1. Yooruma xeeni Yesu ovanhe awe Matheyo 28:18-20?

NUUMALA ohihimuxiwa, Yesu aahaakhumelela awiixutti awe, yaawo yaathukumanne oGalileya. Owo aahikhalana etthu ya faita yinceene aaphavela awe waaleela. Etthu xeeni? Etthu ene elempwale Matheyo 28:18-20.—Mmusome.

2. Mwaha ola, ninrowa othokorerya makoho xeeni?

² Yooruma ya waapaka awiixutti ennivareleya muteko wa khula mmosa a hiyo olelo-va. Nto mwaha ola, ninrowa waakhula makoho mararu anivarihana ni yooruma Yesu onivanhe awe. Noopacerya, ohiya paahi owiixuttiha atthareli asya malamulo a Muluku, etthu xeeni-tho ekina ninreerela ahu opaka? Na nenli, anamalaleerya otheene a mmulokoni anrowa okhaliherya sai okela vahoolo atthu ale anisomihiwa Biibiliya? Na neeraru, ninrowa waakhaliherya sai anna ni arokora ahiyale olaleerya otthikela wiirela mpantta muteko ola wowaapaka awiixutti?

3. Malakiheryo a Yesu, yooruma xeeni yooluluwanya onivanhe awe?

³ Malakiheryo a Yesu tooluluwanya. Maana owo onivekenle owiixuttiha atthu itthu onrumale awe. Masi ti vooloka ohiliyala etthu emosa ya faita yinceene. Etthu xeeni? Etthu ene tiila: Yesu khaahimmye wira ‘mwawixuttiheke atthu itthu sòrumalyakani’. Ohiya-vo owo ahimmye wira: Mwawiixuttiheke “wettela sothene sòrumalyakani”. Eyo enooniherya wira khivamphiyerya paahi owiixuttiha ale nnaasomiha ahu Biibiliya etthu yoopaka, masi nihaana owiixuttiha moota woopaka etthu eyo. (Mit. 8:31) Mwaha wa xeeni?

4. Nlikanyiho xeeni ninnikhaliherya wiiwexexa ele entaphulela aya omwiixuttiha mutthu wiiwelela?

 ⁴ Wira niiwexexe oratteene ele entaphulela aya owiixuttiha atthu wiiwelela, nkahaya mmuupuwele mulipa-oniwiixuttiha atthu weettiha ekaaro. Wanipacerya owo onniwiixuttiha malamulo a mustratani ori ene musaala. Masi wira owiixuttihe ale onaasomiha awe wiiwelela malamulo awo, owo ohaana opaka etthu ekina. Etthu xeeni? Owo ohaana okhala mukaaroni ni naxikola owo, wira omooneke moota naxikola owo oneettiha awe ekaaro ni omooniherya moota woovarihela muteko itthu sotheene iixuntte awe ori ene musaala. Nlikanyiho nna ninniixuttiha exeeni?

5. (a) Moovarihana ni Yohani 14:15 ni 1 Yohani 2:3, nihaana owiixuttiha opaka exeeni ale nnaasomiha ahu Biibiliya? (b) Ninrowa waakhaliherya sai ale nnaasomiha ahu Biibiliya ovarihela muteko ele aniixutta aya?

⁵ Okathi nimmusomiha ahu mutthu Biibiliya hiyo ninnimwiixuttiha malamulo a Muluku. Masi nihaana opaka etthu ekina. Nihaana omwiixuttiha ole nimmusomiha ahu Biibiliya ovarihela muteko mookumini mwawe ele oniixutta awe. (Mmusome Yohani 14:15; 1 Yohani 2:3.) Nirumeelaka ntakiheryo nahu hiyo pooti owooniherya ale nnaasomiha ahu Biibiliya, moota woovarihela muteko malakiheryo a mBiibiliyani oxikola, omutekoni ni okathi anitthekula aya. Nyuwo pooti omuleela naxikola anyu moota malakiheryo a mBiibiliyani yookhapelenlayani aahiiso moota yookhalihenryaayani opaka yoothanla yooloka. Ohiya-vo, okathi ninkhala ahu ni ale nnaasomiha ahu Biibiliya hiyo pooti onvekela Yehova wira aakhaliheryeke ni munepa awe wowaarya.—Yoh. 16:13.

6. Etthu xeeni enihela muhina owiixuttiha atthu wiiwelela malamulo a Yesu?

⁶ Etthu xeeni ekina enihela muhina owiixuttiha atthu wiiwelela malamulo a Yesu? Nihaana waakhaliherya ale nnaasomiha ahu Biibiliya wiirela mpantta muteko wowaapaka awiixutti. Masi atthu akina nnaasomiha ahu Biibiliya, annoovelela olaleerya. Nto nihaana waapixerya murima wira yiiwexexe ele Biibiliya oniixuttiha awe. Maana vaavo ele Biibiliya oniixuttiha awe enaavara aya murima, eyo enniwiiriha ophavela opaka etthu. Nto etthu xeeni ninreerela ahu opaka wira naakhaliherye ale nnaasomiha ahu Biibiliya ophavela olaleerya?

7. Ninrowa omukhaliherya sai ole nimmusomiha ahu Biibiliya ophavela olaleerya?

⁷ Nyuwo pooti omukoha ole munimusomiha anyu Biibiliya wira: “Ikeekhai sa mBiibiliyani sinookhaliheryani sai okhalana okumi wooloka? Nyuwo khamunoona wira atthu akina anniphavela wiiwa ikeekhai iyo? Exeeni mukhanle anyu oopaka wira mwaakhaliherye atthu awo?” (Mir. 3:27; Math. 9:37, 38) Nave mmooniheryeke ole munimusomiha anyu Biibiliya ifolyeeto siri Ekaaxa Ahu Ennikhaliherya Wiixuttiha ni mmuhiye othanlaka ifolyeeto onoona awe wira samwaasivela amusi awe, apatthani awe ni ale anivarana awe muteko aahiiso ale onsomana awe oxikola. * Nave-tho munvaheke ifolyeeto soovirikana. Ohiya-vo mmwiixuttiheke ole munimusomiha anyu Biibiliya moota woovaha ifolyeeto iyo mooreerela murima ni mwa enamuna yoovara murima. Okathi ole munimusomiha anyu Biibiliya onrowa awe weemereriwa okhala namalaleerya oohipatisiwa, nyuwo munrowa olaleeryaka ni owo wira mmukhaliheryeke.—Mus. 4:9, 10; Luka 6:40.

8. Xeeni vari aya vooloka ale nnaasomiha ahu Biibiliya omphenta Muluku ni atthu akina? (Nwehe ekaaxa eni: “ Moota Woowaakhaliherya Ale Anaasomiha Ahu Biibiliya Wuncererya Omphenta Waya Muluku”.)

⁸ Muhiliyale wira Yesu onrumme owiixuttiha atthu “wettela sothene” onrumale awe. Eyo enihela muhina malamulo manli maalupale, eyo piiyo, omphenta Muluku ni namwaattamanani ahu. Malamulo awo manli, annivarihana ni muteko  woolaleerya ni waapaka awiixutti. (Math. 22:37-39) Moota xeeni? Etthu yuulupale enniiriha olaleya ihapari sooreera, omphenta wahu Muluku ni atthu akina. Ekeekhai wira atthu akina nnaasomiha ahu Biibiliya annoovelela olaleerya. Masi nihaana waakhaliherya woona wira Yehova onimwaakhaliherya. Nto vakhaani-vakhaani woova waya onrowa ovukuwaka. (Esal. 18:2-4; Mir. 29:25) Ekaaxa enivarihana ni mwaha ola ninthokorerya ahu, ennooniherya itthu ninreerela ahu opaka wira nimukhaliherye ole nimmusomiha ahu Biibiliya wuncererya omphenta wawe Muluku. Nave muloko pooti waakhaliherya ale nnaasomiha ahu Biibiliya wuncererya ophenta waya. Moota xeeni?

9. Nlikanyiho na exikola enwiixuttiha atthu weettiha ekaaro, mwa enamuna xeeni naxikola oniixutta awe itthu sinceene sa faita?

⁹ Nrowe ntthikele ntakiheryo nahu na exikola eniixuttihiwa atthu weettiha ekaaro. Vano mmuupuwele paahi naxikola. Vaavo onrowa awe weettihaka ekaaro ori ene ni mutthu ole onimwiixuttiha, mwa enamuna xeeni onrowa awe wiixutta? Onwiriyanaka ole onimwiixuttiha ni waaweha mamotorista ooloka. Mwa ntakiheryo, owo pooti omooniherya mulipa oweettiha ekaaro ooreera murima yoowo oniweemererya alipa-ooweettiha ekaaro akina onvikana wala orowa ohoolo wawe. Wala pooti omooniherya motorista yoowo onaavukula aluuxu awe wira atthu akina aweheke oratteene ni omutumererya naxikola awe opaka etthu emosaru. Matakiheryo ntoko awo annimukhaliherya naxikola owo ovarihela muteko ele oniixutta awe.

10. Etthu xeeni enrowa omukhaliherya ole onisomihiwa Biibiliya okela vahoolo?

¹⁰ Etthu emosaru enniiraneya ni mutthu nimmusomiha ahu Biibiliya yoowo onipacerya weetta ephiro ya okumi. Maana owo khoniixutta paahi ni ntakiheryo nooloka na mutthu onimusomiha Biibiliya, masi-tho ni arumeyi akina ooloka a Yehova. Nto okhala wira ti siiso, etthu xeeni enrowa omukhaliherya okela vahoolo? Owo ohaana orowela mithukumano sotheene. Mwaha wa xeeni? Mwa woowi mithukumano sinoomukhaliherya wuncererya osuwela wawe, olipiha waamini wawe ni wuncererya omphenta wawe Muluku. (Mit. 15:30-32) Nave okathi wa mithukumano ole onimusomiha Biibiliya ohaana waasuweliha anna ni arokora akina wira aalimalele. Nto eyo enoomukhaliherya woona wira sookhala itthu sinceene onlikana awe ni anna ni arokora awo. Woonasa wene, eyo enoomukhaliherya woona matakiheryo ooloka a anna ni arokora yaawo anooniherya ophenta wekeekhai. Nrowe niwehe matakiheryo vakhaani.

11. Nvahe matakiheryo, ale anisomihiwa Biibiliya akhanle aya ooweha mmulokoni ni etthu xeeni enrowa okhumelela?

¹¹ Vano nkahaya mmuupuwele muthiyana oohitheliwa ni orina anamwane onisomihiwa Biibiliya. Empa ya Omwene owo onninweha murokora oohitheliwa. Nto vaavo oninweha awe murokora owo iimananihaka orowela mithukumano mmulokoni ni anaawe acikhaani, eyo enninvara murima vanceene. Vano nwehe ntakiheryo nikina, nkahaya mmuupuwele ole onisomihiwa Biibiliya oniimananiha ohiya ompaha soona. Nto Empa ya Omwene onnimusuwela munna owenrye ohiya ompaha soona. Munna owo onimuleela ole onisomihiwa Biibiliya moota omphenta wawe Muluku omukhaliherya awe wiiwelela malamulo awe. (2 aKor. 7:1; aFil. 4:13) Moottharelana, munna owo onimuleela wira: “Ni nyuwo-tho munoowerya”. Nuumala wiiwa yowiiraneya ya munna owo, ole onisomihiwa Biibiliya onnilipa vanceene. Vano nkahaya mmuupuwele mwali onisomihiwa Biibiliya, Empa ya Omwene onninweha mwali mukina ohakalanleene vanceene mwaha wa okhala Namoona a Yehova. Nto vaavo onoona awe ohakalala wa murokora ole, mwali ole onisomihiwa Biibiliya onniphavela osuwela etthu enimwiiriha ohakalala.

12. Exeeni enniiriha ohimya wira atthu otheene mmulokoni anoowerya okhaliherya okela vahoolo wa ale anisomihiwa Biibiliya?

¹² Vaavo ale anisomihiwa Biibiliya anweha aya matakiheryo ooloka a anamalaleerya a mmulokoni, awo anniixutta ele entaphulela aya wiiwelela  yooruma ya omphenta Muluku ni atthu akina. (Yoh. 13:35; 1 Tim. 4:12) Tthiri ntoko niwenha ahu, ale anisomihiwa Biibiliya anoowerya wiixutta itthu sinceene ni anamalaleerya awananne mixankiho ntoko sawaya. Nto eyo enoomukhaliherya ole onisomihiwa Biibiliya woona wira onoowerya opaka marukunuxo wira okhale mutthareli a Kristu. (Otum. 30:11) Moohaaniherya, vannooneya wira khula mutthu mmulokoni onookhaliherya mwa inamuna soovirikana wira ale anisomihiwa Biibiliya akele vahoolo momunepani. (Math. 5:16) Ankhi nyuwo, etthu xeeni munipaka anyu wira mwaakhaliherye ale anisomihiwa Biibiliya anirowela mithukumano?

13-14. Yesu aathokorerya sai arummwa awe vaavo yaakhulumunwe aya?

¹³ Othene ahu ninniphavela waakhaliherya anna ni arokora ahiyale olaleerya wira atthikele ovara muteko ola wowaapaka awiixutti. Wira nisuwele moota nikhanle ahu oopaka eyo, nrowe niwehe moota Yesu akhalihenrye awe arummwa awe vaavo yaakhulumunwe aya.

¹⁴ Ohalaka okathi vakhaani wira Yesu iiviwe, Biibiliya onihimya wira “awixutti awe othene yahimuhiya, khutthyawasa”. (Mar. 14:50; Yoh. 16:32) Nto Yesu aathokorenrye sai arummwa awe okathi ole yaakhulumunwe aya? Okathi vakhaani nuumala ohihimuxiwa, Yesu ahaalela atthareli awe akina wira: “Muhòvé! Murowé mwàhimerye axinn’aka wira [koohihimuxiwa]”. (Math. 28:10a) Tthiri vannooneya wira Yesu khaahiyale waakhaliherya arummwa awe. Nnaamwi awo yaamutthyanwe, Yesu khaahiyale owiitthana okhala “arummwa awe ni okhala axinna awe”. Nimutakihaka Yehova ni Yesu, nihaana okhala atthu oomoriwa ikharari ni oolevelela.—2 Mam. 13:23.

15. Ninwoonela sai anna ni arokora ahiyale olaleerya?

¹⁵ Mwa enamuna emosaru hiyo ninnaathokorerya ni ninnaavaha efaita ale ahiyale olaleerya. Nlelo awo anna ni arokora ni ninnaaphenta vanceene! Tthiri ninnuupuwela muteko wotheene anna ni arokora awo anvarenle aya Yehova. Akina a yaawo aaviriha iyaakha sinceene avaraka muteko wa Muluku. (aHéb. 6:10) Ohiya-vo, hiyo ninninkheliwa vanceene ni anna awo! (Luka 15:4-7) Nto mwa enamuna xeeni ninrowa ahu wooniherya wira ninnimutakiha Yesu ni ninnaathokorerya anna ni arokora ahiyale olaleerya?

16. Mwa enamuna xeeni ninrowa ahu wooniherya wira ninnaathokorerya anna ni arokora ahiyale olaleerya?

¹⁶ Mwaalattuleke orowela mithukumano. Yesu ahaalipiha arummwa awe yaakhulumunwe aalattulaka orowela mithukumano. (Math. 28:10b; 1 aKor. 15:6) Olelo-va, hiyo nihaana opaka etthu emosaru apanke awe Yesu, naalattulaka orowela mithukumano anna ni arokora ahiyale olaleerya akhala wira awo khanrowela mithukumano. Musuweleke wira hiyo pooti waalattula ikwaha sinceene nlelo aheemerenrye nlattulo nahu, masi hata vapisaka awo animweemererya. Yesu aahihakalala vanceene nuumala waaweha awiixutti awe yeemerenrye ene nlattulo nawe. Ni hiyo-tho, nnoohakalala vanceene waaweha anna ni arokora anceene ahiyale olaleerya yeemereryaka nlattulo nahu.—Mulikanyihe ni Matheyo 28:16 ni Luka 15:6.

17. Nihaana opaka exeeni vaavo ale ahiyale olaleerya anirowela aya mithukumano?

¹⁷ Nwaakheleke ni murima wotheene. Okathi Yesu aaphwanye awe awiixutti awe, owo ahooniherya wira aniwaakhela ni murima wotheene aakhomasaka ni oviriha okathi ovaanelaka naawo. (Math. 28:18) Nto etthu xeeni nikhanle ahu oopaka vaavo munna wala murokora ohiyale olaleerya oniphiya awe Empa ya Omwene? Nihaana wiimananiha omukhomasa ni oviriha okathi nivaanelaka nuuwo. Woonasa wene, hiyo pooti oxanka nihinoona yoohimya. Akhala wira eyo enimwiiraneya, nyuwo pooti ohimya moolumo ntoko ala: ‘Koohakalala vanceene woowehani nri ene vamosa olelo’.

18. Ninrowa waakhaliherya sai anna ni arokora ahiyale olaleerya?

¹⁸ Nwooniheryeke ni murima wotheene wira munimwaakhaliherya. Awiixutti a Yesu woonana wene  yuupuwela wira khiyaarowa owerya olaleerya olumwenku wotheene. Masi Yesu aahaalipiherya ohimyaka wira “miyo kinokhala ni nyuwo mahiku othene”. (Math. 28:20) Niireke eyo yaahaakhaliherya awiixutti ale a Yesu? Aayo. Moohipisa awo yaaniimananiha owiixuttiha atthu ihapari sooreera sa Omwene. (Mit. 5:42) Woonasa wene, anna ni arokora ale ahiyale olaleerya anniphavela okupali ni murima aya wotheene wira nnimwaakhaliherya. Pooti yuupuwelaka wira khanrowa owerya otthikela olaleerya. Nihaana waalipiherya ni murima wotheene wira khanrowa olaleeryaka mekhaya. Nto yailokiherya vale nihaana waakuxa wira nalaleerye hoothe. Moohaanyiherya anna ni arokora awo anoohakalala vanceene vaavo ninrowa ahu waakhaliherya aka. Muhiliyale wira vaavo nnaathokorerya ahu oratteene ale ahiyale olaleerya, niwooniheryaka wira annihu ni arokorihu, eyo enimwaaphwanyiha mireerelo sinceene ni enookumiherya mireerelo sinceene muloko wotheene.

19. Tiivi eri yoolakela ahu ni nthowa xeeni?

¹⁹ Mpakha silini ninrowa ahu olaleeryaka ni waapaka awiixutti? Mpakha omala olumwenku ola wootakhala. (Math. 28:20) Niireke nnoowerya opaka eyo? Aayo, tthiri eyo ti etthu nlakenle ahu opaka! Hiyo ninnihakalala orumeela okathi ahu, ikuru sahu ni mireerelo sahu wira naphwanye atthu ale arina murima wooloka wira yaakhele okumi woohimala. (Mit. 13:48) Vaavo nimpaka ahu eyo ninnitthara ntakiheryo na Yesu. Owo aahimmye so: “Yoly’aka miyo, wettela otthuna wawe ole okirumme n’umaliherya miteko sawe”. (Yoh. 4:34; 17:4) Tthiri hiyo ninniphavela opaka eyo. Maana yoolakela ahu omaliha muteko Yesu onirummye awe. (Yoh. 20:21) Ohiya-vo, nimphavela wira otheene ahu waahela muhina ale ahiyale olaleerya nivikaniheke ovara muteko owo hoothe.—Math. 24:13.

20. Moovarihana ni aFilipi 4:13, exeeni ennikupaliha wira nnoowerya omaliha muteko Yesu onivanhe awe?

²⁰ Ekeekhai wira muteko Yesu onirummye awe wookhalana mixankiho sawe. Masi khaninvara mekhihu, maana Yesu oonileiherya wira onrowa okhalaka ni hiyo. Vaavo ninvara ahu yoothanleliwa ahu ya waapaka awiixutti, “ninvara vamosá . . . [ni] Muluku” naataanaka ni Kristu. (1 aKor. 3:9; 2 aKor. 2:17) Eyo enninikupaliha wira nnoowerya omaliha muteko ola. Tthiri eparakha yuulupale ovara muteko ola ni waakhaliherya atthu akina ovara ni hiyo!—Mmusome aFilipi 4:13.