1. Mang e tay Jesus chilen nrogon ni bay ko Matthew 28:18-20?

TOMUREN nni faseg Jesus ko yam’, me m’ug ngak pi gachalpen ni kar muulunggad nga Galile. Bay ban’en nib ga’ fan ni nge yog ngorad. Mang e re n’em? Bay e thin rok ko Matthew 28:18-20.​—Mu beeg. *

2. Mang boch e deer ni gad ra weliy e fulweg riy?

² Fare thin ni tay Jesus chilen ni ngan pingeg e girdi’ ngar manged pi gachalpen e ku bay rogon ngak e pi tapigpig rok Got e ngiyal’ ney. Ere chiney e ngad weliyed dalip e deer ni bay rogon ko re maruwel ney ni ke pi’ Jesus ngodad. Bin som’on e, mang reb e ban’en nsusun e ngad rin’ed ni kub muun ko bin ngad filed ngak e piin ka fin nra manged boch i gachalpen Jesus e n’en nib m’agan’ Got ngay? Bin migid e, uw rogon nrayog ni nge ayuweg urngin e walag u lan e ulung e piin yad be fil e Bible ni ngar mon’oggad ko tirok Got ban’en? Ma bin dalip e, uw rogon ni ngad ayuweged boch e walag ni kar talgad ko muulung nge machib ni ngkur sulod bayay ngar uned ngodad ko re maruwel ney ni yibe ayuweg e girdi’ ni ngar manged boch i gachalpen Jesus?

3. Mang e ri tamilangnag Jesus ni ngan rin’ ko fapi thin ni tay chilen?

³ Ba tamilang e n’en ni yog Jesus ni ngan rin’. Thingar da filed ko girdi’ e pi n’en ke tay chilen ni ngan rin’. Machane, bay ban’en nib ga’ fan nsusun e dab da paged talin. De gaar Jesus: ‘Mi gimed fil ngorad gubin e tin ni ku gog ngomed ni nguum rin’ed.’ Ya gaar: Mu filed ngorad “rogon ni nguur folgad u gubin e tin ni ku gog ngomed ni nguum rin’ed.” Ra ngad folgad ko re thin ney ni yog Jesus, ma aram e gathi kemus nib t’uf ni ngad filed ngak e piin gad be fil e Bible ngorad e n’en nib t’uf ni ngar rin’ed, ya kub t’uf ni ngad daged ngorad rogon ni ngar  rin’ed e pi n’em. (Acts 8:31) Mang fan nib t’uf ni ngad rin’ed e re n’ey?

4. Mu susunnag rogon nrayog ni ngad filed ngak be’ ni gad be fil e Bible ngak rogon ni nge fol ko n’en ni tay Kristus chilen?

⁴ Uw rogon ni ngad filed ngak be’ rogon ni nge fol ko pi n’en ni ke tay Kristus chilen? Baaray ban’en nrayog ni nge ayuwegdad ni nge tamilang u wan’dad e n’en nib t’uf ni ngad rin’ed. Faanra be fil be’ e yan u karrow ngak be’, ma uw rogon ni nge fil ngak facha’ rogon ni nge fol ko motochiyel ko yan u kanawo’? Som’on e nge fil ngak faen be fil e yan u karrow rogon e motochiyel nib t’uf ni nge fol riy u nap’an ni be yan u karrow. Machane faanra nge fil ngak rogon ni nge fol ko pi motochiyel nem, maku bay ban’en nib t’uf ni nge rin’. Ba t’uf ni nge un ngak facha’ u karrow me pow’iy ko n’en nge rin’ u nap’an ni yow bay u daken e kanawo’ ngu nap’an ni be guy facha’ rogon ni nge fol ko n’en kan fil ngak. Ere mang e rayog ni ngad filed ko re n’ey?

5. (a) Mang e ba t’uf ni ngad filed ngak e piin gad be fil e Bible ngorad rogon ni ngar rin’ed nrogon ni bay ko John 14:15 nge 1 John 2:3? (b) Mu weliy rogon nrayog ni ngad ayuweged e piin gad be fil e Bible ngorad.

⁵ Nap’an ni gad ra fil e Bible ko girdi’, ma gad ma fil ngorad e n’en nib m’agan’ Got ngay ni ngad rin’ed. Machane gathi kemus e n’en nib t’uf ni ngad rin’ed. Thingar kud filed ngorad rogon ni ngar folgad ko pi n’en ni yad be fil. (Mu beeg e John 14:15; 1 John 2:3.) Rayog ni ngad daged ngorad u daken e ngongol rodad rogon ni ngar folgad ko pi kenggin e motochiyel u Bible u nap’an ni yad bay u skul, ara tabon e maruwel, ara nap’an ni yad be rin’ boch ban’en ni ngar felfelan’gad ngay. Rayog ni ngad weliyed ngorad ban’en ni ke buch ba ngiyal’ u lan e yafos rodad ni nge dag ngorad rogon ni ke ayuwegdad e pi fonow u Bible u boch ban’en nra gafgownagdad nge rogon ni ke ayuwegdad ni ngad dugliyed boch ban’en u fithik’ e gonop. Ra gad bay e piin gad be fil e Bible ngorad u taabang, ma rayog ni ngad meybilgad ngak Jehovah ngad ninged gelngin nib thothup ni nge pow’iyrad.​—John 16:13.

6. Mang e ba muun ngay ni ngad filed ngak yugu boch e girdi’ rogon ni ngar folgad ko pi n’en ni tay Jesus chilen?

⁶ Mang e ba muun ngay ni ngad filed ngak yugu boch e girdi’ rogon ni ngar folgad ko pi n’en ni tay Jesus chilen? Ba t’uf ni ngad ayuweged e piin gad be fil e Bible ngorad ni ngar adaged ni ngar ayuweged yugu boch e girdi’ ni ngar manged boch i gachalpen Jesus. Bay boch e girdi’ ni yad be fil e Bible nsana yad be rus ni ngar uned ko machib. Ere ba t’uf ni ngad gum’an’naged gadad u nap’an ni gad be ayuwegrad ni ngari tamilang u wan’rad e tin riyul’ ni bay u Bible ya nge yag ni gel boch e michan’ rorad. Faan gad ra rin’ ni aray rogon, ma aram e ra taw e pi n’ey nga gum’ircha’rad me k’aringrad ni ngar adaged ni ngar machibgad. Ere mang e rayog ni ngad rin’ed ya nge yag nda ayuweged e piin gad be fil e Bible ngorad ni ngar adaged ni ngar uned i machibnag fare thin nib fel’?

7. Uw rogon nrayog ni ngad ayuweged be’ ni gad be fil e Bible ni nge adag ni nge machibnag fare thin nib fel’ ngak yugu boch e girdi’?

⁷ Rayog ni ngad fithed e pi deer ni baaray ko en gad be fil e Bible ngak ni be gaar: “Uw rogon ni ke fel’ boch e par rom ni bochan e ga be fol ko n’en be fil e Bible ngodad? Ga be lemnag mab t’uf ni ngki rung’ag yugu boch e girdi’ e re thin ney, fa? Mang e rayog ni ngam rin’ ya nge yag nim ayuwegrad?” (Prov. 3:27; Matt. 9:37, 38) Mu dag ngak fapi tract ni bay ko fare Tafen Talin e Maruwel ni Yima Fil Ban’en Riy ko Girdi’, mag pag ni nge mel’eg e tin be lemnag nra adag girdien e tabinaw rok, ara pi fager rok, ara piin yad nga maruwel ni ngar beeged. Ngemu’ mag pi’ boch e pi tract ney ngak. Tomuren mi gimew weliy rogon nrayog ni nge pi’ e pi tract ney u reb e kanawo’ nra adag e girdi’ ni ngar feked. Bin riyul’ riy e, nap’an nra mang facha’ ni gad be fil e Bible ngak reb e unbaptized publisher, mab t’uf ni nga darod ko machib u taabang ya nge yag nda ayuweged.​—Ekl. 4:9, 10; Luke 6:40.

8. Mang nib ga’ fan ni nge gel feni t’uf Got nge girdi’ rok e piin gad be fil e Bible ngorad? (Kum guy fare kahol ni kenggin e “ Rogon ni Ngad Ayuweged e Piin Gad Be Fil e Bible Ngorad ni Ngari Gel Feni T’uf Got Rorad.”)

⁸ Dab mu pagtalin ni ke yog Jesus ngodad ni ngad filed ko girdi’ rogon “ni nguur folgad u gubin  e tin” ke tay chilen ni ngan rin’. Re n’ey e ba muun ngay fa gal nth’abi ga’ e motochiyel ni aram e nge t’uf Got rodad mu kud t’ufeged e en nib migid ngodad. Gal motochiyel ney e l’agruw nib peth ko fare maruwel ni ngan machib min ayuweg e girdi’ ni ngar manged boch i gachalpen Jesus. (Matt. 22:37-39) Uw rogon nib peth e gali n’ey? Reb i fan nib ga’ fan ni gad ma un ko machib e bochan e ba t’uf Got nge girdi’ rodad. Riyul’ ni bay boch e piin yad be fil e Bible ni faan yad ra lemnag ni ngar uned ko machib ma ma k’aring e marus ngorad. Machane rayog ni nga dogned ngorad nra ayuwegrad Jehovah ni nge war e marus rorad ko girdi’. (Ps. 18:1-3; Prov. 29:25) Fare kahol ni bay boch e thin riy ni fan ko re article ney e be weliy boch ban’en nrayog ni ngad rin’ed ni ngad ayuweged e en gad be fil e Bible ngak ni nge gel feni t’uf Got rok. Maku reb e, mang e rayog ni nge rin’ e pi walag u lan e ulung ya nge yag nra ayuweged e piin yad be fil e Bible ni ngar mon’oggad u rogon ni yad ma dag e t’ufeg?

9. Uw rogon ni be fil faen yibe fil e yan u karrow ngak boch ban’en nib ga’ fan nrayog ni nge fol riy u lan fare fanathin ni murung’agen be’ ni be fil e yan u karrow?

⁹ Kum lemnag bayay fare fanathin ni murung’agen faen yibe fil e yan u karrow ngak. Uw rogon ni be fil boch ban’en u nap’an ni be yan u karrow ni bay e en be fil e yan u karrow ngak u tooben? Aram e nge motoyil ngak faen be fil e yan u karrow ngak miki yaliy rogon e n’en be rin’ yugu boch girdi’ ni yad be yan u karrow ni yad be kol ayuw. Bod nrayog ni nge yog fare sensey rok ngak murung’agen be’ ni bay nga m’on ni ke pag yugu reb e karrow ni ngeb i m’on rok. Fa reb e rayog ni nge yog ngak murung’agen be’ ni ke achignag raen e magal rok ya nge mom ko tin ka bay e girdi’ ni yad be yan u karrow ni ngar guyed e gin yad be sor ngay, maku rayog ni nge yog ngak ni ngki rin’ ni aram rogon. Pi n’ey e rayog ni nge fil ngak facha’ ni be fil e yan u karrow boch ban’en nib ga’ fan nrayog ni nge rin’ u nap’an ni be yan u karrow.

10. Mang e ra ayuweg be’ ni be fil e Bible ni nge mon’og ko tirok Got ban’en?

¹⁰ Ku arrogon nnap’an nra tabab be’ ni be fil e Bible ni nge pigpig ngak Jehovah, ma aram e gathi kemus ni be fil boch ban’en rok e en yow be fil e Bible ya ku be fil boch ban’en rok yugu boch e tapigpig rok Jehovah. Ere, mang e n’en nri ir e ra ayuweg e piin yad be fil e Bible ni ngar mon’oggad ko tirok Got ban’en? Aram e ngaur uned ko muulung. Mang fan? Pi n’en yad ra rung’ag u nap’an e muulung e ra ga’nag e tamilangan’ rorad, me gelnag e michan’ rorad, nge t’ufeg rorad ngak Got. (Acts 15:30-32) Maku reb e, nap’an nra un facha’ ko muulung ma aram e rayog ni nge guy e en yow be fil e Bible rogon ni ngkur mada’gad boch e walag ni taareb rogorad ara taareb rogon e magawon ni ur mada’naged ko tin be mada’nag. Rayog ni nge guy rogon ni be dag e pi walag e t’ufeg u lan e ulung. Am lemnag e pi n’en ni baaray.

11. Mang boch ban’en nrayog ni nge guy be’ ni be fil e Bible u rarogon boch e walag u lan e ulung, ma mang angin nrayog ni nge yib ngak?

¹¹ Reb e ppin ni be fil e Bible ni yigoo ir ni be chuguliy pi fak e ke guy reb e walag nib pin ni taareb rogorow. Ri yib e athamgil nga laniyan’ u nap’an ni guy rogon gelngin e athamgil ni be tay fare walag nib pin ya nge yag ni ur bad pi fak ko muulung nga Tagil’ e Liyor. Reb e pumoon ni be fil e Bible nib mo’maw’ ngak ni nge tal ko tamagow e kar mada’gow reb e walag ni pumoon ni ku aram rogon e magawon rok kafram, machane ke yag ni nge gel ngay. Fare walag e weliy ngak rogon ni yag rok ni nge fol ko pi motochiyel rok Got u nap’an ni guy rogon ni nge gel feni t’uf Jehovah rok. (2 Kor. 4:7; 7:1) Tomuren ni weliy fare walag ngak e n’en ni buch rok, ma aram me yag ni nge gel boch e pagan’ rok u nap’an ni gaar fare walag ngak, “Ku arrogom nrayog ni ngam tal ko tamagow.” Ku bay reb e rugod ni be fil e Bible ni ke guy reb e walag nib pin ni kab fel’ yangaren nib felfelan’ ngay ni ir reb e Pi Mich. Nap’an ni guy fare rugod gelngin e felfelan’ rok fare walag ni kab fel’ yangaren, ma aram me adag ni ngki nang boch i fan nib felfelan’ fare walag.

12. Mang fan nrayog ni nga dogned ni gubin e girdi’ u lan e ulung nrayog ni ngar rin’ed ban’en ni ngar ayuweged e piin yad be fil e Bible?

¹² Nap’an nra nang e piin gad be fil e Bible ngorad boch e walag nib thilthil, ma n’en ni ke buch ko pi walag nem e rayog ni nge ayuwegrad ni ngar nanged rogon ni ngar folgad ko fare thin ni tay  Kristus chilen ni aram e nge t’uf Got nge girdi’ rodad. (John 13:35; 1 Tim. 4:12) Maku reb e bod rogon ni kad weliyed faram. Rayog ni nge fil e en gad be fil e Bible ngak ban’en rok boch e walag ni ku yad be mada’nag boch e magawon ni bod e tin be mada’nag. Pi n’en be rin’ e pi walag ney e ra ayuweg faen be fil e Bible ni nge nang ni ku rayog rok ni nge thilyeg boch ban’en u rarogon ya nge yag ni mang reb i gachalpen Kristus. (Deut. 30:11) Gubin e girdi’ u lan e ulung nrayog ni ngar rin’ed ban’en ni ngar ayuweged e piin yad be fil e Bible ni ngar mon’oggad ko tirok Got ban’en. (Matt. 5:16) Ere mang boch ban’en ni ga ma rin’ ya nge yag nim pi’ e athamgil nga laniyan’ e piin yad be fil e Bible ni yad ma un ko muulung?

13-14. Uw rogon e ngongol rok Jesus ngak e pi apostal rok u nap’an ni mulan’rad?

¹³ Gad baadag ni ngad ayuweged pi walagdad ni kar talgad ko muulung nge machib ni ngkur sulod bayay ngar uned ko machib mar ayuweged e girdi’ ni ngar manged boch i gachalpen Kristus. Rogon e ngongol rok Jesus ngak e pi apostal rok u nap’an ni mulan’rad e be dag ngodad e n’en nrayog ni ngad rin’ed.

¹⁴ De n’uw nap’an u m’on ni ngan li’ Jesus nge yim’, ma urngin e pi apostal rok nra ‘paged ngar milgad.’ (Mark 14:50; John 16:32) Ere mang e rin’ Jesus ko re ngiyal’ i n’em ni ke mulan’ e pi apostal rok? De n’uw nap’an nga tomuren ni fos ko yam’, ma aram me gaar ngak boch i gachalpen: ‘Dab mu tamdaggad, marod nga mogned ngak pi walageg [ni kug fos ko yam’].’ (Matt. 28:10a) De pag Jesus e pi apostal rok. Yugu aram rogon nra milgad rok, machane miki yog ni yad ‘pi walagen.’ Jesus e bod Jehovah ni ma dag e runguy ma ma n’ag fan e kireb.​—2 Ki. 13:23.

15. Uw rogon u wan’dad e piin kar talgad ndakurur uned ko machib?

¹⁵ Ku arrogodad nri gad be lemnag e piin kar talgad ndakurur uned ko machib. Yad boch i walagdad ni yad ba t’uf rodad! Dawor da paged talin rogon e maruwel nib gel ni ur ted kafram ni fan ngak Jehovah. Bay boch e pi walag ney nib gel e maruwel ni ur ted u lan boor e duw. (Heb. 6:10) Ere riyul’ ni kar da tawrengnaged yad! (Luke 15:4-7) Ere mang boch e kanawo’ nrayog ni ngad folwokgad rok Jesus ma gad dag ngorad ni gad be lemnagrad?

16. Uw rogon nrayog ni ngad daged ni gad be lemnag pi walagdad ni kar talgad ko muulung nge machib?

¹⁶ Mu piningrad ko muulung. Reb e kanawo’ ni pi’ Jesus e athamgil nga laniyan’ e pi apostal rok u nap’an ni mulan’rad e aram e piningrad nga reb e muulung. (Matt. 28:10b; 1 Kor. 15:6) Ku arrogon e ngiyal’ ney nrayog ni ngad pied e athamgil ngak e piin kar talgad ko muulung nge machib ni ngar bad ra uned ko muulung. Gad manang nsana ra t’uf ni ngad pininged yad in yay mfini m’agan’rad ngay ni ngar bad. Dariy e maruwar riy ni felfelan’ Jesus u nap’an ni m’agan’ pi gachalpen ngay ni ngar bad ko fare muulung ni piningrad ngay.​—Mu taarebrogonnag ko Matthew 28:16 nge Luke 15:6.

17. Mang e susun ni ngad rin’ed u nap’an ni kad guyed be’ ni ke tal ko muulung nge machib ni ke yib nga Tagil’ e Liyor ni nge un ko muulung?

¹⁷ Mu dag ngorad ni kam felfelan’ ni kar bad ko muulung. I dag Jesus ngak pi gachalpen ni ke felfelan’ ni ke guyrad u nap’an nra mada’gad. Ere de son ni nga ranod ra nonad ngak, ya ir e yan i non ngorad. (Matt. 28:18) Ere mang e gad ra rin’ u nap’an ni gad ra guy be’ ni ke tal ko muulung nge machib ni ke yib nga Tagil’ e Liyor ni nge un ko muulung? Susun e gadad e nga darod da guyed ngad nonad ngak. Som’on e sana ra magafan’dad ni bochan e dad nanged e n’en nga dogned ngak. Machane rayog ni nga dogned ngak ni kar da felfelan’gad ni kad guyed. Kemus ni ngad guyed rogon ni ngad rin’ed e re n’ey u reb e kanawo’ ndabi k’aring e tamra’ ngak.

18. Uw rogon nrayog ni ngad pied e athamgil nga laniyan’ e pi walag ni kar talgad ko muulung nge machib?

¹⁸ Mu pi’ e athamgil nga lanin’rad. Sana rayog ni lemnag pi gachalpen Jesus ndabiyog ni ngar machibgad u ga’ngin yang e fayleng. Ere pi’ Jesus e athamgil nga lanin’rad ni aram e gaar ngorad: “Gubin ngiyal’ ma gu ba’ romed.” (Matt. 28:20) Ere yag ni nge ayuweg e re n’ey pi gachalpen, fa? Arrogon, ya de n’uw nap’an nga tomuren mab gel e maruwel  ni ur ted ni yad be ‘fil ngak e girdi’ ma yad be machibnag ngorad fare Thin Nib Fel’.’ (Acts 5:42) Kub t’uf ni ngan pi’ e athamgil nga laniyan’ e pi walag ni kar talgad ko muulung nge machib. Sana rayog ni yad be rus ni ngkur uned ko machib bayay. Ere rayog ni ngad ayuweged yad ni nge pagan’rad nnap’an ni yad ra machib ma gathi ngar machibgad ni goo yad. Nap’an nra taw nga nap’an nrayog ni ngkur uned ko machib bayay, ma rayog ni nga darod ko machib u taabang. Dariy e maruwar riy ni yad ra felfelan’ ko ayuw ni gad ra pi’ ngorad u nap’an ni yad ra sul ngkur uned i machibnag fare thin nib fel’ bayay. Nap’an ni gad ra dag ko pi walag ney ni ka gad ma tayrad ni yad boch i walagdad, ma aram e sana ku yad ra sul ngaur uned ko muulung nge machib bayay, mab gel e felfelan’ nra tay e pi walag u lan e ulung ni bochan e re n’ey.

19. Mang e n’en nri gad baadag ni ngad rin’ed, ma mang fan?

¹⁹ Uw n’umngin nap’an ni gad ra ulul ni ngad machibgad ma gad be ayuweg e girdi’ ni ngar manged boch i gachalpen Jesus? Gad ra rin’ nge mada’ nga tungun e re m’ag ney. (Matt. 28:20) Ere gur, rayog ni ngad rin’ed e re maruwel ney ni tay Jesus chilen nge mada’ ko ngiyal’ nem? Aram e n’en ni kad dugliyed u wan’dad ni ngad rin’ed! Gad ba felfelan’ ngay ni ngad fanayed e tayim rodad, nge gelngidad, nge salpiy rodad ni ngad gayed e “piin nib munguy lanin’rad ma kub m’agan’rad ngay ni ngar filed e tin riyul’ nra yognag e yafos ndariy n’umngin nap’an” ngorad. (Acts 13:48, NW) Nap’an ni gad ra rin’ e re n’ey, ma aram e gad be folwok rok Jesus. I gaar: “Ggan rog e nggu fol ko tin ni be finey e en ni l’ugeg ku gub, ma nggu mu’nag e maruwel ni ke pi’ ngog ni nggu muruwliy.” (John 4:34; 17:4) Ku aram e n’en nri gad baadag ni ngad rin’ed. Gad baadag ni ngad mu’naged e maruwel ni kan pi’ ngodad. (John 20:21) Ku gad baadag ni ngki un yugu boch e girdi’ ngodad ni kub muun ngay e piin kar talgad ko muulung nge machib ngad rin’ed e re maruwel ney u taabang nge mada’ ko ngiyal’ ni ke m’ay.​—Matt. 24:13.

20. Mang fan nrayog ni ngad mu’naged fare maruwel ni tay Jesus chilen ni ngad rin’ed nrogon nib puluw ko 2 Korinth 4:7?

²⁰ Riyul’ nde mom ni ngad rin’ed e n’en ni tay Jesus chilen ngodad ni ngad rin’ed. Machane, gathi gad be rin’ e re maruwel ney ni goo gadad. I micheg Jesus nra moy rodad ni nga i ayuwegdad. Ere nap’an ni gad ra ayuweg e girdi’ ni ngar manged boch i gachalpen Jesus, ma aram e gad be “maruwel rok Got u taabang” ni “gadad Kristus.” Be ayuwegdad Jehovah nge Jesus ni ngad rin’ed e re maruwel ney. (1 Kor. 3:9; 2 Kor. 2:17, NW) Ere rayog ni ngad mu’naged e re maruwel ney. Riyul’ nri gad ba tow’ath maku gad ba felfelan’ ni ngad rin’ed e re maruwel ney mu kud ayuweged yugu boch e girdi’ ni ngkur uned i rin’!​—Mu beeg e 2 Korinth 4:7.