1. Ana lilemba lya Mateyu 28:18-20 likusasala kuti Yesu ŵalamwile ŵakulijiganya ŵakwe kutenda chichi?

YESU ali ajimwiche, ŵawonechele kwa ŵakulijiganya ŵakwe ku Galileya. Jwalakwe jwakwete ngani jakusosekwa mnope jaŵasakaga kuti ŵasalile jemanjaji. Ana ngani jakwe jaliji jamtuli? Ngani jakwe jikusasimanikwa pa lilemba lya Mateyu 28:18-20.—Aŵalanje.

2. Ana chitukambilane yiwusyo yapi?

² Yaŵalamwile Yesuyi yikusakamulasoni masengo kwa ŵakutumichila wosope ŵa Mlungu masiku agano. Munganiji chitukambilane yiwusyo yitatu yayikukamulana mnope ni masengo ga ŵatupele Yesuga. Kupwatika pakwajiganya ŵandu malamusi ga Mlungu, ana tukusosekwasoni kutenda chichi? Ana abale ni alongo mpaka amkamuchisye chamtuli jwakulijiganya Baibulo kuti ajawule pasogolo? Soni, ana mpaka twakamuchisye chamtuli abale ni alongo ŵaŵalesile kulalichila kuti atandilesoni kukamula nawo masengoga?

3. Ana Yesu ŵagopolelaga chichi paŵatulamwile kuti tukajiganye ŵandu?

³ Lilamusi lyaŵapeleche Yesuli lili lyakupikanika. Tukusosekwa kwajiganya ŵandu yindu yaŵalamwile Yesu. Nambope tukusosekwa kupikanichisya yaŵagopolelaga Yesu pelepa. Yesu paŵalamwile kuti ‘tujawule tukajiganye ŵandu,’ nganagopelelaga kuti tukagambe kwajiganya basi. Nambo jwalakwe ŵagopolelaga kuti tujawule tukajiganye ŵandu kuti akuyeje yindu yosope yaŵalamwile. Kuti tukombole kupikanila lilamusi lyeleyi, tukusosekwa kwakamuchisya ŵakulijiganya Baibulo kumanyilila yampaka atende soni twalosyeje mwampaka atendele yinduyo. (Mase. 8:31). Ligongo chichi tukusosekwa kutenda yeleyi?

4. Ana kukuya lilamusi kukusagopolela chichi? Alondesye.

 ⁴ Kuti mundu ‘akuye’ lilamusi akusasosekwa kulipikanila. Ana mpaka tumkamuchisye chamtuli mundu kukuya yindu yosope yaŵalamwile Yesu? Chisyasyo chakuyichisyachi mpaka chitukamuchisye kumanyilila yampaka tutende. Ana mundu jwakumjiganya mjakwe galimoto mpaka amkamuchisye chamtuli mjakwejo kuti akuyeje malamusi ga pamsewu? Chandanda akusosekwa kumjiganya mjakwejo malamusi ga pamsewu mkanatande kwendesya galimoto. Nambope kuti mjakwejo agakuyeje malamusigo akusasosekwa kutenda chindu chine. Jwalakwe akusosekwa kulongana ni mjakwejo pakwendesya galimoto kuti akamsalileje yindu yakusosekwa kutenda soni kuti akaloleje naga mjakwejo akukuya malamusi gaŵamjiganyisye gala. Ana tukulijiganya chichi pachisyasyo chelechi?

5. (a) Ana lilemba lya Yohane 14:15 ni 1 Yohane 2:3, likulosya kuti tukusosekwa kumjiganya jwakulijiganya Baibulo kutenda chichi? (b) Ana ni yindu yapi yampaka tumsalile jwakulijiganya Baibulo?

⁵ Patukwajiganya ŵane Baibulo, tukusitwajiganyasoni malamusi ga Mlungu. Nambope panasoni yindu yine yatukusasosekwa kutenda. Tukusosekwa kwajiganya ŵakulijiganya Baibulo ŵetu kuti ayikamulichisyeje masengo yindu yakusalijiganya. (Aŵalanje Yohane 14:15; 1 Yohane 2:3.) Mpaka twajiganye ŵakulijiganya Baibulo ŵetu yampaka atende kuti akamulichisyeje masengo malamusi ga Mlungu pali kusukulu, kumasengo, soni kwine kulikose. Mpaka twasalilesoni yajatite Baibulo kutukamuchisya kuti tusagule chenene yindu pandaŵi jatwasimene ni yindu yakusawusya. Patuli yimpepe ni jwakulijiganya Baibulo, mpaka tupopele kwa Yehofa ni kuŵenda msimu weswela kuti umlongoleleje.—Yoh. 16:13.

6. Ana ni yindu yine yapi yatukusasosekwa kutenda patukwajiganya ŵane kuti akuyeje yaŵatulamwile Yesu?

⁶ Ana ni yindu yine yapi yatukusasosekwa kutenda patukwajiganya ŵane kuti akuyeje yaŵatulamwile Yesu? Tukusosekwa kumkamuchisya jwakulijiganya jwetu kola mtima wakusachilila kwajiganya ŵane. Nambope ŵakulijiganya ŵane akusatendaga sooni kuti atande kulalichila. Tukusosekwa kuŵa ŵakusimana mtima patukwakamuchisya kuti awupikanichisyeje usyesyene ni chakulinga chakuti wayicheje pamtima soni kuti awukamulichisyeje masengo paumi ŵawo. Ana mpaka twakamuchisye chamtuli ŵakulijiganya Baibulo kola mtima ŵakusachilila kulalichila ngani syambone?

7. Ana mpaka tumkamuchisye chamtuli jwakulijiganya kola mtima wakusachilila kulalichila?

⁷ Tukusosekwa kumwusya jwakulijiganya Baibulo yiwusyo ayi, “Ana umi wenu uchenjile chamtuli pamwatandite kulijiganya Maloŵe ga Mlungu? Ana mkuganisya kuti ŵane akusosekwasoni kulijiganya Maloŵe ga Mlungu? Ana mpaka mtende wuli kuti mwakamuchisye?” (Mis. 3:27; Mat. 9:37, 38) Amlosye jwakulijiganyajo tumapepala twatukusakamulichisya masengo pakwiganya. Kaneko amsalile kuti asagule kapepala kakukawona kuti mpaka kakamuchisye ŵachibale ŵakwe, achimjakwe soni ŵandu ŵakusakamula nawo masengo. Ampe jwakulijiganyajo tumapepela twakulekanganalekangana. Kaneko amjiganye yampaka atende pakugaŵila tumapepalatu. Chachisosekwasoni kulongana najo jwakulijiganyajo kukulalichila pachachiŵa jwakulalichila jwangabatisidwa.—Jwak. 4:9, 10; Luk. 6:40.

8. Ligongo chichi yili yakusosekwa kuti ŵakulijiganya Baibulo amnonyeleje mnope Yehofa soni achimjawo? (Alole libokosi lyakuti “Mwampaka Tumkamuchisye Jwakulijiganya Baibulo Kuti Amnonyeleje Mnope Mlungu.”)

⁸ Tukusosekwa tukumbuchileje kuti Yesu ŵatusalile kuti twajiganye ŵandu kuti ‘akuyeje yindu yosope’ yaŵatulamwile. Yindu yeleyi yikupwatikapo malamusi gakuti tumnonyeleje  Mlungu soni twanonyeleje achimjetu. Malamusi gelega gali gakamulana mnope ni masengo gakulalichila soni kwajiganya ŵandu. (Mat. 22:37-39) Ana gakusakamulana chamtuli? Chindu chekulungwa chachikusatutendekasya kulalichila chili chinonyelo chetu pa Mlungu soni ŵandu. Nambopetu ŵakulijiganya Baibulo ŵane akusatendega woga kuti atande kulalichila. Myoyo mpaka twasimichisye jemanjaji kuti Yehofa mpaka ŵakamuchisye kuti aleche kwajogopa ŵandu. (Sal. 18:1-3; Mis. 29:25) Tumabokosi twatuli munganiji, tukusala yampaka tutende pakumkamuchisya jwakulijiganya Baibulo kuti amnonyeleje mnope Yehofa. Nambosoni yampaka utende mpingo pakwakamuchisya ŵakulijiganya Baibulo kuti ŵanonyeleje ŵandu ŵane.

9. Ana mundu jwakulijiganya galimoto mpaka alijiganye chamtuli yindu yakusosekwa mnope?

⁹ Aganichisyesoni chisyasyo cha mundu jwakulijiganya kwendesya galimoto jula. Ana jwalakwe akusalijiganya yindu chamtuli pandaŵi jakwendesya galimoto? Jwalakwe akusalijiganya pakupikanila yindu yakumsalila mundu jwakumjiganya soni pakulola mwakwendechesya galimoto ŵandu ŵane. Mwachisyasyo, jwakwiganya mpaka amlanjile jwakulijiganya yakutenda jwakwendesya galimoto jwine pakumkunda mjakwe kuti alongolele kusogolo. Kapena mpaka amsalile yakutenda dalaifala jwine jwakunandiya kaŵale ka magesi ni chakulinga chakuti akamchenga mmeso dalaifala mjakwe. Yindu mpela yeleyi yikusamkamuchisya jwakulijiganyajo kuti ayikuyeje pandaŵi jakwendesya galimoto.

10. Ana ni chichi champaka chimkamuchisye jwakulijiganya kuti ajawuleje pasogolo mwausimu?

¹⁰ Yeleyi ni yampaka atendesoni jwakulijiganya Baibulo jwatandite kumtumichila Yehofa. Jwalakwe mpaka alijiganye yejinji kutyochela kwa mundu jwakumsajiganya Baibulo, nambope panasoni yindu yine yambone yampaka alijiganye kutyochela kwa abale ni alongo ŵane. Nambo ana ni chichi champaka chimkamuchisye jwalakwe kuti ajawuleje pasogolo mwausimu? Akusosekwa asimanikweje pamisongano jampingo. Ligongo kumisonganoku mpaka akalijiganye yindu yampaka yimkamuchisye kuti amanyilileje yindu yejinji, kulimbisya chikulupi chakwe soni kumnonyela mnope Mlungu. (Mase. 15:30-32) Kumisonganoku mpaka amanyiganesoni ni abale ni alongo ŵakusimana ni yindu yakulandana ni yakusimana najo jwalakwe. Jwakulijiganyaju mpaka ayiwone kuti abale ni alongo akusatenda yindu mwakunonyelana mnope.

11. Ana jwakulijiganya Baibulo mpaka ayiwone yindu yapi payiche ku mpingo? Ana yeleyi mpaka yimkamuchisye chamtuli jwalakwe?

¹¹ Aganichisye yisyasyo ayi. Jwakulijiganya Baibulo jwakusalela jika ŵanache, payiche kumisongano ayiweni kuti panasoni mlongo jwine jwakusalela jika ŵanache. Yeleyi yikumyika pamtima mnope pakuyiwona kuti mlongoju akusalingalinga kwika kumisongano yimpepe ni ŵanache ŵakwe. Jwakulijiganya Baibulo jwine jwayikumsawusya kuti aleche kwemba soona asimene ni m’bale jwine kumpingo jwele pandanda jwakwembaga nambo kaneko jwalesile. M’baleju akumsalila jwakulijiganyajo kuti kumnonyela kwakwe Yehofa kwamkamuchisye kuti apikanileje Malamusi ga Mlungu. (2 Akoli. 7:1; Afil. 4:13) M’baleju ŵamsalile jwakulijiganya Baibuloju kuti mpaka akombole kuleka kwemba soona, mwamti yeleyi yamlimbikasisye mnope jwakulijiganyaju. Jwakulijiganya Baibulo jwine jwachisikana akuyiwona kuti mlongo jwine jwachisikana akusangalala mnope ligongo lyakuti ali jwamboni. Jwakulijiganyaju pakuyiwona yakuti mjakwejo pakusangalala, yikumtendekasya kusachilila kulijiganya yindu yejinji yayikumkamuchisya mlongoju kuti asangalaleje.

12. Ligongo chichi mpaka tujile kuti jwalijose mumpingo akwete udindo wakumkamuchisya jwakulijiganya Baibulo?

¹² Jwakulijiganya Baibulo patandite kumanyigana ni abale ni alongo, akusalijiganya  ngopolelo ja kukuya lilamusi lya Yesu lyakuti tumnonyeleje Mlungu soni achalongo achimjetu. (Yoh. 13:35; 1 Tim. 4:12) Mpela mwatuyiwonele, jwakulijiganya mpaka alijiganye kutyochela kwa abale ni alongo ŵaŵakombwele kumalana ni yakusawusya yakulandana ni yakusimana nayo jwalakwejo. Yeleyi mpaka yimkamuchisyeje jwalakwe kuyiwona kuti mpaka akombole kuchenga ni kuŵa jwakulijiganya jwa Klistu. (Det. 30:11) Mundu jwalijose mumpingo mpaka amkamuchisye jwakulijiganya Baibulo kuti akombole kwawula pasogolo mwausimu. (Mat. 5:16) Ana wawojo mpaka amlimbikasye chamtuli jwakulijiganya Baibulo jwayiche kumisongano?

13-14. Ana Yesu jwakamuchisye chamtuli ŵakulijiganya ŵakwe pandaŵi jaŵawujile munyuma?

¹³ Tukusosekwa twakamuchisyeje abale ni alongo ŵaŵalesile kulalichila kuti atandilesoni kukamula masengo gaŵatulamwile Yesuga. Yaŵatesile Yesu pakwakamuchisya ŵakulijiganya ŵakwe pandaŵi jaŵalesile kukamula masengo gakulalichila, yikutujiganyasoni yatukusosekwa kutenda m’wejo masiku agano.

¹⁴ Yesu ali asigele panandi kuti awulajidwe, ŵakulijiganya ŵakwe “wosope ŵatisile ni kumleka” jika. (Maliko 14:50; Yoh. 16:32) Ana Yesu ŵatesile chichi pakusaka kwalimbikasya ŵakulijiganya ŵakweŵa? Paŵagambile kwimuka, Yesu ŵasalile jemanjaji kuti, “Kasimjogopa. Mjawule mkasalile achalongo achimjangu kuti [njimwiche].” (Mat. 28:10a) Yesu nganiŵaleka ŵakulijiganya ŵakweŵa. Atamose kuti jemanjanji ŵamlesile jika nambope jwalakwe ŵakolasile kuti “achimjangu.” Yesu akusatenda yindu mpela Yehofa, jwalakwe ali jwakuwusimana mtima soni akusatukululuchila.—2 Ayi. 13:23.

15. Ana tukusapikana uli patukuganichisya ya abale ni alongo ŵaŵalesile kulalichila?

¹⁵ Mwakulandana ni yeleyi, m’wejisoni tukusitwaganichisya mnope abale ni alongo ŵaŵalesile kukamula masengo gakulalichila. Jemanjaji ali chiŵela abale ŵetu soni tukusitwanonyela mnope. Tukusakumbuchilape yindu yambone yaŵatesile jemanjaji pakumtumichila Yehofa. (Aheb. 6:10) Kusala yisyene, twasoŵile mnope jemanjaji. (Luk. 15:4-7) Mwakamulana ni yaŵatesile Yesu, ana mpaka tulosye chamtuli kuti tukusitwaganichisya mnope jemanjaji?

16. Ana mpaka tulosye chamtuli kuti tukusitwaganichisya ŵandu ŵaŵawujile munyuma?

¹⁶ Ŵaŵilanjileje kumisongano. Yesu ŵaŵilanjile ŵakulijiganya ŵakwe kumsongano pakusaka kwakamuchisya kuti atandilesoni kukamula masengo gakulalichila. (Mat. 28:10b; 1 Akoli. 15:6) M’wejisoni mpaka twalimbikasye ŵandu ŵaŵawujile munyuma kuti ayicheje kumisongano. Tumanyilileje kuti tukusasosekwa kwaŵilanjila jemanjaji kwa mawulendo gejinji. Mwangakayichila, Yesu jwasangalele kwawona ŵakulijiganya ŵakwe ali ayiche pandaŵi jaŵaŵilasile.—Mpaka alolesoni Mateyu 28:16 soni Luka 15:6.

17. Ana tukusatenda wuli naga ŵandu ŵaŵawujile munyuma ayiche ku Nyumba ja Uchimwene?

¹⁷ Twapocheleje chenene. Yesu jwapochele chenene ŵakulijiganya ŵakwe, mwamti jwalakwe ni juŵatandite kuŵechetana nawo. (Mat. 28:18) Ana tukusatenda wuli naga ŵandu ŵaŵawujile munyuma ayiche ku Nyumba ja Uchimwene? Tukusosekwa kuti tuŵeje ŵandanda kwapochela chenene ŵandu ŵeleŵa. Ndaŵi sine mpaka tusoŵe chakuŵecheta. Nambo mmalo mwakwatesya sooni mpaka tugambe kwasalila kuti tusangalele mnope pakwawona.

18. Ana mpaka twalimbikasye chamtuli Aklistu ŵaŵawujile munyuma?

¹⁸ Twalimbikasyeje mwakuwona mtima. Komboleka kuti ŵakulijiganya ŵa Yesu ŵayiwonaga kuti nganaŵa akombwele kulalichila pachilambo chosope. Yesu ŵalimbikasisye jemanjaji pakwasalila kuti, “Unejo ndili ni jemanja masiku gosope.” (Mat. 28:20) Ana maloŵe gelega  galimbikasisye ŵakulijiganyaŵa? Elo. Ligongo pali pagambile kupita masiku gamnono ŵakulijiganyaŵa ŵaliji “mkwiganya ni kulalichila . . . ngani syambone.” (Mase. 5:42) Ŵandu ŵaŵawujile munyuma akusasosekwasoni kwalimbikasya. Jemanjaji mpaka ayiwoneje kuti nganaŵa ali akombwele kutandilasoni kulalichila. Mpaka twasalile kuti chituŵeje nawo yimpepe pakuja kukulalichila. Mwangakayichila, jemanjaji mpaka ayamichile mnope ligongo lyakwakamuchisya kuti atandilesoni kulalichila. Patukwawona ŵandu ŵaŵawujile munyuma kuti ali abale ni alongo ŵetu, yichitendekasya kuti ŵandu ŵosope mumpingo aŵeje ŵakusangalala.

19. Ana wosopewe tuli ŵakusachilila kutenda chichi? Ligongo chichi tuli ŵakusachilila kutenda yeleyi?

¹⁹ Ana tuchipitilisya kukamula masengo gakulalichila mpaka chakachi? Mpaka pajichiyika mbesi ja chilambo chapasichi. (Mat. 28:20) Ana yili yakomboleka kukamula masengo gaŵatupele Yesuga mpaka pa ndaŵi jelejo? Elo, tuli ŵakusachilila kutenda yeleyo. Tukusaŵa ŵakusangalala kukamulichisya masengo ndaŵi, machili, soni yindu yetu pakwakamuchisya ŵandu ŵali ŵakuŵajilwa “umi wangamala.” (Mase. 13:48) Patukutenda yeleyi, tukusaŵa tuli mkujigalila chisyasyo cha Yesu. Pajatu jwalakwe jwatite, “Yakulya yangu ni kupikanila yakusosa ŵele ŵiŵandumile une ni kumalisya kutenda masengo giŵambele.” (Yoh. 4:34; 17:4) Yeleyi ni yatukusasakasoni kutenda m’weji. Tuli ŵakusachilila kumalisya masengo gatwapochelega. (Yoh. 20:21) Soni tukusaka kuti ŵane, kupwatikapo ŵele ŵawujile munyuma, akamule nawo masengo gelega.—Mat. 24:13.

20. Ana lilemba lya Afilipi 4:13, likulosya kuti mpaka tukombole chamtuli kukamula masengo gaŵatupele Yesu?

²⁰ Kusala yisyene, tukusasosekwa kuŵa ŵakulipeleka mnope kuti tukombole kukamula masengo gaŵatupele Yesuga. Nambotu, ngaŵa kuti tukukamula jika masengoga. Yesu ŵatusalile kuti chachiŵa yimpepe ni m’weji, kulosya kuti chachitukamuchisya. Tukusakamula masengo gelega pampepe ni Yehofa soni Yesu. (1 Akoli. 3:9; 2 Akoli. 2:17) Myoyo, mpaka tukombole kukamula masengoga. Uli upile wekulungwa kukamula masengo gelega soni kwakamuchisya ŵane kuti akamule nawo.—Aŵalanje Afilipi 4:13.