XCHANOBIL 45
Jkoltatik yantik yoʼ spasik li kʼusi jbainojtike
«Batanik, bat pasik ta jchankʼop li krixchanoetike [...], chanubtasik ta xchʼunel skotol li kʼusitik laj kalboxuke» (MAT. 28:19, 20).
KʼEJOJ 89 Tsta bendision buchʼu chchʼun mantal
LI KʼUSI TA JCHANTIKE *
1. ¿Kʼusi mantal laj yakʼ Jesus ta Mateo 28:18 kʼalal ta 20?
KʼALAL chaʼkuxi li Jesuse, laj yakʼ sba ta ilel ta stojolal li yajchankʼoptak ti te tsobolik ta Galileae. Oy kʼusi tsots skʼoplal chalanbe. ¿Kʼusi van taje? Te ta jtatik ta Mateo 28:18 kʼalal ta 20 (kʼelo).
2. ¿Kʼusi sjakʼobiltak ta jkʼelbetik batel skʼoplal?
2 Li yajtunelutik Dios avie skʼan jchʼuntik ek li mantal laj yal Jesus ti jpastik ta yajchankʼop li krixchanoetike. Jech oxal, jkʼeltik batel oxib sjakʼobiltak ti te nitil skʼoplal xchiʼuk li abtelal jbainojtike. Baʼyel, ¿kʼusi yan skʼan jpastik ti mu jaʼuk noʼox xkakʼbetik xchan smantal Dios li kaj-estudiotike? Xchibal, ¿kʼuxi xuʼ skolta sbaik sjunul tsobobbail yoʼ xchʼiik ta mantal li estudioetike? Xchiʼuk yoxibal, ¿kʼuxi xuʼ jkoltatik li buchʼutik lubtsajemik ta mantal yoʼ spasik ta yajchankʼop Kristo yan velta li krixchanoetike?
JCHANUBTASTIK TA XCHʼUNEL LI KʼUSI LAJ YAL JESUSE
3. ¿Kʼusi tsots skʼoplal laj yal Jesus li ta mantal laj yakʼe?
3 Jamal laj yal Jesus ti skʼan xkakʼbetik xchan krixchanoetik li kʼusi laj yal komele. Pe skʼan jtsaktik ta venta ti mu xiuk laj yale: «Akʼbik xchan skotol li kʼusitik laj kalboxuke»; moʼoj, xi laj yale: «Chanubtasik ta xchʼunel skotol li kʼusitik laj kalboxuke». Sventa spas kuʼuntik taje, skʼan xkalbetik kaj-estudiotik li kʼusi skʼan spase, pe skʼan xkakʼbetik yil xtok kʼuxi ta pasel (Ech. 8:31). ¿Kʼu yuʼun?
4. ¿Kʼuxi xuʼ jchanubtastik yantik ta xchʼunel li kʼusitik laj yal Jesuse? Albo junuk skʼelobil.
4 ¿Kʼuxi xuʼ jchanubtastik yantik ta xchʼunel li kʼusitik laj yal Jesuse? Kalbetik junuk skʼelobil. Li buchʼu jaʼ to chchan stsʼotel karroe chichʼ chanubtasel ta xchʼunel li smantaltak ajvalil ta sventa stsʼotel karroe. Pe ¿kʼusi skʼan spas li buchʼu chchanubtasvane? Baʼyel van chchapbe smelolal kʼuxi ta pasel. Pe sventa jechuk spas kʼuchaʼal laj yalbee, skʼan xbat xchiʼin kʼalal tstsʼot karro yoʼ xakʼbe yil kʼuxi ta pasele. ¿Kʼusi chakʼ jchantik taje?
5. 1) Jech kʼuchaʼal chal Juan 14:15 xchiʼuk 1 Juan 2:3, ¿kʼusi skʼan xkakʼbetik yil li kaj-estudiotike? 2) ¿Kʼuxi xuʼ jpastik? Albo junantik skʼelobiltak.
5 Kʼalal oy buchʼu chkakʼbetik estudioe, chkakʼbetik xchan li kʼusi tskʼan Dios ti akʼo jpastike. Pe mu baluk noʼox, yuʼun skʼan xkakʼbetik yil ti kʼuxi xuʼ xakʼ ta xkuxlejal li kʼusi chchane (kʼelo Juan 14:15; 1 Juan 2:3). Li kʼusitik ta jpastike xuʼ xkakʼbetik-o yil kʼuxi xuʼ xakʼ ta xkuxlejal li beiltaseletik ta Vivlia ta s-eskuela, ta yabtel o kʼalal tstʼuj li kʼusi chchʼay-o yoʼontone. Jech xtok, xuʼ xkalbetik kʼuxi la skoltautik li mantaletik ta Vivlia kʼalal oy kʼusi la jnuptantike o kʼalal oy kʼusi la jnop la jpastike. Kʼalal chkakʼtik estudioe, jpastik orasion xchiʼuk kalbetik Jeova ti akʼo skolta ta xchʼul espiritu li kaj-estudiotike (Juan 16:13).
6. ¿Kʼusi yan xuʼ jpastik yoʼ jchanubtastik yantik ta xchʼunel li kʼusi laj yal Jesuse?
6 ¿Kʼusi yan xuʼ jpastik yoʼ jchanubtastik yantik ta xchʼunel li kʼusi laj yal Jesuse? Skʼan jkolta kaj-estudiotik yoʼ x-ayan ta yoʼonton spasel ta yajchankʼop Kristo li yan krixchanoetike. Junantik li buchʼutik chkakʼbetik estudioe chnik yoʼontonik ta xiʼel kʼalal tsnopbeik skʼoplal ti chcholik mantale. Jaʼ yuʼun, sventa stsatsub xchʼunel yoʼontonike, skʼan oyuk smalael kuʼuntik kʼalal chkakʼbetik yil kʼusi chal Vivliae, vaʼun jaʼ chtijbat-o yoʼontonik yoʼ xcholik mantal. ¿Kʼuxi xuʼ jkoltatik yoʼ x-ayan ta yoʼontonik xcholik mantale?
7. ¿Kʼuxi xuʼ jkolta kaj-estudiotik yoʼ x-ayan ta yoʼonton li cholmantale?
7 Xuʼ van xi jakʼbetik li kaj-estudiotike: «¿Kʼusitik sbalil ataojbe ti chavaʼi xa mantale? ¿Mi chtun van yuʼunik xanaʼ li yantik eke? ¿Kʼuxi xuʼ xakoltaan?» (Prov. 3:27; Mat. 9:37, 38). Kakʼbetik yil li tratadoetik ti te talem li ta Abtejebaletik sventa xijchanubtasvane xchiʼuk xiuk jakʼbetike: «¿Bu van junukal lek chilik avutsʼ avalal, avamigotak o achiʼiltak ta abtele?». Kakʼbetik jaylikuk xchiʼuk jchanubtastik kʼuxi xuʼ xakʼbe li yan krixchanoetike. Mi och ta jcholmantal ti muʼyuk to yichʼoj voʼe, jechuk-o me jkoltatik batel (Ekl. 4:9, 10; Luk. 6:40).
KʼUXI XUʼ JKOLTA JBATIK TA KOMON YOʼ XCHʼIIK TA MANTAL
8. ¿Kʼu yuʼun tsots skʼoplal ti masuk to skʼan Dios xchiʼuk xchiʼiltak li kaj-estudiotike? (Kʼelo li rekuadro « ¿Kʼuxi xuʼ jkolta kaj-estudiotik yoʼ masuk to skʼan li Diose?»).
8 Li Jesuse laj yal ti skʼan jchanubtastik yantik ta xchʼunel skotol li kʼusi laj yale. Taje te tsakal skʼoplal li chaʼtos mantal ti mas tsots skʼoplale: ti jkʼantik li Diose xchiʼuk li jchiʼiltaktike (Mat. 22:37-39). Mi ta jkolta kaj-estudiotik ta spasel taje, yakal me ta jkoltatik sventa xchol mantal. Jlome mu skʼan xlokʼik ta cholmantal ta skoj ti chiʼike, pe skʼan xkakʼbetik yilik ti chkoltaatik yuʼun Jeova sventa mu xiʼtaik li krixchanoetike (Sal. 18:1-3; Prov. 29:25). Li ta xchanobil liʼe, talem jun rekuadro ti chal kʼuxi xuʼ jkolta kaj-estudiotik yoʼ masuk to skʼan li Diose. Jkʼeltik batel kʼuxi xuʼ xijkoltavan jkotoltik sventa masuk to xkʼanvanik li kaj-estudiotike.
9. ¿Kʼuxi chchan stsʼotel karro li jun krixchanoe?
9 Kalbetik skʼoplal yan velta li buchʼu yakal chchan stsʼotel karroe. Kʼalal yakal tstsʼot batel karroe, maʼuk noʼox xuʼ xkoltaat li kʼusi ch-albat yuʼun li buchʼu chchanubtasate, yuʼun xuʼ xkoltaat xtok kʼalal chil li kʼusi tspas yan choferetik ti xtojobik leke. Jech kʼuchaʼal liʼe: xuʼ van ch-albat ti akʼo skʼel kʼu yelan chakʼ jelavuk yan karro li jun chofere o ti skʼel yan chofer ti kʼu yelan tsyalesbe yip slus sventa mu stupʼbe sat li yantike. Kʼalal jech chil taje, toj ep kʼusitik chchan li buchʼu chchan stsʼotel karroe.
10. ¿Kʼuxi xuʼ xchʼi ta mantal li kaj-estudiotike?
10 Jaʼ noʼox jech ek li kaj-estudiotike, maʼuk noʼox chchan ta jtojolaltik kʼalal chlik xchan mantale, yuʼun xuʼ oy kʼusitik xchan xtok ta stojolal li yan ermanoetike. Jech oxal, sventa xchʼi ta mantale, toj tsots skʼoplal ti xbatilan li ta tsobajeletike. Ep kʼusitik chaʼibe smelolal te, tstsatsub xchʼunel yoʼonton xchiʼuk mas to chlik skʼan li Diose (Ech. 15:30-32). Pe maʼuk noʼox, yuʼun xuʼ xkakʼbetik yojtikin ermanoetik xchiʼuk ermanaetik ti koʼol kʼusitik snuptanojike. ¿Kʼusitik van xuʼ xakʼ venta ta tsobajel li kaj-estudiotike? Jkʼeltik batel junantik.
11. ¿Kʼusitik xuʼ xakʼ venta ta tsobobbail li buchʼu chichʼ estudioe, xchiʼuk kʼuxi xuʼ xkoltaat?
11 Jun ants ti chichʼ estudio xchiʼuk ti stuk yakal tstsʼites yalabe chakʼ venta ti oy jun ermana ti jaʼ jech yakal tsnuptan eke. Labal sba chil ti yakʼoj tajek persa yoʼ xkʼot ta salon li ermana xchiʼuk li yuni alabtake. Jun vinik ti chichʼ estudio xchiʼuk ti yakal chakʼ persa yiktael sikʼolajele chojtikin jun ermano ti jaʼ jech la snuptan eke. Ta skoj ti skʼanoj Jeova li ermanoe, chal ti jaʼ koltaat sventa xchʼun kʼusi chal Vivlia xchiʼuk ti xikta sikʼolajele (2 Kor. 7:1; Filip. 4:13). Li vinike xpatet xa yoʼonton chkom kʼalal chaʼibe sloʼil li ermanoe xchiʼuk ti ch-albat ti xuʼ x-iktaj yuʼun eke. Jech xtok, oy jun tseb ti yakal chchan Vivliae chakʼ venta ti xmuyubaj tajek jun ermana ti koʼol sjabilalik ta skoj ti jaʼ stestigo Jeovae. Vaʼun, tskʼan tsnaʼ kʼu yuʼun xkuxet noʼox yoʼonton skotol ora li ermanae.
12. ¿Kʼu yuʼun chkaltik ti jkotoltik xuʼ jkoltatik li buchʼutik chichʼik estudioe?
12 Li kaj-estudiotike xuʼ xakʼ venta kʼusi skʼan xal ti jkʼantik Dios xchiʼuk jchiʼiltaktik kʼalal chojtikin jayibuk ermanoetik ti tukʼ yakʼoj sbaike (Juan 13:35; 1 Tim. 4:12). Jech kʼuchaʼal laj xa kaltike, li kaj-estudiotike xuʼ xkoltaat li kʼusi tspas yan ermanoetik ti koʼol kʼusi yakal tsnuptanike. Vaʼun, chakʼ venta ti xuʼ xjel xkuxlejal yoʼ xkʼot ta yajchankʼop Kristo (Deut. 30:11). Jamal xvinaj ti jkotoltik xuʼ xkakʼ jkʼobtik yoʼ xchʼiik ta mantal li buchʼutik chichʼik estudioe (Mat. 5:16). Xiuk jakʼbe jbatik ta jujuntale: «¿Kʼusi yakal ta jpas sventa jkolta li buchʼutik chichʼik chanubtasel ti chkʼotik xa ta tsobajele?».
JKOLTATIK LI BUCHʼU LUBTSAJEM TA MANTALE
13, 14. ¿Kʼusi la spas Jesus kʼalal jaʼo chibajemik li yajtakboltake?
13 Ta jkʼan ta jkoltatik li ermanoetik ti lubtsajemik ta mantal yoʼ spasik yan velta li kʼusi yakʼoj jbaintik Jesuse. Sventa spas kuʼuntike, jvules ta joltik kʼuxi la skolta yajtakboltak Jesus kʼalal jaʼo chibajemike.
14 Kʼalal jutuk xa ox skʼan xcham li Jesuse, li jtakboletike stuk laj yiktaik komel xchiʼuk jatavik batel (Mar. 14:50; Juan 16:32). ¿Kʼusi la spas Jesus kʼalal jaʼo chibajemik li yajtakboltake? Kʼalal jaʼtik to laj yichʼ chaʼkuxesele, la stak batel junantik antsetik yoʼ xbat yalbeik yajtakboltak ti laj xa yichʼ chaʼkuxesele. Xi laj yalanbee: «¡Mu xaxiʼik! Batanik, bat albeik kermanotak» (Mat. 28:10 sbavokʼal). Akʼo mi iktavanik komel li jtakboletike, li Jesuse muʼyuk la spʼajanan, yuʼun «kermanotak» xutanan. Li Jesuse la xchanbe stalelal Jeova, yuʼun laj yakʼ ta ilel xkʼuxul yoʼonton xchiʼuk akʼvan ta perton (2 Rey. 13:23).
15. ¿Kʼu yelan chkiltik li buchʼutik lubtsajemik ta mantale?
15 Li voʼotik eke ta jvul koʼontontik ta stojolal li buchʼutik lubtsajemik ta mantale. Jaʼo kermanotik xchiʼuk jkʼanojantik, te-o ta joltik ti kʼu yelan tunik stojolal Jeova ta voʼnee, junantike ta epal jabil jech la spasik (Ebr. 6:10). Ta jkʼan xa ta jkʼelbetik satik (Luk. 15:4-7). ¿Kʼuxi xuʼ jchanbetik stalelal Jesus xchiʼuk ti xkakʼbetik yilik ti oyik ta koʼontontike?
16. ¿Kʼuxi xuʼ xkakʼbetik yil ti oy ta koʼontontik li buchʼutik lubtsajemik ta mantale?
16 Jtijbetik yoʼonton yoʼ xbat xchiʼinutik ta tsobajeletik. Jaʼ jech la spas Jesus kʼalal chibajem li yajtakboltake, laj yalbe ti akʼo stsob sbaike (Mat. 28:10 xchaʼvokʼal; 1 Kor. 15:6). Li avi eke, xuʼ jtijbetik yoʼonton li buchʼutik lubtsajemik ta mantal yoʼ xbat xchiʼinutik li ta tsobajeletike. Sventa jechuk spasike, xuʼ van ep ta velta skʼan xkalbetik. Muyubaj van tajek Jesus kʼalal laj yil ti bat onoʼox stsob sbaik li yajtakboltake. Xuʼ jech xkaʼi jbatik ek (Mat. 28:16; koʼoltaso xchiʼuk Lukas 15:6).
17. ¿Kʼusi xuʼ jpastik mi tal ta tsobajel junuk ermano ti lubtsajem ta mantale?
17 Jchʼamtik ta sjunul koʼontontik. Li Jesuse nopaj batel ta stojolal yajtakboltak kʼalal la stsob sbaike xchiʼuk la xchiʼinan ta loʼil sventa junuk yoʼonton xaʼi sbaik (Mat. 28:18). Li voʼotik une, ¿kʼusi van ta jpastik mi laj kiltik kʼot ta salon junuk ermano ti lubtsajem ta mantale? Skʼan lekuk jchʼamtik xchiʼuk ti xijmuyubajuk noʼox jchiʼintik ta loʼile. Skʼan ti mu chopoluk xaʼi sba kuʼuntike. Yikʼaluk van mu jnaʼ kʼusi chkalbetik, pe xuʼ xkalbetik ti xijmuyubaj tajek ti chkiltik yan veltae.
18. ¿Kʼuxi xuʼ jpatbetik yoʼonton li buchʼu lubtsajem ta mantale?
18 Jpatbetik yoʼonton xchiʼuk kalbetik ti mu stukuk oye. Kʼalal laj yaʼi yajchankʼoptak Jesus ti skʼan xcholik mantal ta spʼejel balumile, xuʼ van la svul yoʼontonik. Pe xi patbat yoʼontonik yuʼun li Jesuse: «Te ta jchiʼinoxuk-o skotol kʼakʼal» (Mat. 28:20). ¿Kʼusi kʼot ta pasel? Mu ta sjaliluke, muʼyuk bu laj yikta sbaik ta chanubtasvanej xchiʼuk ta yalbel skʼoplal li lekil aʼyejetike (Ech. 5:42). Li buchʼutik lubtsajemik ta mantale skʼan jpatbetik yoʼontonik xchiʼuk ti xkalbetik ti mu stukuk oyike. Xuʼ van chiʼik ta skoj ti chlokʼik yan velta ta cholmantale. Sventa junuk yoʼonton xaʼi sbaike, kalbetik ti chbat jchiʼintik ta cholmantal mi xuʼ xa ox chaʼiike. Bal to xaʼiik mi jech la jpastike. Mi muʼyuk jelel chkiltik kʼuchaʼal li yan ermanoetike, xuʼ van xlik yakʼbeik yipal yan velta.
JTSUTSESTIK LI KʼUSI JBAINOJTIKE
19. ¿Kʼusi oy ta koʼontontik spasel, xchiʼuk kʼu yuʼun?
19 ¿Bakʼin to chkiktatik ta spasel ta yajchankʼoptak Kristo li krixchanoetike? Jaʼ to mi laj yichʼ lajesel li kʼusitik oy ta balumile (Mat. 28:20; kʼelo li glosario, «poʼot xa xlaj skotol li kʼusitik oy ta balumile»). ¿Mi tspas onoʼox kuʼuntik li kʼusi laj yakʼ jbaintik Jesuse? Oy ta koʼontontik spasel. Muʼyuk ta jalan jkʼakʼaltik, kipaltik o li kʼusitik x-ayan kuʼuntik sventa jsaʼtik «li buchʼutik oy lek ta yoʼontonik stael li kuxlejal sbatel osile» (Ech. 13:48). Jaʼ jech ta jchanbetik stalelal li Jesuse, yuʼun xi laj yale: «Jaʼ jveʼel ti ta jpasbe li kʼusi tskʼan yoʼonton li buchʼu la stakun tale xchiʼuk ti ta jtsutsesbe li yabtele» (Juan 4:34; 17:4). Li kʼusi oy ta koʼontontik eke jaʼ ti jtsutsestik li kʼusi jbainojtike (Juan 20:21). Ta jkʼantik ti jmojuk xij-abtej xchiʼuk kermanotaktik xchiʼuk li buchʼutik lubtsajemik ta mantal jaʼ to mi tal li slajebe (Mat. 24:13).
20. Jech kʼuchaʼal chal Filipenses 4:13, ¿kʼu yuʼun xuʼ spas kuʼuntik li kʼusi jbainojtike?
20 Maʼuk kʼun li kʼusi laj yakʼ jbaintik Jesuse. Pe mu jtukuk oyutik, yuʼun laj yal ti te chchiʼinutik skotol kʼakʼale. Jmoj chij-abtejutik xchiʼuk Dios kʼalal ta jpastik ta yajchankʼop Kristo li krixchanoetike xchiʼuk te xchiʼinojutik li Jesuse (1 Kor. 3:9; 2 Kor. 2:17). Jaʼ yuʼun, xuʼ spas kuʼuntik. Ta jkʼupintik tajek xchiʼuk jaʼ jun mukʼta matanal chkaʼitik ti xuʼ jpastik li kʼusi jbainojtike xchiʼuk ti jkoltatik yantik yoʼ jechuk spasik eke (kʼelo Filipenses 4:13).
KʼEJOJ 79 Koltao sventa oyuk stsatsal yoʼontonik
^ par. 5 Li Jesuse laj yalbe yajtsʼaklomtak ti akʼo spasik ta yajchankʼop li krixchanoetike xchiʼuk ti xchanubtasik ta xchʼunel skotol li kʼusitik laj yale. Li ta xchanobil liʼe, ta jkʼeltik kʼuxi xuʼ jpastik taje. Li kʼusitik ta jchantik batele te laj yichʼ lokʼesel tal junantik li ta revista La Atalaya ta 1 yuʼun julio ta 2004, pajina 14 kʼalal ta 19.
^ par. 66 LI KʼUSI XVINAJ TA LOKʼOLETIKE: Li jun ermanae chalbe yaj-estudio li kʼusi xuʼ spas sventa masuk to skʼan Diose. Laje, li yaj-estudio tspas li oxtos kʼusi albate.
