1. Кыӵе курон-косон сётӥз Иисус дышетскисьёсызлы, Матфейлэсь 28:18—20 лыдэ басьтыса?

 УЛӞЕМЕЗ бере Иисус возьматскиз дышетскисьёсызлы, кудъёсыз Галилеяын люкаськизы. Иисуслэн соослы мае ке кулэзэ верамез потэ вал. Солэн кылъёсыз гожтэмын Матфейлэсь 28:18—20 (лыдӟе).

2. Кыӵе юанъёсты ми эскеромы?

² Туннэ но Инмарлэн котькуд ужась-тыршисезлы Иисуслэсь курон-косонзэ быдэсъяно. Ойдолэ эскеромы куинь юанъёсты, кудъёсыз та курон-косонэн герӟаськемын. Нырысетӥез, тырмыт-а дышетскисьёслы валэктыны гинэ, мае соослэсь Инмар возьма? Кыкетӥез, кызьы кенешысь вань ивортӥсьёс дышетскисьёслы юрттыны быгато Инмарен кусыпъёссэс юнматыны? Куинетӥез, кызьы юрттоно вын-агайёслы но сузэр-апайёслы, кудъёсыз тодытон уже пыриськемысь дугдӥзы, выльысь дышетскисьёсты дасян уже пыриськыны? b

3. Кыӵе кулэ луись малпан вань Иисуслэн курон-косоназ?

³ Иисус милемлы валамон курон-косонъёс сётӥз. Ми адямиосты соослы дышетыны кулэ. Но милемлы тодамы возёно  одӥг кулэ луись малпанэз. Иисус ӧз вера: «Калыкъёсты дышетэлэ... ваньмызлы, мае Мон тӥледлы косӥ». Со шуиз: «Калыкъёсты дышетэлэ... ваньзэ, мае Мон тӥледлы косӥ, соосты быдэсъяны дышетэ». Озьыен, ми дышетскисьмылы тодон-валан сётыны гинэ кулэ ӧвӧл. Со сяна, солы валэктоно, кызьы басьтэм тодон-валанзэ улоназ пыртоно. Малы со туж кулэ?

4. Мае возьматэ «быдэсъяны» кыл? Вералэ пример.

⁴ «Быдэсъяны» кыл возьматэ малэсь ке кылзӥськемез. Нош кызьы адямиез дышетоно Иисуслэсь курон-косонъёссэ быдэсъяны? Эскеромы тае машинаез нуллыны дышетӥсь инструкторлэн примерез вылын. Кызьы со адямиосты дышетэ сюрес вылын мынон-ветлон куронъёсты быдэсъяны? Нырысь инструктор соослы классын тодон-валанъёс сётэ. Нош дышетскисьёс мед валалозы шуыса, кызьы та куронъёсты быдэсъяно, со гинэ тырмыт ӧвӧл. Куке дышетскись руль сьӧрын пуке, инструкторлы со вӧзын луоно но валэктоно, кызьы тодэмзэ уже кутоно. Малы дышетэ милемыз та пример?

5. а) Мар карыны дышетоно дышетскисьёсмес, Иоаннлэсь 14:15 но 1 Иоаннлэсь 2:3 лыдэ басьтыса? б) Кызьы дышетскисьёсмылы юрттоно Библиысь возетъёсты улоназы пыртыны?

⁵ Кинэн ке Библиез дышетыкумы, ми валэктӥськомы, мае возьма соослэсь Инмар. Но та тырмыт ӧвӧл. Милемлы соосты дышетоно басьтэм тодон-валанзэс улоназы пыртыны. (Лыдӟе Иоаннлэсь 14:15; 1 Иоаннлэсь 2:3.) Асьмелэн ужъёсынымы ми дышетскисьёсмылы возьматыны быгатӥськомы, кызьы Библиысь валтӥсь возетъёсты уже кутоно школаын, уж дорын яке шутэтскон дыръя. Ми соослы вераны быгатӥськомы, кызьы Инмарлэн Кылысьтыз визь-кенешъёс милемыз кыӵе ке кышкытлыклэсь утизы яке шонер быръён лэсьтыны юрттӥзы. Озьы ик соосын ӵош вӧсяськыны луоз, святой дух соослы шонер ужпумъёс кутыны мед юрттоз шуыса (Иоанн 16:13).

6. Мар эшшо кароно на, мукетъёссэ Иисуслэсь курон-косонъёссэ быдэсъяны дышетон понна?

⁶ Мар эшшо кароно на, мукетъёссэ Иисуслэсь курон-косонъёссэ быдэсъяны дышетон понна? Ми соослы юрттыны кулэ, дышетскисьёсты дасяны мылкыдзы мед луоз шуыса. Куд-огъёсыз малпаны ик кышкало, соослы тодытоно луоз шуыса. Соин ик милемлы дышетскисьёсмылы чидаса юрттоно Библиысь зэмлыкъёсты эшшо но мургес валаны. Та соослэсь сюлэмзэс вырӟытоз но тодытыны мылкыдзэс ӝутоз. Нош мар милемлы кароно, дышетскисьёсмылэн ӟеч иворез вераны мылкыдзы мед луоз шуыса?

7. Мар милемлы кароно, дышетскисьлэн ӟеч иворез вераны мылкыдыз мед луоз шуыса?

⁷ Ми дышетскисьмылы таӵе юанъёс сётыны быгатӥськомы: «Кызьы Библиысь тодон-валанъёс тӥлесьтыд улондэс умойгес каризы? Кулэ-а та тодон-валанъёсты мукет адямиослы но тодыны? Кызьы тӥ соослы юрттыны быгатӥськоды?» (Мад. 3:27; Матф. 9:37, 38). Возьматэ дышетскисьтылы валтӥсь дышетон тӥрлыкъёс пӧлысь буклетъёсты. Ӵектэ солы бырйыны сооссэ, кудъёсыз, солэн малпамезъя, ӵыжы-выжыосызлы, эшъёсызлы яке ӵош ужасьёсызлы тунсыко потозы. Собере дышетскисьтылы кӧня ке буклетъёс сётэ но соин ӵош малпаське, кыӵе учырын но кызьы соосты лякытэн ӵектыны луоз. Нош куке дышетскисьмы пылатӥськымтэ ивортӥсь луоз, солы юрттон понна, ми соин ӵош тодытомы (Екк. 4:9, 10; Лука 6:40).

8. Малы дышетскисьёслы Инмарез но матысьёссэс юн яратоно? (Озьы ик учке « Кызьы юрттоно дышетскисьлы Инмарез эшшо но юнгес яратыны» рамкаез.)

⁸ Висъялэ саклыктэс: Иисус милемлы курон-косон сётӥз мукетъёссэ дышетыны ваньмызлы,  мае со косӥз. Со пӧлы пыро кык валтӥсь курон-косонъёс но — Инмарез яратыны но матысьтэ яратыны (Матф. 22:37—39). Кыкез ик та курон-косонъёс герӟаськемын тодытон но дышетскисьёсты дасян ужен. Малы ке шуоно ужаны-тыршыны мылкыдмес нырысь ик ӝутэ яратон — Иеговаез но матысьёсмес яратон. Зэм но, куд-ог дышетскисьёслы малпаны ик кышкыт, соослы тодмотэм адямиосын вераськоно луоз шуыса. Но ми соосты оскытыны быгатӥськомы, Иеговалэн юрттэменыз, соос адямиослэсь кышканзэс каллен вормыны быгатозы шуыса (Пс. 17:2—4; Мад. 29:25). Та статьялы рамкаын гожтэмын, кызьы дышетскисьёсмылы юрттоно Инмарез эшшо но юнгес яратыны. Нош мар карыны быгатэ кенеш, соос Инмарлы но матысьёссылы яратонзэс возьматыны мед дышетскозы шуыса?

9. Мар валаны юрттоз машинаез нуллыны дышетскись адямилы, кызьы ассэ сюрес вылын возёно?

⁹ Нош ик малпаськомы машинаез нуллыны дышетскись адями сярысь. Руль сьӧрын пукыкуз, со инструкторез кылзыса гинэ уг дышетскы, нош мукет водительёс шоры учкыса но дышетске. Кылсярысь, инструктор дышетскисезлэсь саклыксэ висъяны быгатэ мукет водительлы, кудӥз матэ югдытӥсь тылзэ ӝуатэ, солы пумит мынӥсь водительёсты медаз мальдыты шуыса, яке артысь машиналы мукет чуре султыны луонлык сётэ. Озьы дышетскись валалоз, кызьы ассэ сюрес вылын возёно.

10. Мар юрттоз дышетскисьлы Инмарен кусыпъёссэ юнматыны?

¹⁰ Озьы ик адями но, кудӥныз ми Библиез дышетӥськомы но кудӥз али гинэ улонэ нуись сюрес вылэ султӥз, милемыз кылзыса гинэ уг дышетскы, нош Иеговалэн мукет ужась-тыршисьёсыз шоры учкыса но дышетске. Озьыен, мар юрттоз дышетскисьлы эшшо но ӝоггес Инмарен кусыпъёссэ юнматыны? Кенешлэн пумиськонъёсаз ветлон. Пумиськонъёсын дышетскыса, со эшшо но мургес Библиез валалоз, осконзэ юнматоз но юнгес Инмарез яратоз (Ап. уж. 15:30—32). Со сяна, Эксэйлык юртын ми дышетскисьмес тодматыны быгатӥськомы вын-агайёсын но сузэр-апайёсын, кудъёсыныз солэн мар ке но огкадез вань. Пумиськонъёсын солэн адӟемез луоз, кызьы Иеговалэн ужась-тыршисьёсыз зэмос христиан яратонзэс возьмато. Эскеромы куд-ог учыръёсты.

11. Кинэн тодматскемзы луэ дышетскисьёслэн Эксэйлык юртын но кыӵе пайда со соослы вайыны быгатэ?

¹¹ Шуом, Библиез дышетэ кышномурт, кудӥз нылпизэ одӥгназ будэтэ. Эксэйлык юртын со тодматске сузэрен, кудӥзлэн сыӵе ик югдурез. Кышномурт адӟе, макем тырше сузэрмы пичи нылпиосыныз ӵош кенешлэн пумиськонъёсаз ветлыны. Та солэн сюлмаз ик пыре. Яке син азямы пуктомы мукет учырез. Пиосмурт, кудӥз Библиез дышетэ, тамак кысконзэ нокызьы но куштыны уг быгаты. Со тодматске агаен, кудӥз азьвыл сыӵе ик шуг-секытэн нюръяськиз. Агай пиосмуртлы валэктӥз: макем золгес со яратӥз Иеговаез, сокем юнгес мылкыдыз луиз Инмарлэн курон-косонъёсызъя улыны (2 Кор. 4:7; 7:1). Собере агай вераз на: «Мон быгатӥ тамак кысконме куштыны, тӥ но быгатоды». Солэн кылъёсыз пиосмуртэз юнмато. Нош тани эшшо одӥг учыр. Нылмурт, кудӥз Библиез дышетэ, Эксэйлык юртын тодматске сыӵе ик аресъем сузэрен но адӟе, Иеговалы ужан-тыршон солы туж бадӟым шумпотон вае шуыса. Нылмуртлэн тодэмез потэ, малы сузэрмы котьку но шумпотыса улэ.

12. Малы вераны луоз, дышетскисьлы Инмарен кусыпъёссэ юнматыны кенешысь котькуд ивортӥсь юрттыны быгатэ шуыса?

¹² Пӧртэм вын-агайёсын но сузэр-апайёсын тодматскыса, дышетскись эшшо но умойгес  валалоз, кызьы быдэсъяно Христослэсь курон-косонзэ — Инмарез но матысьёсты яратыны (Иоанн 13:35; 1 Тим. 4:12). Со сяна, кызьы гожтэмын вал ини, дышетскись адӟем карыны быгатэ христиан муртъёслэсь, кудъёсыз солэн кадь ик шуг-секытъёсын пумиськизы. Со адӟоз, Христослэн дышетскисез луон понна, кулэ луись воштӥськонъёс лэсьтыны со но быгатоз шуыса (К. Зак. 30:11). Кенешысь котькуд ивортӥсь дышетскисьлы юрттыны быгатэ Инмарен кусыпъёссэ юнматыны (Матф. 5:16). Нош кызьы тӥ юрттӥськоды дышетскисьёслы, кудъёсыз пумиськонъёсы ветло?

13, 14. Кызьы Иисус апостолъёсыз шоры учкиз, куке соос, «сое кельтыса, ваньзы бызьыса кошкизы»?

¹³ Милям юрттэммы потэ вын-агайёслы но сузэр-апайёслы, кудъёсыз тодытэмысь дугдӥзы, соос тодытон но дышетскисьёсты дасян уже выльысь мед пыриськозы шуыса. Та ласянь ми Иисуслэсь адӟем карыны быгатӥськомы. Ойдолэ эскеромы, кызьы со ассэ возиз апостолъёсыныз, кудъёсыз огдырлы лябӟизы вал.

¹⁴ Музъем вылын ужан-тыршонэзлэн пумаз, куке Иисуслэн кулон дырыз вуэ вал ини, апостолъёс, «сое кельтыса, ваньзы бызьыса кошкизы» (Марк 14:50; Иоанн 16:32). Кызьы Иисус соос шоры учкиз? Улӟемез бере ӝоген со вераз куд-ог кышномуртъёслы, кудъёсыз солэн дышетскисьёсыз пӧлын вал: «Эн кышкалэ. Мынэлэ, Мынам братъёсылы ивортэлэ. Галилеяе мед мынозы, отысен соос Монэ адӟозы» (Матф. 28:10). Иисус апостолъёсызлэсь ӧз палэнскы. Соос сое кельтӥзы ке но, Иисус азьло кадь ик соосты вын-агайёс шуыса нимаз. Атаез сямен, Иисус дась вал соосты простить карыны но гажан-жалянзэ возьматыны (4 Экс. 13:23).

15. Кызьы ми учкиськомы соос шоры, кинъёс тодытэмысь дугдӥзы?

¹⁵ Ми но озьы ик учкиськомы соос шоры, кинъёс тодытэмысь дугдӥзы, но соос сярысь сюлмаськиськомы. Соос милям вын-агайёсмы но сузэр-апайёсмы, ми соосты яратӥськомы! Ми тодӥськомы, кызьы соос вань сюлмысьтызы ужазы-тыршизы — куд-огъёсыз трос дасо аръёс ӵоже (Евр. 6:10). Ми туж мӧзмиськомы соослэсь! (Лука 15:4—7). Кызьы ми быгатӥськомы Иисуслэсь адӟем карыны но соос сярысь сюлмаськеммес возьматыны?

16. Кызьы тодытэмысь дугдэм вын-агайёс но сузэр-апайёс сярысь сюлмаськеммес возьматоно?

¹⁶ Сюлмысь ӧте соосты кенешлэн пумиськонъёсаз. Апостолъёсызлэсь мылкыдзэс юнматон понна, Иисус ӧтиз соосты нимысьтыз пумиськонэ (Матф. 28:10б; 1 Кор. 15:6). Нош ми тодытэмысь дугдэм вын-агайёсты но сузэр-апайёсты кенешлэн пумиськонъёсаз ӧтьыны быгатӥськомы. Валаны кулэ, соос пумиськонэ лыктыны соглаш мед кариськозы шуыса, соосты одӥг пол гинэ ӧтёно уз луы, дыр. Иисус шумпотӥз, луоз, куке дышетскисьёсыз ӧтёнэзлы вазиськизы, ми но озьы ик шумпотомы (Матф. 28:16; ӵошатэ Лукалэсь 15:6).

17. Кызьы милемлы асьмеды возёно, куке пумиськонэ лыктэ тодытэмысь дугдэм агай яке сузэр?

¹⁷ Соосты шуныт пумиталэ. Иисус тыршиз, дышетскисьёсыз асьсэды умойтэм медаз шӧдэ шуыса: со ӧз возьма, куке соос со доры лыктозы, нош ачиз, соос доры мыныса, вераськыны кутскиз (Матф. 28:18). Нош кызьы ми асьмеды возёмы, куке пумиськонэ лыктоз тодытэмысь дугдэм агай яке сузэр? Милемлы асьмелы соин ӟечбуръяськоно но сое шуныт пумитано. Нырысь ми сюлмаськомы, вылды, тупась кылъёс ум шедьтэ шуыса. Сыӵе дыре вераны луоз, ми сое адӟыны шумпотӥськомы шуыса,— соку адями ассэ умойтэм уз шӧды.

18. Кызьы ми юрттыны быгатӥськомы тодытэмысь дугдэм агайёслы но сузэръёслы?

 ¹⁸ Оскытэ соосты, тӥ юрттыны дась шуыса. Иисуслэн дышетскисьёсыз малпазы, вылды, Эксэйлык сярысь ӟеч иворез быдэс дунне вылын тодытыны уз быгатэ шуыса. Нош Иисус соосты оскытӥз: «Дунне бырытозь, Мон тӥледын огазьын» (Матф. 28:20). Юрттӥз-а та дышетскисьёслы? Одно ик юрттӥз! Ӝоген соос «дугдылытэк дышетылӥзы, Иисус Христос сярысь Ӟеч Ивор тодытыса ветлӥзы» (Ап. уж. 5:42). Тодытэмысь дугдэм вын-агайёслы но, сузэр-апайёслы но юрттыны кулэ. Оло нош, соослы кышкыт тодытон уже выльысь пыриськыны. Но ми соосты оскытыны быгатӥськомы, соос огназы уз тодытэ шуыса. Куке соос дась луозы, ми соослы ӵектыны быгатӥськомы тодытон уже ӵош пыриськыны. Юрттэммы понна соос одно ик тау карозы. Ми тодытэмысь дугдэм ивортӥсьёс шоры вын-агайёс но сузэр-апайёс шоры кадь учкиськомы ке, соос выльысь тодытыны кутскозы, вылды, нош со быдэс кенешлы шумпотон ваёз.

19. Кыӵе мылкыдмы милям вань но малы?

¹⁹ Кӧня дыр ӵоже ми дышетскисьёсты дасяломы на? Иисус вераз: «Дунне бырытозь» (Матф. 28:20). Быгатомы-а ми ужмес быдэстыны? Милям туж потэ быдэстэммы. Ми шумпотыса сётӥськомы кужыммес, дырмес но коньдонмес, зӥбыт-востэм адямиосты шедьтон понна, кудъёсыз Инмарез утчало (Евр. 11:6). Озьы ми адӟем кариськомы Иисуслэсь, кудӥз вераз: «Мынам сиёнэ — Монэ Ыстӥсьлэсь эриксэ карон но Солэсь ужзэ быдэстон» (Иоанн 4:34; 17:4). Милям но вань сюлмысьтымы быдэстэммы потэ милемлы оскем ужез (Иоанн 20:21). Но милям потэ, та уже милемын ӵош мукетъёсыз но мед пыриськозы шуыса, озьы ик тодытэмысь дугдэм вын-агайёс но сузэр-апайёс (Матф. 24:13).

20. Малы ми быгатӥськомы быдэсъяны милемлы оскем ужез, 2 Коринфъёслы 4:7 лыдэ басьтыса?

²⁰ Зэм но, Иисуслэсь курон-косонзэ быдэсъяны капчи ӧвӧл. Но ми огнамы ӧвӧл. Иисус кылзэ сётӥз, милемлы юрттоз шуыса. Со сяна, милемлы юрттэ Иегова, малы ке шуоно ми «Инмарлэн ужасьёсыз» но «Христосэн ӵош тодытӥськомы» (1 Кор. 3:9; 2 Кор. 2:17). Озьыен, ми быгатӥськомы быдэсъяны милемлы оскем ужез но мукетъёсызлы юрттыны. Макем со бадӟым шумпотон но дан! (Лыдӟе 2 Коринфъёслы 4:7).