1. მუჭოთ მათეშ 28:18—20-ის იძირე, მუ მითითება მეჩ იესოქ მუშ მოწაფეეფს?

გათელებაშ უკულ იესოქ გეგმეცხად მუშ მოწაფეეფს, მით გალილეას რდეს შაყარელ. თის მნიშვნელოვან მუდგარენ აფუდ თინეფშა ორაგადე. მათეშ 28:18—20-ის (წეკითხით) მოჩამილ რე, მუ უწუ იესოქ მუშ მოწაფეეფს.

2. მუ კითხვეფს გუვარჩიენთ?

² მოწაფეეფიშ მომზადებაშ გურშენ იესოშ მითითება, ღორონთიშ არძა მსახურს მოხუნა. ათეშენ გუვარჩუათ სუმ კითხვა, ნამუთ იესოშ მოჩამილ თე დავალებაწკუმა რე დაკავშირებულ. პირველ, ახალ მოწაფეეფშა ღორონთიშ მოთხოვნეფიშ გურაფაშ გარდა, ხოლო მუ ოკო ვაკეთათ? მაჟია, მუჭო შეულებ კრებაშ არძა მაუწყებელს, მეხვარას ბიბლიაშ მაგურაფალს სულიერო წიმი ულას? მასმა, მუჭო შემლებნა მივეხვარათ არააქტიურ თანამორწმუნეეფს, კინ დართან მოწაფეეფიშ მომზადებაშ საქმეს?

3. მუ კონკრეტულ მითითება მუჩეს იესოქ?

³ იესოშ მითითება არგამა რე. ჩქი ოკო ვოგურუათ ხალხის თი ირფელ, მუთ თიქ მოგურეს. მარა ვეგშმოჭყორდან ართ მნიშვნელოვან დეტალქ. იესოს ვა უთქუალ: „ქუდაგურეთ თინეფს ირფელ, მუთ ჩქიმდე დიგურეთ“. თიქ თქუ: „ქუდაგურეთ თინეფს ირფელიშ დაცვება, მუთ ჩქიმდე დიგურეთ“. თე კონკრეტულ მითითებას ქიმვაჸუნათინ, ბიბლიაშ მაგურაფალს ოკო დუვოგურუათ, მუ ოკო აკეთას დო თეწკუმა ართო ქუვოძირათ, მუჭო შეულებ თეშ კეთება (საქ. 8:31). მუშენ რე თენა საჭირო?

4. მუს ნიშნენს მცნებეფიშ დაცვება? ქიმიჸონით მაგალით.

⁴ მცნებეფიშ „დაცვება“ თიშ მორჩილებას ნიშნენს. თიშ გაგებელო,  მუჭო შემლებნა ვოგურუათ პიროვნებას იესოშ მითითებეფიშ დაცვება, შხვა სიტყვეფით ქოფთქუათინ, მორჩილება, დეფიფქრათ ართ მაგალითშე. მუჭო ოგურუანს ინსტრუქტორ, მაგურაფ შოფერეფს მოძრაობაშ წესეფიშ დაცვებას? დუდშე მასწავლებერს შეულებ თე წესეფ საკლასო ოთახის ოგურუას თინეფს. მარა თიშ დაგურაფალო, მუჭო ოკო დემორჩილან მოძრაობაშ წესეფს, ინსტრუქტორქ შხვა მუდგარენ ხოლო ოკო აკეთას. თიქ მაგურაფალ ოკო ქიგიოხუნუას მანქანას დო ქიმეჩას რჩევეფ, მუჟამსით მაგურაფ შოფერ ოცად, მეღებულ რჩქინაშ პრაქტიკულო გიმორნაფას. მუშ გურაფა შემლებნა თე მაგალითშე?

5. ა) იოანეშ 14:15 დო პირველ იოანეშ 2:3-იშ თანახმას, მუშ კეთება ოკო დუვოგურუათ ბიბლიაშ მაგურაფალეფს? ბ) ქიმიონით მაგალითეფ, მუჭო შემლებნა ვოგურუათ ჩქინ ბიბლიაშ მაგურაფალეფს.

⁵ მუჟამსით შხვეფწკუმა ბიბლიაშ გურაფას ვატარენთ, ვოგურუანთ, მუს ითხინს ღორონთ ჩქინდე. მარა ხოლო რე მუდგარენიშ კეთება საჭირო. ბიბლიაშ მაგურაფალეფს ოკო ვოგურუათ, მუჭო გიმირინუან ნაგურეფ ირდღაშიან ცხოვრებას (წეკითხით იოანეშ 14:15; 1 იოანეშ 2:3). შემლებნა პირად მაგალითით ვოძირათ, მუჭო გიმირინუან ძირითად ბიბლიურ პრინციპეფ სკოლას, სამუშას დო გართობა დო მოსვანჯაშ დროს. მაგალთო, შემლებნა ქივეჩუათ, ჩქი მუჭო დამცვეს ზიანშე ბიბლიურ ხემძღვანელობაშ მეჸუნაქ ვარდა მუჭო მიმეხვარეს თიქ ბრძნულ გადაწყვეტილებეფიშ მეღებას. თეწკუმა ართო, მუჟამსით ბიბლიაშ მაგურაფალწკუმა ვორეთ, შემლებნა იბლოცათ დო იეჰოვას ფთხუათ, ნამდა მუშ წმინდა შურით ქუხემძღვანელას თის (იოან. 16:13).

6. მუს გულისხმენს თინა, ნამდა შხვეფს იესოშ მცნებეფიშ დაცვება ვოგურუათ?

⁶ მუს გულისხმენს თინა, ნამდა შხვეფს იესოშ მცნებეფიშ დაცვება ვოგურუათ? ჩქი ოკო მივეხვარათ ბიბლიაშ მაგურაფალეფს, გევითარან მოწაფეეფიშ მომზადებაშ სურვილ. ნამთინეს შილებე ქადაგებაშ საქმეს მონაწილებაშე ფიქრ ხოლო ოშქურინუანდას. ათეშენ, მოთვინება მოსაჭირნა, მუჟამსით ვოხვარუთ თინეფს, ჭიე-ჭიეთ უჯგუშო ქინანჭან ბიბლიურ ჭეშმარიტებას დო თეშნერო უმოს რჩქინა მიღან, ნაგურეფუქ თინეფიშ გურს შეხუას დო მოქმედებაშა აღძრას. მუშ კეთება შემლებნა, ნამდა ბიბლიაშ მაგურაფალეფს მივეხვარათ, უღდან შხვეფწკუმა სახიოლო ამბეშ ქადაგებაშ სურვილ?

7. მუჭო შემლებნა მივეხვარათ ბიბლიაშ მაგურაფალს, გევითარას შხვეფშა სახიოლო ამბეშ გინოჩამაშ სურვილ?

⁷ შემლებნა ბიბლიაშ მაგურაფალს თეცალ კითხვეფ დუსვათ: „მუჭო თირუ სქან ცხოვრება უჯგუშობაშა სამეფოშ ცნობაქ? სქან აზრით, ქასაჭირნანო შხვეფს თე ცნობაშ მორჩქილაფა? მუჭო შეილებ მეხვარე თინეფს?“ (იგავ. 3:27; მათ. 9:37, 38). ქაძირე თის თი ბუკლეტეფ, ნამუთ გურაფას მოხვარნან ფერ საშვალებეფშა მიშურს დო გეგშაგორაფე ნამთინე, ნამდგაშეთ ფიქრენს, ნამდა მუშ ნათესეეფს, მეგობრეფს ვარდა თანამშრომელეფს დაინტერესენს. ქიმეჩ თე ბუკლეტეფიშ მუსხირენ ეგზემპლარ. წინასწარ ქივარჯიშ თიწკუმა ართო, ნამდა ქუდაგურუე, ტაქტიანო მუჭო მიარზუას ბუკლეტ. მუშო ოკო რაგად, თიშ უკულ მუთ ბიბლიაშ მაგურაფალ მოუნათლავ მაუწყებელო გინირთუ, ჩქი თიწკუმა ართო მსახურებაშა მიდურთ დო ქიმვეხვარებუთ თის (ეკლ. 4:9, 10; ლუკ. 6:40).

8. მუშენ რე მნიშვნელოვან, ნამდა ბიბლიაშ მაგურაფალეფქ გევითარან ღორონთიშ დო მოყვასიშ ძალიერ ჸოროფა? (ქოძირით ჩარჩო  „მუჭო მივეხვარათ ბიბლიაშ მაგურაფალეფს, უმოსო ქიჸოროფუან ღორონთ“.)

⁸ რშუდან, ნამდა იესოქ მითითება მუჩეს, შხვეფს ვოგურუათ „ირფელიშ დაცვება“, მუთ თიქ დუმოგურეს. თეშა მიშურს ჟირ არძაშ უდიდაშ მცნება — იეჰოვაშ დო მოყვასიშ ჸოროფა. ჟირხოლო მცნება მტკიცაშო რე დაკავშირებულ ქადაგება დო მოწაფეეფიშ მომზადებაშ საქმეწკუმა (მათ. 22:37—39).  მუჭო ოკავშირნა თინეფ თე საქმეს? ღორონთიშ დო მოყვასიშ ჸოროფა რე მთავარ, მუთ პიროვნებას აღძრენს, ნამდა იქადაგას. მარჩქილენა, ნამდა ნამთინე ბიბლიაშ მაგურაფალს ქადაგებაშ საქმეს მონაწილებაშე ფიქრიქ შილებე შიშ გურჩქინას. მარა ჩქი შემლებნა დუვარწმუნათ თითოულ ბიბლიაშ მაგურაფალ, ნამდა იეჰოვაშ მოხვარათ შეიალებე ჭიე-ჭიეთ გიორჯგინას კოჩიშ შიშის (ფსალმ. 18:1—3; იგავ. 29:25). თე სტატიაწკუმა დაკავშირებულ ჩარჩოს მოჩამილ რე, მუ ნაბიჯეფიშ გინოდგუმა შემლებნა, ნამდა მივეხვარათ ბიბლიაშ მაგურაფალს, უმოსო ქიჸოროფუას ღორონთ. მუშ კეთება შეულებ კრებას, ნამდა მეხვარას ქრისტეშ ახალ მოწაფეეფს, უმოსო გეგმირჩქინან ჸოროფა?

9. მუჭო გურაფლენს მნიშვნელოვან გაკვეთილეფს მაგურაფ შოფერ?

⁹ ხოლო ართშა დუვართათ მაგურაფ შოფერიშ მაგალითის. მუჭო გურაფლენს თინა, მუჟამსით ინსტრუქტორიშ გვერდით ხე დო მანქანა მეჸუნს? თინა ურჩქილე ინსტრუქტორიშ მითითებეფს დო შხვა გამოცდილ შოფერეფს ოკვირ. მაგალთო, ინსტრუქტორს შეულებ მოსწავლეს გამოცდილ შოფერშა ქიმიოქციებაფუას ყურადღება, ნამუთ შხვას გიწოლუაფაშ საშვალებას არზენს. ვარდა შეულებ ყურადღება თი შოფერშა მიოქციებაფუას, ნამუთ სპეციალურო დაბალ სინთეშა გინიჸონანს განათებაშ ფარეფს, ნამდა შხვა შოფერეფს თოლ ვა მუჭკირას. თეცალ მაგალითეფით დაჭყაფ შოფერ გურაფლენს მნიშვნელოვან გაკვეთილეფს, მუთ მანქანაშ ჸონაფაშ დროს გიმადირთუ.

10. მუ მეხვარებ ბიბლიაშ მაგურაფალს სულიერო წიმი ულას?

¹⁰ თეშნერო, მუჟამსით ბიბლიაშ მაგურაფალ სიცოცხლეშ შარას გიოდირთუ, ხვალე მასწავლებერშე ვარინ, იეჰოვაშ შხვა მსახურეფიშ ჯგირ მაგალითშე ხოლო გურაფლენს. მარა უმოსო მუ მეხვარებნა ბიბლიაშ მაგურაფალეფს სულიერო წიმი ულას? ქრისტიანულ შეხვალამეფშა დასწრება. მუშენ რე თენა მნიშვნელოვან? შეხვალამეფს ბიბლიურ მითითებეფიშ მორჩქილაფა მეხვარებ თინეფს, მიღან მეტ რჩქინა, რწმენა გემანგარან დო უმოსო ქიჸოროფუან ღორონთ (საქ. 15:30—32). თეს გეძინელ, კრებაშ შეხვალამეფს ბიბლიაშ მასწავლებერ თის გაჩინებაფუანს თი და დო ჯიმალეფს, მიდგაწკუმა შილებე ბრელ საერთო უღდას. საქმეეფით გიმორჩქინელ ჸოროფაშ მუ ჯგირ მაგალითეფ შილებე ბიბლიაშ მაგურაფალქ ძირას კრებას? გუვარჩუათ მუსხირენ სიტუაცია.

11. მუ სიტუაციეფს შილებე ბიბლიაშ მაგურაფალქ კრებას შეხვადას დო მუჭო შილებე თე ირფელქ იმოქმედას თიშა?

¹¹ პირველ სიტუაციას ბიბლიაშ მაგურაფალ, ნამუთ ხვალახე დიდა რე, ორწყე ქრისტიან დას, ნამდგას იგივე სიტუაცია უღჷ. ბიბლიაშ მაგურაფალიშ გურშა მანგარო მოქმედენს თიშ ძირაფა, მუშმადიდა ძალისხმევას გიმირჩქინანს თე და, ნამდა მუშ ჭიჭე ბაღანეფწკუმა ართო ქუმორთას კრებაშ შეხვალამაშა. მაჟია სიტუაციას ბიბლიაშ მაგურაფალ, ნამდგას სიგარეტიშ შუმაშ მეტება უჭირს, იჩინებაფუანს ჯიმას, ნამდგას იგივე პრობლემა უღუდ, მარა გიორჯგინ თის. თე ჯიმა ურაგად ბიბლიაშ მაგურაფალს, მუჭო მეხვარ იეჰოვაშ მიმართ ჸოროფაშ გამანგარებაქ, დემორჩილკო ღორონთიშ მცნებეფს (2 კორ. 7:1; ფილ. 4:13). თე ჯიმაშ ისტორიაშ მორჩქილაფაშ უკულ, თინა არწმუნენს ბიბლიაშ მაგურაფალს: „სი ხოლო შეილებ სიგარეტიშ შუმაშ მეტება“. შედეგო ბიბლიაშ მაგურაფალ უმოს დარწმუნებულ რე მუშ დუდშა. მასმა სიტუაციას ახალგაზრდა ბიბლიაშ მაგურაფალ კრებას ორწყე ახალგაზრდას, ნამუთ ბედნერ რე დო ხიოლით ომსახურ იეჰოვას. თეშ ძირაფა აღძრენს ბიბლიაშ მაგურაფალს, ქიგეგას, მუშენ რე თე და ირო თეცალ ბედნერ.

12. მუშენ შემლებნა ფთქუათ, ნამდა კრებაშ თითოულ მაუწყებელს შეულებ ბიბლიაშ მაგურაფალეფიშ მოხვარა?

¹² მუჟამსით ბიბლიაშ მაგურაფალ გეჩინებაფუანს ღორონთიშ ართგურ მსახურეფს, მიდგას შხვადოშხვანერ სიტუაციეფ უღდეს, თენა მეხვარებ, თინეფიშ მაგალითშე  ქიდიგურუას, მუს ნიშნენს ქრისტეშ მცნებეფიშ დაცვება, მუდგაშა მიშურს ღორონთიშ დო მოყვასიშ ჸოროფა (იოან. 13:35; 1 ტიმ. 4:12). თეს გეძინელ, მუჭოთ უკვე მიფშინეთ, ბიბლიაშ მაგურაფალს შეულებ თი მაუწყებელეფიშ მაგალითშე დიგურუას, მიდგას მუს უღუნ ფერ სირთულეეფ უღდეს. თეშნერ მაგალითეფშე თინა ქოძირუნს, ნამდა შეიოლებერ რე, მუდგარენეფ დოთირუას, მუთ ქრისტეშ მოწაფეთ გინორთაშო რე საჭირო (კან. 30:11). კრებაშ თითოულ მაუწყებელს შეულებ ბიბლიაშ მაგურაფალეფს შხვადოშხვანერო მეხვარას სულიერო წიმი ულას (მათ. 5:16). პირადო თქვა მუს ორთუთ თიშო, ნამდა კრებაშა გილულან ფერ, ბიბლიაშ მაგურაფალეფს მეხვარათ?

13, 14. მუჭო ოქცუდ იესო გურგოტახილ მოციქულეფს?

¹³ ჩქი მოკონა, მივეხვარათ არააქტიურ და დო ჯიმალეფს, ნამდა კინ შეასრულან ქრისტეშ მითითება, ნამუთ მოწაფეეფიშ მომზადებას ოხუ. თევრეშე, მუჭო ოქცუდ იესო გურგოტახილ მოციქულეფს, ბგურაფლენთ, ჩქი მუჭო შემლებნა მივეხვარათ არააქტიურეფს.

¹⁴ დედამიწას იესოშ მსახურებაშ ბოლოს, მუჟამსით თიშ ღურა ხოლოს რდუ, მოციქულეფქ „მიოტეს თინა დო ინტეს“ (მარ. 14:50; იოან. 16:32). მუჭო მექცუ იესოქ მოციქულეფს, მუჟამსით თინეფქ დროებით სულიერო დასუსტებულეფო გინირთეს? გათელებაშ უკულ, იესოქ მუსხირენ მოწაფეს უწუ: „ვა გაშქურნან, მეუთ დო ქუწით ჩქიმ ჯიმალეფს, [ნამდა გათელებურ ვორექ]“ (მათ. 28:10ა). იესოს ვემუტებ მუშ მოციქულეფ. მართალ რე, თინეფქ მიოტეს იესო, მარა თინა იშენით ჯიმალეფო მიშინუანდჷ მოციქულეფს. იესო იეჰოვაშ მაგალითის მეჸუნდჷ დო მოჭყოლოფე დო მპატიებელ რდუ (2 მეფ. 13:23).

15. მუ დამოკიდებულება მიღნა თინეფიშ მიმართ, მიდგაქ მიოტუ მსახურებას მონაწილება?

¹⁵ იესოცალო ჩქი ხოლო მოწუხნა თინეფიშ მდგომარეობა, მიდგაქ მიოტუ მსახურებას მონაწილება. თინეფ ჩქინ ძვირფას და დო ჯიმალეფ რენა დო მანგარო მიჸორა! ჩქი ფშუნა თინეფიშ ჸოროფა, ნამდგას ულირს გიმირჩქინანდეს. ნამთინე ბრელ წანას ართგურო ომსახურუდ იეჰოვას (ებრ. 6:10). ჩქი მანგარო მონატრნა თე და დო ჯიმალეფ! (ლუკ. 15:4—7). მუჭო შემლებნა მივაჸუნათ იესოშ მაგალითის დო ვოძირათ, ნამდა ბზრუნენთ არააქტიურეფშე?

16. მუჭო შემლებნა ვოძირათ, ნამდა ბზრუნენთ არააქტიურეფშე?

¹⁶ მთელ გურით ქუდაპატიჟით შეხვალამეფშა. იესოქ გურგოტახილ მოციქულეფ შეხვალამაშა დაპატიჟ დო თეშნერო გურშა ელუკინ თინეფს (მათ. 28:10ბ; 1 კორ. 15:6). იესოცალო, ჩქი ხოლო შემლებნა არააქტიურეფ აღბძრათ, ნამდა კინ ქიდესწრან კრებაშ შეხვალამეფს. ჩქი მარჩქილენა, ნამდა შილებე მუსხირენშა მაჸუან თექ ოკეთებელქ, მარა შეხვალამაშა თინეფიშ მოულა მანგარო მახიოლენა. მუშო ოკო რაგად, იესოს ხოლო ახიოლედ, მუჟამსით მოწაფეეფ მიღენდეს მუშ მოწვევას (ქეშუდარით მათეშ 28:16 დო ლუკაშ 15:6).

17. მუჭო ოკო მიფქცუათ, მუჟამსით არააქტიურ დარბაზშა ქუმურს?

¹⁷ მთელ გურით მიღით თინეფ. იესოქ მთელ გურით მიღჷ მოციქულეფ, მუჟამსით თინეფს შეხვად; თიქ ინიციატივა გეგმირჩქინ, იშო ქიმერთჷ მოციქულეფშა დო ქუდურაგადუ თინეფს (მათ. 28:18). ჩქი მუჭო მიფქციებუთ, მუჟამსით არააქტიურ დარბაზშა ქუმურს? თე დროს ინიციატივა ოკო გეგმიფრჩქინათ დო მთელ გურით მიბღათ თინა. დუდშე შილებე ბწუხენდათ თიშენ, ნამდა ვა მიჩქნა, მუ ვუწუათ. მარა დუდ უხერხულო ვა ვოგინაფუათინ, შემლებნა უბრალოთ ვუწუათ, ნამდა მანგარო მოხიოლნა თიშ ძირაფა.

18. მუჭო შემლებნა გურშა ელვუკინათ არააქტიურეფს?

¹⁸ გურშა ელუკინით არააქტიურეფს. იესოშ მოწაფეეფს შილებე ოშქურდეს, ნამდა ვეშეასრულებედეს მითითება ქადაგებაშ გურშენ.  მარა იესოქ უწუ: „მა ირდღას თქვანწკუმა ვორექ“ (მათ. 28:20). თე სიტყვეფით თიქ გურშა ელუკინ მოწაფეეფს. ქუმაჸუნუო თეს მუთუნ შედეგიქ? მუშო ოკო რაგად, ქო. თეშ უკულ, ხეთეშე, თინეფ „ოგურუანდეს დო აცხადენდეს სახიოლო ამბეს“ (საქ. 5:42). არააქტიურეფს ხოლო ოსაჭირნა გურიშელაკინა. შილებე ქადაგებაშ საქმეშა დორთაშა ოშქურდან. ჩქი შემლებნა დუვარწმუნათ თინეფ, ნამდა თე საქმეს ქელვუდირთუთ. მზათ იჸუაფნან, შემლებნა ოქადაგებშა მიდეპჸუნათ. მუშო ოკო რაგად, სახიოლო ამბეშ ქადაგებას კინ ქიდიჭყანან, დაფასენა ჩქინ თეცალ ელარნას. მუჟამსით არააქტიურეფს თეშ ვუჯინეთ დო ვოქცუთ მუჭოთ ჩქინ და დო ჯიმალეფს, თეს შილებე მთელ კრებაშო მაჸუნას ჯგირ შედეგეფქ.

19. მუ მოკონა დო მუშენ?

¹⁹ სოიშახ ოკო გუვაგრძელათ მოწაფეეფიშ მომზადებაშ საქმე? თე საქმეს თე ქვეყნიერებაშ ბოლოშახ გუვაგრძელენთ (მათ. 28:20). შემალებენანო, ნამდა ბოლოშა ქიმიპჸუნათ იესოშ თე დავალება? ჩქი გინოჭყვიდილ მაფნა, თაშ მოქციება! ხიოლით ვუთმენთ ჩქინ დროს, ენერგიას დო სახსრეფს თი ადამიანეფიშ გორუას, „მით მარადიულ ცხოვრებაშო სწორას განწყობილ“ რენა (საქ. 13:48). თეშნერო იესოშ მაგალითის მეპჸუნთ. თიქ თქუ: „ჩქიმ ოჭკუმალ თინა რე, ნამდა ჩქიმ მუმაშქუმალარიშ ნება შევასრულე დო თიშ საქმე ბოლოშა ქიმიპჸუნე“ (იოან. 4:34; 17:4). ჩქი ხოლო თენა მოკონა. ჩქინ სურვილ რე, ბოლოშა ქიმიპჸუნათ ჩქინდა მონდებულ საქმე (იოან. 20:21). თეს გეძინელ, მოკონა შხვეფქ ხოლო, თინეფ შქას არააქტიურეფქ, ჩქინწკუმა ართო ბოლოშა შეასრულან თე საქმე (მათ. 24:13).

20. მუჭოთ ფილიპელეფიშ 4:13-ს ჭარჷ, მუშენ შემლებნა შევასრულათ თი საქმე, ნამუთ იესოქ მუმანდეს?

²⁰ იესოშ მითითებაშ შესრულება გვალო ადვილ ხოლო ვა რე. მარა თე საქმეს ხვალე ჩქინით ვა ვორთუთ. იესოქ პირობა მუჩეს, ნამდა ჩქინწკუმა იჸუაფუდ. ჩქი მოწაფეეფიშ მომზადებაშ საქმეს „ღორონთიშ თანამშრომლეფ ვორეთ“ დო თის „ქრისტეწკუმა ართო“ ვასრულენთ (1 კორ. 3:9; 2 კორ. 2:17). ათეშენ შემლებნა თე საქმეშ შესრულება. მუშმადიდა პატი რე, ვასრულენდათ თე საქმეს დო შხვეფს ხოლო ვოხვარდათ თიშ შესრულებას! (წეკითხით ფილიპელეფიშ 4:13).