1. Which command Jesus give e disciples for Matthew 28:18-20?

AFTER God bring Jesus back to life, Jesus appear to e disciples wey gather for Galilee. E get important thing wey e want tell them. Wetin be that? The thing wey Jesus talk dey for Matthew 28:18-20.—Read-am.

2. Which questions we go talk about?

² The command wey Jesus give to make disciples still concern all servants of Jehovah today. So, make we talk about three questions wey concern the work wey Jesus don give us. Number one, apart from to teach people the things wey God want, wetin we need to do? Number two, how all publishers for congregation fit help Bible students to continue to do well? Number three, how we fit help some brothers and sisters for congregation wey don stop to preach make they start to make disciples again?

3. Which important thing Jesus add inside the command wey e give?

³ The things wey Jesus talk dey clear. We must teach people the things wey e don command. But make we no forget one important thing. Jesus no talk say: ‘Teach them all the things wey I don command wuna.’ Instead, e talk say: Teach them “to do all the things wey I don command wuna.” So that we go fit do that thing wey Jesus talk when we de teach our Bible student, we no go only teach them, we go still show them how they go do wetin Jesus talk. (Acts 8:31) Why this one dey important?

4. How we fit teach Bible student to do wetin Jesus command?

⁴ Make we use one example to explain how we fit teach person to do wetin Jesus command. When person de teach  people how to drive motor, how e de teach e students how to obey sign and laws for road? The teacher go first teach them the road signs and laws for classroom. But, to teach how they go obey the signs and laws, e need to do another thing. E need to follow the students go practice for road, and show them how they go do wetin they don learn. Wetin we fit learn from this example?

5. (a) As e dey for John 14:15 and 1 John 2:3, wetin we need to teach our Bible students to do? (b) Talk some things wey we fit do to help our Bible students.

⁵ When we de study Bible with people, we de teach them the things wey God want make we do. But we need to do more. We must teach our Bible students to do the things wey them de learn for their life. (Read John 14:15; 1 John 2:3.) We fit use our example show them how they fit do some things wey them de learn from Bible for their school, for work, or even the place wey them de relax and enjoy theirself. We fit tell them something wey happen to us, how wetin Bible talk help us to make better decision and save us from danger. This one go show them why e good to do wetin Bible talk. We fit still pray with our students and beg Jehovah to help them with e holy spirit.—John 16:13.

6. Which other thing we need to do when we de teach our Bible students to obey wetin Jesus command?

⁶ Which other thing we need to do when we de teach our Bible students to obey wetin Jesus command? We need to help our Bible students so that they go want make disciples. Some students fit de fear to preach. So we need to dey patient with them as we de help them to understand Bible more. Then, small-small, their faith go strong, the things wey we de teach them go touch their heart, and this one go move them to want preach. Wetin we need to do to help our Bible students so that they go want preach?

7. Wetin we fit do to help our Bible students so that they go want preach?

⁷ We fit ask our Bible students some questions like: “Which better thing don happen for your life because you do wetin Bible talk? You think say other people need to hear this message too? Wetin you fit do to help them?” (Prov. 3:27; Matt. 9:37, 38) Show the student the tracts wey dey our Teaching Toolbox, and let-am choose the ones wey e feel say e family people, friends, or work people go like to read. Give the student some of the tracts. Then, make wuna practice together to show-am how e go fit use sense preach to other people and give them the tract. After our Bible student don qualify to preach as publisher wey never baptize, we want make sure say we de preach together to help-am dey strong.—Eccl. 4:9, 10; Luke 6:40.

8. Why e dey important for our Bible students to get strong love for God and neighbor? (Check the box “ How to Help Our Bible Students Love God More-More.”)

⁸ Remember say, Jesus tell us make we teach other people to “do all the things” wey e don command. The two commandment wey dey important pass na to love God and to love our neighbor. This two commandment na part of “all the things” wey Jesus command and e connect with our preaching work. (Matt. 22:37-39) So, wetin be the connection? The number one reason why we de preach, na because of the love wey we get for God and our  neighbor. Na true say some Bible students fit begin fear when they think-am say they want preach. But we fit make them know say Jehovah go help them stop to fear man small-small. (Ps. 18:1-3; Prov. 29:25) The box wey dey this article tell us the things wey we need to do to help our Bible students so that their love for God go de grow more-more. Another thing be say, wetin congregation fit do to help Bible students so that they go de show love more-more?

9. For the example of the student driver, how the student de learn important lessons?

⁹ Think again about the example of that student driver. As e de drive for road with e teacher, how the student de learn? Na when e de listen to e teacher and sofri de look other drivers as them de drive. For example, the teacher fit show the student another driver wey de sofri allow other drivers to enter e front. Or e fit show the student another driver wey de sofri reduce the light of e motor so that the full light no go shine for the eye of other drivers, and tell the student to do like that. That kind example them fit teach the student important lesson wey e go use when e de drive.

10. Wetin go help Bible students to become servant of Jehovah?

¹⁰ For the same way, Bible student wey don start to serve Jehovah no go only learn from e Bible teacher, e go still learn from the fine example of other servants of Jehovah. So, wetin fit really help Bible students to continue to do well? Na when them de always attend our Christian meeting. Why we talk like that? Advice from Bible wey them de hear for meeting go help them to learn more. This one go make their faith strong more and help them to love God more. (Acts 15:30-32) Another thing be say, when the student come meeting, the Bible teacher fit show-am other brothers and sisters wey don experience the same thing wey e de experience. Which kind better example of Christian love the student fit see for congregation? Make we see some examples.

11. Which examples Bible students fit notice for congregation, and how this examples fit affect them?

¹¹ Number one, Bible student wey get pikin but no get husband fit see another sister wey dey the same condition with-am for Kingdom Hall. But the sister de do e best to carry e small children come meeting, and so this one really touch the Bible student for heart. Number two, Bible student wey de struggle to stop to smoke try to make friend with one brother wey don dey that condition before, but e succeed to stop-am. The brother tell the student how the love wey e get for Jehovah help-am to obey the command wey Jehovah give for Bible. (2 Cor. 7:1; Phil. 4:13) The brother advice-am say, “You go fit stop-am.” So, after the student hear the story of the brother finish, e come get strong heart say e go fit really stop-am. Number three, one young girl wey be Bible student see one young sister wey de really enjoy e life as Jehovah Witness. The things wey the Bible student notice about the sister move-am to want learn more and know why the sister de always dey happy.

12. Why we fit talk say each person for congregation get wetin e fit do to help Bible students?

¹² When Bible students try to know and make friend with plenty brothers and sisters wey hold Jehovah tight, the students go learn from their example wetin e really mean to obey Jesus command, wey be to love God and neighbor. (John 13:35; 1 Tim. 4:12) As we don talk before,  the student fit learn from publishers wey don face the kind problem wey e de face. The student go see from the example of those brothers and sisters say, to change the things wey e need to change for e life and become disciple of Christ really dey possible. (Deut. 30:11) Each of us go fit do something to help Bible students for congregation. (Matt. 5:16) Answer this question by yourself: Wetin you de do to help and encourage Bible students wey de come meeting?

13-14. How Jesus treat e apostles when them dey weak for some time?

¹³ We want help our brothers and sisters wey don stop to preach make they start to preach and make disciples again. The way Jesus treat e apostles when them dey weak for some time show us wetin we fit do today.

¹⁴ Just before Jesus finish e work for this earth and before they kill-am, all the apostles “run leave Jesus.” (Mark 14:50; John 16:32) So wetin Jesus do that time wey e apostles dey weak for some time? Small time after Jesus come back to life, e tell some of e followers say: “Make wuna no fear! Make wuna go tell my brothers [say I don come back to life].” (Matt. 28:10a) Jesus no abandon e apostles. Even though say they abandon-am, Jesus still call them “my brothers.” Just like Jehovah, Jesus de show pity and e de forgive.—2 Ki. 13:23.

15. How we de feel about the publishers wey don stop to preach?

¹⁵ For the same way, we de care about our publishers wey don stop to preach. They still be our brothers and sisters, and we love them! We never forget how this dear brothers and sisters work hard for Jehovah. Some of them don even serve for many years. (Heb. 6:10) We de miss them no be small! (Luke 15:4-7) Just like Jesus, how we fit show say we care about them?

16. How we fit show say we care about publishers wey no de attend meeting again?

¹⁶ Invite them with love. One way wey Jesus use encourage e apostles when them dey weak for some time na to invite them come meeting. (Matt. 28:10b; 1 Cor. 15:6) Today too, we fit encourage publishers wey no de attend meeting again make them de attend. We fit need to invite them many times before they go gree come. As Jesus invite e disciples and they come, we dey sure say this one really make-am glad.—Compare Matthew 28:16 and Luke 15:6.

17. Wetin we go do when we see say person wey don stop to come meeting, come Kingdom Hall?

¹⁷ Welcome them with all your heart. Jesus really welcome e disciples when they meet. E no wait make they come meet-am, but e go meet them and talk to them. (Matt. 28:18) Wetin we go do when we see say person wey don stop to come meeting or preaching, come Kingdom Hall? Make we no wait make e come meet us. Make we go welcome-am with all our heart. We fit first de worry say, we fit no know wetin we go talk when we go meet the person. We fit tell the person say we really dey happy to see-am. But we go try so that we no go talk-am the way e go feel bad.

18. How we fit encourage publishers wey don stop to preach?

¹⁸ Support and encourage them. Maybe Jesus disciples feel say they no go fit preach for the whole world. But Jesus encourage them and show say e support them when e tell them say: “I dey with  wuna all the days.” (Matt. 28:20) This thing wey e do help e disciples? Yes, e help them. Small time after that time, them dey busy de “teach and tell people the good news.” (Acts 5:42) Na so e still be for publishers wey no de preach and come meeting again, they need encouragement. They fit no know where they go start from, or fear fit even de catch them to start preaching again. We fit make their mind come down when we tell them say we go dey with them, and support them for preaching. When they don ready, make we join them for preaching. They go really dey happy to know say we dey with them and support them as they start to preach again. When we treat publishers wey don stop to preach as our brothers and sisters, this one fit make them start to do well again. And this one go make everybody for congregation dey happy.

19. Wetin we dey ready to do, and why?

¹⁹ Which time this preaching work go end? Na until the end of this wicked world. (Matt. 28:20; check the Glossary, “Conclusion of the system of things.”) We go fit continue to preach and make disciples till that time? Yes, we dey ready to do-am! We de use our time, power, money, and other things wey we get to find and help the people “wey the condition of their heart dey good for everlasting life.” (Acts 13:48) When we do like this, we de follow Jesus example. E talk say: “My food na to do wetin my Father send me make I do. My food na to finish e work.” (John 4:34; 17:4) Na wetin we too dey ready to do be that. We want finish the work wey Jesus give us to do. (John 20:21) And we want other people, even people wey don stop to preach, to follow us de do the work.—Matt. 24:13.

20. As e dey for Philippians 4:13, which reason we get to talk say we go fit do the work wey Jesus command us to do?

²⁰ The truth be say, e no easy to do the work wey Jesus don give us to do. But, we no dey alone. Jesus promise say e go dey with us. For this preaching work wey we de do, “we de work with God” and with Jesus too. (1 Cor. 3:9; 2 Cor. 2:17) So, we go fit do-am. Na really big favor and blessing we get to do this work and to help other people to do-am too!—Read Philippians 4:13.