1. Maatiyoosa 28:18-20y yootiyoogaadan, Yesuusi immido azazoy aybee?

YESUUSI hayquwaappe denddi simmidi, Galiilan shiiqida ba erissiyo ashkkaratussi qoncciis. I keehi koshshiya issibaa etawu yootiis. Hegee aybee? I yootidobay Maatiyoosa 28:18-20n deˈees.—Nabbaba.

2. Nuuni pilggana oyshati awugeetee?

² Erissiyo ashkkara oottanaadan Yesuusi azazido azazoy ha wodiyan deˈiya Xoossaa ashkkaratu ubbawu hanees. Hegaa gishshawu, Yesuusi nuussi immido oosuwaara gayttidaagan heezzu oyshata ane beˈoos. Koyruwan, mati erissiyo ashkkara gididaageeta Xoossay etappe koyiyoobaa tamaarissiyoogaappe harabaa nuuni waatana koshshii? Naaˈˈanttuwan, xinaateti ayyaanaaban diccanaadan gubaaˈiyan deˈiya aassiyaageeti ubbay ay oottana danddayiyoonaa? Heezzanttuwan, sabbakiyoogaa aggida ishanttinne michchontti zaarettidi erissiyo ashkkara oottiyo oosuwaa doommanaadan waati maaddana danddayiyoo?

3. Yesuusi azazidoban I dummayidi azazidobay aybee?

³ Yesuusa azazoti qoncce. I azazidobaa nuuni asaa tamaarissana koshshees. SHin, nuuni waannabaa dogana bessenna. Yesuusi: ‘Taani inttena azazidobaa ubbaa eta tamaarissite’ gibeenna. SHin I, “Taani inttena azazidobaa ubbaa eti naagana mala,” eta tamaarissite yaagiis. Nuuni Yesuusi azazidobaa azazettanawu, nu xinaatee ay oottanaakko tamaarissananne hegaa I waati oottanaakko qonccissana bessees. (Oos. 8:31) Nuuni yaatana koshshiyoy aybissee?

4. Issi xinaatee Kiristtoosi azazidobaa azazettanaadan nuuni waati tamaarissana danddayiyaakko leemisuwan yoota.

 ⁴ Issi uri Kiristtoosi azazidobaa azazettanaadan nuuni waati tamaarissana danddayiyoo? Nuuni ay oottana koshshiyaakko akeekanaadan kaalliya leemisoy nuna maaddana danddayees. Kaamiyaa laaggiyoogaa tamaarissiyaagee ba tamaareti tiraafike higgiyawu azazettanaadan waati tamaarissii? Koyruwan, tamaaree ogiyan azazettana koshshiyo higgeta asttamaaree tamaarissees. SHin, ba tamaareti he higgeta waati azazettanaakko tamaarissanawu I harabaakka oottana koshshees. Tamaaree laaggiyoonne tamaaridobaa oosuwan peeshshanawu baaxetiyo wode asttamaaree A matan uttidi awu zoriyaa immana koshshees. Ha leemisuwaappe nuuni ay tamaarana danddayiyoo?

5. (a) Yohaannisa 14:15⁠ynne 1 Yohaannisa 2:3y yootiyoogaadan, xinaateti ay oottanaadan nuuni tamaarissana koshshii? (b) Nuuni nu xinaateta waati maaddana danddayiyaakko leemisuwan yoota.

⁵ Nuuni harata Geeshsha Maxaafaa xannaˈissiyo wode, Xoossay nuuppe koyiyoobaa eta tamaarissoos. SHin hegaa xallay gidenna. Nu xinaateti tamaaridobaa galla galla deˈuwan oosuwan peeshshanaadan nuuni tamaarissana koshshees. (Yohaannisa 14:15; 1 Yohaannisa 2:3 nabbaba.) Nuuni etawu leemiso gidiyoogan, Geeshsha Maxaafaappe tamaarido tumaa eti timirtte keettan, ooso sohuwan woy allaxxiyoosan waati oosuwan peeshshanaakko bessana danddayoos. Geeshsha Maxaafaa zoriyaa oosuwan peeshshiyoogee nuna qohiyaabaappe waati naagidaakko woy hegee loˈˈobaa kuuyanaadan waati maaddidaakko nu deˈuwan gakkida issibaa etawu yootana danddayoos. Nu xinaatetuura issippe deˈiyo wode geeshshaa ayyaanay eta kaalettanaadan Yihoowa woossana danddayoos.—Yoh. 16:13.

6. Nuuni harati Yesuusi azazidobaa naaganaadan tamaarissiyo wode oottana koshshiya harabay aybee?

⁶ Nuuni harati Yesuusi azazidobaa naaganaadan tamaarissiyo wode oottana koshshiya harabay aybee? Nu xinaateti erissiyo ashkkara gidanawu koyanaadan nuuni maaddana koshshees. Issi issi xinaateti sabbakanawu yayyana danddayoosona. Hegaa gishshawu, etawu mino ammanoy deˈana mala eti Geeshsha Maxaafaa tumaa loytti akeekanaadan nuuni eta maaddiyo wode danddayanchcha gidana bessees. Yaatiyo wode eta wozanay denttettin eti sabbakanawu koyana. Nu xinaatetussi mishiraachchuwaa haratussi yootiyo koshshay deˈanaadan maaddanawu waatana danddayiyoo?

7. Mishiraachchuwaa haratussi yootiyo koshshay nu xinaatiyawu deˈanaadan maaddanawu waatana danddayiyoo?

⁷ Nu xinaateta kaallidi deˈiyaageetu mala oyshata oychchana danddayoos: “Neeni Geeshsha Maxaafaappe tamaaridobaa oosuwan peeshshido gishshawu ne deˈoy waani giiga gididee? Harati hegaa mala timirttiyaa siyana koshshees gaada qoppay? Neeni eta maaddanawu ay oottana danddayay?” (Lee. 3:27; Maa. 9:37, 38) Xinaatiyaa Tamaarissanawu Goˈettiyo Waanna Miishshatun deˈiya traktteta bessa; qassi A dabboti, A laggeti woy aara issippe oottiyaageeti hegeetuppe awugaa nabbabanawu koyoosona giidi I qoppiyaakko dooranaadan ootta. Yaatada daro trakttiyaa awu imma. I trakttiyaa haratussi kehatettan waati immana danddayiyaakko aara meezeta. Nu xinaatee xammaqettibeenna aassiyaagaa gidi simmin, A maaddanawu nuuni aara issippe haggaazana koshshees.—Era. 4:9, 10; Luq. 6:40.

8. Nu xinaateti Xoossaanne asaa mintti siiqiyoogee keehi koshshiyoy aybissee? (“ Nu Xinaateti Xoossaa Loytti Siiqanaadan Maaddiyo Ogeta” giya saaxiniyaakka xeella.)

⁸ Harati Yesuusi azazidobaa ‘ubbaa naagana mala’ nuuni tamaarissanaadan I azazidoogaa hassaya. Hegee Xoossaanne shooruwaa  siiqa giya ubbaappe aadhdhiya naaˈˈu azazota gujjees. (Maa. 22:37-39) Nu xinaatee he azazota azazettanaadan nuuni maaddiyo wode, I sabbakanaadan maaddoos. Aybissi? I Xoossaanne harata loytti siiqikko, sabbakanawu koyana. Issi issi xinaateti sabbakiyo oosuwaa oottiyoogaa qoppiyo wode yayyana danddayiyoogee qoncce. SHin he xinaateti asawu yayyiyoogaa Yihooway maaddin loddan loddan aggana danddayiyoogaa ammanettanaadan maaddana danddayoos. (Maz. 18:1-3; Lee. 29:25) Nu xinaatee Xoossaa loytti siiqanaadan maaddanawu ay oottanaakko ha huuphe yohuwan deˈiya saaxinee qonccissees. Qassi nu xinaatee Xoossaa loytti siiqanaadan maaddanawu gubaaˈee ay oottana danddayii?

9. Kaamiyaa laaggiyoogaa tamaariya uran qonccida leemisuwan, he tamaaree maaddiyaabaa ay ogetun tamaarii?

⁹ Kaamiyaa laaggiyoogaa tamaariyaagaabaa denttido leemisuwaa zaarettada qoppa. Asttamaaree A matan uttin tamaaree laaggiyo wode, I ay ogetun tamaarii? Asttamaaree yootiyoobaa siyiyoogaananne laaggiyoogan gooba gidida harata loytti xeelliyoogaana. Leemisuwawu, hara uri baappe kasetanaadan kehatettan odiya laaggiya issi ura asttamaaree tamaariyawu bessana danddayees. Woy sinttaara yiya kaamee beˈanawu metootennaadan qoppidi ba kaamiyaa xomppiyaa darin pooˈennaadan oottida shufeeriyaa tamaariyaassi bessidi, ikka hegaadan oottana mala minttettana danddayees. He hanotati tamaaree kaamiyaa laaggiyo wode oosuwan peeshshana danddayiyo keehi maaddiyaabaa tamaarissoosona.

10. Xinaatee ayyaanaaban diccanaadan aybi maaddanee?

¹⁰ Hegaadan, Yihoowawu haggaaziyoogaa doommida issi xinaatee ba asttamaariya xallaappe gidennan, Yihoowawu haggaaziya loˈˈo leemiso gidida haratuppekka tamaarees. Xinaateti ayyaanaaban diccanaadan keehi maaddanabay aybee? Gubaaˈe shiiqota shiiqiyoogaa. Aybissi? SHiiqotun Geeshsha Maxaafaappe tamaariyoobay eti eraa gujjanaadan, eta ammanoy minnanaadaaninne eti Xoossaa loytti siiqanaadan maaddiyo gishshataassa. (Oos. 15:30-32) Qassi shiiqotun, xannaˈissiyaagee geella ba xinaatiyaagaara issi malabaa genccida ishanttuuranne michchonttuura A eretissana danddayees. Gubaaˈiyan siiquwaa bessiyoogan loˈˈo leemiso gidiya ishanttanne michchontta xinaatee beˈana. Kaallidi deˈiya leemisota qoppa.

11. Issi xinaatee gubaaˈiyan akeekana danddayiyoobati aybee, qassi hegeeti A waati maaddana danddayiyoonaa?

¹¹ Barkka naata dichchiya issi xinaatiyaa hanotay iigaara issi mala gidido Kiristtaane michchiyo beˈaasu. Michchiya ba yelaga naata ekkada SHiiquwaa Addaraashaa yiyoogee ay keena metiyaakko beˈidoogee xinaatee wozanaa denttettiis. Sijaaraa uyiyoogaa agganawu baaxetiya issi xinaatee aagaadan baaxetidi guyyeppe aggida issi ishaara erettiis. He ishay Yihoowa loytti siiqiyoogee Xoossaa azazota azazettanaadan A denttettidoogaa xinaatiyawu yootiis. (2 Qor. 7:1; 2 Qor. 4:7) Ishay I sijaaraa uyiyoogaa waati aggidaakko xinaatiyawu yooti simmidi, “Neenikka sijaaraa uyiyoogaa aggana danddayaasa” yaagiis. Xinaatee keehi minettiisinne ikka hegaa aggana danddayiyoogaa ammaniis. Geeshsha Maxaafaa xannaˈiya issi yelagiya Yihoowa Markka gidiyoogan keehi ufayttiya issi yelagiyo akeekaasu. Yelaga michchiyaa ufayttiyoogaa xinaatiyaa beˈido wode, michchiyaa ubbatoo ufayttiyaaba milatiyoy aybissakko A loytta eranawu koyaasu.

12. Gubaaˈiyan deˈiya ubbay xinaateta maaddana danddayees giyoy aybissee?

¹² Xinaateti ammanettida daro Yihoowa Markkatuura erettiyo wode, Xoossaanne shooruwaa siiqanaadan Kiristtoosi yootido azazuwaa Yihoowa Markkati waati azazettiyaakko eta leemisuwaappe xinaateti tamaaroosona. (Yoh.  13:35; 1 Xim. 4:12) Qommoora odettidaagaadan, xinaatee bana gakkidaagaa mala paaciyaa xoonida aassiyaageetuppe tamaarana danddayees. Xinaatee hegaa mala leemisotuppe tamaariyoogee I Kiristtoosi erissiyo ashkkara gidanawu koshshiyaaban laamettanaadan oottana. (Zaa. 30:11) Xinaateti ayyaanaaban diccanaadan gubaaˈiyan deˈiya ubbay issi issiban maaddana danddayees. (Maa. 5:16) SHiiqota yiida xinaateta minttettanawu neeni oottiyoobay aybee?

13-14. Kiitettidaageeti hidootaa qanxxido wode Yesuusi eta waati oyqqidee?

¹³ Sabbakiyoogaanne erissiyo ashkkara oottiyoogaa aggida ishanttinne michchontti zaarettidi hegaa oottanaadan maaddanawu koyoos. Yesuusi hidootaa qanxxida kiitettidaageeta oyqqido ogee nuuni ha wodiyan oottana danddayiyoobaa bessees.

¹⁴ Yesuusi hayqqanaappe kase, kiitettidaageeti “ubbati a yeggi bayidi baqatidosona.” (Mar. 14:50; Yoh. 16:32) Kiitettidaageeti hidootaa qanxxido he wode Yesuusi waatidee? Yesuusi hayquwaappe denddi simmidi takkennan bana kaalliya amaridaageetussi hagaadan giis: ‘Yayyoppite; [taani hayquwaappe denddidoogaa] ta ishanttussi biidi yootite.’ (Maa. 28:10a) Yesuusi kiitettidaageetun hidootaa qanxxibeenna. Eti A aggidi baqatikkonne I eta ‘ta ishantta’ giis. Yihoowagaadan, Yesuusi qarettiisinne atto giis.—2 Kaw. 13:23.

15. Haggaaziyoogaa aggidaageeta xeelliyaagan nuuyyo aybi siyettii?

¹⁵ Hegaadankka, nuuni haggaaziyoogaa aggidaageetussi keehi qarettoos. Eti nu ishanttanne michchontta, qassi nu eta siiqoos! He ishanttinne michchontti Yihoowawu minni oottido oosuwaa ubbaa nuuni haasayoos. Haˈˈi shuggida issoti issoti daro layttawu minni oottidosona. (Ibr. 6:10) Nuuni eta laamotoos! (Luq. 15:4-7) Nuuni Yesuusa leemisuwaa kaalliyoogan etawu qarettiyoogaa ay ogetun bessana danddayiyoo?

16. SHiiqiyoogaa aggida nu ishanttussinne michchonttussi qoppiyoogaa waati bessana danddayiyoo?

¹⁶ SHiiquwaa shiiqanaadan kehatettan shoobba. Yesuusi hidootaa qanxxida kiitettidaageeta minttettido issi ogee eta shiiquwaa shoobbiyoogaana. (Maa. 28:10b; 1 Qor. 15:6) Hegaadankka ha wodiyan, nuuni shiiquwaa shiiqiyoogaa aggidaageeta minttettana danddayoos. Eti yaana gakkanaashin nuuni eta darotoo shoobbana koshshiyoogaa eroos. Yesuusi shoobbin A erissiyo ashkkarati yiidoogan I keehi ufayttidoogee qoncce.—Maatiyoosa 28:16 Luqaasa 15:6⁠ra gatta xeella.

17. SHiiqiyoogaa aggida issi uri shiiquwaa yiyo wode nuuni waatana koshshii?

¹⁷ Wozanappe eta mokka. Yesuusi erissiyo ashkkarati aara gayttido wode I eti ufayttanaadan oottiis; qassi I kasetidi eta haasayissiis. (Maa. 28:18) SHiiquwaa shiiqiyoogaa aggidaagee SHiiquwaa Addaraashaa yiyo wode nuuni ay oottana koshshii? I shiiquwaa yiyo wode nuuni kasetidi A pashkki giidi mokkana koshshees. Koyro nuuni A woygi haasayissanaakko erenna gishshawu yayyana danddayoos. SHin I yeellatanaadan oottennan, nuuni A beˈidoogan keehi ufayttidoogaa awu yootana danddayoos.

18. SHiiqiyoogaa aggidaageeta waati minttettana danddayiyoo?

¹⁸ Eta minttetta. Yesuusi erissiyo ashkkarati kumetta saˈan sabbakana danddayokko giidi qoppennan aggokkona. Yesuusi bana kaalliyaageeta, ‘Taani ubba wode inttenaara deˈays’ giidi minttettiis. (Maa. 28:20) Hegee erissiyo ashkkarata maaddidee? Ee. Daro takkennan, eti ‘tamaarissiyoogaaninne mishiraachchuwaa yootiyoogan’ minnidi oottidosona. (Oos. 5:42) Sabbakiyoogaa aggida aassiyaageetussikka minttettoy koshshees. Eti zaarettidi haggaaziyoogaa doommanawu yayyana danddayoosona.  Eti banttarkka sabbakennaagaa yootidi eta minttettana danddayoos. Eti giigettiyo wode, nuuni etaara haggaazana danddayoos. Mishiraachchuwaa sabbakiyoogaa zaarettidi doommanaadan nuuni eta maaddiyoogaa eti nashshana. SHiiqiyoogaa aggida nu ishanttussinne nu michchonttussi qoppiyoogaa nuuni bessikko eti zaarettidi minnana danddayoosona; hegee qassi gubaaˈiyan deˈiya ubbaa ufayssiyaaba.

19. Nuuni wozanappe koyiyoobay aybee, qassi aybissi?

¹⁹ Nuuni erissiyo ashkkara oottiyo oosuwaa awude gakkanaashin oottana koshshii? Wodiyaa wurssettay gakkanaashin. (Maa. 28:20; Qaalatu birshshettan, “Wodiyaa wurssettaa” (Amaarattuwaa) giyaagaa xeella.) He wodee gakkanaashin sabbakiyoonne erissiyo ashkkara oottiyo oosuwaa oottanee? Nuuni hegaadan oottanawu murttida! Nu wodiyaa, nu wolqqaanne nu miishshaa goˈettidi ‘merinaa deˈuwaa demmanawu suure wozanaa koshshay’ deˈiyoogeeta demmanawu ufayssan oottoos. (Oos. 13:48, NW) Nuuni yaatiyo wode Yesuusa leemisuwaa kaalloos. I, “Ta qumai tana kiittidaagee koyiyoobaa oottanaagaanne a oosuwaa polanaagaa” yaagiis. (Yoh. 4:34; 17:4) Hegee nuuni wozanappe koyiyooba. Nuuni nuuyyo imettida oosuwaa polanawu koyoos. (Yoh. 20:21) Qassi haggaaziyoogaa aggidaageeta gujjin, harati nunaara issippe ha oosuwan genccanaadan koyoos.—Maa. 24:13.

20. Naaˈˈantto Qoronttoosa 4:7y yootiyoogaadan, nuuni oottanaadan Yesuusi azazidobaa polana danddayiyoy aybissee?

²⁰ Yesuusi azazidobaa oottiyoogee metana danddayees. Gidoppe attin, nuuni ha oosuwaa nurkka oottokko. Yesuusi nunaara gidanawu qaalaa geliis. Nuuni erissiyo ashkkara oottiyo wode, ‘Xoossaara issippe oottoos’ qassi ‘Kiristtoosaara hashetidi oottoos’; hegaa gishshawu Yihoowaynne Yesuusi he oosuwaa oottanaadan nuna maaddoosona. (1 Qor. 3:9; 2 Qor. 2:17) Yaatiyo gishshawu, he oosuwaa polana danddayoos. Ha oosuwaa oottiyoogeenne haratikka hegaa oottanaadan maaddiyoogee keehi ufayssiya gita maata!—2 Qoronttoosa 4:7 nabbaba.