1. Jeʼex u yaʼalik Mateo 28:18-20, ¿baʼax tu yaʼalaj Jesús tiʼ u discípuloʼob ka u beetoʼob?

KA TSʼOʼOK u kaʼa kuxkíintaʼal Jesúseʼ tu chíikbesuba tiʼ u discípuloʼob u muchʼmubaʼob Galileaoʼ. Yaan baʼax jach kʼaʼabéet u yaʼaliktiʼob. ¿Baʼax ta tʼaaniʼ? Utiaʼal k-ilkeʼ koʼox xokik Mateo 28:18-20 (xoke).

2. ¿Baʼax ken k-il teʼ xookaʼ?

² Teʼ kʼiinoʼobaʼ láayliʼ unaj k-kaʼansik le máakoʼob jeʼex tu yaʼalil Jesúsoʼ. Teʼ xookaʼ yaan k-ilik óoxpʼéel baʼaloʼob kun áantkoʼon k-beet tubeel le meyaj tu kʼubéentajtoʼon Jesúsoʼ. Yáaxeʼ yaan k-ilkeʼ maʼ chéen yaan yéetel k-kaʼansik tiʼ le máakoʼob le baʼax tu yaʼalaj Jesúsoʼ, kʼaʼabéet xan k-kaʼansiktiʼob u tsʼoʼokbesoʼob le baʼax tu yaʼaloʼ. U kaʼapʼéeleʼ yaan k-ilik bix jeʼel u yáantaj le múuchʼulil utiaʼal u progresar le máaxoʼob ku xookoʼoboʼ. Tu tsʼookeʼ yaan k-ilik bix jeʼel k-áantik le sukuʼunoʼob xuʼul u kʼaʼaytajoʼoboʼ.

3. ¿Baʼax táakaʼan ichil le baʼax tu yaʼalaj Jesús ka k-beetoʼ?

³ Jesúseʼ tu yaʼaleʼ jach kʼaʼabéet k-kaʼansik tiʼ le máakoʼob ka u beetoʼob le baʼax tu kaʼansoʼ. Maʼ unaj u tuʼubultoʼoneʼ Jesúseʼ maʼ chéen tu yaʼalaj «kʼaʼabéet k-kaʼanskoʼobiʼ», baʼaxeʼ tu yaʼalaj xan: «Kaʼanseʼexoʼob u tsʼoʼokbesoʼob tuláakal le baʼaxoʼob tsʼoʼok in waʼalikteʼexoʼ». Utiaʼal k-beetik le baʼax tu yaʼalaj Jesúsoʼ maʼ chéen unaj k-kaʼansik tiʼ le j-xoknáal baʼax kʼaʼabéet u beetkoʼ  táakaʼan xan k-kaʼansiktiʼ bix unaj u beetik. ¿Baʼaxten?

4. Aʼal junpʼéel ejemplo ku yeʼesik bix unaj u kaʼansaʼal juntúul máak u beet le baʼax tu yaʼalaj Jesúsoʼ.

⁴ ¿Bix jeʼel k-kaʼansik tiʼ juntúul máak u beet le baʼax tu yaʼalaj Jesúsoʼ? Koʼox ilik junpʼéel ejemplo. ¿Baʼax ku beetik juntúul máak wa táan u kaʼansik wa máax u kan manejar? Maʼ xaaneʼ yáaxeʼ chéen ku tsoliktiʼ baʼax ku yaʼalik le leyoʼob u tsʼaamaj le gobierno utiaʼal u yúuchul manejaroʼ. Pero wa u kʼáat ka u beet le baʼax ku yaʼalik le leyoʼoboʼ kʼaʼabéet u láakʼintik le kéen káajak u manejaroʼ. Beyoʼ yaan u yilik wa táan u beetik le baʼax tu kaʼansajtiʼoʼ. ¿Baʼax k-kanik tiʼ le ejemploaʼ?

5. 1) Jeʼex u yaʼalik Juan 14:15 yéetel 1 Juan 2:3, ¿baʼax uláakʼ unaj k-kaʼansik tiʼ le j-xoknáaloʼ? 2) Aʼal jujunpʼéel bix jeʼel u páajtal u beetaʼaleʼ.

⁵ Le kéen k-tsʼáa xook tiʼ wa máaxeʼ táan k-kaʼansiktiʼ le baʼax u kʼáat Dios ka u beetoʼ. Pero yaan uláakʼ baʼax kʼaʼabéet k-beetik. Unaj xan k-kaʼansiktiʼ bix jeʼel u tsʼáaik ichil u kuxtal le baʼax ku kanikoʼ (xok Juan 14:15; 1 Juan 2:3). Kéen u yil bix k-kuxtaleʼ yaan u kanik bix jeʼel u beetik le baʼax ku yaʼalik le Biblia teʼ escuelaoʼ, teʼ tuʼux ku meyajoʼ wa tak le kéen u yéey baʼax yéetel ken u náays u yóoloʼ. Jeʼel xan u páajtal k-tsikbaltiktiʼ bix úuchik k-áantaʼal tumen le Biblia le ka anchajtoʼon junpʼéel problemaoʼ wa le ka kʼaʼabéetchaj k-chʼaʼtuklik junpʼéel baʼax jach kʼaʼanaʼan ichil k-kuxtaloʼ. Tsʼoʼoleʼ le kéen orarnakoʼon yéetel le j-xoknáaloʼ maʼalob ka k-kʼáat tiʼ Jéeoba ka u yáant yéetel u espíritu santo (Juan 16:13).

6. ¿Baʼax uláakʼ kʼaʼabéet k-beetik utiaʼal k-áantik u maasil u beetoʼob le baʼaxoʼob tu yaʼalaj Jesúsoʼ?

⁶ ¿Baʼax uláakʼ kʼaʼabéet k-beetik utiaʼal k-áantik u maasil u beetoʼob le baʼaxoʼob tu yaʼalaj Jesúsoʼ? Kʼaʼabéet k-áantik le j-xoknáal utiaʼal u taaktal u kaʼansik uláakʼ máakoʼoboʼ. Yanoʼobeʼ kéen u yuʼuboʼob yaan u jóokʼloʼob kʼaʼaytajeʼ ku sajaktaloʼob. Le oʼolal unaj u yantaltoʼon paciencia utiaʼal k-áantkoʼob u naʼatoʼob le baʼaxoʼob ku kaʼansik le Bibliaoʼ. Beyoʼ yaan u muʼukʼaʼantal u fejoʼob yéetel tu juunaloʼob ken u yaʼaloʼob taak u jóokʼloʼob kʼaʼaytaj. ¿Bix jeʼel k-áantik le j-xoknáaloʼob utiaʼal ka taakak u tsikbaltikoʼob le baʼax ku kankoʼoboʼ?

7. ¿Bix jeʼel u páajtal k-áantik le j-xoknáal utiaʼal ka taakak u tsikbaltik le baʼax ku kanikoʼ?

⁷ Maʼ xaaneʼ jeʼel u páajtal k-beetik tiʼ le j-xoknáal le kʼáatchiʼobaʼ: «¿Tsʼoʼok wa u kʼexpajal a kuxtal desde ka káaj a xokik le Bibliaoʼ? ¿Yaan wa uláakʼ máakoʼob kʼaʼabéet u kankoʼob le baʼax ku yaʼalik le Bibliaoʼ? ¿Baʼax jeʼel u páajtal a beetik utiaʼal a wáantkoʼobeʼ?» (Pro. 3:27; Mat. 9:37, 38). Jeʼel u páajtal k-eʼesiktiʼ le tratadoʼob yaan teʼ publicaciónoʼob ku meyaj utiaʼal k-kaʼansajoʼ yéetel k-kʼáatiktiʼ máakalmáak ku tuklik jeʼel u taaktal u xoʼokol tumen u láakʼtsiloʼob, u amigoʼob wa u yéet meyajoʼobeʼ. Jeʼel u páajtal k-tsʼáaiktiʼ le tratadoʼob tu yéeyoʼ, tsʼoʼoleʼ k-ensayartik tu yéetel bix jeʼel u páajtal u tsʼáaiktiʼobeʼ. Yéetel le kéen káajak u jóokʼol kʼaʼaytajeʼ yaan xan u seguer k-áantik (Ecl. 4:9, 10; Luc. 6:40).

8. ¿Baʼaxten le j-xoknáaloʼ kʼaʼabéet u yaabiltik Dios yéetel u yéet máakil? (Ilawil xan le cuadro « Bix jeʼel k-áantik le j-xoknáal u maas yaabilt Diosoʼ»).

⁸ Jesúseʼ tu yaʼalaj unaj k-kaʼansik tiʼ u maasil tuláakal le baʼaxoʼob tu yaʼaloʼ. Ichil le baʼaxoʼob tu yaʼaloʼ tiaʼan le kaʼapʼéel mandamientoʼob maas kʼaʼanaʼantakoʼ, u yaabiltaʼal Jéeoba yéetel u yaabiltik máak u yéet máakil (Mat. 22:37-39). Wa k-tsolik tiʼ le j-xoknáal jach kʼaʼabéet u beetik le kaʼapʼéel mandamientoʼobaʼ yaan k-áantik u yil jach kʼaʼabéet u kʼaʼaytaj. Deporsi yaan u sajaktal le j-xoknáal u jóokʼol kʼaʼaytajoʼ, chéen baʼaleʼ unaj k-áantik u yil  de ke yaan u yáantaʼal tumen Jéeoba utiaʼal ka xuʼuluk u sajaktal tʼaan yéetel le máakoʼoboʼ (Sal. 18:1-3; Pro. 29:25). Wa u yaabiltmaj Jéeoba bey xan u yéet máakileʼ maʼ kun sajaktal u tsikbalt tiʼ u maasil le jatsʼuts baʼaloʼob ku yaʼalik le Bibliaoʼ. Le xookaʼ ku taasik junpʼéel cuadro tuʼux ku yaʼalik bix jeʼel k-áantik le j-xoknáaloʼob u maas yaabiltoʼob Diosoʼ. Chéen baʼaleʼ tuláakal le múuchʼulil jeʼel u páajtal u yáantaj utiaʼal ka béeyak u progresar le j-xoknáaloʼ. Koʼox ilik bix jeʼel u yáantajeʼ.

9. ¿Bix uláakʼ jeʼel u kaanbal le máax táan u kanik manejaroʼ?

⁹ Koʼox kaʼa ilik le ejemplo tiʼ le máax táan u kanik manejaroʼ. Le máax ku manejaroʼ ku yilik u kaanbal tiʼ le máax kaʼansikoʼ bey xan tiʼ le uláakʼ máaxoʼob jach u yojloʼob manejaroʼ. Maʼ xaaneʼ le máax kaʼansikoʼ ku yaʼaliktiʼ ka u yil baʼax ku beetik juntúul máax ku manejar le kéen u yil yaan máax ku kʼatkuba tu beel. Wa bix u yéemsik u sáasil u foco le kéen u yil táan u taal uláakʼ coche aktáantiʼ. Yéetel le baʼax ku yilkoʼ yaʼab baʼaloʼob ku kanik.

10. ¿Baʼax jeʼel u yáantik le j-xoknáal progresaroʼ?

¹⁰ Le j-xoknáal táan xan u káajal u tsʼáaik ichil u kuxtal le baʼax ku kanikoʼ maʼ chéen ku kaanbal tiʼ le máax kaʼansikoʼ, baʼaxeʼ tak tiʼ le máaxoʼob u tsʼaamaj u yóoloʼob u meyajtoʼob Jéeobaoʼ. Le oʼolal utiaʼal u progresareʼ jach kʼaʼabéet u bin teʼ muchʼtáambaloʼoboʼ. Le baʼax ken u yuʼuboʼ yaan u yáantik utiaʼal u maas kaanbal, u muʼukʼaʼantal u fe yéetel u maas yaabiltik Dios (Hech. 15:30-32). Tsʼoʼoleʼ le kéen xiʼik teʼ muchʼtáambaloʼ le máax tsʼáaik xook tiʼoʼ jeʼel u páajtal u presentartiktiʼ uláakʼ sukuʼunoʼob tu máansaj ichil u kuxtaloʼob le baʼax ku yúuchul xan tiʼ letiʼoʼ. ¿Bey baʼaxoʼob ku beetik le sukuʼunoʼob teʼ múuchʼulil jeʼel u yáantik le j-xoknáaloʼ? Koʼoneʼex ilik jujunpʼéel ejemploʼob.

11. 1) ¿Bey baʼaxoʼob ku beetik le sukuʼunoʼob teʼ múuchʼuliloʼ? 2) Le baʼax ku beetik le sukuʼunoʼoboʼ, ¿bix jeʼel u yáantik le j-xoknáaloʼ?

¹¹ Juntúul koʼolel táan u xook ku líiʼsik tu juunal u paalaleʼ ku kʼaj óoltik juntúul kiik táan xan u líiʼsik tu juunal u paalal. Jach ku líikʼil u yóol kéen u yil bix u tsʼáaik u yóol le kiik u bis u mejen paalal teʼ muchʼtáambaloʼ. Uláakʼ juntúul j-xoknáal taak u pʼatik u tsʼuʼutsʼ chamaleʼ ku kʼaj óoltik juntúul sukuʼun yaan kaʼach tiʼ le vicio jeʼeloʼ. Le sukuʼunoʼ ku tsikbaltik tiʼ le j-xoknáaloʼ le yaabilaj ku yuʼubik yoʼolal Jéeobaoʼ letiʼe baʼax áant u tsʼáa ichil u kuxtal le baʼax ku yaʼalik le Bibliaoʼ yéetel le áant xan u pʼat le vicio yaantiʼ kaʼachoʼ (2 Cor. 7:1; Fili. 4:13). Ka tsʼoʼok u tsikbaltiktiʼ le baʼax tu aktáantoʼ ku yaʼalik tiʼ le j-xoknáal jeʼel xan u tsaʼayal u pʼat le viciooʼ. Lelaʼ jach ku líiʼsik u yóol. Juntúul x-chʼúupal táan u xookeʼ ku kʼaj óoltik juntúul kiik jach u yéet jaʼabil yéetel mantatsʼ kiʼimak u yóol ikil u meyajtik Jéeoba. Le oʼolal letiʼeʼ ku taaktal u yojéeltik baʼaxten mantatsʼ jach kiʼimak u yóol u yilaʼal le kiikoʼ.

12. ¿Baʼaxten tuláakloʼon jeʼel u páajtal k-áantaj utiaʼal ka progresarnak le j-xoknáaloʼoboʼ?

¹² Le kéen u kʼaj óolt le j-xoknáal uláakʼ sukuʼunoʼob jach u tsʼaamaj u yóol u meyajtoʼob Diosoʼ yaan u tsʼáaik cuenta bix u yaabiltaʼal Dios bey xan le máakoʼoboʼ (Juan 13:35; 1 Tim. 4:12). Jeʼex tsʼoʼok k-ilkoʼ le j-xoknáaloʼ jach jeʼel u yáantaʼal u máans junpʼéel problema wa ku kʼaj óoltik uláakʼ sukuʼunoʼob tu máansoʼob xan le baʼax ku yúuchultiʼoʼ. Yaan u tsʼáaik cuentaeʼ jeʼel u páajtal u kʼexik u kuxtal utiaʼal u káajal u meyajtik Dioseʼ (Deu. 30:11). Tuláakloʼon teʼ múuchʼulil jeʼel u páajtal k-áantaj utiaʼal ka progresarnak le j-xoknáaloʼoboʼ (Mat. 5:16). Le oʼolal maʼalob ka k-tukle: «¿Baʼax táan in beetik utiaʼal in wáantik le j-xonáaloʼob ku taaloʼob teʼ muchʼtáambaloʼoboʼ?».

13, 14. ¿Baʼax tu beetaj Jesús le ka lúub u yóol u apóstoloʼoboʼ?

¹³ Toʼoneʼ unaj k-áantik le sukuʼunoʼob yéetel le kiikoʼob tsʼoʼok u xáantal maʼ tu jóokʼloʼob kʼaʼaytajoʼ (inactivo). Utiaʼal u páajtal k-áantkoʼobeʼ unaj k-ilik bix tu yáantil Jesús u apóstoloʼob le ka tu yilaj lubaʼan u yóoloʼoboʼ.

¹⁴ Le taʼaytak u kʼuchul u yorail u kíimsaʼal Jesúsoʼ xúumpʼattaʼab tumen u apóstoloʼob (Mar. 14:50; Juan 16:32). ¿Baʼax túun tu beetaj Jesús? Le maʼ úuch kaʼa kuxkíintaʼakoʼ tu túuxtaj jujuntúul koʼoleloʼob utiaʼal ka u yaʼaloʼob tiʼ u apóstoloʼob de ke tsʼoʼok u kaʼa kuxkíintaʼal. Tu yaʼalaj tiʼ le koʼoleloʼoboʼ: «Xeen a waʼaleʼex tiʼ in sukuʼunoʼob ka xiʼikoʼob Galilea, tiʼ ken in wiloʼobiʼ» (Mat. 28:10). Kex xúumpʼattaʼab tumen u apóstoloʼobeʼ letiʼeʼ maʼ tu xúumpʼattoʼobiʼ, seguernaj u yilkoʼob bey u sukuʼunoʼobeʼ. Jesúseʼ tu chaʼaj óotsilil tiʼob yéetel tu perdonartoʼob jeʼex u beetik Jéeobaeʼ (2 Rey. 13:23).

15. ¿Bix unaj k-ilik le máaxoʼob xuʼul u jóokʼloʼob kʼaʼaytajoʼ?

¹⁵ Toʼon xaneʼ taak k-áantik le máaxoʼob tsʼoʼok u xuʼulul u jóokʼloʼob kʼaʼaytajoʼ. Láayliʼ k-ilkoʼob bey sukuʼunoʼobeʼ yéetel jach k-yaabiltmoʼob. Maʼ tuʼubuktoʼon le bix tu tsʼáajil u yóol u meyajtoʼob Jéeobaoʼ. Yaan tiʼ letiʼobeʼ máan yaʼab años táan u beetkoʼob (Heb. 6:10). Jach taak k-kaʼa ilkoʼob teʼ kʼaʼaytajoʼ (Luc. 15:4-7). ¿Bix jeʼel k-áantkoʼob jeʼex tu yáantil Jesús u apóstoloʼobeʼ?

16. ¿Bix jeʼel k-eʼesik taak k-áantik le sukuʼunoʼob tsʼoʼok u xuʼulul u kʼaʼaytajoʼoboʼ?

¹⁶ Unaj k-invitarkoʼob teʼ muchʼtáambaloʼoboʼ. Jesúseʼ tu yaʼalaj tiʼ u apóstoloʼob ka u muchʼubaʼob tu yéetel utiaʼal u líiʼsik u yóoloʼob (Mat. 28:10b; 1 Cor. 15:6). Toʼon xaneʼ jeʼel u páajtal k-invitartik le sukuʼunoʼob xuʼul u kʼaʼaytajoʼob utiaʼal ka u láakʼintoʼonoʼob teʼ muchʼtáambaloʼoboʼ. Chéen baʼaleʼ yaan horaeʼ yaan k-aʼaliktiʼob yaʼab u téenel antes u yóotkoʼob. Jesúseʼ jach kiʼimakchaj u yóol le ka tu yilaj bin u apóstoloʼob teʼ tuʼux tu yaʼalajtiʼoboʼ. Toʼon xaneʼ yaan u kiʼimaktal k-óol kéen k-il u taal teʼ muchʼtáambal le sukuʼunoʼob xuʼul u kʼaʼaytajoʼoboʼ (Mat. 28:16; ket yéetel Lucas 15:6).

17. ¿Baʼax unaj k-beetik le kéen taalak teʼ muchʼtáambal juntúul sukuʼun xuʼul u jóokʼol kʼaʼaytajoʼ?

¹⁷ Unaj k-kʼamkoʼob yéetel kiʼimak óolal. Le ka tu yilaj u discípuloʼobeʼ Jesúseʼ náatsʼ tu yiknaloʼobeʼ ka káaj u tsikbal tu yéeteloʼob (Mat. 28:18). Kux túun toʼon, ¿baʼax ken k-beet kéen k-il u kʼuchul teʼ muchʼtáambal juntúul sukuʼun xuʼul u jóokʼol kʼaʼaytajoʼ? Unaj k-náatsʼal tu yiknal utiaʼal k-saludartik yéetel kiʼimak óolal. Maʼ xaaneʼ maʼ jach k-ojel baʼax jeʼel k-aʼaliktiʼeʼ, pero yaan horaeʼ chéen kʼaʼabéet k-aʼaliktiʼ jach kiʼimak k-óol k-kaʼa ilik. Chéen baʼaleʼ unaj k-kanáantik maʼ k-suʼlakkúuntik.

18. ¿Bix jeʼel k-líiʼsik u yóol yéetel bix jeʼel k-áantik le máaxoʼob xuʼul u kʼaʼaytajoʼoboʼ?

¹⁸ Líiʼs u yóoloʼob yéetel áantoʼob utiaʼal u kaʼa jóokʼloʼob kʼaʼaytaj. U discípuloʼob Jesúseʼ sajakchajoʼob le ka tu yuʼuboʼob yaan u kʼaʼaytajoʼob tiʼ tuláakal yóokʼol kaab. Chéen baʼaleʼ jach líikʼ u yóoloʼob le ka tu yaʼalajtiʼob Jesús lelaʼ: «Tiʼ yanen ta wéeteleʼex[eʼ]» (Mat. 28:20). Lelaʼ jach tu yáantaj le discípuloʼoboʼ tumen «maʼ xuʼul u kaʼanskoʼob yéetel u tsikbaltikoʼob le maʼalob baʼaloʼob[oʼ]» (Hech. 5:42). Lelaʼ ku yeʼesikeʼ kʼaʼabéet u yáantaʼal yéetel u líiʼsaʼal u yóol le sukuʼunoʼob tsʼoʼok u xuʼulul u kʼaʼaytajoʼoboʼ. Maʼ xaaneʼ chan saajkoʼob kaʼa jóokʼol kʼaʼaytaj. Le oʼolal jeʼel u páajtal k-aʼaliktiʼob yaan k-láakʼintikoʼob kéen u yuʼuboʼob  jeʼel u páajtal u kʼaʼaytajoʼobeʼ. Leloʼ jach jeʼel u beetik u kiʼimaktal u yóoloʼobeʼ. Le oʼolal wa maʼ tu xuʼulul k-áantkoʼob yéetel maʼ tu xuʼulul k-ilkoʼob bey k-sukuʼunoʼobeʼ, jach yaan u kiʼimaktal k-óol kéen k-il u kaʼa chʼaʼjoʼoltikoʼob u meyajtikoʼob Jéeoba.

19. ¿Baʼax unaj k-beetik utiaʼal k-tsʼoʼoksik le meyajoʼ, yéetel baʼaxten taak k-beetik?

¹⁹ ¿Baʼax kʼiin ken xuʼuluk k-áantik le máakoʼob u tsʼáaʼob ichil u kuxtaloʼob le baʼax tu kaʼansaj Jesúsoʼ? Tak ken kʼuchuk u kʼiinil u xuʼulsaʼal le yóokʼol kaabaʼ (Mat. 28:20; ilawil le jaats «Tʼaanoʼob ku tsoʼolol», kaxt «U tsʼoʼokol tiʼ le yóokʼol kaaboʼ»). ¿Yaan wa u béeytal k-tsʼoʼoksik le meyajaʼ? ¡Yaan k-ilik k-beetik! Yéetel kiʼimak óolal yaan u meyajtoʼon k-muukʼ, k-tiempo yéetel tuláakal baʼax yaantoʼon utiaʼal k-áantik «le máaxoʼob jach tu jaajil u yóol ku yeʼeskoʼob u kʼáat u kʼamoʼob le kuxtal minaʼan u xuuloʼ» (Hech. 13:48). Yaan k-tuukul jeʼex Jesús le ka tu yaʼalaj: «In woʼocheʼ in beetik baʼax u kʼáat le máax túuxtenoʼ yéetel in tsʼoʼoksik le meyaj u tsʼaamajtenoʼ» (Juan 4:34; 17:4). Jeʼex Jesúseʼ toʼoneʼ jach k-tsʼíiboltik k-tsʼoʼoksik le meyaj kʼubéentaʼantoʼonoʼ (Juan 20:21). Le oʼolal k-kʼáat ka kʼaʼaytajnak tu kaʼatéen le sukuʼunoʼob xuʼul u beetkoʼoboʼ. Beyoʼ junmúuchʼ yéetel tuláakal le sukuʼunoʼoboʼ yaan k-tsʼoʼoksik le meyajoʼ (Mat. 24:13).

20. Jeʼex u yaʼalik Filipenses 4:13, ¿baʼaxten jeʼel u páajtal k-tsʼoʼoksik le meyaj tu kʼubéentajtoʼon Jesúsoʼ?

²⁰ K-ojel maʼ fácil le meyaj tu kʼubéentajtoʼon Jesúsoʼ. Chéen baʼaleʼ maʼ u pʼatmoʼon t-juunaliʼ, letiʼeʼ tu yaʼalaj yaan u yáantkoʼon. Kéen k-beet le meyajoʼ táan k-eʼesik «u yéet meyajoʼon Dios» yéetel táan k-meyaj «junmúuchʼ yéetel Cristo» (1 Cor. 3:9; 2 Cor. 2:17). Jeʼex k-ilkoʼ jeʼel u páajtal k-tsʼoʼoksik le meyajoʼ tumen táan k-áantaʼal tumen Dios yéetel Jesús. Jach nojoch baʼal k-ilik k-beetik le meyajaʼ tsʼoʼoleʼ ku taasiktoʼon kiʼimak óolal k-áantik uláakʼ máakoʼob ka u beetoʼob xan beyoʼ (xok Filipenses 4:13).