IBADỊ abumor r’abumarani dị orọl ghan ramhạ aḅekeeny uḅulha yogh ni reelhe abidị. Ephomhoghiạn aZihova ḅilhẹ r’ephomhoghiạn amatuman kụ inyu bọ bidị oḅuạ oghị arikpisi dị emhoghi buboom abukaaphọm ilọ Omhạr phọ. (Mat. 22:37-39) Eeghe arikiạ kụ idị bidị ophinyọn, kụ ika kụ idị aZihova asẹph bọ bidị? Orue ophanyanhaạn asipuru phọ ipẹ phọ, uguạ osoman Cameroon, eniin eelhe Africa pakirị phọ epẹ erumuḍio phọ remeel ghan bọ.

Lhạ phọ 1998 onyọ umor dị oghol mọ Onésime aḅuạ ni eelhe phọ abidị Cameroon. Esi 14 asiạ odị arọl ghan emhạ aḅekeeny. Eniin aḍio dị odị aghị ituughạ, odị anhaghạn ni oghaạph omaaniọm dị agbolhomaam oḍighi iphelhegbeel phọ. Okaaphọm mọ aḅẹm mọ, “Eḍighi maạr dị iyạl arighirị oghị akonị, kụ oniin rakonị agạ phọ ephẹn, ophodiphọ rakonị agạ phọ epẹ, kụ oniin azẹ rapu nyooriphọ, opọ ra/zẹ aani bọ iboom mọ k”aḍuraan akị epẹ odị kazẹ aani bọ iboom ina phọ ḍughụm?”

Oghaạph omaaniọm mọ opọ phọ aḍighi idị Onésime aatughiạn ilọ oḅilhẹ oḅula aCameroon, rikpisi phọ kosiph bọ iboom ina. Kuolọ odị amhoọgh ni ooḅaghamhiạn aloor. Odị katue niin niin atọl Cameroon, iduọn odị marọl bọ emhạ aḅekeeny k’asiạ phọ? Ophogh mughumọ odị katue ni, Onésime aghị ni Cameroon arọl odiiny unwanyụ. Kụ reteẹny 2012, bịn odị akạr aḅulha Cameroon.

Onésime aḅẹm mọ: “Mị uḅilhẹ ni amhiigh oluạn r’ogholhoghọl okuaḍio phọ, ḅilhẹ r’asidọl phọ. Mị aḅilhẹ amhiigh orolhọm ghan ikpokolo asibẹns siphẹ aKindọm Họl phọ. Kuolọ mem dị mị agbon edeọm ituughạ phọ r’oḅaạl olhoghi, bịn iitughiạn imạ asigadạ epẹ emhạ aḅekeeny phọ meḅuạ.”

Lhạ phọ 2013, bịn Onésime aphin Géraldine, umarani dị arọl ghan France esi esugha asiạ kụ marigheel aani Cameroon. Eeghe aḍisẹph kirokirọ kụ edị olom mọ r’anhịr phọ abuẹn phọ momhoọgh, esi iduọn bidị ogbon bọ ghuḍum mọ abidị iiḍighi Omhạr phọ? Onésime aḅẹm mọ: “Idiphọ olom r’anhịr yoor ughị ni School for Kingdom Evangelizers oḅilhẹ okumuan Betẹl. Ku esi alhạ bịn 20 awe dị rotuughạ ghan Baibul phọ siphẹ ookpomhoghan phọ ayoor, oḍiiny muụm. Mị aloghoma mọ nyiidiphọ mị akạr odi esi dị mị rasiph iboom ‘ina.’” (Mạk 1:17, 18) AGéraldine aḅẹm aani mọ: “Nyiidiphọ mị mamhoọgh ḍisẹph kirokirọ, dị mị u/kiọm olhoghi.”

AJudith arọl ghan United States, kụ amhoọgh ḍiḅeraạn obughẹ arukumuan phọ odị. Odị aḅẹm mọ, “Torobọ amem dị mị aghị aphogh eghunotu ayoor epẹ Cameroon aḅula, mị umhoghi ghan loor esi dị mị uwilhẹ ghan we dị mị mamhiigh otughemhị aBaibul kụ agheel.” Toroboiperolbọ, ikparanhaạn ni aJudith oḅula aCameroon. Odị amhoọgh ogbogh oḍighi dị alhoghonhaạn ghan nyodị ḍighaạgh orue okpẹ ikpoki arookonhom odẹ odị epẹ Cameroon. Ghalhamọ r’iduọn phọ ni,  oḍuom olhoghi phọ aJudith amhoọgh bọ aghị esi aZihova, aḍighi ni iyaạr dị odị aḅula Cameroon. Odị aghaạph mọ, inyaam adọl aghuḍum mọ odị aghelhọm ghan bọ epẹ emhạ aḅekeeny phọ irọl li. Odị aaḅereghị ni alhọm aZihova orue oluạn adọl phọ. Oroma opoghom eghir r’anhịr odị alhoghonhaạn ni nyodị ḍighaạgh.

AJudith aaghiraan ni aphogh omhạn kụ aḅẹm mọ, “Esi iraạr asiạ bịn mị atughemhị inya awe oḍiiny muụm.” AJudith aḍighi ni okọy eten dị agbatanhaạn. Nyiidiphọ, odị raloghonhaạn ghan ḍighaạgh olom odị Sam-Castel, idiphọ opoghom eghir. Kụ kokaạph ika ilọ odẹ phọ odị? Otọ k’abidị r’odị uwaaghị ni omhiịn otu arookonhom enhọn eelhe, dị aạy odẹ phọ odị kụ oḅilhẹ ookonhom oopho.

Oniin onyọ umor dị oghol mọ Victor aḅuạ ni agheel Canada. Kụ r’aạl eniin emhuoghaạph aWatchtower dị aghaạph idị egbolhomaam ogbogh askul, kụ akiririom aphogh osopha phọ odị idị egbolhomaam askul. Bịn odị awilhẹ aạl akọs dị odị kamoọgh ḍigbogh aḍinyạ, bịn amhiigh aạl olọ ekulha amem dị aḅarạm oḍighi aḍighaạgh. Odị aḅẹm mọ, “Ilhoghonhaạn imhị ḍighaạgh onhuụn omhoọgh oḍighi, ḅilhẹ r’oḍighi ipẹ mị aatughiạn bọ k’agee-phọ—okọy eten oomo amem.” Onyebel roten, bịn aVictor aphin Caroline, kụ iyạl phọ abidị oghị Cameroon. Mem dị bidị oghị bọ ophogh aani olạ agadạ phọ, abuniin abumor uroma ni bidị mọ bidị ootughiạn ilọ oḅula okumuan aani epẹ Cameroon phọ. AVictor aḅẹm mọ, “Yoor u/moọgh ephigh otuạn oghel oroma phọ opọ phọ, eḍighi bọ edị yoor modughe bọ dọl aghuḍum mọ ayoor, yoor usighẹ ni ḍimhạgh phọ.” ACaroline amhoọgh ni iiḅaghamhị e/moon, ghalhamọ r’iduọn phọ ni bidị usopha ni bịn onyeenhe.

AVictor r’aCaroline umhiigh ni okumuan idiphọ abukọy eten oomo amem, orue olhoghonhaạn aḍighaạgh ekpisi dị ewaạm mọ ebụgh. Bidị ukumuan ni epẹ Canada iphurukpu arunwanyụ oseerean ikpoki, bịn eḍighi idị bidị uu/ḅaghamhiạn loor owạ oḍighi eḅẹl amem mọ bidị osi bọ Cameroon. Eeghe aḍisẹph kirokirọ kụ idị bidị oghelhọm? Bidị moghị School for Kingdom Evangelizers, oḅilhẹ okumuan idiphọ abukọy eten dị agbatanhaạn, kụ nyiidiphọ bidị rokumuan ghan agạ abuphẹ rologhoḍị ghan bọ ruutu phọ. AVictor aḅẹm mọ, “Owilhẹ adọl phọ yoor oghelhọm ghan bọ meḍighi idị yoor momhiịn aani olhoghonhaạn aḍighaạgh phọ aZihova.”

Lhạ phọ 2002, umor phọ Alain, dị aghị ghan univasiti epẹ Germany, aạl li trạkt phọ oghol bọ mọ Iḍoọgh—Nạ kaḍighinhom Eeghe Ghuḍum Mọ Anạ? Ipẹ odị aạl bọ inyu ni nyodị ophighi imhoom asiigbu. Lhạ phọ 2006, bịn odị aghị Ministerial Training School kụ osighẹ nyodị oghị Cameroon, epẹ eelhe phọ odị aḍuạ bọ aru.

Epẹ Cameroon phọ, Alain amhoọgh ni oḍighi ekulha amem. Esighẹ rekị bịn odị amhiịn oḍighi dị okpẹ ghan igbogh ikpoki, kuolọ odị amhoọgh ni ogbolhomaam ilọ amem arukumuan phọ odị epẹ erugh phọ. Esi iduọn phọ, mem mọ omhạgh bọ nyodị oḍighi okọy eten dị agbatanhaạn, odị o/phiemhi mem, odị asighẹ ni. Uw-oḍighi phọ aḅẹm ni mọ onọ kabughẹ ikpoki odị, kuolọ odị asopha okọy eten phọ. Onyebel roten, bịn Alain aphin onyọ umarani dị marọl ghan epẹ France esi ibadị asiạ, dị oghol mọ Stéphanie. Eeghe ipaanhaạn kụ edị umarani phọ asoman mem mọ arigheel bọ Cameroon?

AStéphanie aḅẹm mọ: “arisipheeny iiḅaghamhị ghan ni imhị, ḅilhẹ iniin araraạr imhị i/mheera, kuolọ mị ukparaghạ ghan ni adaphạn rookonhoma phọ ilọ amem r’amem kụ imalhaạm ghan ni eeni  amem.” AZihova akpẹ ni iikpiạ olom mọ r’anhịr phọ loor okparạm mọ abidị. Alain aḅẹm mọ: “Mem dị yoor oghị oghaạph iiḅi iinhaghạn phọ eniin emhạ dị oghol mọ Katé, dị edi ghan sạm, yoor uteẹny ni ibadị awe dị rowạ otuughạ aBaibul phọ. I/bia bịn yoor omhiigh otughemhị iyạl awe Baibul dị eego esi afon. Iyạl phọ awe phọ uḍiiny ni muụm bịn egu abukaaphọm omite epẹ phọ.” AStéphanie aḅẹm mọ: “Ibo i/lo dị eeleeny olhoghonhaạn oye ḍighaạgh dị kaḅọgh ghuḍum odị angọ aZihova. Okumuan ephẹn phọ meḍighi idị yoor momhiịn kụ oḅilhẹ omhiịn ibo phọ iphẹn phọ.” Nyiidiphọ, Alain r’aStéphanie odi rukumuan abupoghom eghir.

AGisèle aḍiiny muụm mem dị rakị askul adoktọ epẹ Italy. Adọl aghuḍum olom mọ r’anhịr phọ oḍighi bọ bukoyọm eten phọ otughemhị ghan bọ nyodị ikạr kụ eḅeraạn nyodị, kụ odị awạ ghan obughẹ aani arukumuan phọ odị. Esi iduọn phọ, aGisèle amhiigh okọy eten oomo amem mem mọ odị r’amạn bọ askul phọ.

AGisèle amoọgh ḍiḅeraạn oḅula epẹ Cameroon obughẹ arukumuan phọ odị, kuolọ odị amhoọgh ni raạr dị eeḅaghamhị ghan olhoghi phọ odị. Odị aḅẹm mọ, “Iduọn phọ pọ remạ ghan mọ mị ka/moọgh mun eepoogh oḅilhẹ oḅula Italy orọl ghan, ḅilhẹ mị kagbatanhaạn righirị r’asiya phọ amhị odi ghan bọ Italy.” Ghalhamọ r’iduọn phọ ni, unwanyụ aMay 2016, bịn aGisèle anyeenhe Cameroon. Esighẹ rekị bịn odị aạl Léonce, kụ olạ agadạ aCameroon osighẹ bidị oghị Ayos, emạ dị ekạr emhoghi bukaaphọm ilọ Omhạr phọ.

Adọl aghuḍum mọ irọl ika epẹ Ayos phọ? AGisèle aḅẹm mọ: “Ibadị amem alaịt o/rọl ghan siwiki, kụ asifon phọ ayoor emhuughu ghan. Ibadị amem, iyaạr oḍighi i/tọl ghan. Mị utuughạ ni ilọ osaạm ipẹh, yoor uphạm ghan wilbaro r’atọs kụ oghị ghan okpạ amuụm ḍughul mem dị awe u/muza iboom esi phọ r’okpạ ghan bọ muụm mọ.” Eeghe kụ ilhoghonhaạn bidị ḍighaạgh orue okparạm orọl epẹ phọ? AGisèle aḅẹm mọ: “Uwaloor phọ aZihova, ḅilhẹ obakị phọ oniin abakị ghan bọ nyonhiin idiphọ olom r’anhịr, ḅilhẹ kẹn iromhoghiom r’asipenị dị arighirị r’asiya ayoor ungọ ghan iyoor eeni amem, ilhoghonhaạn ni iyoor ḍighaạgh.”

Olhoghi aGisèle aḅaạl li iduọn odị agheel bọ eelhe abidị ḍughụm? Odị aḅẹm mọ: “Ii! Okạr iduọn, eḅẹl amem mọ ipaanhaạn ḅilhẹ r’oḅonyonhu ozuan irọl li, kuolọ iduọn yoor okpạr bọ opu, bịn olom amhị r’amhị ulhoghoma ni mọ, yoor oḍighi ni ipẹ ekạr bọ ewạ mọ yoor uḍighi phọ. Yoor uḍuom olhoghi aZihova, kụ oḍuraan ogbị nyodị.” ALéonce r’aGisèle moghị School for Kingdom Evangelizers, kụ nyiidiphọ rokumuan ghan ekulha amem idiphọ abukọy eten oomo amem dị agbatanhaạn.

Idiphọ abukoniọm akonị dị omhoọgh akpọ oḅio, ropinyọn ghan bọ rikiạ omhiịn mọ bidị ozẹ iboom ina, abuphẹ oghelheghu bọ reelhe abidị, uphinyọn rikiạ kirokirọ etigheri ipaanhaạn, pidị bidị otue ologhonhaạn ḍighaạgh we iiḅi arokpom mọ omhegheron bọ dom Omhạr phọ. Iikia i/lo, aZihova ka/bulha iikparạ iiḍighi abukaaphọm mọ abuẹn phọ, loor ephomhoghiạn phọ bidị omhooghọm bọ ḍien phọ odị. (Neh. 5:19; Hib. 6:10) Eḍighi maạr dị nạ odi ghan emhạ aḅekeeny, kụ ewaạm abukaaphọm ilọ Omhạr phọ ebụgh eelhe anyinha, nạ katue ni akị ḍughụm? Nạ aḍighi iduọn phọ, pọ aḍiḅoom aḍisẹph rekori ni nyinhạ.—Prov. 10:22.