1. Ndomo ca lekisiwa kelivulu lia Mateo 28:18-20, ocikundi cipi Yesu a eca kolondonge viaye?

YESU noke lioku pinduiwa wa molẽha kolondonge viaye via kala ko Galilea. Eye wa kuatele cimue ci kuete esilivilo a yonguile oku va sapuila. Ocina cipi? Olondaka viaco vi sangiwa ku Mateo 28:18-20.—Tanga.

2. Apulilo api tu konomuisa?

² Ocihandeleko ca Yesu coku longisa omanu oco va linge olondonge, ci tiamisiwilavo kafendeli va Suku koloneke vilo. Cilo, tu konomuisa apulilo atatu atiamẽla kocikele Yesu a tu ĩha. Tete, poku longisa olonumbi via Suku kondonge yimue yokaliye, nye tu sukila oku linga vali? Vali, ndamupi akundi vosi vekongelo va pondola oku kuatisa koku kula kuondonge yimue Yembimbiliya konepa yespiritu? Tatu, tu kuatisa ndati vamanji vana va liwekapo oku kunda loku endaenda kolohongele oku fetika vali oku kunda?

3. Olonumbi vipi Yesu a kongela vocikundi caye?

³ Olonumbi via Yesu via sunguluka. Tu sukila oku longisa omanu ovina eye a handeleka. Pole, ka tu ka ivaliko etosi limue lia velapo. Yesu ka popele hati: ‘Va longisi ovina viosi ndo kundiki.’ Pole, wa popia hati: Va longisi “oku linga ovina viosi ndo kundiki.” Oco tu kapeko onumbi ya Yesu, tu sukila oku longisa olondonge Viembimbiliya ovina va sukila oku linga kuenda oku va lekisa ndomo va ci linga. (Ovil. 8:31) Momo lie?

4. Nye ci lomboloka oku kapako ocihandeleko cimue? Ci lombolola.

 ⁴ ‘Oku kuama’ ocihandeleko cimue ci lomboloka oku ci pokola. Tu kuatisa ndati omunu umue oku linga, ale oku pokola kovina Yesu a handeleka? Ocindekaise ci kuãimo ci tu kuatisa oku kuata elomboloko lieci tu sukila oku linga. Ndamupi ulongisi umue woku endisa ekãlu a longisa olondonge viaye oku pokola kovihandeleko via kapiwa lakuenje velombe? Tete Ulongisi olongisa olondonge viaye oku pokola kovihandeleko vietapalo. Pole oco a longise olondonge viaye ndomo va vi pokola, eye o sukila oku linga ovina vikuavo. Eye enda kumue londonge loku eca kokuaye olonumbi osimbu a endisa kuenda ondonge yaco yi kapako eci a kasi oku lilongisa. Nye tu lilongisila kocindekaise eci?

5. (a) Ndomo ca tangiwa Yoano 14:15; kuenda 1 Yoano 2:3, nye tu sukila oku longisa kolondonge Viembimbiliya oku linga? (b) Tukula olonumbi tu pondola oku eca kolondonge.

⁵ Eci tu longisa Embimbiliya vakuetu, tu va longisa eci Suku a lavoka kokuetu. Pole, tu sukila oku linga vali ovina vikuavo. Tu sukila oku longisa olondonge Viembimbiliya oku kapako ovina va lilongisa komuenyo wavo. (Tanga Yoano 14:15; 1 Yoano 2:3.) Ndeci, tu lekisa kokuavo ndomo va pondola oku kapako ocili ovo va lilongisa Vembimbiliya kosikola, kupange, ale poku linga olomapalo. Tu pondolavo oku va sapuila ulandu womuenyo wetu oco tu lekisa kokuavo ndomo oku kapako olonumbi Viembimbiliya ca tu teyuila ale ndomo ca tu kuatisa oku nõla onjila yimue lolondunge. Eci tu kasi lolondonge Viembimbiliya, tu likutilila ku Yehova oco espiritu sandu li va songuile.—Yoa. 16:13.

6. Nye ca kongela voku longisa vakuetu oku pokola kovihandeleko via Yesu?

⁶ Nye ca kongela voku longisa vakuetu oku pokola kocihandeleko ca Yesu? Tu sukila oku kuatisa olondonge Viembimbiliya oku kuata onjongole yoku longisa omanu oco va linge olondonge. Olondonge vimue pamue vi kuata usumba woku kunda. Omo liaco, tu sukila oku kuata epandi, osimbu tu va kuatisa oku kuata elomboloko lia suapo liocili Cembimbiliya, oco va kuate ekolelo liapama. Kuenje tu ka vetiya utima wavo kuenda va ka kuata onjongole yoku kunda. Nye tu sukila oku linga oco tu kuatise olondonge oku kuata onjongole yoku kunda?

7. Tu kuatisa ndati ondonge yimue oku kuata onjongole yoku kundila olondaka viwa ku vakuavo?

⁷ Tu sukila oku linga apulilo kolondonge ndeci: “Ndamupi oku tava kesapulo Liusoma ca pongolola omuenyo wove? Osima hẽ okuti omanu vakuavo va sukila oku yeva esapulo liaco? Nye o sukila oku linga oco o va kuatise?” (Olosap. 3:27; Mat. 9:37, 38) Lekisa kondonge otuikanda tu panga onepa Kovimãleho vietu Vioku Longisa kuenda ecelela okuti o nõla vimue eye a sima okuti vi ka kuatisa epata, akamba, ale vana va talavayela kumosi. * Eca etendelo limue liokuikanda tuaco kondonge. Linga laye ocindekase cimue ndomo ku eciwa okokanda kamue lonjila ya sunguluka. Ocili okuti eci ndonge a taviwa oco a kale ukundi ka papatisiwile, tu sukila oku kunda laye oco tu u kuatise.—Uku. 4:9, 10; Luka 6:40.

8. Momo lie ci kuetele esilivilo olondonge Viembimbiliya oku kuata ocisola ca pama ku Suku kuenda komanu? (Talavo okakasia “ Ndomo tu Kuatisa Olondonge Viembimbiliya Oku Pamisa Ocisola Cavo ku Suku.”)

⁸ Ivaluka okuti Yesu wa tu sapuila oco tu longise omanu “oku linga ovina viosi” a tu kundika. Ocili okuti, mua kongela ovihandeleko  vivali via velapo okuti, oku sola Suku kuenda omanu, vivali viaco vi kuete elitokeko kupange woku kunda kuenda kupange woku longisa omanu oco va linge olondonge. (Mat. 22:37-39) Elitokeko lipi li kasipo? Esunga lia velapo litu vetiya oku kunda ocisola tu kuetele Suku kuenda omanu. Pamue kolondonge Viembimbiliya oku kuata ovisimĩlo vioku kunda ca va kokela usumba. Pole, tu sukila oku va sapuila okuti, Yehova o ka va kuatisa oku yula usumba va kuetele omanu. (Osa. 18:1-3; Olosap. 29:25) Okakasia ka tiamẽla kocipama cilo, ka lombolola ananga tu sukila oku kuama oco tu kuatise olondonge oku vokiya ocisola cavo ku Suku. Lonjila eyi, ekongelo li pondola oku kuatisa ndati ondonge yokaliye Yembimbiliya oku vokiya ocisola caye?

9. Vocindekaise cu wendisa, volonjila vipi ondonge a lilongisa ovina vi kuete esilivilo?

⁹ Sokolola vali kocindekaise comunu va kasi oku longisa oku endisa. Osimbu va kasi vetapalo lulongisi ponele yaye, volonjila vipi eye a kasi oku lilongisa? Poku yevelela ulongisi waye kuenda oku lavulula lutate omanu vakuavo va kasi oku endisa. Ndeci, ulongisi pamue u lekisa omanu vakuavo vakuakuendisa ndomo va lekisa ocisola poku eca epuluvi ku vakuavo. Ale ulongisi o sapuila umue ukuakuendisa oco a tepulule ocinyi cekãlu liaye okuti ka ci tateka vakuavo va endisa. Ovindekaise evi, vi longisa ondonge oku kuama olonumbi viaco poku endisa.

10. Nye ci ka kuatisa ondonge yimue Yembimbiliya oku kula konepa yespiritu?

¹⁰ Cimuamue haico okuti, eci ondonge yimue yi fetika oku vumba Yehova, ka lilongisa lika kulongisi waye, pole, o lilongisilavo kongangu yiwa yafendeli vakuavo va Yehova. Nye ci ka kuatisa ondonge Yembimbiliya oku kula konepa yespiritu? Poku endaenda kolohongele. Momo lie? Momo ovina va ka yeva kolohongele, ci ka va kuatisa oku lilongisa ovina vialua, oku pamisa ekolelo liavo kuenda oku vokiya ocisola cavo ku Suku. (Ovil. 15:30-32) Citavavo okuti ulongisi u lekisa ku vamanji vakuavo okuti pamue va kasi oku liyaka lovitangi vimuamue. Ndonge o ka limbuka ongangu yiwa ku vamanji yoku lekisa ocisola vekongelo. Sokolola kovolandu a kuãimo.

11. Ongangu yipi ondonge yimue yi pondola oku limbuka vekongelo kuenda ci kuatisa ndati ondonge yimue?

¹¹ Ondonge yimue Yembimbiliya okuti onjali yi tekula omãla likawaye o mola okuti manji umue ukãi o kasivo vekalo limuamue. Eci ci ka vetiya utima wondonge poku mola alikolisilo manji a siata oku linga yoku iya Konjango Yusoma lomãla vaye vatito. Ondonge yimue yi kasi oku liyaka locitangi coku sipa, kuenje o sanga ukundi umue ya liyakavo locitangi cimuamue noke wa ci yula. Ukundi o sapuila kondonge ndomo ocisola a kuatela Yehova co kuatisa oku pokola kovihandeleko viaye. (2 Va Kor. 7:1; Va Fil. 4:13) Noke ya manji oku u sapuila ndomo a liwekapo oku sipa, eye wo sapuila okuti, “Ove o pondolavo oku liwekapo.” Umalẽhe umue okuti ondonge Yembimbiliya o limbuka okuti manji umue umalẽhe vekongelo o kuete esanju omo lioku kala ombangi ya Yehova. Eci ondonge Yembimbiliya yi limbuka ndomo manji umalẽhe a sanjuka eye o ka vetiyiwa oku kũlĩha vali esunga lieci manji olonjanja viosi a sanjukila.

12. Momo lie tu popela okuti omunu lomunu vekongelo o kuete ocikele coku kuatisa olondonge Viembimbiliya?

¹² Eci ondonge yi kũlĩha vamanji valua vakuekolelo, oyo yi ka lilongisila kongangu yavo ndomo a pokola kocihandeleko ca Kristu coku sola Suku kuenda omanu vakuavo. (Yoa. 13:35; 1 Tim. 4:12) Handi vali, ndomo tua ci mola ale, ondonge yimue Yembimbiliya yi pondola oku lilongisila kakundi va liyaka  lovitangi vimuamue ndevi viaye. Ondonge yi lilongisila kovolandu o ko kuatisa oku linga apongoloko a sukila oco a linge ondonge ya Kristu. (Esin. 30:11) Omunu lomunu vekongelo o pondola oku kuatisa volonjila via litepa koku kula kuondonge Yembimbiliya konepa yespiritu. (Mat. 5:16) Alikolisilo api wa siata oku linga oco o vetiye olondonge Viembimbiliya veyaya kolohongele?

13-14. Yesu wa tata ndati olondonge viaye eci via honguele?

¹³ Etu tu yongola oku kuatisa vamanjetu vana va liwekapo oku kunda oku tẽlisa vali ocikundi ca Yesu coku longisa omanu oco va linge olondonge. Onjila ndomo Yesu a tata ovapostolo vaye yi situlula eci tu sukila oku linga koloneke vilo.

¹⁴ Yesu kesulilo liupange waye palo posi osimbu handi ka file, olondonge “viosi vio siapo kuenda via tila.” (Mar. 14:50; Yoa. 16:32) Yesu wa tata ndati olondonge viaye eci vepuluvi limue va honguele? Yesu noke liepinduko liaye, wa sapuila kolondonge vimue okuti: “Ko ka kuati usumba! Kuendi ka sapuili vamanjange [okuti ame nda pinduiwa].” (Mat. 28:10a) Yesu ka yandulukile ovapostolo vaye. Ndaño okuti ovo vo yandulukile, eye handi wa va tukula okuti “vamanjange.” Ndeci Yehova, Yesu wa lekisa ohenda kuenda ocituwa coku ecela.—2 Olos. 13:23.

15. Cipi ocisimĩlo cetu catiamẽla ku vana va liwekapo oku kunda?

¹⁵ Cimuamue haico, tu sukila oku lekisa okuti tua kapako vana va liwekapo oku kunda. Ovo vamanjetu kuenda tu va sole! Handi tu ivaluka ciwa upange va linga locisola kosimbu, vamue va u linga vokuenda kuanyamo alua. (Va Hev. 6:10) Ocili okuti, tu va kuetele ongeva! (Luka 15:4-7) Poku setukula Yesu, volonjila vipi tu lekisa okuti tua va kapako?

16. Tu lekisa ndati okuti tua kapako vamanjetu va liwekapo oku kunda?

¹⁶ Locisola calua va laleka oku enda kolohongele. Onjila yimue Yesu a kuama oco a pamise olondonge viaye, poku va laleka kohongele yimue. (Mat. 28:10; 1 Va Kor. 15:6) Cimuamue haico koloneke vilo, tu sukila oku vetiya vana va liwekapo oku kunda oco va endaenda kolohongele nda ovo ka va endaenda. Tua kũlĩha okuti, tu sukila oku va laleka olonjanja viosi. Ocili okuti, Yesu wa kuata esanju eci olondonge viaye via tava elaleko liaye.—Sokisa Mateo 28:16; Luka 15:6.

17. Ocituwa cipi tu sukila oku lekisa eci umue wa liwekapo oku kunda loku endaenda kolohongele eya kohongele?

¹⁷ Va yolela lutima wosi. Yesu wa kuatisa olondonge viaye oku lianja eci ovo va li sanga laye; eye wa fetika oku sapela lavo. (Mat. 28:18) Nye tu sukila oku linga eci omunu una wa liwekapo oku kunda loku endaenda kolohongele eya Vonjango Yusoma? Tu sukila oku u yolela lesanju. Kefetikilo pamue ka tua kũlĩhĩle eci tu popia. Pole oco a liyeve ciwa, tu pondola oku popia lika okuti, tua sanjuka oku ku mola.

18. Tu vetiya ndati akundi vana okuti va liwekapo oku kunda loku endaenda kolohongele?

¹⁸ Va vetiya. Citava okuti olondonge via Yesu via liyeva okuti ka va ponduile oku kundila koluali luosi. Yesu wa vetiya olondonge viaye poku popia hati: “Ñasi kumue lene oloneke viosi.” (Mat. 28:20) Eci ca kuatisa hẽ olondonge viaye? Oco. Momo noke liokatembo kamue, ovo va kala “oku longisa loku kunda olondaka viwa.” (Ovil. 5:42) Akundi vana okuti va liwekapo va sukilavo evetiyo. Ovo pamue va kuete ohele yoku fetika vali oku kunda. Tu sukila oku va vetiya okuti upange waco ka va ka  u linga lika wavo. Eci ovo va fetika vali oku kunda, tu pondola oku enda lavo. Ocili okuti ovo va ka sanjukila ekuatiso lietu, eci va ka fetika vali oku kunda. Eci tu lekisa okuti tua kapako vana va liwekapo oku kunda loku va tenda nda vamanji, citava okuti ci ka va kuatisa oku tiuka vali vekongelo kuenda vamanji vosi vekongelo va ka sanjuka.

19. Yipi onjongole yetu kuenda momo lie?

¹⁹ Toke otembo yipi tu amamako oku linga upange wo kunda loku longisa omanu oco va linge olondonge? Toke kesulilo liovina vi kasi voluali. (Mat. 28:20; tala Elomboluilo Liolondaka Vimue Viembimbiliya, “Esulilo liovina vi kasi voluali.”) Anga hẽ tu pondola oku tẽlisa ocikundi Yesu a tu ĩha? Tua nõlapo oku ci linga! Tua nõlapo oku eca otembo yetu, ongusu kuenda ovipako vietu oco tu sandiliye “vakuotima wa sungulukila omuenyo ko pui.” (Ovil. 13:48) Poku ci linga, tu kuama ongangu ya Yesu. Eye wa popia hati: “Okulia kuange oku linga ocipango cu wa numa loku tẽlisa upange waye.” (Yoa. 4:34; 17:4) Eci oco tu yongolavo oku linga. Etu tu yongola oku tẽlisa upange va tu kundika. (Yoa. 20:21) Handi vali, tu yongola okuti vakuetu oku kongelamo vana va liwekapo oku kunda loku endaenda kolohongele tua amamako oku pandikisa oku linga upange waco.—Mat. 24:13.

20. Ndomo ca lekisiwa kukanda ku Va Filipoi 4:13, momo lie tu ponduila oku tẽlisa upange Yesu a tu handeleka oku linga?

²⁰ Ocili okuti, oku tẽlisa ocikundi ca eciwa la Yesu ka ca lelukile. Pole, upange waco ka tu kasi oku u linga lika wetu. Yesu wa likuminya okuti o kala letu. Eci tu linga upange woku longisa omanu oco va linge olondonge, “tulondingupange kumue la Suku” kuenda “kumue la Kristu.” (1 Va Kor. 3:9; 2 Va Kor. 2:17) Omo liaco, tu pondola oku u tẽlisa. Hesumũlũhokuolio tu kuete oku tẽlisa ocikundi eci coku kuatisa omanu oco va ci lingevo!—Tanga Va Filipoi 4:13.