1. Sumala ha Mateo 28:18-20, ano nga sugo an iginhatag ni Jesus?

KABANHAW ni Jesus, nagpakita hiya ha iya mga disipulo nga nagkakatirok ha Galilea. May importante hiya nga iginsumat ha ira. Ano ito? An iya ginsiring mababasa ha Mateo 28:18-20.​—Basaha.

2. Ano nga mga pakiana an aton hihisgotan?

² An sugo ni Jesus nga manhimo hin disipulo aplikado liwat ha tagsa nga surugoon han Dios yana. Salit, hisgotan naton an tulo nga pakiana nga may kalabotan ha toka nga iginhatag ni Jesus ha aton. Siyahan, labot la ha pagtutdo han mga sugo han Dios ha bag-o nga mga disipulo, ano pa an kinahanglan naton buhaton? Ikaduha, paonan-o makakabulig an ngatanan ha kongregasyon basi mag-uswag ha espirituwal an mga estudyante ha Biblia? Ikatulo, paonan-o naton mabubuligan an aton diri aktibo nga kabugtoan nga makigbahin utro ha buruhaton nga panhimo hin disipulo?

3. Ano nga espisipiko nga mga instruksyon an igin-api ni Jesus ha iya sugo?

³ Klaro an mga instruksyon ni Jesus. Kinahanglan naton itutdo ha mga tawo an iya mga iginsugo. Pero, kinahanglan diri naton kalimtan an usa nga importante nga detalye. Hi Jesus waray magsiring: ‘Tutdui hira han ngatanan nga akon iginsugo ha iyo.’ Lugod, nagsiring hiya: “Tutdui hira ha pagtuman han ngatanan nga akon iginsugo ha iyo.” Basi masunod iton espisipiko nga instruksyon, kinahanglan diri la naton basta tutdoan an aton estudyante ha Biblia, kondi giyahan liwat. (Buh. 8:31) Kay ano?

4. Ano an iginpapasabot han pagtuman ha usa nga sugo? Iilustrar.

⁴ An “pagtuman” ha usa nga sugo nagpapasabot hin pagsunod  hito. Ha pag-ilustrar kon paonan-o naton matututdoan an usa ha pagtuman, o pagsunod, han mga iginsugo han Kristo, hunahunaa ini nga ehemplo. Paonan-o gintututdoan han usa nga instruktor ha pagdrayb an iya mga estudyante ha pagsunod han mga balaud ha trapiko? Bangin itutdo anay niya an mga patakaran ha kalsada. Pero, may kinahanglan pa hiya buhaton basi matutdoan an iya mga estudyante kon paonan-o susundon ito nga mga patakaran. Kinahanglan niya hira updan ngan giyahan samtang aktuwal nga nagdadrayb hira ngan nangangalimbasog nga iaplikar an ira nahibaroan. Ano an aton mahibabaroan hito nga ehemplo?

5. (a) Sumala ha Juan 14:15 ngan 1 Juan 2:3, ano an kinahanglan naton itutdo ha aton mga estudyante ha Biblia nga angay nira buhaton? (b) Paghatag hin mga sampol kon paonan-o naton magigiyahan an aton mga estudyante.

⁵ Kon nagdudumara kita hin pag-aram ha Biblia, igintututdo naton kon ano an mga iginsusugo ha aton han Dios. Pero may kinahanglan pa kita buhaton. Kinahanglan naton tutdoan an aton mga estudyante nga iaplikar ha ira adlaw-adlaw nga pagkinabuhi an ira mga nahibaroan. (Basaha an Juan 14:15; 1 Juan 2:3.) Pinaagi han aton susbaranan, maipapakita naton ha ira kon paonan-o nira maiaaplikar an mga prinsipyo ha Biblia dida ha eskwelahan, ha trabaho, o ha panahon han pagpahalibway. Mahimo kita mag-istorya hin panhitabo ha aton kinabuhi basi ipakita ha ira kon paonan-o nagprotektar ha aton an pag-aplikar han giya han Biblia o kon paonan-o ito nakabulig ha aton nga makahimo hin maopay nga desisyon. Mahimo kita mag-ampo kan Jehova kaupod han aton mga estudyante ngan maghangyo nga giyahan hira han iya baraan nga espiritu.​—Juan 16:13.

6. Ano pa an kinahanglan naton buhaton basi matutdoan an iba nga tumanon an mga sugo ni Jesus?

⁶ Ano pa an kinahanglan naton buhaton basi matutdoan an iba nga tumanon an mga sugo ni Jesus? Kinahanglan naton buligan an aton mga estudyante ha Biblia nga magkaada hingyap nga manhimo hin disipulo. An iba nga estudyante bangin mahadlok ha pagsangyaw. Salit kinahanglan magin mapailubon kita samtang ginbubuligan hira nga magkaada han kahibaro nga magpapahilarom han ira pagsabot, makakabantad han ira kasingkasing, ngan magpapagios ha ira nga magsangyaw. Ano an mahimo naton buhaton basi mabuligan an mga estudyante nga magkaada hingyap ha pagsangyaw han maopay nga sumat?

7. Paonan-o naton mabubuligan an estudyante nga magkaada hingyap ha pagsangyaw han maopay nga sumat?

⁷ Mahimo naton pakianhan an aton estudyante ha Biblia: “Paonan-o an pagkarawat han mensahe han Ginhadian nakapaopay han imo kinabuhi? Para ha imo, kinahanglan ba mabatian han iba ini nga mensahe? Ano an imo mahihimo basi buligan hira?” (Prob. 3:27; Mat. 9:37, 38) Ipakita ha estudyante an mga tract nga aada ha aton Toolbox ha Pagpanutdo ngan papilia hiya kon hain hito an maruruyagan han iya mga paryente, kasangkayan, o katrabaho. Tagi an estudyante han pipira hito nga mga tract. Pagpraktis kamo basi matutdoan hiya kon paonan-o itatanyag an usa nga tract ha buotan nga paagi. Syempre, kon magin diri-bawtismado nga magwarali na an aton estudyante, kinahanglan updan naton hiya ha pagsangyaw basi mabuligan hiya.​—Ecles. 4:9, 10; Luc. 6:40.

8. Kay ano nga importante nga an aton mga estudyante magkaada marig-on nga gugma ha Dios ngan ha igkasi-tawo? (Kitaa liwat an kahon nga “ Kon Paonan-o Naton Mapapahilarom an Gugma ha Dios han Aton mga Estudyante.”)

⁸ Hinumdumi nga ginsugo kita ni Jesus nga tutdoan an iba “ha pagtuman han ngatanan” nga iya iginsugo. Sigurado nga kaupod hito an duha nga pinakaimportante nga sugo​—higugmaon an  Dios ngan an igkasi-tawo—​nga konektado gud ha pagsangyaw ngan panhimo hin disipulo nga buruhaton. (Mat. 22:37-39) Ano an koneksyon hito? An aton nangunguna nga motibo ha pakigbahin ha pagsangyaw amo an gugma​—an aton gugma ha Dios ngan ha aton igkasi-tawo. Normal la nga maghunahuna an pipira nga estudyante ha Biblia nga bangin makaharadlok an pakigbahin ha pagsangyaw. Pero mahimo naton pasarigon hira nga ha bulig ni Jehova hinay-hinay nga malalamposan nira an kahadlok ha tawo. (Sal. 18:1-3; Prob. 29:25) An kahon dinhi hini nga artikulo naghihisgot han mahimo naton buhaton basi mabuligan an aton estudyante nga magtubo an iya gugma ha Dios. Dugang pa, ano an mahihimo han kongregasyon basi mabuligan an mga estudyante ha Biblia nga mas magpakita hin gugma?

9. Ha ilustrasyon mahitungod ha usa nga nag-aaram pagdrayb, paonan-o an estudyante nahibabaro hin importante nga mga leksyon?

⁹ Hunahunaa utro an ilustrasyon mahitungod ha usa nga nag-aaram pagdrayb. Samtang nagdadrayb hiya kaupod han instruktor, paonan-o hiya nahibabaro? Pinaagi ha pagpamati ha iya instruktor ngan pag-obserbar ha iba pa nga mahirot nga mga drayber. Pananglitan, bangin aghaton hiya han instruktor nga kitaon an usa nga drayber nga may pagkabuotan nga nahatag hin lugar ha iba nga mahiuna ha iya. O bangin itudlok ha iya an usa nga drayber nga may konsiderasyon nga nag-iban han lamrag han iya suga basi diri masilaw an iya iginkakatapo. Ito nga mga ehemplo nagtututdo ha estudyante hin importante nga mga leksyon nga iya magagamit kon nagdadrayb hiya.

10. Ano an makakabulig ha estudyante ha Biblia nga mag-uswag ha espirituwal?

¹⁰ Sugad man, an estudyante ha Biblia nga nagtikang pagbiyahe ha dalan ngadto ha kinabuhi nahibabaro diri la tikang ha iya magturutdo kondi pati liwat ha maopay nga mga ehemplo han iba pa nga surugoon ni Jehova. Salit, ano an makakabulig gud ha mga estudyante nga mag-uswag ha espirituwal? An pag-atender ha aton Kristiano nga mga katirok. Kay ano? An Kasuratanhon nga instruksyon ha mga katirok magpapahilarom han ira kahibaro, magpaparig-on han ira pagtoo, ngan mabulig ha ira nga magtubo an ira gugma ha Dios. (Buh. 15:30-32) Dugang pa, ha mga katirok maipapakilala han magturutdo an estudyante ha mga kabugtoan nga bangin pariho ha iya an mga naieksperyensyahan. Makikita han estudyante an mag-opay nga ehemplo han kabugtoan ha kongregasyon nga nagpapakita hin gugma. Tagda an masunod nga mga senaryo.

11. Ano nga mga ehemplo an mahimo makita ha kongregasyon han usa nga estudyante, ngan ano an mahimo magin epekto hito ha iya?

¹¹ Naoobserbaran han usa nga estudyante ha Biblia, nga solo nga kag-anak, an usa nga sister nga pariho ha iya an sitwasyon. Nababantad an iya kasingkasing kon nakikita niya an daku nga pangalimbasog han sister nga makaatender ha Kingdom Hall upod an iya gudtiay nga mga anak. Nakilala han usa nga estudyante nga nakukurian pagbaya ha pagsigarilyo an usa nga magwarali nga nakaeksperyensya liwat hito pero naglampos hiya. An magwarali nagsiring ha estudyante nga an iya nagtutubo nga gugma kan Jehova nagpagios ha iya nga sundon an Iya mga sugo. (2 Cor. 7:1; Fil. 4:13) Katapos mamati ha eksperyensya han magwarali, mas nagkaada kompyansa an estudyante han ginpasarig hiya han brother, “Kaya mo liwat ito bayaan.” Napapansin han usa nga batan-on nga babaye, nga estudyante ha Biblia, an batan-on nga sister nga malipayon gud ha iya kinabuhi sugad nga Saksi. Tungod han malipayon nga disposisyon han batan-on nga sister, karuyag niya mahibaro hin dugang pa kon kay ano nga malipayon pirme an sister.

12. Kay ano nga masisiring naton nga an tagsa ha kongregasyon makakabulig ha mga estudyante ha Biblia?

¹² Kon nakikilala han mga estudyante ha Biblia an iba-iba nga matinumanon nga magwarali,  nahibabaro an mga estudyante tikang ha ira ehemplo kon ano an iginpapasabot ha pagtuman han sugo han Kristo nga higugmaon an Dios ngan an igkasi-tawo. (Juan 13:35; 1 Tim. 4:12) Dugang pa, sugad han ginsiring na, mahimo mahibaro an estudyante ha Biblia tikang ha mga magwarali nga nakakaeksperyensya hin mga problema nga pariho han iya naieksperyensyahan. Pinaagi han sugad nga mga ehemplo, nahibabaro hiya nga kaya niya himoon an mga pagbag-o nga ginkikinahanglan basi magin disipulo han Kristo. (Deut. 30:11) An tagsa ha kongregasyon makakabulig ha iba-iba nga paagi basi mag-uswag ha espirituwal an mga estudyante ha Biblia. (Mat. 5:16) Ano an imo mga ginhihimo basi dasigon an mga estudyante ha Biblia nga naatender ha mga katirok?

13-14. Paonan-o gintratar ni Jesus an iya nanluluya nga mga apostol?

¹³ Karuyag naton buligan an diri aktibo nga kabugtoan nga makigbahin utro ha panhimo hin disipulo sugad nga pagtuman han sugo han Kristo. An paagi han pagtratar ni Jesus ha iya nanluluya nga mga apostol nagpapakita kon ano an mahimo naton buhaton yana.

¹⁴ Ha kataposan han ministeryo ni Jesus dinhi ha tuna han hirani na an iya kamatayon, “ginbayaan hiya [han ngatanan nga apostol] ngan namalagiw hira.” (Mar. 14:50; Juan 16:32) Paonan-o gintratar ni Jesus an iya mga apostol han nanluluya hira? Waray pag-iha tikang han ginbanhaw hi Jesus, ginsidngan niya an iba niya nga sumurunod: “Ayaw kamo kahadlok! Lakat, sumati niyo an akon kabugtoan [nga nabanhaw na ako].” (Mat. 28:10a) Waray bayai ni Jesus an iya mga apostol. Bisan kon ginbayaan hiya nira, gintawag la gihapon niya hira nga “akon kabugtoan.” Pariho kan Jehova, maloloy-on ngan mapinasayloon hi Jesus.​—2 Hadi 13:23.

15. Ano an aton inaabat para hadton diri na nakikigbahin ha ministeryo?

¹⁵ Sugad man, interesado gud kita hadton diri na nakikigbahin ha ministeryo. Kabugtoan naton hira, ngan hinigugma naton hira! Nahinunumdoman pa naton an ira mga ginbuhat hadto para kan Jehova​—an iba ha ira bangin nag-alagad ha sulod hin mga dekada. (Heb. 6:10) Namimingaw gud kita ha ira! (Luc. 15:4-7) Pariho kan Jesus, paonan-o naton maipapakita nga interesado gud kita ha ira?

16. Paonan-o naton maipapakita nga interesado kita ha aton diri aktibo nga kabugtoan?

¹⁶ May pagkabuotan nga imbitara hira. Usa nga paagi nga ginparig-on ni Jesus an iya nanluluya nga mga apostol amo an pag-imbitar ha ira ha usa nga katirok. (Mat. 28:10b; 1 Cor. 15:6) Sugad man yana, mahimo naton dasigon an mga diri aktibo nga umatender ha mga katirok ha kongregasyon. Maaram kita nga bangin kinahanglan naton hira imbitaron hin pipira ka beses antes hira umatender. Sigurado nga nalipay hi Jesus nga ginkarawat han iya mga disipulo an iya imbitasyon.​—Ikompara an Mateo 28:16 ngan Lucas 15:6.

17. Ano an angay naton magin reaksyon kon may umatender ha katirok nga diri aktibo?

¹⁷ Kinasingkasing nga abiabiha hira. Iginpaabat ni Jesus ha iya mga disipulo nga gin-aapresyar gud an ira presensya han nagkirigta hira; nag-una hiya ha pakiistorya ha ira. (Mat. 28:18) Ano an aton magigin reaksyon kon may diri aktibo nga umatender ha Kingdom Hall? Kinahanglan mag-una kita pagdaop ha iya ngan kinasingkasing nga abiabihon hiya. Ha siyahan, bangin mabaraka kita nga diri kita maaram han aton iyayakan. Pero mahimo naton hiya sidngan nga nalilipay kita nga makita hiya, ngan buhaton ito ha paagi nga diri hiya maaalohan.

18. Paonan-o naton mahimo pasarigon an diri aktibo nga mga magwarali?

¹⁸ Sinsero nga pasariga hira. Posible nga inabat han mga disipulo ni Jesus nga diri nira kaya an  sugo nga magsangyaw ha bug-os nga kalibotan. Ginpasarig ni Jesus an iya mga sumurunod: “Kaupod niyo ako ha ngatanan nga adlaw.” (Mat. 28:20) Nakabulig ba ito ha ira? Oo. Katapos hito, nagin okupado hira ha “pagtutdo ngan pagpasamwak han maopay nga sumat.” (Buh. 5:42) An diri aktibo nga mga magwarali kinahanglan liwat pasarigon. Bangin umabat hira nga diri nira kaya magsangyaw utro. Mahimo naton hira pasarigon nga diri hira magsasangyaw nga nag-uusahan. Kon andam na hira, mahimo naton hira updan. Sigurado nga aapresyaron nira an aton suporta samtang nagtitikang hira utro ha pagsangyaw han maopay nga sumat. Kon gintatratar naton an mga diri aktibo sugad nga aton kabugtoan, mahimo hira magin aktibo utro ngan makakapalipay ito ha bug-os nga kongregasyon.

19. Ano an karuyag gud naton buhaton, ngan kay ano?

¹⁹ Tubtob san-o kita manhihimo hin disipulo? Tubtob nga mahuman an ikatarapos hini nga sistema han mga butang. (Mat. 28:20; kitaa an Glossary, “Ikatarapos han sistema han mga butang.”) Makakaya ba naton tumanon ini nga sugo ni Jesus? Determinado kita nga buhaton ito! Malipayon nga ginagamit naton an aton panahon, kusog, ngan kwarta basi bilngon adton “may husto nga disposisyon basi magkaada kinabuhi nga waray kataposan.” (Buh. 13:48) Kon ginbubuhat naton ito, ginsusunod naton an susbaranan ni Jesus. Hiya nagsiring: “An akon pagkaon amo an pagbuhat han kaburut-on niya nga nagsugo ha akon ngan an paghuman han iya buruhaton.” (Juan 4:34; 17:4) Ito gud liwat an aton karuyag. Karuyag naton tapuson an buruhaton nga igintapod ha aton. (Juan 20:21) Ngan karuyag naton nga an iba, upod na an mga diri aktibo, magpadayon hini nga buruhaton kaupod naton.​—Mat. 24:13.

20. Sumala ha Filipos 4:13, kay ano nga kaya naton tumanon an buruhaton nga iginsugo ni Jesus?

²⁰ Oo, diri masayon an pagtuman han sugo ni Jesus. Pero, diri naton ito bubuhaton nga nag-uusahan la. Nagsaad hi Jesus nga makakaupod naton hiya. Kon nanhihimo kita hin mga disipulo, mga “igkasi-magburuhat [kita] han Dios” ngan ‘kaupod [naton] an Kristo.’ (1 Cor. 3:9; 2 Cor. 2:17) Salit, kaya naton ito tumanon. Daku nga pribilehiyo ngan makalilipay gud an pagtuman hini nga toka ngan pagbulig ha iba nga buhaton liwat ito!​—Basaha an Filipos 4:13.