¹³ E ma‵nako tatou o fesoasoani ki ‵tou taina mo tuagane kolā ko ‵mate faka-te-agaga ke mafai o toe ‵kau mai ki te galuega talai kae ke fai a soko. A faifaiga ne fai ne Iesu ki ana apositolo kolā ne loto vāi‵vai e fakaasi mai i ei a mea kolā e mafai ne tatou o fai i aso nei.

¹⁴ I te fakaotiga o te galuega talai a Iesu i te lalolagi kae ko pili fua a ia o mate, ne tiaki a ia ne te kau apositolo “kae ‵tele kea‵tea.” (Male. 14:50; Ioa. 16:32) Ne a mea ne fai ne Iesu i te taimi ne loto vāi‵vai ei ana apositolo? Mai tua malie o tena fakatuakaga ne fai atu a Iesu ki ana nisi soko: “Sa ma‵taku! Olo o fakailoa atu ki oku taina [i a au ko oti ne toetu].” (Mata. 28:10a) Ne seki ‵fiu a Iesu i ana apositolo. Faitalia eiloa me ne tiaki ne latou a ia, ne taku faeloa ne ia a latou me ko “oku taina.” E pelā mo Ieova, ne loto alofa a Iesu kae fakamagalo ne ia a latou.—2 Tupu 13:23.

15. E pefea ‵tou lagonaga ki a latou kolā ko se ‵kau ki te galuega talai?

¹⁵ E a‵lofa malosi foki tatou ki a latou kolā ko se ‵kau mai sāle ki te galuega talai. A latou ko ‵tou taina mo tuagane kae e a‵lofa tatou ki a latou! Koi masaua ne tatou a galuega e uke ne fai ne taina tali‵tonu konā i aso mua—kāti a nisi ne ga‵lue malosi i tausaga e uke. (Epe. 6:10) Ko misi malosi ne tatou a latou! (Luka 15:4-7) Ne a auala e mafai o fakaasi atu ne tatou te ‵tou a‵lofa ki a latou e pelā mo Iesu?

16. E fakaasi atu pefea ne tatou a te ‵tou a‵lofa ki ‵tou taina mo tuagane kolā ko ‵mate faka-te-agaga?

¹⁶ ‵Kami mai latou. Te auala e tasi ne fakamalosi ne Iesu ana soko kolā ne loto vāi‵vai ko te ‵kami mai a latou ki se fakatasiga. (Mata. 28:10e; 1 Koli. 15:6) E penā foki i aso nei, e mafai o fakamalosi ne tatou a taina mo tuagane kolā ko ‵mate faka-te-agaga ke ‵kau ki fakatasiga a te fakapotopotoga. Kāti e manakogina ke ‵kami fakafia atu latou koi tuai o ‵kau mai. E mautinoa me ne fiafia eiloa a Iesu me ne talia ne ana soko a tena ‵kamiga.—Fakatusa ki te Mataio 28:16 mo te Luka 15:6.

17. Ne a ‵tou mea e mafai o fai māfai ko sae mai ki se fakatasiga se tino ko mate faka-te-agaga?

¹⁷ Ke talia ne koe latou mo te loto fia‵fia. Ne talia ne Iesu ana soko i te taimi ne fetaui ei latou; ko ia ne mua o faipati atu ki a latou. (Mata. 28:18) Ne a ‵tou mea ka fai māfai ko sae mai se tino ko mate faka-te-agaga ki te Fale Tapuaki? E ‵tau mo tatou o ga‵sue muamua o fakatalofa atu ki a ia. Muamua la, kāti ka manava‵se tatou me ne a ‵tou pati ka fai atu. I lō te fakamasiasi atu ki a ia, e mafai o fakaasi atu ne tatou a te ‵tou fia‵fia ke toe fetaui mo ia.

18. E mafai pefea o fakamalosi atu tatou ki tino talai kolā ko ‵mate faka-te-agaga?

¹⁸ Fakamalosi atu latou. Kāti ne manava‵se malosi a soko o Iesu i te fakatonuga ke talai atu latou  ki te lalolagi kātoa. Ne fakamalosi atu a Iesu ki ana soko i ana pati: “Au e fakatasi faeloa mo koutou i aso katoa.” (Mata. 28:20) E mata, ne aoga te mea tenā ki ana soko? Ao. E seki leva kae ne fakalave‵lave malosi latou “i te akoako mo te folafola atu . . . a te tala ‵lei.” (Galu. 5:42) E ma‵nako foki a tino talai kolā ko ‵mate faka-te-agaga ki ne fakamalosiga. Kāti e manava‵se latou māfai e mafau‵fau ke toe olo o talai. Ke fakamalosi atu ki a latou me ka se talai a latou i a latou eiloa. Kafai ko toka latou e mafai o ga‵lue fakatasi tatou mo latou i te galuega talai. E mautinoa me ka fia‵fia eiloa latou ki te ‵tou fesoasoani māfai ko kamata latou o toe olo atu i te galuega talai. Kafai e ‵kilo atu tatou ki a latou e pelā me ko ‵tou taina mo tuagane ka lavea eiloa ne tatou a ikuga ‵gali i te ‵tou fakapotopotoga.

19. Se a te manakoga tonu o tatou, kae kaia?

¹⁹ Ko te taimi fea ka palele atu ei te galuega ko te faiga o soko? Ke oko eiloa ki te gataga o te olaga tenei. (Mata. 28:20; onoono ki te Fakamatalaga o Pati, “Gataga o te olaga tenei.”) E mata, e mafai o fakataunu ne tatou te vaega o te fakatonuga a Iesu tenei? E ma‵nako eiloa tatou ke fai penā! E fia‵fia eiloa tatou o tuku atu a ‵tou taimi, ‵tou malosi mo ‵tou kope ke ‵sala ki tino kolā “e ‵tau o maua . . . te ola se-gata-mai.” (Galu. 13:48) Kafai e fai ne tatou te mea tenei, ko tau‵tali tatou ki te fakaakoakoga a Iesu. Ne fai mai a ia: “A taku meakai ko te faiga o te loto o ia telā ne uga mai ne ia au kae ke fakaoti foki tena galuega.” (Ioa. 4:34; 17:4) Tenā eiloa te manakoga tonu o tatou. E ma‵nako tatou o fakaoti te galuega ne tuku mai ki a tatou. (Ioa. 20:21) Kae e ma‵nako foki tatou ko nisi tino, e aofia ei a latou kolā ko ‵mate faka-te-agaga, ke kufaki i te faiga o te galuega tenei fakatasi mo tatou.—Mata. 24:13.

20. E ‵tusa mo te Filipi 4:13, kaia e mafai ei o fakataunu ne tatou te galuega ne fakatonu mai ne Iesu ke fai ne tatou?

²⁰ E sē se mea faigofie ke fakataunu a te fakatonuga ne tuku mai ne Iesu. Kae e se fai ne tatou a te galuega tenei i a tatou eiloa. Ne tauto mai a Iesu me ka ‵kau fakatasi mai a ia ki a tatou. Kafai e fai ne tatou a soko, ko fai tatou pelā me ko “tino ga‵lue a te Atua” kae “‵kau fakatasi mo Keliso.” (1 Koli. 3:9; 2 Koli. 2:17) Tela la, e mafai eiloa o fakataunu ne tatou. Se tauliaga gali eiloa kae se mea fakafiafia foki ke fai ne tatou te galuega tenei kae fesoasoani atu ki nisi tino ke fai foki penā!—Faitau te Filipi 4:13.