UMEGO ku nyimego ma pol ma giweko ng’om ma thuggi pi nicisayu sente, dikok kendo ku ng’eigi i ng’om ma thuggi. Mer ma gimaru ko Yehova man dhanu wadi, ucwalugi nidok i kabedo ma yeny mi jurwei lembanyong’a utie lee i ie. (Mat. 22:37-39) Gitwoniri ku lembang’o man ginwang’u mugisa ma kani? Pi ninwang’u dwokowang’ lembene, wakewec iwi ng’om mi Cameroun ma nwang’ere i Afrika ma yo reto.

I oro 1998, umego moko ma nyinge Onésime uvaru kud i Cameroun ma tie ng’om ma thugi. Ekwo i ng’om mange pi oro 14. Nindo acel kinde ma gibino i coko, ewinjo lapor moko ma jakorlembe umaku pi tic mi lembanyong’a. Laporne uwacu kumae: “Ka jurimo moko ario gibedwaru rec i kabedo ma tung’ tung’, ng’at’acel ubenego rec lee nisagu wadi, nyo ng’atu m’ubenego ngo rec lee copo dok ungo kaka ma wadi ubenego ie rec akeca?”

Lapor maeno ucwalu Onésime niparu i lembe kara edok i Cameroun kaka ma rec ubetho i ie i thenge mi tipo, pi nikonyo kor jurwei lembanyong’a kuca. Ento lworo ubino nege. Edaru kwo i ng’om mange pi oro ma dupa, nyo ebiwok ng’iyo ku kit kwo ma kuca? Pi ning’eyo ka nyo ecopo, elar ecidh eliewo ng’om mi Cameroun pi dwi abusiel. E i oro 2012, edok dong’ ma zoo kuca.

Onésime ukoro kumae: “Ugam ukwayere nia adok akwo i ng’om ma lieth man i kit kwo de m’ukoc. I Ot Ker, acaku bedo kendo iwi kom mi bau.” Ento ku ng’iero eyero kumae: “Calu m’abed aketho wia akeca i kum lubo coko, e nok nok wiya caku wil i kum kom ma cuu m’aweko i ng’eya.”

I oro 2013, Onésime gigamiri ku nyamego Géraldine, ma de udok i Cameroun i ng’ei m’ekwo i ng’om mi France pi oro abung’wen. Ginwang’u mugisa ma kani pi timo yeny pa Yehova ma giketho i kabedo ma kwong’a i kwo migi? Onésime ukoro kumae: “Waku min ot para wasomo somo mi Jurwei Injili mi Ker man i ng’eye wadok watimo i Bethel. I kind oro acel kende ci, juponj Biblia 20 mi cokiri mwa gilimo batizo. Anwang’u nia atie tap i kaka ma ber mi dwaru rec.” (Mk. 1:17, 18) Nyamego Géraldine umedo kumae: “Anwang’u mugisa dupa ma nwang’u ageno ngo nia acopo nwang’u.”

Nyamego Judith m’udok i États-Unis, umito etim lee ni Yehova. Ekoro kumae: “Abed acidh’aliewo wedi para thiri thiri i Cameroun. Nja kan abecidok, wak re ma nyai i ia pi dhanu dupa m’abeweko ma nwang’u wacaku kugi ponji mi Biblia.” Re kadok kumeno de, ebino ku jiji nidok ku ng’eye i Cameroun, kum ebed etimo tic mi sente ma lee i États-Unis, m’ubed  ukonye niculo sente mi yath mi remo pa won i Cameroun. Re genogen m’ebino ko iwi Yehova ucwale nidok i Cameroun. Ekoro nia ma fodi edok adoka, andha ebed eparu pi kwo ma ber m’eweko i ng’eye i États-Unis. Ekwayu nia Yehova ukonye elok paru pare. E andha enwang’u kony nikadhu kud i bang’ jaliew mi twodiri moko ku min ot pare.

Judith ukoro kumae: “Pi oro adek, aponjo Biblia ku dhanu ang’wen nitundo i batizo.” I ng’eye, edok ecaku tic pa jayab yo ma segi. Tin gibetimo tic mi twodiri karacelo ku Sam-Castel ma won ot pare. Dong’ won ke utie nenedi ku remo pare? Judith ku jupagi mange, ginwang’u odi yath i ng’om mange ma copo culo pir operasio pa won. Lembe ma ber utie nia, operasione ukadhu m’umbe peko.

Umego moko ma nyinge Victor ubino kwo i ng’om mi Canada. Lembe m’esomo i Otkur ma Wiw m’uweco iwi somo ma malu, uketho eparu lembe lee iwi somo mi iniversite m’ebino somo. Ejigo somone man eponjo tic mi bodho mi cing’ ma ting’o ngo kare ma lee. Ekoro kumae: “Eno ukonya ninwang’u tic ndhu ndhu i ng’eye, man nitimo bende tic pa jayab yo m’akeco pire.” I ng’eye, gigamiri ku nyamego Caroline man gicidh giliewo ng’om mi Cameroun. Kuca, kinde ma gicidh giliewo Bethel, umego moko uwok uketho cwinygi nia gikeginen ka nyo gicopo timo ni Yehova i ng’om mi Cameroun. Victor uwacu kumae: “Wanwang’u nia lembe ma copo cerowa mbe, e wacaku jwigo wel piny ma watie ko kara wamedara ku tic pa jayab yo.” Kadok Caroline ubino ku peko mi remo kum de, re ging’io asu niai kud i Canada.

Victor giku Caroline gicaku timo tic pa jayab yo ma nja, eno ukonyogi niponjo Biblia ku dhanu dupa m’umaru ponjo Biblia. Kinde ma gitundo, giwok gicaku the kwo ku sente ma gilar gigwoko. I ng’eye, gidok gitimo tic pi dwi ma nok i Canada, m’udok ukonyogi nimediri ku tic pa jayab yo i ng’om mi Cameroun. Ginwang’u mugisa ma kani? Julwong’ogi gicidh i somo mi Jurwei Injili mi Ker; i ng’eye, juorogi ni juyab yo ma segi man kawoni ke gibekonyo tic mi giero udi Ker. Umego Victor uwacu kumae: “Kwo mi nivo ma malu ma waweko uketho wajengara iwi Yehova man waneno gwok pare kamaleng’.”

I oro 2002, umego Alain m’ubino somo somo ma malu mi iniversite i ng’om mir Allemagne, usomo trakt moko ma thiwie wacu : Jeunes gens, qu’allez-vous faire de votre vie ? Lembe m’enwang’u i ie uketho emaku yub ma nyen. I oro 2006, esomo somo mi Jurwei Injili mi Ker, ma saa maeca jubed julwong’e École de formation ministérielle man i ng’eye juore i ng’om ma thugi i Cameroun.

Kinde ma Alain utundo i Cameroun, ewok enwang’u tic moko m’ecopo timo pi nindo moko kende. I ng’eye edok enwang’u tic mi sente ma lee, ento cwinye bino dieng’ nia tije copo weko ngo ire saa lee mi rweyo lembanyong’a. Pieno, kinde ma julwong’e nia ecidh etim calu jayab yo ma segi, eyio lwong’one m’umbe jiji. Jadit tic pare ulund uwacu nia ebimedo cul pare mi tic, ento Alain uwilo ngo nen pare. I ng’eye gigamiri ku nyamego Stéphanie, m’ukwo oro m’ulwar i ng’om mi France. Stéphanie unwang’ere ku peko ma kani kinde ma gidok i Cameroun?

Ekoro kumae: “Abed anwang’ara ku peko mi remo ma thindho thindho man cam ma pol ujai ira. Ento yath m’abed amaku ukonya  ninwang’u alokaloka.” Juruot maeno ginwang’u mugisa dupa pi cirocir migi. Alain ukoro kumae: “Nindo moko wacidh warweyo lembanyong’a bor i kiaru ma julwong’o Katé, wanwang’u dhanu dupa kuca m’umaru juponj kugi Biblia. I ng’eye, wadok wacaku telo wi ponji mi Biblia migi ku telefon. Dhanu ario m’i kindgi ulimo batizo, e wang’ acel jucaku ther ungu mi jurwei kuca.” Stéphanie umedo kumae: “Anyong’a moko mbe ma jucopo poro kud anyong’a ma junwang’u ka jukonyo ng’atu moko uthiero kwo pare ni Yehova. Timo ni Mungu kakeni uketho wanwang’u anyong’a maeno wang’ ma pol.” Tin, Alain giku Stéphanie gibetimo tic mi twodiri.

Gisèle ulimo batizo kinde m’ebino somo somo mi doko dokta i ng’om mir Italie. Umego moko ku min ot pare ma gibino juyab yo re ma gibonjo kude Biblia. Gin m’utelo nen pare lee ubino kit kwo m’umbe ku giki dupa ma gibino ko, uketho en de emito etim lee ni Yehova. Pieno, kinde m’edhingo daru somo pare, e ecaku tic pa jayab yo ma nja.

Gisèle ubino kud ava mi dok i Cameroun kara edok etim lee ni Yehova kuca, re lworo ubino nege. Ewacu kumae: “Kum bikwayere nia aai kud i ng’om mir Italie, awek jurimba ku wedi para ma wabino kwo kugi kuca.” Re kadok kumeno de, i dwi mir 5, 2016, edok i Cameroun. I ng’ey kare moko, egamere kud umego Léonce, man Bethel mi Cameroun ukwayugi nia gicidh i Ayos, ma tie adhura ma yeny mi jurwei lembanyong’a utie lee i ie.

Kwo ubino nenedi i adhura mir Ayos? Gisèle ukoro kumae: “Wang’ ma pol mac mi kura kathu pi yenga ma dupa, ma ayi ma wacopo royo ko mac i telefon mwa de doko tek. Eno ketho wang’ ma pol watio kude ngo. Aponjo nitedo cam ku yen, man wabed wacidh watwomo pii ku burweti, wacidho uthieno ku torsi saa ma nwang’u dhanu upong’ ungo i ie.” Ginyego ku peko maeno nenedi? Gisèle ukoro kumae: “Tipo pa Yehova, ku kony ma wabed wakonyara ko i kindwa waku won ot para, man tielocwiny ku kony mi jamcing’ m’ubed uai i bang’ wedi mwa man jurimbwa ukonyowa lee ninyego ku peko maeno.”

Nyo anyong’a unego Gisèle pi dok ma gidok ko i ng’om ma thuggi? “Eyo!” Eyero kumae: “Ku kwong’a peko ukeubedo nuti man wabed wawinjara ku pidoic mi turcwiny, ento kinde ma wavoyo pekonegi, waku won ot para, wanwang’u nia watimo tap gin m’ukwayu watim. Wajengara iwi Yehova man kindwa udoko ceng’ini kude.” Umego Léonce giku Gisèle gisomo somo mi Jurwei Injili mi Ker, man kawoni gibetimo calu juyab yo ma segi ma pi saa moko.

Calu jadwar nam nyego ku peko dupa kara eneg rec, umego ku nyimego ma gidok i ng’om ma thuggi de gitwoniri ku lembe dupa pi nikonyo dhanu m’adundegi bedo ayika ma gijolo rwonglembe mi Ker. M’umbe jiji, Yehova biwil ungo pi tic ma tek mi mer ma ginyutho pi nyinge. (Neh. 5:19; Ebr. 6:10) Tek kawoni ibekwo i ng’om mange, man iwinjo nia yeny mi jurwei utie lee i ng’om ma thu, nyo icopo bedo ngo ayika nidok kuca? Kan idok, ng’ei nia ibinwang’u mugisa dupa.​—Rie. 10:22.