ИНКИШАФ етмәкдә олан өлкәләрдән Гәрб өлкәләринә көчмүш хејли диндашымыз өз доғма јурдларына гајыдыб. Јеһоваја вә инсанлара мәһәббәтдән ирәли ҝәләрәк онлар тәблиғчиләрә тәләбат олан әразиләрә көчүб (Мәт. 22:37—39). Бу баҹы-гардашлар һансы гурбанлары вериб вә һансы немәтләри алыб? Буну билмәк үчүн ҝәлин Африканын гәрбиндә јерләшән Камеруна көчәнләрдән данышаг.

Онисим адлы бир гардаш 1998-ҹи илдә доғма јурду олан Камерундан башга өлкәјә көчмүшдү. О, 14 ил гүрбәтдә јашамышды. Бир дәфә ибадәт ҝөрүшүндә натиг тәблиғ иши илә бағлы бир нүмунә чәкмишди: «Ики дост фәргли јерләрдә балыг тутурса вә бири о бириндән даһа чох балыг тутурса, аз балыг тутан адам достунун јанына, балығын чох олдуғу јерә ҝетмәз?»

Бу нүмунә Онисими дүшүндүрдү. О истәди ки, мәҹази балығын бол олдуғу Камеруна гајыдыб јерли тәблиғчиләрә көмәк етсин. Амма тәрәддүд ичиндә иди. Фикирләширди ки, бу гәдәр ил гүрбәтдә јашајандан сонра доғма јурдуна өјрәшә биләҹәк? Буну мүәјјән етмәк үчүн Онисим алты ајлыг Камеруна ҝетди. 2012-ҹи илдә исә ора бир дәфәлик көчдү.

Онисим дејир: «Мән исти һаваја вә фәргли һәјат шәраитинә ујғунлашмалы олдум. Јенидән ибадәт евиндәки бәрк скамјалара өјрәшмәли идим. Амма диггәтими јығынҹаға даһа чох ҹәмләдикҹә, — о, ҝүлүмсәјәрәк гејд едир, — раһат отураҹагларла бағлы хатирәләрими јаваш-јаваш унутмаға башладым».

2013-ҹү илдә Онисим Жералдин адлы бир баҹы илә аилә һәјаты гурду. Жералдин дә доггуз ил Франсада јашајандан сонра Камеруна гајытмышды. Бу әр-арвад Јеһованын ишини һәјатларында һәр шејдән үстүн тутдуглары үчүн һансы немәтләри алды? Онисим дејир: «Биз Падшаһлыг Мүждәчиләри Мәктәбиндә охудуг, һал-һазырда Бејтелдә хидмәт едирик. Өтән ил јығынҹағымыздан ијирми нәфәр вәфтиз олунду. Һисс едирәм ки, “балыг” тутмаг үчүн доғру јердәјәм» (Марк 1:17, 18). Жералдин әлавә едир: «Тәсәввүр етдијимдән дә чох немәт алмышам».

Ҹудит Бирләшмиш Штатлара көчмүшдү. Амма хидмәтини ҝенишләндирмәјин һәсрәтиндә иди. О дејир: «Камеруна аиләми зијарәтә ҝедирдим. Һәр дәфә орадан гајыданда ағлајырдым. Чүнки Мүгәддәс Китаб дәрсинә башладығым инсанлары гојуб ҝәлмәли олурдум». Лакин Ҹудит Камеруна гајытмаға тәрәддүд едирди. О, јахшы ҝәлирли ишдә ишләјирди вә бунун сајәсиндә Камерунда јашајан атасынын мүалиҹә хәрҹләрини өдәјә билирди. Амма о,  Јеһоваја ҝүвәнди вә Камеруна көчдү. Ҹудит етираф едир ки, бәзән Бирләшмиш Штатлардакы раһат һәјаты үчүн дарыхырды. О, Јеһоваја дуа едирди ки, ујғунлашмаға она көмәк етсин. Рајон нәзарәтчиси вә арвадынын Ҹудити руһландырмаларынын да она чох көмәји дәјмишди.

Өтән илләрә бојланараг Ҹудит дејир: «Үч ил әрзиндә дөрд руһани өвлада саһиб олмағын ҝәтирдији севинҹи даддым». Ҹудит әри Сам-Кастеллә бирҝә хүсуси өнҹүл кими хидмәт етмәјә башлады, һал-һазырда онлар рајон хидмәтиндәдир. Бәс Ҹудитин атасынын мүалиҹәси неҹә олду? Онлар атасыны башга өлкәдә хәстәханаја јерләшдирдиләр, бу хәстәхана атасынын әмәлијјат хәрҹләрини өз үзәринә ҝөтүрдү. Чох шүкүр ки, әмәлијјат уғурлу кечди.

Виктор адлы гардаш Канадаја көчмүшдү. «Ҝөзәтчи гүлләси» журналында али тәһсиллә бағлы мәгаләни охујандан сонра өз тәһсили барәдә фикирләшди. О, университети јарымчыг гојуб, гыса мүддәтли техники тәлим курсларына ҝетди. О дејир: «Бу мәнә тез бир заманда иш тапмаға вә чохдандыр етмәк истәдијим өнҹүл хидмәтинә башламаға имкан јаратды». Сонра Виктор Каролин адлы бир баҹы илә аилә гурду, онлар Камеруна гонаг ҝетдиләр. Орада филиалы екскурсија едән вахт гардашлар онлары тәшвиг етди ки, Камерунда хидмәт етмәк һаггында дүшүнсүнләр. Виктор дејир: «Имтина етмәк үчүн сәбәбимиз јох иди. Биз артыг садә һәјат сүрүрдүк вә бу дәвәти гәбул едә биләрдик». Бахмајараг ки, Каролинин сәһһәтиндә бәзи проблемләр вар иди, онлар көчмәк гәрарына ҝәлди.

Виктор вә Каролин Мүгәддәс Китаба марағы олан инсанлара көмәк етмәк үчүн өнҹүл хидмәтинә башладылар. Бир мүддәт онлар јығдыглары пулун һесабына доландылар. Сонра исә бир нечә ајлығына Канадада ишләдиләр. Бунун һесабына ҝери Камеруна гајыдыб өнҹүл хидмәтләрини давам етдирдиләр. Бәс онлар һансы немәтләри алдылар? Онлар Падшаһлыг Мүждәчиләри Мәктәбинә дәвәт алдылар, хүсуси өнҹүл кими хидмәт етдиләр, инди исә тикинтидә хидмәт едирләр. Виктор дејир: «Раһат һәјатымызы ҝеридә гојмағымызын сајәсиндә Јеһованын дәстәјини ҝөрдүк».

2002-ҹи илдә Ален гардаш Алманијада университетдә охујурду. О, «Ҝәнҹләр, һәјатынызы нәјә һәср едәҹәксиниз?» адлы буклети охујандан сонра гаршысына јени мәгсәдләр гојду. 2006-ҹы илдә о, Хидмәти Тәкмилләшдирмә Мәктәбини кечди вә доғма јурду Камеруна тәјин олунду.

Камерунда Ален јарымҝүнлүк иш тапды. Сонра маашы даһа јүксәк олан иш тапды. Лакин бу иш онун чох вахтыны алырды. Ален бүтүн диггәтини өнҹүл хидмәтинә ајыра билмәдији үчүн нараһат иди. Буна ҝөрә дә она хүсуси өнҹүл кими хидмәт етмәк тәклиф олунанда тәрәддүд етмәдән разылашды. Һәтта мүдири онун маашыны артыраҹағыны десә дә, о, гәрарындан дөнмәди. Сонралар Ален узун илләр Франсада јашамыш Стефани адлы баҹы илә аилә гурду. Бәс баҹы Камеруна көчәндә һансы чәтинликләрлә үзләшмишди?

Стефани дејир: «Сәһһәтимдә бәзи хырда проблемләр вә аллерҝија јаранды. Амма мән мүнтәзәм мүалиҹә ҝөтүрдүм вә јахшылашдым». Бу әр-арвад ҝөстәрдикләри дөзүмүн гаршысында мүкафатларыны алдылар. Ален дејир: «Кејт адлы уҹгар бир кәнддә тәблиғ етмәјә ҝедәндә орада бир нечә нәфәр  Мүгәддәс Китаб дәрси кечмәк истәди. Сонра биз онларла телефон васитәсилә Мүгәддәс Китаб дәрси кечдик. Онлардан икиси вәфтиз олунду вә орада тәблиғчиләрдән ибарәт груп јаранды». Стефани әлавә едир: «Инсанлара көмәк едиб онларын вәфтиз олундуғуну ҝөрмәкдән бөјүк севинҹ ола билмәз. Бурада хидмәт етдијимиз мүддәтдә бу севинҹи дәфәләрлә дадмышыг». Һал-һазырда Ален вә Стефани рајон хидмәтиндәдир.

Жизел Италијада тибб мәктәбиндә охудуғу дөврдә вәфтиз олунуб. Жизелә Мүгәддәс Китаб дәрси кечән өнҹүл әр-арвад садә һәјат сүрүрдү вә бу она бөјүк тәсир бағышламышды. Жизел дә истәјирди ки, хидмәтдә даһа чох иш ҝөрсүн. Беләҹә, мәктәби гуртарана јахын өнҹүл хидмәтинә башлады.

Жизелин арзусу иди ки, Камеруна гајыдыб Јеһоваја хидмәтдә чох иш ҝөрсүн. Амма бу аддымы атмаг онун үчүн һеч дә асан дејилди. О дејир: «Италијада јашамаг һүгугундан мәһрум едиләҹәкдим вә бурадакы достларымдан, аиләмдән ајры дүшәҹәкдим». Һәр шејә рәғмән 2016-ҹы илин мај ајында Жизел Камеруна гајытды. Сонра о, Леонс адлы бир гардашла аилә гурду. Онлар филиалын мәсләһәти илә Камерунун тәблиғчиләрә бөјүк тәләбат олан Ајос шәһәринә көчдү.

Ајосда јашајыш неҹә иди? Жизел дејир: «Тез-тез елә олурду ки, һәфтәләрлә ишыг јанмырды. Телефонумузун батарејасыны долдура билмирдик дејә чох вахт сөнүлү олурду. Мән оҹаг галајыб, јемәк биширмәји өјрәндим. Ҝеҹәләр булаг башында адамларын аз олдуғу вахт әл арабасы вә фәнәр илә су ҝәтирмәјә ҝедирдик». Онлар нәјин сајәсиндә бу чәтинликләрә дөзә билди? Жизел дејир: «Јеһованын руһу, јолдашымын дајағы, аиләмизин вә достларымызын мәнәви, јери ҝәләндә, мадди дәстәји бизә дөзмәјә көмәк етди».

Жизел доғма јурдуна гајытдығы үчүн хошбәхтдир? «Бәли. Зәррә гәдәр дә пешман дејиләм», — дејә о бөлүшүр: «Әввәл-әввәл бир аз чәтин иди, руһ дүшкүнлүјү кечирирдик. Амма бунларын өһдәсиндән ҝәләндән сонра икимиз дә баша дүшдүк ки, ән дүз гәрары вермишик. Јеһоваја етибарымыз мөһкәмләнди вә Она даһа да јахын олдуг». Леонс вә Жизел Падшаһлыг Мүждәчиләри Мәктәбиндә охудулар вә һал-һазырда мүвәггәти хүсуси өнҹүл кими хидмәт едирләр.

Балыгчылар чохлу балыг тутмаг үчүн ҹәсарәтлә мүхтәлиф чәтинликләрә синә ҝәрирләр. Ејнилә, доғма јурдуна гајыдан мүждәчиләр дә хош хәбәрә һај верән сәмими инсанлара көмәк етмәк үчүн чохлу гурбанлар верирләр. Сөзсүз ки, Јеһова бу зәһмәткеш тәблиғчиләрин Онун адына ҝөстәрдикләри мәһәббәти һеч вахт унутмајаҹаг (Нәһ. 5:19; Ибр. 6:10). Әҝәр сиз дә гүрбәтдә јашајырсынызса вә доғма јурдунузда тәблиғчиләрә тәләбат варса, ҝери гајыда биләрсиниз? Гајытмаг гәрарыны версәниз, боллуҹа немәтләр алаҹагсыныз (Мәс. 10:22).