MUSORO WE KUFUNDA 45
Betserai Anhu Kuti Acengete Mitemo ya Kristu
“Hino, endai, mooita afundi . . . , meciafundisa kucengeta zvese zvandakamufundisai.”—MT. 28:19, 20.
NGOMA 89 Purutanai, Mozviita Kuti Mukomborerhwe
ZVATICAFUNDA *
1. Maererano no bhuku ra Mateu 28:18-20, Djesu akapasa mutemo upi?
MU MASURE, mekuti Djesu amutswa kuakafa, iyena akadzipangidza ku afundi ake ainga akaungana ku Garireya. Iyena wainga ano masoko anokosha e kuti arekete nawo. Aida kureketei? Masoko aaida kureketa, tinoagumira pana Mateu 28:18-20.—Erengai.
2. Mibvunzo dzipi dzaticaona?
2 Mutemo wa Djesu we kuita afundi, unoseenzawo kune umwe na umwe we aseenzi a Mwari e mazuwa ano. Ngo kudaro, ngationei mibvunzo dzinokwana kuita mitatu dzakaringana no basa ratakapaswa na Djesu. Wokutanga, pane kufundisa basi zvinodiwa na Mwari kuafundi apsva, ngazvipi zvatinodikana kuita? Wecipiri, aparidzi ese e mu ungano angabetsera kudini afundi e Bhaibheri kuti akure pakunamata? Wecitatu, tingabetsera kudini hama no hanzvadzi dzedu dzakasiya kuparidzira kuti dzitange kuitazve basa iri rekuita afundi?
AFUNDISEI KUCENGETA MITEMO YA KRISTU
3. I nhumgamiriro dzipi dzakabatanidzwa na Djesu paaipasa mitemo?
3 Mitemo ya Djesu yakadjeka. Tinodikana kufundisa anhu zviro zvese zvaakatibvunza kuti tiite. Ngo kudaro, atidikani kusiya ciro cimwe cinokosha. Djesu aazi kubhuya kuti: ‘Meciafundisa zviro zvese zvandakamufundisai.’ Iyena wakati: Afundisei “kuti acengete zviro zvese zvandakamufundisai.” Kuti tiseenzese mutemo uu patinofundisa mufundi we Bhaibheri, atidikani kungogara mufundisi basi, asi tinodikanawo kugara mutungamiriri. (Zvi. 8:31) Ngei tecidikana kudaro?
4. Zvinoreyei kucengeta mitemo? Pasai miezaniso.
4 “Kucengeta” mitemo kunoreya kuutondowedza. Ngationei muezaniso ungatibetsera kuona kuti tingafundisa kudini munhu kuti acengete kana kuti atondowedze zviro zvatakabvunzwa na Kristu kuti tiite, rangarirai ngezve muezaniso uu. Mufundisi we kutekenya, ungafundisa kudini afundi ake kutondoedza mitemo yo mumakwanza? Iyena unotanga afundisa mufundi wake mitemo yaanodikana kutondowedza paanonga ecitekenya mugwanza. Hino, kuti afundise afundi ake maitiro aangaita kuti atondoedze mitemo yakhona, iyena unodikana kutora danho recipiri. Unodikana kuperekedza afundi ake oatungamirira paanonga ecitekenya aa mugwanza uye oseenzesa zviya zvaakafunda kuti angatondoedza kudini mitemo yo mumakwanza. Tinofundei pa muezaniso uu?
5. (a) Maererano no tsamba ya Juau 14:15; uye 1 Juau 2:3, tinodikana kufundisa afundi edu kuti aitei? (b) Pasai miezaniso dze nhungamiriro dzatingapanganidzira afundi edu.
5 Patinofunda no anhu Bhaibheri, tinoafundisa zvinodiwa na Mwari katiri. Asi pano zvimwenizve zvatinodikana kuita. Tinodikana kufundisa afundi edu e Bhaibheri kutondoedza zviya zvaanofunda mu upenyu wawo zuwa ne zuwa. (Erengai Juau 14:15; 1 Juau 2:3.) Ngo muezaniso, tingapangidzira afundi edu matondoedzere aangaita zvokwadi zvisikacinji zviri mu Bhaibheri paanonga ari kucikora, ku basa kana kuti paanonga ecidzorora. Tingapanganidza miezaniso ye zvakaitika mu upenyu wedu kuti tiapangidzire kuti kutondoedza mitemo ye Bhaibheri kakatidziirira kudini pa ngozi uye kakatibetsera kudini kuti tiite zvisananguro zvakanaka. Pamberi pe afundi edu tinganamata kuna Djehovha kuti mwiya mucena utitungamirire.—Ju. 16:13.
6. Ngacipizve cinobatanidzwa pakufundisa anhu kuti acengete mitemo ya Djesu?
6 Ngacipi cinobatanidzwa pakufundisa amweni kuti acengete mitemo ya Djesu? Tinoda kubetsera afundi edu e Bhaibheri kuti agare no cido cekuita afundi. Kune afundi amweni, basa iri rekuita afundi rinoatyisa. Hino tinodikana kugara no mwoyo unononoka kutsamwa, hingana zvatinoita pakuafundisa nhungamiriro dzinoita kuti azwisise padoko no padoko uye dzinobaya mwoyo yawo, zvoita kuti aite ciito. Tingabetsera kudini afundi edu kuti atunhudzire cido cekureketawo no anhu amweni nge zve masoko anopfadza?
7. Tingabetsera kudini mufundi kuti atunhudzire cido cekureketa no anhu amweni nge zve masoko anopfadza?
7 Tingaita mibvunzo ku afundi edu dzakaita hingana idzi: “Kutambira kamakaita masoko e Umambo kakacinja kudini upenyu wenyu? Munorangarirawo kuti amweni anodikanawo kuzwa masoko aya here? Ngazvipi zvamungaita kuti muabetere?” (Zvie. 3:27; Mt. 9:37, 38) Pangidzai afundi mataratadho anobatanidzwa pa Bhokisi re Mafaramenta e Kufundisa uye musiyei kuti akhete raanoona kuti raizobata-bata hama dzake, shamwari kana kuti aya aanofunda nawo kucikora. * Mupasei numero ye mataratadho aya. Mufundisei kuti ungaparidzira kudini eciseenzesa taratadho ii ngo mwazvo. Zve zvirokwazvo kana mufundi wedu akatenderhwa kugara muparidzi asati abhabhatidzwa, ticada kugara ku dii rake kuti timutungamirire.—Mup. 4:9, 10; Ru. 6:40.
UNGANO INOBETSERA KUDINI AFUNDI E BHAIBHERI KUTI ABUDIRIRE
8. Ngei zvecikosha kuti afundi edu ade Djehovha ne mudoni wake? (Onai bhokisi “ Tingaitei Kuti Afundi Edu Agare ne Ushamwari Wakanaka na Djehovha.”)
8 Edzurirai kuti Djesu wakatipasa mitemo yekufundisa anhu amweni kuti “acengete zviro zvese” zvaakatifundisa. Izvi zvinobatanidzawo mitemo—kuda Mwari uye kuda mudoni wako—izvona zvakabatana no basa rekuparidzira uye rekuita afundi. (Mt. 22:37-39) Zvakabatana papi? Cinangwa cikuru cekuita basa rekuparidzira i rudo—rudo redu kuna Mwari uye rudo redu ku adoni edu. Zvinozwisisika kune afundi amweni e Bhaibheri, pfungwa ye kuita basa re kuparidzira ingaita kuti atye. Asi tingagondesa afundi aya kuti no rubetso ra Djehovha, awona angakwanisa kuwina kutya munhu. (Pis. 18:1-3; Zvie. 29:25) Bhokisi rinotungamirira fundo ino, rinopanganidza zvatingaita kuti tibetsere mufundi wedu kuti ade Mwari. Kupinda izvi, ungano ingaita kudini kuti ibetsere afundi e Bhaibheri kuti apangidze rudo?
9. Mu muezaniso we mutekenyi, mufundi uri kufunda fundo dzinokosha nge gwanza ripi?
9 Rangariraizve ngezve muezaniso we mufundi, uye ne mufundisi wake unotekenya karu. Paanonga ecihamba mugwanza ne mufundisi wake ku dii rake, mufundi unonga ecifundira nge mushobo upi? Ngekuzwira mufundisi uye ngekuona zviri kuitwa no atekenyi amweni. Ngo muezaniso, mufundisi we kutekenya ungapangidzira ku mufundi wake mutekenyi umweni waizomusiya kuti apinde pamberi pake paanonga ecitekenya mu gwanza. Kana kuti mufundisi we kutekenya ungapangidzira ku mufundi wake mutekenyi umweni unodzimisa getsi re karu yake kuti zvigare nyore kune atekenyi amweni anonga ari sure ke karu yake asatungwe, uye mufundisi uu we kutekenya ungakohomedzesawo mufundi wake kuti ateedzere miezaniso ye atekenyi aya. Miezaniso idzi dzinofundisa afundi zvaangaita paanonga ecitekenya.
10. Ngazvipi zvicabestsera mufundi we Bhaibheri kuti abudirire pakunamata?
10 Kuita hingana mufundi we kutekenya, mufundi we Bhaibheri unotanga kuhamba mugwanza rinoenda kuupenyu, unofunda haiwa basi ku mufundi wake, asi kubva pamiezaniso yakanaka ye aseenzi amweni a Djehovha. Ngo kudaro, cinyi cingabetsera afundi e Bhaibheri kuti ahambire mberi pakunamata? Kupinda misangano yedu yeciKristu. Ngei tecidaro? Mirairidzo ye Bhaibheri inopaswa pamisangano icatunhudzira kuziya kawo, kubambisa kutenda kawo uye icaita kuti rudo raanaro na Mwari ribambirire kukura. (Zvi. 15:30-32) Kupinda izvi, ku misangano, mufundisi we Bhaibheri angapangidzawo mufundi wake ku hama no hanzvadzi dzaangafundira nadzo zvakawanda. Mufundi ungagumira muezaniso upi we rudo re ciKristu mu ungano? Ngationei zvinoteera.
11. Mufundi ungaona miezaniso ipi mu ungano, uye zvingamubetsera kudini?
11 Mufundi we Bhaibheri urikurera mwana ega, unoona hanzvadzi yeciKristu iri pamugarire umwewo wakaezana no wake. Zvinobaya mwoyo we mufundi uu ngekuona kupeta masimba kunoita hanzvadzi yecuuya ku Nyumba yo Umambo no ana akhona. Mufundi umweni urikuneseka kuti amire kubhema, unoshamwaridzana no muparidzi umweni wainga no dambudziko rakaezana no rake. Muparidzi wakhona unobvunza mufundi kuti kuda kaaita Djehovha kakamubetsera kudini kuti atondoedze mitemo ya Mwari. (2Ako. 7:1; Afi. 4:13) Aa apedza kuzwa ngano ye zvakaitika ye muparidzi uu, mufundi unogara no rugondo kana hama ii ingamugondesa kuti, “Mungakwanisawo kusiya kubhema.” Mufundi we Bhaibheri unoona hanzvadzi imweni inothunga rake yecidakadzwa ne upenyu wake hingana Mupupuri. Mufundi we Bhaibheri paanoona hanzvadzi ii, iyona inogara no cidakadaka cekuda kuziya kuti ngei hanzvadzi ii inogara yakapfara.
12. Ngei teciti umwe na umwe mu ungano uno dii raangaita kuti abetsere afundi e Bhaibheri?
12 Afundi e Bhaibheri paanoziya hama dzakagondeka dzakasiyana-siyana, anofundira no miezaniso dzawo, zvinoreya kuti anofundira kucengeta mitemo ya Kristu ye kuda Djehovha uye mudoni wawo. (Ju. 13:35; 1Ti. 4:12) Kusiya izvi, hingana zvataona, mufundi we Bhaibheri ungafundira no afundisi amweni anosonganawo no matambudziko akaezana no ake. Mufundi unofundira no miezaniso idzi, kuti zvaakutsamira kaari kuti aite cinjo uye kuti agare mufundi wa Kristu. (Dhe. 30:11) Umwe na umwe mu ungano, ungaita zvese zvaanokwanisa kuti abetsere mufundi we Bhaibheri kuti abudirire pakunamata. (Mt. 5:16) Ngazvipi zvamunoita pacenyu kuti mubambise afundi e Bhaibheri anouya kumisangano?
BETSERAI ASIKACAITI BASAKUTI APARIDZIREZVE
13-14. Djesu wakabata kudini aphostori ake aineseka
13 Tinoda kubetsera hama no hanzvadzi dzedu dzakasiya kuparidzira kuti aparidzezve uye kuti aite afundi. Mushobo wakaizwa na Djesu kuti abate zvakanaka afundi ainga aora mwoyo, zvinopangidza zvatingaita nyamasi.
14 Pakupedzesera ke ushumiri wa Djesu pasi pano, rufu rake perainga raa dhuze, aphostori “ese akamusiya uye akatiza.” (Mk. 14:50; Ju. 16:32) Djesu wakaita kudini no aphostori ake panguwa yaainga asina simba? Aa amutswa, Djesu wakabvunza ateeri ake amweni kuti: “Musatye! Endai, moobvunza hama dzangu [kuti Ndasikwazve].” (Mt. 28:10a) Djesu aazi kusenga nyara ngezva aphostori ake. Kunyazi ainga amusiya, aiyadaidza kuti “hama dzangu.” Kuita hingana Djehovha, Djesu wainga ano usisi uye wairekerera.—2Mad. 13:23.
15. Tinozwa kudini nge zve aya akasiya kuparidzira?
15 Kuita hingana Djesu, tinogara tecirangarirawo maningi aya akasiya kuparidzira. Aona i hama no hanzvadzi dzedu, uye tinoada maningi! Ticiri kuedzurira mabasa e rudo akaitwa no hama idzi kare—amweni akatosiya kare-kare kamare. (Ahe. 6:10) Zve zvirokwazvo taanocisuwo! (Ru. 15:4-7) Kuita hingana Djesu, tingaapangidzira kudini kuti tinoarangarirawo?
16. Tingapangidza kudini kuti tinozwira usisi hama no hanzvadzi dzisikacaiti basa?
16 Apikei kuti auye ku misangano. Mushobo umweni waiizwa na Djesu kuti abambise aphostori ake ainga akaora mwoyo, nge we kuapika kumisangano. (Mt. 28:10b; 1Ako. 15:6) Ngo kudaro, tingakohomedzesawo aya akasiya kuparidzira kuti apinde misangano ye ungano kana asikacapindi. Tinoziya kuti ticada kuapika kakawanda asati atidaira. Zviri pamhene kuti Djesu wakapfadzwa nge kuona kuti afundi ake akatendera mipiko yake.—Ezanisirai na Mateu 28:16 na Ruka 15:6.
17. Tinodikana kuzwa kudini patinoona hama dzisikacaiti basa padzinoguma pa Nyumba yo Umambo?
17 Atambirei zvakanaka. Djesu wakaita kuti afundi ake azwe atambirhwa zvakanaka paakaonana naye; iyena wakatanga kucedza nawo. (Mt. 28:18) Ticabata kudini kana hama dzisikacaiti basa padzinoguma pa Nyumba ye Umambo? Tinodikana kudzitambira ne mupfaro wese. Pa nguwa imweni tinombotya kuti toreketei nawo. Asi tisikaashori, tingareketa hedu mupfaro watirikuzwa nge kuwaona.
18. Tingaitei kuti tibambise aparidzi asikacaiti basa?
18 Abambisei. Pamweni afundi a Djesu akaremerhwa nge basa raakapaswa rekuparidzira mu nyika yese. Djesu wakaanyaradza eciti: “Ndinemwi mazuwa ese.” (Mt. 28:20) Zvaakaita izvi zvakaseenza here? Honde. Pa nguwa doko basi, awona ainga akabatikana pa “kufundisa uye kuparidzira masoko anopfadza.” (Zvi. 5:42) Aparidzi asikacaiti basa anodawo kunyaradzwa. Iwona angazwawo kutya nge kuzwa kuita basa rekuparidzira. Tingaabvunza kuti amuripi mwega. Kana mooda koparidzira tingaenda tese. Zve zvirokwazvo iwona acatenda maningi rubetso raticaapasa. Patinoona nokubata zvakanaka hama ne hanzvadzi dzisikacaiti basa tinoona mupfaro mu ungano.
TINODA KUPEDZESA BASA RATAKAPASWA NA DJESU
19. Cido cedu ngecekuitei, uye ngei?
19 Tinodikana kurumbwa teciita afundi dakara riini? Dakara kumugumo we zviro zvese zvenyika ino. (Mt. 28:20; onai Tsanangudzo Yemashoko emuBhaibheri, “Mugumo we zviro zvese zve nyika ino.”) Ticakwanisa kuparidza uye kuita afundi dakara pa nguwa ii here? Takashinga kuti tizviite! Tinopfara nge kupa nguwa yedu, simba uye zviro zvingaita kuti tigumire anhu “ese ano cido ce kuona upenyu usikaperi.” (Zvi. 13:48) Patinoita izvi, tinonga teciteedzera muezaniso wa Djesu. Iyena wakati ku afundi ake: “Zvekurhya zvangu, kuita kuda ka uya akandituma uye kupedza basa rake.” (Ju. 4:34; 17:4) Ndicona cido cedu. Tinoda kupedzesa basa ratakapaswa. (Ju. 20:21) Uye tinoda kuti amweni, kutobatanidzawo no aya asikacaiti basa, kuti abatane na isusu pakuita basa iri.—Mt. 24:13.
20. Maererano na Afiripi 4:13, ngei tecikwanisa kuita basa ratakapaswa na Djesu kuti tiite?
20 Zvirokwazvo kuti pamweni paya, zvinganesa kuita basa ratakapaswa na Djesu. Ngo kudaro, atiripi kuita basa iri tega. Djesu wakagondesa kuti waizotibetsera. Tinoita basa rekuita afundi hingana “Aseenzi anoseenza pamwepo na Mwari uye teciperekedzwa na Kristu.” (1Ako. 3:9; 2Ako. 2:17) Ngo kudaro, tinokwanisa kuzviita. Iropapfadzo yakanakisisa uye kudakadzwa nge kuita basa iri uye kubetsera amweni kuti azviitewo!—Erengai Afiripi 4:13.
NGOMA 79 Afundisei Kuti Arumbwe Akabamba
^ par. 5 Djesu wakabvunza ateeri ake kuti aite afundi uye kuti aafundise kucengeta zviro zvese zvaakaafundisa. Mu fundo ino ticafunda kuti tingaita kudini kuti tiite zvaakatibvunza kuti tiite. Kana mecida masoko akadzara mungaagumira mu Murindiri wa Khunguru 1, 2004, mapajina 14-19, muci Shona.
^ par. 7 Kuti zvigare nyore kuzwisisa, mufundi watiri kureya nge we mwanarume.
^ par. 67 KUPANGANIDZWA KE MUFANIKISO: Hanzvadzi iri kuitisa fundo ye Bhaibheri, irikupanganidza matanho anodikanwa kutorhwa nge mu fundi wake kuti atunhudzire kuda kaanoita Djehovha. Mufundi waakuseenzesa mazano matatu aakatambira kubva kumufundisi wake we Bhaibheri.
