1. Iji vọ yen Jesu vwọ kẹ idibo rọyen vwẹ Matiu 28:18-20?

A VWỌ rhọnvwọ Jesu nushi nu, ọ da vwomaphia kẹ idibo rọyen ri siomakoko vwẹ Galili. O vwo ovuẹ ọghanghanre ọvo rọ guọnọ vuẹ ayen. Die yen o shekpahen? E si eta rọyen na phiyọ Matiu 28:18-20.—Se.

2. Enọ vọ yen a cha kpahenphiyọ?

² Iji rẹ Jesu jiri nẹ e gbe idibo, ji djobọte idibo rẹ Ọghẹnẹ eje nonẹna. Ọtiọyena, e jẹ avwanre kpahenphiyọ enọ erha ri churobọ si iruo rẹ Jesu vwọ kẹ avwanre na. Ọrẹsosuọ, vwọ vrẹ oborẹ Ọghẹnẹ guọnọ mie avwanre re che yono idibo kpokpọ kpahen, die ọfa yen ofori nẹ e ru? Ọrivẹ, idjerhe vọ yen ighwoghwota na eje rehẹ ukoko na se vwo toroba ẹyan-obaro rẹ ihwo ra vwẹ Baibol vwo yono? Ọrerha, mavọ yen e se vwo phi oruru rẹ iruo rẹ odibo egbe na phiyọ oma rẹ iniọvo re dobọ rẹ aghwoghwo ji?

3. Die yen Jesu vwọba iji rọyen na?

³ Iji ri Jesu na phẹnre. Avwanre che yono ihwo obo rọ vuẹ avwanre nẹ e ru. Ẹkẹvuọvo, o vwo orọnvwọn ọghanghanre ọvo ro fori nẹ e niso. Ọ dia Jesu tare nẹ, ‘Yono ayen erọnvwọn eje ri mi ji iji rọyen kẹ ovwan’ na-a. Ukperẹ ọtiọyen, ọ da ta: Yono ayen “ayen vwọ riẹn otọ rẹ imu na ejobi rẹ mi ji iji kẹ ovwan na.” Kọyen a cha davwẹngba vwo dje erọnvwọn sansan kẹ ihwo re yono, ukperẹ avwanre de vwọ dia iyono ghevweghe. (Iruo 8:31) Diesorọ?

4. Die yen o mudiaphiyọ ra vwọ riẹn otọ rẹ iji? Djekpahọn.

 ⁴ Ra vwọ “riẹn otọ” rẹ iji, mudiaphiyọ e vwo ru nene. Ra vwọ nabọ djisẹ rẹ obo re se vwo yono ohwo vwọ riẹn otọ yẹrẹ nene iji ri Kristi, roro kpahen udje nana. Mavọ yen ohwo ro yono ohwo ọfa obo ra djẹ imoto sa vwọ chọn uko vwo nene irhi ri suẹn idjerhe? Ẹsosuọ, ọ cha dia evunrẹ iklasi de yono ohwo na kpahen irhi ri suẹn idjerhe. Ẹkẹvuọvo, o vwo emu ọfa ro che ru tavwen ohwo na ki se nene irhi na. O che nene ohwo na chidia imoto je vwẹ odjekẹ sansan kẹ, rẹ ohwo na vwo ruẹ nene obo ro yonori na. Die yen avwanre se yono nẹ udje yena rhe?

5. (a) Wo nene obo rehẹ Jọn 14:15 kugbe 1 Jọn 2:3, die yen ofori nẹ e yono ihwo ra vwẹ Baibol vwo yono? (b) Djudje sansan ri shekpahen odjekẹ ra sa vwọ kẹ ihwo re yono.

⁵ Avwanre yono ihwo ra vwẹ Baibol yono oborẹ Ọghẹnẹ guọnọ mie avwanre. Jẹ, ọ ba etiyi-in. E ji che yono ayen oborẹ ayen sa vwọ reyọ oborẹ ayen yonori vwo ruiruo vwẹ akpeyeren ri kẹdẹ kẹdẹ rayen. (Se Jọn 14:15; 1 Jọn 2:3.) Kerẹ udje, avwanre sa chọn ayen uko vwọ riẹn oborẹ ayen sa vwọ vwẹ irhi ri Baibol vwo ruiruo vwẹ isikuru, iruo, kugbe ọke rẹ ayen da heha. Avwanre sa vuẹ ayen emu ọvo rọ phia kẹ avwanre vwo dje oborẹ irhi ri Baibol sẹro avwanre je chọn avwanre uko vwo brorhiẹn rẹ aghwanre. Avwanre sa nẹrhovwo rhe Jihova vwẹ irharo rayen nẹ ọ vwẹ ẹwẹn ọfuanfon rọyen vwo sun ayen.—Jọn 16:13.

6. Die ọfa yen o churobọ si re vwo yono ihwo vwọ riẹn otọ rẹ iji ri Jesu?

⁶ Die ọfa yen o churobọ si re vwo yono ihwo vwọ riẹn otọ rẹ iji ri Jesu? A cha chọn ayen uko vwo vwo owenvwe rẹ ayen vwo gbe idibo. Oshọ re vwo ru ọtiọyen se mu evo usun rayen. Ọtiọyena, ofori nẹ avwanre vwẹ erhiorin vwọ chọn ayen uko vwo vwo ẹruọ rẹ uyota ri Baibol na rere ayen se vwo vwo esegbuyota rọ ghwotọ. Ọke yena, Ota rẹ Ọghẹnẹ ko se te ubiudu rayen ji mu ayen vwo vwobọ vwẹ iruo rẹ aghwoghwo na. Die yen e se ru vwọ chọn ihwo re yono uko vwo vwo owenvwe rẹ ayen vwo ghwoghwo iyẹnrẹn esiri na kẹ ihwo efa?

7. Mavọ yen a sa vwọ chọn ohwo re yono uko vwo vwo owenvwe ro vwo ghwoghwo iyẹnrẹn esiri na kẹ ihwo efa?

⁷ Avwanre sa nọ ohwo rẹ avwanre vwẹ Baibol yono enọ nana: “Mavọ yen ovuẹ rẹ Uvie na ru wo rhiabọreyọ na vwo ru akpeyeren wẹn yovwin? Wo rorori nẹ ofori ihwo efa ji vwo nyo ovuẹ nana? Die yen wo se ru wọ chọn ayen uko?” (Isẹ 3:27; Mat. 9:37, 38) Dje itrati sansan rehẹ Ekpeti rẹ Uyono rẹ avwanre kẹ, rere ọ sane e ro rorori nẹ i che je ihwo rẹ orua rọyen, igbeyan rọyen, yẹrẹ ihwo re vẹ ọyen gba wian. Vwẹ evo usun rẹ e rọ sanere na kẹ. Nene yono obo rọ sa vwọ vwẹ itrati na kẹ ihwo vwẹ idjerhe rẹ ọghọ. Aphro herọ-ọ, avwanre cha davwẹngba vwo bicha ohwo rẹ avwanre yono na siẹrẹ a da rhọnvwe kẹ nẹ ọ dia oghwoghwota ro ji bromaphiyame-e.—Aghwo. 4:9, 10; Luk 6:40.

8. Diesorọ ọ vwọ dia obo re ghanre rẹ ihwo re yono vwo ru ẹguọnọ rẹ ayen vwo kpahen Ọghẹnẹ kugbe irivẹ rayen ganphiyọ? (Ji ni ekpeti na “ Obo re se Vwo ru Ẹguọnọ rẹ Ihwo re Yono Vwori Kpahen Ọghẹnẹ Ganphiyọ.”)

⁸ Karophiyọ nẹ Jesu ji avwanre nẹ e re yono ihwo rere ayen “riẹn otọ rẹ imu na ejobi” ro ji iji rọyen. Ọnana churobọ si irhi ivẹ re ma rho, ri muẹ avwanre vwo  vwobọ vwẹ iruo rẹ aghwoghwo vẹ odibo egbe na, re dia re vwo vwo ẹguọnọ rẹ Ọghẹnẹ kugbe ọrivẹ rẹ ohwo. (Mat. 22:37-39) Vwẹ idjerhe vọ? Ẹguọnọ rẹ Ọghẹnẹ kugbe ọrivẹ rẹ avwanre ọyen emu ọvo kiriguo ro muẹ avwanre vwo ghwoghwo. Oshọ re vwo vwobọ vwẹ iruo rẹ aghwoghwo na se mu ihwo evo ra vwẹ Baibol vwo yono. Ẹkẹvuọvo, avwanre sa kẹ ayen imuẹro nẹ Jihova cha chọn ayen uko vwo phi oshọ rẹ ohworakpọ kparobọ ememerha. (Une 18:1-3; Isẹ 29:25) Ekpeti rọ vwomaphia vwẹ uyono nana djisẹ rẹ owọẹjẹ rẹ avwanre sa reyọ vwọ chọn ihwo rẹ avwanre vwẹ Baibol yono uko vwo ru ẹguọnọ rẹ ayen vwo kpahen Ọghẹnẹ ganphiyọ. Vwọba, die yen ukoko na se ru vwọ chọn idibo kpokpọ uko vwo ru ẹguọnọ rayen ganphiyọ?

9. Idjerhe vọ yen ohwo ro yono obo ra djẹ imoto sa vwọ mrẹ udje eghanghanre ro se vwo ruiruo?

⁹ Jẹ e rhivwin kpo udje rẹ ohwo ro yono obo ra djẹ imoto na. Idjerhe vọ yen o ji se vwo yono mie oyono rọyen ro chidia kẹrẹ na, dede nẹ ọyen re yono na yen djẹ imoto na yanran? Womarẹ ọ vwọ kerhọ rẹ oyono rọyen, ji nẹ ihwo efa re djẹ imoto rayen yanran dẹndẹn. Kerẹ udje, oyono na se dje ohwo ọvo kẹ, rọ fọ kẹ imoto ọfa nẹ ọ ro obaro rọyen, yẹrẹ ro si urhukpẹ rọyen kpotọ rere ihwo re djẹ imoto cha sa vwọ mrorẹ fiotọ. Udje sansan tiọyena sa chọn ohwo re yono na uko ọke rọ da djẹ imoto.

10. Die yen cha chọn ohwo re yono uko vwọ yan obaro?

¹⁰ Vwẹ idjerhe vuọvo na, vwọ vrẹ ohwo ro yono na, ohwo ra vwẹ Baibol yono rọ yan vwẹ idjerhe rẹ arhọ na re, che yono emu buebun vwo nẹ udje esiri rẹ idibo ri Jihova efa. Ọtiọyena, die yen cha chọn ihwo re yono uko vwọ nabọ yan obaro? Uyono ẹra. Diesorọ? Odjekẹ ri Baibol ra vwọphia vwẹ emẹvwa cha chọn ayen uko vwo ru erianriẹn rayen kodophiyọ, ji ru esegbuyota vẹ ẹguọnọ rẹ ayen vwo kpahen Ọghẹnẹ ganphiyọ. (Iruo 15:30-32) Vwọba, wo se dje ohwo ru wo yono na kẹ iniọvo sansan vwẹ emẹvwa, ri phi egbabọse ro hirharokuẹ enẹna kparobọ re. Udje rẹ ẹguọnọ rẹ Inenikristi vọ yen ohwo re yono na sa mrẹ vwẹ ukoko na? Roro kpahen idje nana.

11. Udje sansan vọ yen ohwo re yono sa mrẹ vwevunrẹ ukoko na, kẹ mavọ yen ayen se djobọte wan?

¹¹ Aye ọvo re yono rọ dia oni rẹ ọyen ọvo vwẹrote emọ rọyen, vwo oniso rẹ oniọvo aye ọvo rẹ ẹdia rayen họhọ ohwohwo. O te re ẹwẹn mamọ rọ vwọ mrẹ oborẹ oniọvo aye na davwẹngba te, ro vwo muẹ emọ rọyen cha Ọguan Ruvie. Ohwo ọvo re yono rọ davwẹngba rọ vwọ dobọ rẹ isigati ephopho ji, da vwẹ ugbeyan vwo mu oghwoghwota ọvo ro phi ebẹnbẹn tiọyena kparobọ re. Oghwoghwota na da vuẹ oborẹ ẹguọnọ ro vwo kpahen Jihova chọn rọ uko vwo nene irhi rọyen. (2 Kọr. 7:1; 2 Kọr. 4:7) Rọ vwọ kerhọ rẹ ikuegbe rẹ oghwoghwota na nu, udu rẹ ohwo re yono na da rhe gan ọke rẹ oniọvo na vwọ vuẹ nẹ, “Wọ je sa dobọ rẹ isigati ephopho ji.” Ọmọtẹ ọvo ra vwẹ Baibol yono vwo oniso rẹ oniọvo aye ọvo rọ dia eghene, rọ riavwerhen rẹ akpeyeren rọyen kerẹ Oseri ri Jihova. Aghọghọ ro niso vwẹ oma rẹ oniọvo aye na da nẹrhẹ o vwo ẹwẹn rọ vwọ riẹn kpobarophiyọ kpahen oboresorọ oma vwọ vwerhen oniọvo na ọkieje.

12. Diesorọ a sa vwọ tanẹ kohwo kohwo vwevunrẹ ukoko na yen vwo oghwa rọ vwọ vwẹ ukẹcha kẹ ihwo re yono?

¹² Ihwo ra vwẹ Baibol yono de rhi vughe  ighwoghwota sansan re fuevun, udje esiri rẹ ighwoghwota na kọ sa nẹrhẹ ayen riẹn otọ rẹ urhi rẹ Kristi jiri nẹ e vwo ẹguọnọ rẹ Ọghẹnẹ kugbe irivẹ rẹ avwanre. (Jọn 13:35; 1 Tim. 4:12) Vwọba, kirobo ra tare jovwo, ohwo ra vwẹ Baibol yono se yono mie ighwoghwota ri ji rhiẹromrẹ obo ro hirharokuẹ enẹna. Udje esiri rẹ iniọvo tiọyena sa nẹrhẹ ọ riẹn nẹ o se ru ewene ro fori rere ọ sa vwọ dia odibo ri Kristi. (Urhi 30:11) Kohwo kohwo vwevunrẹ ukoko na se toroba ẹyan obaro rẹ ihwo re yono vwẹ idjerhe sansan. (Mat. 5:16) Die yen wo ruẹ rere wo se vwo phiuduphiyawọ rẹ ohwo re yono rọ cha uyono?

13-14. Mavọ yen Jesu nene iyinkọn rọyen rẹ ẹwẹn rayen kuọnre yerin wan?

¹³ Avwanre guọnọ vwẹ ukẹcha kẹ iniọvo avwanre re dobọ rẹ aghwoghwo ji, rere ayen vwọ rhoma ton aghwoghwo vẹ iruo rẹ odibo egbe na phiyọ. Oborẹ Jesu nene iyinkọn rọyen rẹ ẹwẹn rayen kuọnre yerin wan dje obo re se ru nonẹna.

¹⁴ Vwẹ oba rẹ iruo rẹ aghwoghwo rọyen vwẹ akpọ na, ọke ro che vwo ghwu vwo sikẹre mamọ re, iyinkọn na “ejobi da yan jovwo, ayen da djẹ.” (Mak 14:50; Jọn 16:32) Mavọ yen Jesu nene iyinkọn rọyen yerin wan ọke rẹ ẹwẹn rayen vwọ kuọnrọ? Ọmọke krẹn ra vwọ rhọvwọn nushi nu, Jesu da vuẹ idibo rọyen evo: “Wa djẹ oshọ-ọ: ovwan ra vuẹ imoni mẹ [nẹ a kpare ovwẹ vrẹn re].” (Mat. 28:10a) Jesu kpairoro vrẹ aye-en. Dede nẹ ayen djẹ jovwo, o ji se ayen “imoni mẹ.” Kerẹ Jihova, Jesu ọyen ohwo vẹ arodọnvwẹ kugbe evwoghovwo.—2 Ivie 13:23.

15. Ẹwẹn vọ yen avwanre vwo kpahen iniọvo re dobọ rẹ aghwoghwo ji?

¹⁵ Kerẹ Jesu, avwanre vwo ọdavwẹ rẹ ihwo re dobọ rẹ aghwoghwo ji. Ayen iniọvo rẹ avwanre, avwanre vwo ẹguọnọ rayen! Avwanre je karophiyọ owian ọgangan rẹ ayen wianre vwẹ obuko. Evo tobọ dobọ rẹ aghwoghwo ji vwẹ ikpe buebun re. (Hib. 6:10) Avwanre guọnọre nẹ ayen rhivwin! (Luk 15:4-7) Kerẹ Jesu, idjerhe vọ yen avwanre se vwo dje erorokẹ phia kẹ ayen?

16. Mavọ yen e se vwo dje erorokẹ phia kẹ iniọvo re dobọ rẹ aghwoghwo ji?

¹⁶ Durhie ayen rhe Ọguan Ruvie. Idjerhe ọvo rẹ Jesu vwo phiuduphiyawọ rẹ iyinkọn rọyen, ọyen ro vwo durhie ayen kpo omẹvwa ọvo. (Mat. 28:10b; 1 Kọr. 15:6) Nonẹna, e ji se durhie ihwo re dobọ rẹ aghwoghwo ji nẹ ayen rhe emẹvwa, ọ da dianẹ ayen ji rhi ru ọtiọye-en. Avwanre riẹnre nẹ ọkiọvo e che ru ọtiọyen abọ buebun tavwen ayen ke sa rhe. O muẹro dẹn nẹ oma vwerhen Jesu nẹ idibo rọyen rhiabọreyọ edurhie rọyen.—Ni Matiu 28:16 kugbe Luk 15:6.

17. Die yen e che ru siẹrẹ ohwo rọ dobọ rẹ aghwoghwo ji da rhe Ọguan Ruvie?

¹⁷ Dede ayen sasasa. Jesu ru oborẹ ẹwẹn rẹ idibo rọyen se vwo totọ ọke rọ vwọ mrẹ ayen, o bru ayen ra ra ta ota kẹ, ukperẹ ọ vwọ hẹrhẹ nẹ ayen bru ọyen rhe. (Mat. 28:18) Die yen e che ru siẹrẹ ohwo rọ dobọ rẹ aghwoghwo ji da rhe Ọguan Ruvie? E jẹ avwanre bro ra re dede sasasa. Ẹsosuọ, udu se bru avwanre kpahen obo ra cha ta. Ẹkẹvuọvo, vwẹ idjerhe rẹ oma de jẹ vuọ, a sa vuẹ oborẹ oma vwerhen avwanre te ra vwọ mrẹ.

18. Mavọ yen e se vwo phiuduphiyawọ rẹ iniọvo re dobọ rẹ aghwoghwo ji?

¹⁸ Phiuduphiyọ ayen awọ. Ọ sa dianẹ idibo  ri Jesu ke roro nẹ ayen che se ruiruo rẹ aghwoghwo na vwẹ akpọneje-e. Jesu phiuduphiyọ ayen awọ, rọ vwọ ta: “Me vẹ ovwan herọ vwẹ ọke ejobi.” (Mat. 28:20) Ọyena chọn ayen uko? E. O kriri-i, ayen de muomaphiyọ iruo na rẹ ayen vwo yono ihwo ji “ghwoghwo” iyẹnrẹn esiri na. (Iruo 5:42) Iniọvo re dobọ rẹ aghwoghwo ji je guọnọ uduephiophiyawọ. Oshọ rẹ ayen vwọ rhoma ton aghwoghwo phiyọ se mu ayen. A sa kẹ ayen imuẹro nẹ ọ dia ayen ọvo yen che kpo aghwoghwo-o. Avwanre che nene ayen wian kugbe siẹrẹ ayen da choma re. O muẹro dẹn nẹ ayen che vwo ọdavwaro kpahen obicha tiọyena siẹrẹ ayen da ton aghwoghwo rẹ iyẹnrẹn esiri na phiyọ. E de nene ayen yerin kerẹ iniọvo, ọyena sa nẹrhẹ ayen rhoma rhe sasa vwevunrẹ ukoko na, o mi ji toroba aghọghọ rẹ ukoko na.

19. Ọrhọ yen ọdavwẹ rẹ avwanre, kẹ diesorọ?

¹⁹ Ọke vọ yen e che ruiruo rẹ odibo egbe na te? Re te oba re eyeren na. (Mat. 28:20; ni Glossary, “Conclusion of the system of things” rọhẹ New World Translation.) Avwanre se ghini ghwoghwo ji yono te ọke yena? Avwanre choma re vwo ru ọtiọyen! Oma vwerhen avwanre rẹ avwanre vwọ vwẹ ọke, ẹgba, kugbe oborẹ avwanre vwori vwo ze, rere a sa vwọ mrẹ ihwo re “ve arhọ ri bẹdẹ na kẹ.” (Iruo 13:48) E de ru ọtiọyen, jẹ e nene udje ri Jesu. Ọ tare nẹ, “Emu mẹ vwenẹ hẹ eruo rẹ ọhọre rẹ ọ ro ji vwe rhe, re mi vwo ru iruo rọye re.” (Jọn 4:34; 17:4) Ọyena jehẹ ọdavwẹ rẹ avwanre. Avwanre guọnọ ruiruo ra vwọ kẹ avwanre na re. (Jọn 20:21) Avwanre je guọnọ nẹ ihwo efa nene avwanre ruiruo nana vẹ erhiorin, ji te ighwoghwota re dobọ rẹ aghwoghwo ji.—Mat. 24:13.

20. Vwo nene obo rehẹ 2 Kọrẹnt 4:7 die yen cha nẹrhẹ e se ruiruo rẹ Jesu vwọ kẹ avwanre na re?

²⁰ Vwọrẹ uyota, ọ lọhọre e vwo ru nene iji ri Jesu na-a. Ẹkẹvuọvo, ọ dia avwanre ọvo yen che ruiruo na-a. Jesu veri nẹ ọyen vẹ avwanre herọ. Avwanre cha mrẹ obicha ri Jihova vẹ Jesu kidie avwanre “iruiruo rẹ Ọghẹnẹ” re vẹ “Kristi” wian kuẹgbe. (1 Kọr. 3:9; 2 Kọr. 2:17) Eriyina, avwanre se ruiruo na re. Ọyen emu omavwerhovwẹn kugbe okpuphẹn re vwo ruiruo nana, je chọn ihwo efa uko vwo ru ọtiọyen.—Se 2 Kọrẹnt 4:7.