1. Eraka raha koran̈iny Matio 28:18-20, nirahiny Jesosy han̈ino ma pianatranany?

JESOSY koa fa nivilôminy Zan̈ahary, izy niboaka tamy pianatranany nivory ta Galilia tan̈y. Nisy raha matomboko nila nikoran̈iny tamindro. Asa ino izio? Amy Matio 28:18-20 ao misy koran̈anany io.​—Vakia.

2. Ino aby fan̈ontanian̈a handeha hidinihintsika ato?

² Mandeha amy panompony Jehovah jiaby avahizo koa bekony Jesosy io. Ke alô atsika handiniky fan̈ontanian̈a telo mifandray amy raha nan̈irahany Jesosy atsika io. Voanalohany, ino raha mila ataontsika ankoatrany mampianatra olo hahay raha takiny Zan̈ahary aminolombelon̈o? Faharoe, ino raha mety hataony pitory jiaby an̈ivony fiangonan̈a han̈ampian̈a pianatra Baiboly handroso? Fahatelo, akory mety han̈ampian̈a olo efa tsy mitory eky himpody hitory ndreky han̈ano pianatra ndraiky?

3. Ino raha namafisiny Jesosy, izy koa fa nan̈amia beko pianatranany?

³ Mazava toromariky namezany Jesosy. Mila ampianarintsika olo raha jiaby nan̈irahany atsika. Kanefa misy raha maventy tsy tokony hadin̈antsika. Jesosy tsy nivolan̈a: ‘Ampianara iro raha jiaby nan̈irahako anaro.’ Fa ho izy: Ampianara iro “hitandrin̈y raha jiaby nan̈irahako anaro.” Akory han̈anaovantsika zen̈y tsarabe lera mampianatra Baiboly? Tokony haboakantsika olo ampianarintsika raha tokony hataony ndreky fomba han̈anaovany zen̈y. (Asa. 8:31) Ino antony?

4. Karakory ma mampianatra olo hitandrin̈y lalàn̈a zen̈y? Hazavà aminy ohatra.

 ⁴ Dikany ‘mitandrin̈y’ zen̈y man̈araka na man̈aja. Ke akory fomba hampianaran̈a olo araiky hitandrin̈y, na han̈aja na han̈araka bekony Kristy io? Alô atsika hangala ohatra araiky han̈azavan̈a zen̈y. Misy olo araiky mianatra amy lekoly mampianatra olo mitondra tomôbily. Tsy maintsy ampianariny papianatranany izy antsendriky ino aby lalàn̈a mifehy fandihanan̈a amy lalabe, ke mila hajain̈a. Kanefa zen̈y tsy ampy, fa misy raha hafa koa mila ataony papianatra io. Izy mila miaraka amy pianatranany mitondra tomôbily amy lalabe, avio ambarany izy fomba han̈arehan̈a raha jiaby nianarany pianatra io tandatabatra tan̈y. Ino raha ianarantsika baka aminy ohatra io?

5. a) Izikoa zahan̈a Jaona 14:15 ndreky 1 Jaona 2:3, ino raha mila ampianarintsika olo ampianarintsika Baiboly? b) Akory aby fomba han̈ampiantsika pianatrantsika han̈araka toro lalan̈a amy Baiboly?

⁵ Atsika koa fa mampianatra Baiboly, ampianarintsika iro ino raha takiny Zan̈ahary amintsika. Tsy zen̈y fo. Mila ampianarintsika iro koa fomba han̈arehandro raha nianarandro io amy fiain̈ana andavanandra. (Vakia Jaona 14:15; 1 Jaona 2:3.) Akory han̈anaovantsika zen̈y? Atsika antsendriky ny mila man̈araka toro lalan̈a amy Baiboly ao lera a lekoly, ampiasàn̈a, na lera mangala diandian̈a. Mety tantaraintsika amindro raha sarotro niain̈antsika, avio amy karakory fan̈arehan̈a taridalan̈any Baiboly niaro atsika, ndreky nan̈ampy atsika hahay hanapakevitry. Lera atsika mivavaka miaraka aminany, atsika mety miangavy Jehovah hampiasa fan̈ahy masin̈inany hitaridalan̈a izy.​—Jaona 16:13.

6. Ino koa raha mila ataontsika izikoa fa mampianatra olo han̈araka bekony Kristy?

⁶ Ino koa raha mila ataontsika izikoa fa mampianatra olo hitandrin̈y bekony Jesosy? Mila ataontsika raha hahavy pianatra io han̈iry han̈ano pianatra. Sasany amindro io mavozo hitory. Ke mila maharidraha atsika izikoa fa man̈ampy iro hahay tsarabe ny marin̈y amy Baiboly ao, amy zen̈y iro hanan̈a finoan̈a matanjaka. Ho tafiditry lalin̈y amy fondro koa raha zen̈y, ke hahavy iro han̈ano raha. Ino raha mety hataontsika baka olo ampianarintsika Baiboly han̈iry hitory vaovao tsara?

7. Akory mety han̈ampian̈a pianatra Baiboly han̈iry hitory vaovao tsara aminolo?

⁷ Ty fan̈ontanian̈a mety hapetrakanao aminany: ‘Hitanao nahaitsara ma fiain̈ananao izikoa fa nan̈araka raha volan̈iny Baiboly? Fahitanao izy, mety hahatsara olo hafa koa ma maharen̈y hafatra baka amy Baiboly io? Ino raha mety hataonao han̈ampian̈a iro?’ (Ohab. 3:27; Mat. 9:37, 38) An̈aboaha trakty amy Fitaovan̈a Fampianaran̈a ao izy; an̈ontania izy aia amindro io hitany fa mety ho tianiry havany, na kamaradiny, na olo fiasan̈a araiky aminany. An̈ameza maromaro amizio izy, avio aboaha izy fomba mety han̈apitrahan̈a trakty aby io. Ampatsiaraova izy fa tokony ho tsara fan̈ahy izy koa fa man̈ano zen̈y. Man̈anaova koa fan̈azaranten̈a miaraka aminany. Lera izy manjary pitory tsy vita batisa, anao mila miaraka mitory aminany ndreky man̈ambarambara izy raha tokony hataony.​—Mpito. 4:9, 10; Lioka 6:40.

8. Nan̈ino ma olo ampianarintsika Baiboly ten̈a mila tia Jehovah ndreky tia olo jiaby? (Zahava koa “ Akory Han̈ampian̈a Pianatra Baiboly Hahaiho Tia Zan̈ahary?”)

⁸ Tsaraova fo fa Jesosy nan̈iraka atsika hampianatra olo “hitandrin̈y raha jiaby” nan̈irahany pianatranany. Tafiditry amy zen̈y beko aroe maventy man̈iraka atsika ho tia Zan̈ahary ndreky ho tia olo jiaby. Mila tia Zan̈ahary ndreky tia olo atsika vo hahavita hitory  ndreky han̈ano pianatra. (Mat. 22:37-39) Nan̈ino ma? Tsy mora aminolo ampianarintsika Baiboly ndraikindraiky hitory, fotony iro mavozo olo; ary raha zen̈y normaly. Izikoa fa mahaitia Jehovah ndreky mahaitia olo pianatra io, hihen̈y tsihelihely tahotronany. (Sal. 18:1-3; Ohab. 29:25) Akory han̈ampian̈a pianatra Baiboly hahaiho tia Jehovah fo? Man̈azava zen̈y efajoro amy lahatsoratra ty. Ankoatranizen̈y, misy raha hafa koa mety hataonolo amy fiangonan̈a han̈ampian̈a izy hahay han̈aboaka fitiavan̈a aby io, na fitiavan̈a Jehovah zen̈y na fitiavan̈a olo hafa.

9. Aminy ohatra mikasiky olo mianatra mitondra tomôbily in̈y, nan̈ino izy mila mitondra tomôbily miaraka amy papianatranany?

⁹ Diniha ndraiky baka ohatra mikasiky olo mianatra mitondra tomôbily in̈y. Misy fotoan̈a izy mitondra tomôbily amy lalabe, miaraka amy papianatranany. Ino ma mahatsara zen̈y? Ho maro raha ho hainy izikoa tandrin̈esany tsarabe toromariky amezany papianatranany, ndreky zahavany tsara raha ataony sofera hafa. An̈atiny iro amy lalan̈a in̈y, papianatranany io mety hanondro sofera araiky tsara fan̈ahy, nan̈omba tomôbily hafa nangataka hihoatra izy. Papianatra io koa mety hanondro sofera araiky nampihen̈y hazavan̈any jironany baka tsy hampijaly sofera hafa hizaha lalan̈a. Fahitany pianatra io raha aby zen̈y han̈ampy izy hahay raha tsy maintsy atao izikoa fa mitondra tomôbily.

10. Ino raha han̈ampy pianatra Baiboly handroso arapan̈ahy?

¹⁰ Karaha zen̈y koa pianatra Baiboly araiky vo manomboko mandeha amy lalan̈a mengo amy fiain̈ana. Marin̈y fa efa misy olo mampianatra izy Baiboly, fa ho maro koa raha ho hainy izikoa fa mandiniky modely tsarany panompony Jehovah hafa. Ino raha ten̈a han̈ampy izy handroso arapan̈ahy? Man̈aton̈o fivorian̈a. Fotony izy koa mivory, hitombo raha ho hainy, ho fatatra koa finoan̈anazy, avio hahaiho tia Zan̈ahary fo izy. (Asa. 15:30-32) Mety ampikoran̈iny papianatranany amy rahalahy ndreky ranabavy miramiran̈a raha iain̈ana aminany koa izy lera avy an̈y, ke ho hitany karakory atao man̈aboaka fitiavan̈a Jehovah ndreky olo hafa. Alô atsika handiniky ohatra vitsivitsy mety ho hisy ampivorian̈a.

11. Ino aby raha mety ho hitany pianatra Baiboly izy koa fa mandeha mivory, baka io ino mety ho vokatranizen̈y aminazy?

¹¹ Misy viavy araiky mianatra Baiboly; izy zaraiky fo mitarimy zanany. Izy koa fa nandeha nivory, rikian̈a izy mahita ranabavy araiky mifen̈y man̈aton̈o fivorian̈a miaraka amy zanany maro madiniky. Ten̈a nanohin̈y fonany raha zen̈y! Misy pianatra araiky tihiala sigarety ndraiky mikoran̈a amy rahalahy araiky efa navy nifima taloha. Nivolan̈a rahalahintsika io fa izy koa fa nahaitia Jehovah, nanjary vitany fo nan̈araka bekony Zan̈ahary. (2 Kor. 7:1; Fil. 4:13) Avio rahalahy io nivolan̈a tamy pianatra io karaha ty: “Ho vitanao koa raha zen̈y.” Ino vokany? Nanjary nahainatoky fo pianatra io fa ho vitany koa hiala sigarety. Misy man̈angy tanora araiky koa rikian̈a mahita ranabavy tanora araiky ravoravo manompo Jehovah. Ke raha zen̈y nandrisiky tsaiky viavy io tihahay nan̈ino ranabavintsika hely io karaha ravoravo fo.

12. Ino haviantsika mivolan̈a fa samby afaka man̈ampy pianatra Baiboly handroso aby olo tsiaraikiaraiky an̈ivony fiangonan̈a?

¹² Ino vokany izikoa olo ampianarintsika Baiboly mahay rahalahy ndreky ranabavy tsy mivadiky karaha zen̈y? Ho moramora aminany han̈araka bekony Jesosy, araiky man̈iraka atsika ho tia Jehovah ndreky ho tia olo. Ho hitany koa fomba mety han̈anaovan̈a zen̈y.  (Jaona 13:35; 1 Tim. 4:12) Maro amindro piaramanompo aby io baka efa niaritry problemo mitovitovy amy ninany. Ke ho tsapany fo fa man̈aradia Kristy zen̈y tsy raha sarotro be. (Deot. 30:11) Hitantsika baka amy zen̈y fa afaka man̈ampy pianatra Baiboly handroso aby olo jiaby an̈ivony fiangonan̈a. (Mat. 5:16) Izikoa misy pianatra Baiboly avy mivory, asa ino raha iritriretinao hatao hankahirezan̈a izy?

13-14. Ino raha nataony Jesosy koa fa hitany fa rivan̈a iro apostoly aby io?

¹³ Maro piaramanompo amintsika efa tsy mitory eky. Ke atsika tihan̈ampy iro himpody hitory ndreky han̈ano pianatra, eraka bekony Kristy. Han̈ampy atsika han̈ano zen̈y fomba nitondrasany Jesosy iro apostoly aby io, iro koa fa kivy.

¹⁴ Taloha heliny namonoan̈a Jesosy, ‘niala izy aby iro apostolinany aby io ke nilefa iro jiaby.’ (Mar. 14:50; Jaona 16:32) Nalemy trôko mare iro tamy zen̈y. Akory nan̈ampiany Jesosy iro? Karaha ty ho izy tamy pan̈aradia izy sasany (viavy iro io), tafara heliny namilaomany Jehovah izy: “Anaro aza mavozo! Mindao, koràn̈a aminiry rahalahiko [fa zaho efa velon̈o].” (Mat. 28:10a) Jesosy tsy nan̈ary iro. Ndray ningiandro apostolinany aby io izy, mbala ‘rahalahiny’ fo fomba nikahiany iro. Izy namindra fô sady nan̈ambela hadisovan̈a, karaha Jehovah.​—2 Mpanj. 13:23.

15. Karakory fiheverantsika iro piaramanompo efa tsy mitory eky aby io?

¹⁵ Karaha fiheverany Jesosy iro apostoly aby io koa fiheverantsika iro piaramanompo amintsika aby io, ndray iro efa tsy mitory eky. Iro io mbala rahalahintsika ndreky ranabavintsika, ary ten̈a tiantsika mare iro! Tsisy andra an̈adin̈asantsika raha tsara jiaby vitandro tamy fanompoan̈a, nohony fitiavandro Jehovah. Tan̈atiny taon̈o maro, nifen̈y angovo jiaby sasany tamindro io nan̈ano asany Jehovah. (Heb. 6:10) Efa tsy din̈intsika hiaraka hanompo amindro ndraiky! (Lioka 15:4-7) Karaha nataony Jesosy, akory han̈aboahantsika fa mbala tia iro namantsika aby io atsika ndray iro efa tsy mitory eky?

16. Akory han̈aboahantsika fa tia iro piaramanompo efa tsy mitory eky aby io atsika?

¹⁶ Tahaoma hivory iro. Iro apostoly aby io koa fa kivy, nitahôminy Jesosy hivory iro. Zen̈y fomba araiky nankahirezany iro. (Mat. 28:10b; 1 Kor. 15:6) Misaora ravoravo izy, iro koa fa navy nan̈aton̈o fivorian̈a io! Karaha zen̈y koa ataontsika amy zioty. Tahômintsika hivory koa iro efa tsy mitory eky aby io, izikoa iro mbala tsy mivory. Mety hatetitetiky atsika hitaon̈o iro io, zay iro vo ho avy. Fa iro koa fa avy, ravoravo mare atsika, karaha Jesosy.​—Ampiràn̈a amy Matio 28:16 ndreky Lioka 15:6.

17. Karakory tokony hataontsika izikoa fa misy rahalahy na ranabavy araiky efa tsy mitory eky avy mivory?

¹⁷ Aboaha fa ravoravo mare anao mahita iro. Jesosy koa fa nitraotro tamy pianatranany aby io, nataony tsapandro tsarabe fa ravoravo izy nahita iro. Izy tsy niambin̈y iro han̈aton̈o fa izy foeky nan̈aton̈o iro. (Mat. 28:18) Akory koa tokony hataontsika izikoa fa misy olo efa tsy mitory eky avy mivory? Mila raesintsika tsarabe iro, ke atsika ny tokony han̈aton̈o iro voanalohany. Marin̈y fa mety havozo atsika tsao tsy hahita raha hivolan̈iny. Kanefa, aboaha iro fo fa ravoravo mare anao naviandro. Aza man̈ano raha mety hampamen̈atra iro foeky.

18. Akory mety an̈amezantsika toky iro efa tsy mitory eky aby io?

¹⁸ Ameza korazy iro. Mety nieritreritry iro pianatrany Jesosy aby io fa tsy ho vitandro  foeky hitory amy tany jiaby zen̈y. Ke Jesosy nan̈amia toky iro karaha ty: “Hiaraka aminaro fo zaho isanandra.” (Mat. 28:20) Nisy vokany tsara tamindro ma raha zen̈y? Ia! Tsy ela tafaranizin̈y, nazoto mare iro ‘nampianatra ndreky nan̈ambara vaovao tsara.’ (Asa. 5:42) Mila amezantsika toky karaha zen̈y koa iro efa tsy mitory eky aby io. Mety havozo mare iro io himpody hitory, kanefa ameza toky iro fa tsy ambelantsika manokan̈a foeky iro izikoa fa mitory. Lera iro von̈ono, mety tahômintsika hiaraka hanompo amintsika iro. Hay be fa ho ravoravo mare iro izikoa atsika mifen̈y man̈ampy iro. Ataova tsapandro fa iro io mbala rahalahintsika ndreky ranabavintsika. Izikoa atsika man̈ano zen̈y, tsy atsika fo ho ravoravo fa olo jiaby an̈ivony fiangonan̈a koa.

19. Ino raha tiantsika hatao, baka io nan̈ino?

¹⁹ Firaka ombian̈a ma atsika mila mitory ndreky mampianatra? Ziska amy farany donia ty. (Mat. 28:20) Hahavita hitory ndreky hampianatra fo ma atsika firaka amy zen̈y? Ia, ary tapakevitry mare atsika han̈ano zen̈y! Ravoravo atsika mahafoe fotoan̈antsika, angovontsika, ndreky fanan̈anantsika hitsakarehan̈a lan̈iany olo ‘manan̈a toetsain̈y tsara, hazahoan̈a fiain̈ana tsisy farany.’ (Asa. 13:48) Mangala tahaka Jesosy atsika izikoa man̈ano zen̈y. Ho izy: “Man̈ano sitrapony araiky nan̈iraka zaho ndreky mankefa asanany, zen̈y hanin̈inaka.” (Jaona 4:34; 17:4) Zen̈y koa raha tiantsika hatao. Tiantsika hankifain̈a firaka amy farany asa nan̈irahany Jesosy atsika. (Jaona 20:21) Tiantsika hahavita asa io firaka amy farany koa olo hafa, an̈isanizen̈y iro efa tsy mitory eky.​—Mat. 24:13.

20. Izikoa Filipianina 4:13 io zahan̈a, nan̈ino atsika matoky fa ho vitantsika hankefa asa nan̈irahany Jesosy atsika io?

²⁰ Tsy mora mankefa asa nan̈irahany Jesosy atsika io. Nakiry izy, atsika tsy miasa manokan̈a. Jesosy efa nampan̈anten̈a fa izy hiaraka amintsika fo. Ny marin̈y aminany, ‘miaraka miasa amy Zan̈ahary ndreky Kristy’ atsika izikoa fa mitory ndreky mampianatra, ke iro tsy maintsy han̈ampy atsika. (1 Kor. 3:9; 2 Kor. 2:17) Dikanizen̈y, ho vitantsika izio. Ravoravo atsika man̈ano asa io ndreky man̈ampy olo han̈ano izio. Tsisy raha bebenizen̈y!​—Vakia Filipianina 4:13.