1. ¿Bin la yal ta mantal te Jesús ta Mateo 28:18-20?

TE KʼALAL chaʼkuxaj te Jesuse, chiknaj ta stojol te jnopojeletik te stsoboj sbaik ta Galilea-a. Ay bin mukʼ skʼoplal la yaltiklanbey. ¿Bin-a? Ya jtatik ta Mateo 28:18-20 (kʼopona).

2. ¿Bintik jojkʼoyeletik ya jnopbeytik skʼoplal?

² Te j-abatetik yuʼun Dios ta kʼajkʼal ini, jaʼnix jich ya skʼan ya jchʼuuntik te mantal la yal te Jesús te ya kotsestik jnopojeletik. Kiltik oxeb jojkʼoyeletik te snitojbey sba skʼoplal sok te aʼtelil la yal jilel te Jesús. Sbabial, ¿jaʼnaxbal ya skʼan ya kakʼbeytik snop te estudianteetik te mantaliletik yuʼun te Diose? Schebal, ¿bin-utʼil ya xkoltaywan te kongregasion yuʼun ya xchʼixan te schʼuunel yoʼtan te estudiantee? Yoxebal, ¿bin-utʼil ya jkoltaytik te ermanoetik te inaktibo ayik yuʼun ya xchaʼjajch yotsesik jnopojeletik?

3. ¿Bin la yal te Jesús te ya skʼan ya jpastike?

³ Jamal la yal jilel te Jesús te ya skʼan ya jnojptestik te ants winiketik. Pero te Jesús maba jichuk la yal: «Acʼticlambeya  snopic spisil bintic la jpasex ta mandar». Jich la yal: «Acʼticlambeya snopic te ya me schʼuhunic spasel spisil bintic la jpasex ta mandar». Teme jich ya jkʼan ya jpastike, ya skʼan ya jnojptestik te estudiante kuʼuntik te bin ya skʼan ya spas, pero jaʼnix jich ya skʼan ya kalbeytik te bin-utʼil ya spase. ¿Bin yuʼun?

4. Albeya skʼoplal sok jun ejemplo te bin-utʼil ya xjuʼ ya jkoltaytik te estudianteetik.

⁴ ¿Bin-utʼil ya kakʼbeytik snop te estudiante te yakuk schʼuun spasel te bin la yal ta mantal te Cristo? Kiltik te ejemplo ini. ¿Bin ya spas te machʼa ya xnojpteswan ta stijel karro? Nail ya scholbey te machʼa ya snojptes te bitʼil ta tijele. Pero, ¿tikʼbal-a? Maʼuk. Ya skʼan ya sjokin ta stijel te karro yuʼun ya skoltay ta spasel te bin la yakʼbey snope (Hech. 8:31). ¿Bin ya jnoptik yuʼun?

5. 1) Jich bitʼil ya yal Juan 14:15 sok 1 Juan 2:3, ¿bin ya skʼan ya jnojptestik ta spasel te estudiante kuʼuntike? 2) Ala cheʼoxebuk ejemplo te bin-utʼil ya xjuʼ ya jpastik.

⁵ Te kʼalal ay machʼa ya jnojptestik ta Biblia, ya kakʼbeytik snop te bin ya smulan te Diose. Pero maba tikʼuk-abi. Ya skʼan ya jnojptestik te bin-utʼil ya skʼan ya spas ta skuxlejal ta jujun kʼajkʼal (kʼopona Juan 14:15; 1 Juan 2:3). Ya xjuʼ ya kakʼbeytik yil te bitʼil ya xjuʼ ya spas ta skuxlejal te bintik ya yal te Biblia, te kʼalal ay ta eskuela, ta yaʼtel sok te kʼalal ya stsa te bintik ya skʼases kʼajkʼal-ae. Jaʼnix jich ya xjuʼ ya jcholbeytik yaʼiy te bin kʼaxem ta jkuxlejaltik sok te bitʼil la skoltayotik te Biblia ta stael ta nopel te bin lek ta pasel. Te kʼalal ya jkʼopontik Dios sok te estudiante kuʼuntik, jkʼanbeytik te Jehová te yakuk skoltay ta swenta te schʼul espiritu (Juan 16:13).

6. ¿Binxan ya skʼan ya jpastik yuʼun ya jnojptestik ta schʼuunel spasel te bin la yal ta mantal te Jesuse?

⁶ ¿Binxan ya skʼan ya jpastik yuʼun ya jnojptestik ta schʼuunel spasel te bin la yal ta mantal te Jesuse? Ya skʼan ya jkoltaytik te estudiante yuʼun ya xkaj smulan snojptesel te yantike. Ay estudianteetik te ya xiw yoʼtanik te kʼalal ya snopik te ya xlokʼik ta scholel skʼop Dios. Jaʼ yuʼun ma skʼan ya xlujbotik ta skoltayel yuʼun ya yichʼbey swentail te bin ya yal te Biblia, jich ya stsak yip schʼuunel yoʼtan sok ya xtijbot yoʼtan yuʼun ya xlokʼ ta scholel skʼop Dios. ¿Bin ya xjuʼ ya jpastik yuʼun ya skʼan ya schol te lek yachʼil kʼope?

7. ¿Bin-utʼil ya xjuʼ ya jkoltaytik te estudiante yuʼun ya skʼan ya schol skʼop Dios?

⁷ Yaniwan xjuʼ te jich ya jojkʼoybeytik: «¿Bin-utʼil lekuben akuxlejal te bitʼil yakat ta snopel te Biblia? ¿Mukʼbal skʼoplal te ya snopik-euk te ants winiketike? ¿Bin-utʼil ya xjuʼ ya akoltaylan?» (Prov. 3:27; Mat. 9:37, 38). Kakʼbeytik yil te tratadoetik te ay ta kit de enseñansa sok jojkʼoybeytik te bantiwan ya smulan te sfamiliatak, yamigotak o sjoʼtak ta aʼtel. Kakʼbeytik te tratado la stsae sok jpastik ensayar te bin-utʼil ya xjuʼ ya sjapbey te yantike. Te kʼalal ochix ta publikador yato skʼan ya jkoltaytik (Ecl. 4:9, 10; Luc. 6:40).

8. ¿Bin yuʼun te estudiante ya skʼan te kʼuxuk ta yoʼtan te Dios sok te spatxujk? (Ilawil-euk te rekuadro « Bin-utʼil ya jkoltaytik te estudiante yuʼun kʼuxuk ta yoʼtan te Dios»).

⁸ Te Jesús la yal te yakuk kakʼtik ta nopel te ya schʼuunik spasel spisil te bin la yal jilel. Tey ochem skʼoplal te cheb  mantalil te kʼax mukʼ skʼoplale: te kʼuxuk ta koʼtantik te Dios sok te jpatxujktik (Mat. 22:37-39). Teme ya jnojptestik te estudiante yuʼun ya schʼuun te cheb mantalil-abi, yakotik ta skoltayel yuʼun ya schol skʼop Dios. Ya xkʼot ta koʼtantik te ay chaʼoxtulik te ya xiwik kʼalal ya snop ta yoʼtanik te ya xlokʼik ta scholel skʼop Dios, pero ya xjuʼ ya kalbeytik te ya xkoltayotik yuʼun te Jehová yuʼun kʼunkʼun ya xchʼay bael te xiwelike (Sal. 18:1-3; Prov. 29:25). Te artikulo ini yichʼoj jun rekuadro te ya schol te bitʼil ya jkoltaytik te estudiante yuʼun kʼux ya yaʼiyxan ta yoʼtan te Diose. Pero spisilik ta kongregasion ya xjuʼ ya xkoltaywanik-euk. Kiltik bin-utʼil.

9. ¿Bin-utʼil ya snopxan stijel karro te machʼa ayto ta snopele?

⁹ Jchaʼkiltik te ejemplo yuʼun te machʼa yak ta snopel stijel karro. Maba jaʼuknax ya snop te bin ya x-albot yuʼun te jpʼijubteswanej yuʼune, jaʼnix jich ya yil te bitʼil ya stij skarro te yantike. Te kʼalal ayix ta karretera-ae, bayal bintik ya xjuʼ ya snop. Jich bitʼil te ya yilbey slekil yoʼtan te yantik karroetik te ya skʼal sbaik o ya skʼej sbaik yuʼun ya xkʼax te yantik karroetik. O jaʼnix jich ya skoesbey slus te skarro yuʼun maba ya stupʼbey sit te machʼa yak ta talel ta site. Kʼalal ya yil-abi, bayal bin ya snop te machʼa yak ta snopel stijel te karro.

10. ¿Bin ya xkoltayot te estudiante swenta ya xchʼi te schʼuunel yoʼtan?

¹⁰ Te machʼa yak ta snopel te Biblia jaʼ pajal sok te machʼa yak ta snopel stijel karro, ma jaʼuknax ya snop te bin ya spas te machʼa ya xpʼijubtesot yuʼune, jaʼnix jich ya snop te bintik ya spasik te yantik j-abatetik yuʼun Jehová. Jaʼ yuʼun mukʼ skʼoplal te ya xbajt ta tsoblejetik. Bayal bin ya snop tey-a, ya stsak yip te schʼuunel yoʼtan sok te skʼuxul yoʼtan ta stojol te Jehová (Hech. 15:30-32). Te ermano o te ermana te yakʼbey te kursoe, ya xjuʼ ya yakʼ snaʼbey sba yantik ermanoetik te pajal skuxlejal soke. ¿Bintik lekil ejemplo ya xjuʼ ya yil te estudiante ta kongregasion? Kiltik cheʼoxebuk.

11. ¿Bintik ejemplo ya xjuʼ ya yilik ta kongregasion te estudianteetik sok bin-utʼil ya xkoltayotik?

¹¹ Jtul estudiante te stukel yak ta schʼitesel yalatak ya snaʼbey sba jtul ermana te pajal skuxlejal sok. Ya yil te ya spas tulan yuʼun ya xbajt ta tsoblej sok te yalatake. Yan estudiante te wokol ya yaʼiy yijkitayel snukʼel may, ya snaʼbey sba yan ermano te jich kʼax ta skuxlejal-euke. Te ermano ya scholbey te bin koltayot ta yijkitayel te maye jaʼ te skʼuxul yoʼtan ta stojol te Jehová (2 Cor. 7:1; Filip. 4:13). Te kʼalal ya yaʼiy te estudiante te bin kʼax ta skuxlejal te ermanoe, ya snaʼ te ya xjuʼ yuʼun-euke. Yan estudiante te jchʼielto, ya snaʼbey sba jtul jchʼiel ermana te tseʼel yoʼtan ta swenta te jaʼ testigo yuʼun Jehová. Jich yuʼun ya skʼan ya snaʼ bin yuʼun spisil-ora tseʼel yoʼtan.

12. ¿Bin-utʼil ya xjuʼ ya jkoltaytik te estudianteetik?

¹² Kʼalal te estudiante ya snaʼbey sba ermanoetik te jun yoʼtanike, ya yil te ya schʼuunik te mantal la yal te Cristo, te kʼuxuk ta yoʼtanik te Dios sok te spatxujkik (Juan 13:35; 1 Tim. 4:12). Jich bitʼil la kiltikix ta yan parrafo, te estudiante ya xjuʼ ya xkoltayot te ejemplo yuʼun te ermanoetik te pajal te bin yak ta kʼaxel ta skuxlejal soke. Jich ya snaʼ te ya xjuʼ ya sjeltay te skuxlejal yuʼun ya x-och ta jnopojel yuʼun Cristo (Deut. 30:11). Chikan  ta ilel te spisilik ta kongregasion ya xjuʼ ya skoltayik te estudiante (Mat. 5:16). Ta jujuntul ya xjuʼ ya jojkʼoybey jbatik ini: «¿Bin-utʼil yakon ta skoltayel te estudianteetik te ya xtalik ta tsoblej?»

13, 14. ¿Bin la spas te Jesús te kʼalal chebajem yoʼtanik-a te jpuk-kʼopetike?

¹³ Jkoltaytik te ermanoetik te inaktibo ayik ta schaʼpasel te aʼtelil ta yotsesel jnopojeletik. ¿Bin-utʼil ya jkoltaytik? Kiltik te bin la spas te Jesús te kʼalal chebajem yoʼtanik-a te jpuk-kʼopetike.

¹⁴ Te kʼalal nopol ya yichʼix milel-a te Jesuse, te jpuk-kʼopetik lokʼik ta anel, stukel la yijkitayik jilel te Jesús (Mar. 14:50; Juan 16:32). ¿Bin la spas te Jesús te kʼalal chebajem yoʼtanik-ae? Te kʼalal chaʼkuxajemix-a te Jesuse, la stikun bael chaʼoxtul antsetik ta yalbeyel te jpuk-kʼopetik te chaʼkuxajemixe. Jich la yaltiklanbey: «Ma xiwex. Bahanic, halbeyahic yaʼiy te quermanotac» (Mat. 28:10a). Manchukme ijkitayot yuʼun te jpuk-kʼopetike, te Jesús maba la spʼajtiklan sok la yal te jaʼ yermanotak. La stʼunbey stalel te Jehová, la snaʼtiklanbey yoʼbolil sba sok la spastiklanbey perdon (2 Rey. 13:23).

15. ¿Bin yaʼiyel ya kaʼiy jbatik ta stojol te machʼatik yijkitayojik scholel te skʼop Dios?

¹⁵ Ya jmel koʼtantik ta stojol te machʼatik yijkitayojik scholel te skʼop Diose. Jaʼme kermanotaktik sok kʼux ta koʼtantik. Ma xchʼay ta koʼtantik spisil te bin la spasik ta stojol te Jehová (Heb. 6:10). Bayal ya jnaʼtik te ermanoetik-abi (Luc. 15:4-7). ¿Bin-utʼil ya xjuʼ ya jtʼunbeytik stalel te Jesús sok te ya kakʼtik ta ilel te ay skʼoplal ta koʼtantik?

16. ¿Bin-utʼil ya kakʼtik ta ilel te ay skʼoplal ta koʼtantik te ermanoetik te inaktibo ayike?

¹⁶ Kikʼtik ta tsoblejetik sok slekil koʼtantik. Te Jesús la stsob te jpuk-kʼopetik te kʼalal chebajem yoʼtanik-ae (Mat. 28:10b; 1 Cor. 15:6). Jaʼnix jich te joʼotike ya xjuʼ ya kikʼtik ta tsoblej te inaktiboetike. Maniwan orauk ya xbajtik, bayalniwan buelta ya skʼan ya kalbeytik. Kʼalal te Jesús la yil te la stsob sbaik te jpuk-kʼopetike, bayalniwan akʼbot stseʼelil yoʼtan, jichnix ya kaʼiy jbatik (Mateo 28:16; paja sok Lucas 15:6).

17. ¿Bin ya xjuʼ ya jpastik teme ya xtal ta tsoblej jtul inaktibo?

¹⁷ Jpatbeytik yoʼtan te kʼalal ya xtal ta tsoblej. Kʼalal te Jesús la stsob sba sok te jpuk-kʼopetike, noptsaj ta stojolik sok leknax la yaʼiy sbaik yuʼun (Mat. 28:18). Jaxan te joʼotike, ¿bin ya jpastik teme ya xkʼot ta tsoblej jtul inaktibo? Ya skʼan ya xnoptsajotik ta stojol sok ya jpatbeytik yoʼtan. Maniwan ya jnaʼtik bin ya kalbeytik, pero tikʼwan-a te ya kalbeytik te tseʼel koʼtantik yuʼun te ya kiltike.

18. ¿Bin-utʼil ya kakʼbeytik smukʼul yoʼtan te machʼatik inaktibo ayike?

¹⁸ Kakʼbeytik smukʼul yoʼtan. Te jnopojeletik yuʼun Jesús ayikniwan ta mel-oʼtan-a ta swenta te ya xbajt scholik skʼop Dios ta swolol Balumilal. Pero te Jesús jich la yaltiklanbey: «Te hoʼone joquinejex spisil ora» (Mat. 28:20). Jich la sta smukʼul yoʼtanik, melel ta patil «mayuc la scom sbahic ta pʼijubteswanej» (Hech. 5:42). Te machʼatik yijkitayojik scholel skʼop Dios, jaʼnix jich ya skʼan smukʼul yoʼtanik. Yaniwan xiw yoʼtanik te kʼalal ya snopik te ya schaʼlokʼik ta scholel skʼop Dios. Kalbeytik te maba stukelik ya scholik te skʼop Diose sok te ya xjuʼ  ya jokintik lokʼele. Bayalme ya yalik wokol teme jich ya jpastike. Teme jich ya kiltik sok ya jkʼopontik bitʼil kermanotaktik, yame yakʼ bayal stseʼelil koʼtantik te kʼalal ya schaʼjajchik ta scholel te skʼop Diose.

19. ¿Bin-a te ya jkʼan ya jpastike, sok bin yuʼun?

¹⁹ ¿Jayebxan kʼajkʼal ya kotsestik jnopojeletik? Jaʼto ta slajibal te bintik ay (Mat. 28:20; ilawil ta glosario «conclusión del sistema» ta La Biblia. Traducción del Nuevo Mundo). Ya xjuʼ kuʼuntik spasel te mantalil la yal jilel te Jesuse. ¡Kakʼbeytik yipal! Jtuuntestik te jtiempotik, te kiptik sok te bintik ay kuʼuntik ta skoltayel te «machʼa jich yoʼtanik te ya xkuxinik ta sbajtelkʼinal» (Hech. 13:48, TNM). Jichme ya jtʼunbeytik stalel te Jesús te jich la yal: «Ha jweʼel te ya jpas te bin ya scʼan yoʼtan te machʼa la sticonon tal soc te ya huʼtesbe te yaʼtel» (Juan 4:34; 17:4). Jaʼ ya jkʼan ya jpastik-euk, te ya juʼtestik te aʼtelil te la yakʼ jilel ta jwentatike (Juan 20:21). Sok ya jkʼantik te spisil te kermanotaktik ya spasik-euk jaʼto kʼalal ta slajibal (Mat. 24:13).

20. Jich bitʼil ya yal Filipenses 4:13, ¿bin yuʼun ya xjuʼ kuʼuntik spasel te aʼtelil la yakʼ jilel ta jwentatik te Jesuse?

²⁰ Yame skʼan ya jnaʼtik te maba kʼun ta pasel te aʼtelil la yakʼbotik jilel te Jesuse. Pero mame jtukeltik ya jpastik, la yal ta jamal te ya skoltayotike. Yakotik ta yotsesel jnopojeletik, joy jbatik ta aʼtel sok te Dios sok ya sjokinotik te Cristo (1 Cor. 3:9; 2 Cor. 2:17). Jich ya xjuʼ kuʼuntik spasel. Ya yakʼ stseʼelil koʼtantik, jaʼ jun majtanil te ya jpastik te aʼtelil ini sok te ya jtijbeytik yoʼtan yantik yuʼun ya spasik-euk (kʼopona Filipenses 4:13 te ay ta nota). *