RANDAK iwara, naek ma srar sibor sra sḇarek ro sup Amber. Mboi ḇarpur mura, skaḇer ḇe sup marin sedi. Simarisen sra ḇe moḇ ḇefandun syadi manbaryas kukro siswar Yahwe I ma min sesi. (Mat. 22:37-39) Inja rosai monda sibur kwar na, ma barakas rosai sismai na? Rwama komam fawar riḇeso ro naek srar koḇesi ḇefarmyan ro sup oso ḇenir ḇe Kamerun ro Afrika bar wambarek.

Ro taun 1998, naek oso ḇenir ḇe Onésime ibur sup ḇyeja Kamerun ḇo rya ḇyarek ro sup ḇese swaf taun ri 14. Ras oso, iso fananjur ḇo ryower wos sarḇer oso ḇekur fararur ḇeḇebaryas. Naek ḇeyun faya ikofen radine, ”Snon risuru suḇebati ḇo ras oso sura susarfer in, mboi supyar ḇesisye. Snon oso pyaw in sya sibore, mboi sumindi moḇ ipyar ro ya in sya san kuf ḇa, inja in ismai sya sibor ḇa. Kokyar na snon ine rya ipyar ma syarfer kuker bati ḇyani ḇae.”

Ryower wos sarḇer ine mura, kyara fa imbe ibur kaḇer ḇe Kamerun kukro snonggaku ḇemarisen ḇefarkor Refo sya sibore. Imarisen isaramper naek srar ro diwa, mboi imgakwarek roi ono. Ḇyarek ro sup bondi kwar, inja imgak na samswen fa ikenem ro sup marin ḇyeja wer. Inja, doḇe rya ḇyarek paik riwonem fa byukimam resanari. Mura ro taun 2012 ya, kyinfir fa ḇyarek pdef ro sup ḇyeja.

Naek Onésime fyar ḇo doḇe, ”Yasewar fa yapok samsam ma kenem ḇero dine. Yasewar fa yakain pyum ro bangku ḇepakrek ro Balai Karajan.” Imbrif mgun ḇo ikofen wer, ”Imboi yarower pyum kaku ro fananjur ido, yaḇefnder kursi ḇepyum ro Balai Karajan ro fafisu naiwara.”

Ro taun 2013, fyarḇuk kuker Srar Géraldine. Srar ine ḇepondi ḇyarek ro Prancis swaf taun risiw, mura kyaḇer ḇe Kamerun. Inja, barakas rosai monda susmai na kukro susewar ḇepon fandun rur ro kenem suḇena? Naek Onésime doḇe, ”Sor nu fa nuyakso ro Farkarkor faro Manbaryas Karajan. Nufarmyan ro Betel kako. Ro taun oser ḇarpur ine, ḇefarkor Refo ri 20 ro sidang nuḇedi, sebaptis. Yakara inema nuisya nuro moḇ ḇesrow fa ’nufor in sya sibore’.” (Mrk. 1:17, 18) Srar Géraldine dakkofen radine, ”Barakas yasmai na nasyadi ro rosai yakara ḇepon na.”

Imbesrar ḇenir ḇe Judith rya ḇyarek ro sup Amerika Serikat, mboi ḇarpur mura imarisen ifrur nabor syadi ro fararur ḇesren. Fyar radine, ”Fafisu yara yamamfar kina  ayesi ro Kamerun, na yasmai ker snonggaku ḇefarkor Refo. Inja imbe yakaḇer ḇe Amerika ido, na yakanes ker kukro yabur si wer.” Randak ya, Srar Judith imgak fa rya ḇyarek ro Kamerun. Nya fararur ḇepyum ro Amerika kwar, inja bisa byukibak kmari fa smam dafduf ḇyena ro Kamerun. Imbape, ikyar faro Yahwe I ma imarisen ibur fa ḇyarek ro Kamerun. Doḇe randak ya, myander kenem ḇepyum ḇyena ro Amerika. Inja, ḇyenadi dor fa Yahwe ifnoḇek i insama kyain pyum. Oso wer ido, syambraḇ kako kukro pengawas wilayah ma swari susaramper i.

Srar Judith doḇe, ”Yana roma inai rifyak ro kakyar oser ine. Yamarisen kaku.” Ḇarpur muma, ifarmyan ḇe perintis istimewa. Fafisu ine, iwarpu swari Naek Sam-Castel, sura ḇe sidang-sidang na. Mboi Judith kmari ido na ryariso? Judith ma kina ḇyesi sisrow rumḇeduf ro sup bondi. Simarisen se-operasi kmari, ma nane nambran pyum.

Naek oso ḇenir ḇe Victor, rya ḇyarek ro Kanada. Ras oso iwasya syap Baryas ḇekur farkarkor ḇekaki, mura kyain kyarauser na. Fyoro ḇa, imnai ro kuliah ḇyena ma dun monda kursus. Doḇe, ”Yasmai fararur fasaw ma yaksun ro fararur perintis, raris marisen ayena ro randak naiwara.” Ḇarpur mura, Naek Victor fyarḇuk kuker imbesrar Caroline, ma sura suyakmam Kamerun. Fafisu sumam kantor cabang ḇero diwa, naek riḇeso sanun fa sukara insama suyakfarmyan ro Kamerun. Naek Victor doḇe, ”Nubur mura, nukara bisa nuso anun senane kukro ro swaf ine roi ono nadwarek nu ḇa.” Srar Caroline ismai dafduf ono, mboi sukinfir fa sura suḇarek ro Kamerun.

Victor ma Caroline suyun perintis biasa fa sufnoḇek snonggaku ḇebor ḇemarisen ḇefarkor sya. Sukram pipi ḇepon kwar, inja fafisu surama randak ro Kamerun, sufararur ḇa. Ḇarpur mura, sukaḇer ḇe Kanada fa sufararur paik riḇeso. Sukram pipi na fa nasrow kwar ido, subur kaḇer ḇe Kamerun ma sufarmyan pdef ḇe perintis. Barakas rosai monda susmai na? Sor su fa suyakso ro Farkarkor faro Manbaryas Karajan. Mura sufarmyan ḇe perintis istimewa, ma kirine sufarmyan ḇe ḇemamwarek fararur ḇaḇawes. Naek Victor doḇe, ”Nubur kenem mararen nuḇena kwar anya, numam kaku Yahwe isaramper nu.”

Ro taun 2002, Naek Alain, ḇye kuliah ro Jerman ḇo ras oso iwasya syapram Kaum Muda—Bagaimana Kalian Akan Menggunakan Kehidupan? Nane nafrur i fa imbe fyadwer roi isewar na. Ro taun 2006, iso Sekolah Pelatihan Pelayanan ma siwan i fa rya ifarmyan ro Kamerun, moḇ snari nya i.

Naek Alain ismai fararur kermgun ro Kamerun. Muniwara, ismai fararur ḇena ḇaḇyak ḇekaki syadi wer, mboi myam fararur anna nafrur i fa nya swaf nabor kuf ḇa faro fararur ḇesren. Inja, fafisu sor i fa ifarmyan ḇe perintis istimewa, dun na ḇeri. Bos ḇyedi doḇe na byuk gaji ḇekaki, mboi Naek Alain kyinfir monda fa ḇye perintis istimewa. Ḇarpur mura, fyarḇuk kuker Srar Stéphanie. Srar ine ḇepon iwara ḇyarek kawan kwar ro Prancis. Inja, samswen rosai ḇekur Srar Stéphanie fafisu rya ḇyarek ro Kamerun?

Srar Stéphanie doḇe, ”Yasmai dafduf riḇeso kwar ma sor ḇe alergi kako, mboi rya yapyum kwar kukro smam dafduf ayenane.”  Imbeswa suine susmai barakas kukro sufarmyan pdef. Naek Alain fyar ḇo boḇe, ”Fafisu nubaryas ro mnu kasun ḇenir ḇe Katé, nusrow snonggaku sia simarisen sakfarkor Refo. Fyoro ḇa, nubuk farkarkor Refo faro si roro telfon. Suru suḇebaptis kwar, ma sifrur raryur oso ro mnu ani.” Srar Stéphanie ikofen wer, ”Kosaramper snonggaku oso isof byuk kenem ḇyedi ḇe Yahwe ma ḇyebaptis ido, na komarisen kaku. Nufarmyan ro dine naiso eḇedari nusmai marasrisen ine ker.” Fafisu ine, Naek Alain ma Srar Stéphanie sufarmyan ro fararur ḇe pengawas wilayah.

Srar Gisèle ḇyebaptis rofyor ḇye kuliah dokter ro Italia. Fyarkor Refo kuker imbeswa perintis. Myam imbeswa ansuya sukenem syadadi ḇa mura, imarisen dakfrur nabor syadi faro fararur ḇesren. Inja, kyinfir fa dun perintis biasa ḇo ḇye kuliah pdef.

Srar Gisèle imarisen kyaḇer ḇe Kamerun fa ifarmyan ro diwa, mboi imgakwarek roi ono. Doḇe, ”Yara ḇe moḇ ḇese ido, nari yana ijin fa yaḇarek ro Italia wer ḇa. Na yaḇesisye ro bati ma kina ayesi ḇero Italia kako.” Imbape, ro paik Mei 2016, Gisèle ibur kaḇer ḇe Kamerun.

Ḇarpur mura, fyarḇuk kuker Naek Léonce, ma kantor cabang ro Kamerun sanun fa sura suḇarek ro kota Ayos, moḇ ine sfandun manbaryas sibor syadi.

Moḇsa Ayos ine isnai rai? Srar Gisèle fyar radine, ”Listrik ro dine imar ker ro swaf minggu ḇe minggu, ma jadi fa nuḇe cas HP nuḇena ḇa. Inja, nḇarek monda. Yasewar fa yakanggun kuker ai mun. Imbe nuyun war ido, na nura ro roḇ kukro moḇ ya insape snonggaku sya sibor ḇa. Nuyun lori ma senter fa nubukidun war.” Rosai ḇefrur fa imbeswa suine sumku pdef? Srar Gisèle doḇe, ”Yahwe rur ḇesren Ḇyedi iso ḇefnoḇek nu fa nususu ḇa. Oso wer ido, nusambraḇyae nu. Kina ma bati suḇesi saksaramper nu ma fafisu ono sbuk fandun baken faro nu kako.”

Srar Gisèle fyafko ke? Oroḇa ḇeri! Doḇe, ”Randak ya, nuyaksmai samswen ma fafisu ono nuḇesanekar. Imboi numbran kam na kuker payamyum kwar, inja nukyar nuisya nukinfir sasar ḇa. Nukyar syadi faro Yahwe I ma numam nufanam syadi faro I.” Naek Léonce ma Srar Gisèle suso Farkarkor faro Manbaryas Karajan, ma fafisu ine suisya sufarmyan ḇe perintis istimewa sementara.

Raris mandaswan na imgak ḇa faro samswen ro swan insama ismai in sibor, rarirya kako naek ma srar ḇekaḇer ḇe sup marin sedi simarisen sra fa sifnoḇek snonggaku ḇena sne ḇenapes ḇemarisen ḇerower sya. Yahwe na ipok ḇyefnder ḇaḇeri fararur marḇak sena ma saswar sfasnai faro snonsnon Ḇyedi. (Neh. 5:19; Ibr. 6:10) Ausya fafisu ine ḇarek ro sup bondi ma wafawi ro sup Bena sfandun manbaryas sibor syadi ido, bisa kwaḇer ḇe diwa ke? Wafrur rarirya ido, wakyar na Yahwe byuk barakas nabor kaku ḇe Au.​—Ams. 10:22.