PLANTE brata mo sista we oli bin lego kantri blong olgeta blong go winim mane long ol rij kantri, oli gobak long kantri blong olgeta. Lav we oli gat long Jehova mo long ol narafala man, i pulum olgeta blong oli muv i go long ol eria we i nidim plante moa pablisa blong Kingdom. (Mat. 22:37-39) ?Olgeta oli mas mekem wanem sakrefaes, mo oli kasem wanem blesing from? Blong faenemaot, bambae yumi tokbaot kantri blong Kamerun, long wes Afrika.

Long 1998, brata Onésime i aot long Kamerun we i hom kantri blong hem. Hem i laef long wan nara kantri blong 14 yia. Wan dei, long wan Kristin miting, hem i harem wan pijatok long saed blong wok blong prij. Spika i bin talem se: “Sipos tu fren i stap fising long tu defren ples, ale wan i stap kasem moa fis i bitim narawan, ?fren blong hem we i no kasem plante fis bae i mekem wanem? ?Bae hem i no muv i go long ples ya we i gat plante moa fis long hem?”

Pijatok ya i mekem Onésime i wantem gobak long Kamerun we i wan gudfala ples blong fising long spirit, blong halpem ol pablisa longwe. Be hem i wari. Hem i stap plante yia finis long wan narafala kantri, ?bambae hem i save lan bakegen blong laef long hom kantri blong hem? Blong fanemaot, Onésime i go visitim Kamerun blong sikis manis. Biaen, long 2012, hem i muv i go.

Onésime i talem se: “Mi mas lan bakegen long hot weta, mo long fasin blong laef long ples ya. Long Haos Kingdom, mi mas lan bakegen blong sidaon long ol stul.” Hem i smael mo i gohed se: “Be moa we mi konsentret long miting, moa we mi fogetem ol jea we matres blong olgeta i sofsof gud.”

Long 2013, Onésime i maredem Géraldine, we hem tu i kambak long Kamerun afta we i stap long Franis blong naen yia. Kapol ya i putum wok blong God i stap fasples long laef blong tufala. ?Wanem blesing tufala i kasem? Onésime i talem se: “Mitufala i joen long Skul Blong Ol Man Blong Talemaot Kingdom, mo mitufala i wok long Betel. Las yia, 20 Baebol studen long kongregesen blong mifala i baptaes. Mi filim se naoia mi stap long stret ples blong ‘fising.’” (Mak 1:17, 18) Géraldine i ademap se: “Mi kasem moa blesing i bitim wanem we mi tingbaot.”

Judith i bin muv i go long Yunaeted Stet, be hem i wantem tumas blong mekem moa long wok blong prij. Hem i talem se: “Afta we mi go visitim ol famle long Kamerun, mi krae evritaem we mi aot blong gobak, from we mi mas lego plante man we mi statem Baebol stadi wetem olgeta.” Judith i wantem muv i gobak long Kamerun, be hem i gat tu tingting. Hem i stap kasem gudfala pei from wok blong hem, nao hem i save  pem hospital mo meresin blong papa blong hem long Kamerun. Nating se i olsem, Judith i trastem Jehova, nao i muv i go. Hem i talem se hem i misim sam long ol gudfala samting we hem i bin enjoem long nara kantri. Ale hem i prea blong Jehova i halpem hem blong lan long niufala laef ya, mo enkarejmen we hem i kasem long wan eria elda mo waef blong hem, i halpem hem bigwan.

Judith i tingtingbak nao i se: “Long tri yia nomo, mi kasem glad ya blong givhan long fo man blong oli baptaes.” Judith i stat blong mekem wok blong spesel paenia. Tede, hem i folem hasban blong hem Sam-Castel we i wan eria elda, taem i go visitim ol kongregesen. ?Be wanem i hapen long papa blong Judith? Judith mo famle blong hem i naf blong faenem wan hospital ovasi, we i agri blong sponsarem operesen blong papa blong hem. Mo hem i glad tumas se operesen ya i go gud nomo.

Brata ya Victor, i muv i go stap long Kanada. Afta we hem i ridim wan atikol long Wajtaoa we i tokbaot hae edukesen, hem i tingting gud long saed blong skul blong hem. Ale hem i no moa tekem ol kos long yunivesiti, be i tekem wan teknikol trening kos we i sot nomo. Hem i talem se: “Kos ya i halpem mi blong kasem wan wok kwiktaem, mo blong mi save mekem samting we mi wantem mekem longtaem finis, hemia blong paenia.” Sam yia biaen, Victor i maredem Caroline, mo tufala i go visitim Kamerun. Taem tufala i go visitim branj ofis long ples ya, ol brata oli enkarejem tufala blong tingbaot sipos tufala i save muv i kam long Kamerun blong prij. Victor i talem se: “Mitufala i luk se i no gat risen blong talem no, mo from we laef blong mitufala i simpol finis, mitufala i talem yes.” Nating se Caroline i gat sam problem blong helt, tufala i mekem desisen blong muv i go.

Biaen, victor mo Caroline i stat blong mekem wok blong fultaem paenia, blong givhan long plante man we oli intres. Long stat, tufala i yusum mane we tufala i sevem i stap, blong kasem samting we tufala i nidim. Afta, tufala i go wok long Kanada blong sam manis, ale tufala i save gobak long Kamerun mo gohed blong paenia. ?Tufala i kasem wanem blesing? Tufala i joen long Skul Blong Ol Man Blong Talemaot Kingdom, tufala i kam spesel paenia, mo naoia tufala i wok long konstraksen. Victor i se: “From we mitufala i lego isi laef blong mitufala, mifala i naf blong luk sapot blong Jehova.”

Alain i wan studen blong yunivesiti long Jemani. Long 2002, hem i ridim traket ya Youths—What Will You Do With Your Life? Infomesen long traket ya i pulum hem blong i putum ol niufala mak long laef blong hem. Long 2006, hem i joen long Ministeriol Trening Skul, mo hem i kasem asaenmen blong go long Kamerun, kantri we hem i bon long hem.

Long Kamerun, Alain i faenem wan haftaem wok. Biaen, hem i faenem wan nara wok we pei blong hem i gud moa, be hem i wari se wok ya bambae i mekem se i no moa prij plante. Taswe, taem hem i kasem invetesen blong kam spesel paenia, hem i agri kwiktaem nomo. Bos blong hem i talem se bambae i mekem salari blong hem i hae moa, be Alain i no jenisim desisen blong hem. Sam taem biaen, Alain i maredem Stéphanie we i bin stap plante yia long Franis. ?Wanem hadtaem we Stephanie i fesem afta we i muv i go long Kamerun?

Stéphanie i talem se: “Mi mi kasem plante smosmol sik mo aleji, be mi naf blong kasem tritmen oltaem, mo hemia i mekem mi harem gud.”  Kapol ya i kasem blesing from fasin blong tufala blong stanap strong. Alain i talem se: “Taem mitufala i go prij long Katé, hemia wan vilej we i stap longwe, mitufala i faenem sam man we oli wantem stadi Baebol. Biaen, mitufala i mekem stadi wetem olgeta tru long fon. Tu long ol Baebol studen ya i baptaes, mo wan grup blong pablisa i stat.” Stéphanie i ademap se: “I no gat wan glad we i bigwan olsem glad ya blong halpem ol man go kasem we oli givim laef blong olgeta long Jehova. From we mitufala i prij long ples ya, mitufala i kasem glad ya plante taem.” Tede, Alain i wan eria elda, mo hem mo Stéphanie i stap visitim ol kongregesen.

Gisèle i baptaes taem hem i stap long wan medikol skul long Itali. Kapol we i tijim hem long Baebol, tufala i paenia, mo Gisèle i laekem simpol laef blong tufala, mo hem i wantem mekem moa long wok blong prij. Ale, taem Gisèle i stap finisim skul blong hem, hem i mekem wok blong haftaem paenia.

Gisèle i wantem tumas blong mekem moa long wok blong Jehova long Kamerun, be hem i wari. Hem i talem: “Sipos mi go, bambae mi no moa gat raet blong stap long Itali, mo bae mi lego ol fren mo famle blong mi we oli stap long Itali.” Nating se i olsem, long Mei 2016, Gisèle i muv i gobak long Kamerun. Sam yia biaen, hem i maredem Léonce, mo branj ofis long Kamerun i talem long tufala blong go long Ayos, hemia wan taon we i nidim moa man blong talemaot Kingdom.

?Laef long Ayos i olsem wanem? Gisèle i talem se: “Plante taem i no gat lektrik blong sam wik olsem, mo mitufala i no save jajem mobael fon blong mitufala. Bighaf blong ol taem oli no wok. Mi mas lanem blong kuk long faeawud. Mo long naet, mitufala i tekem toslaet mo wilbara blong go kasem wota long spring, from we i no gat tumas man long taem ya.” ?Olsem wanem kapol ya i naf blong laef olsem? Gisèle i talem se: “Spirit blong Jehova i givhan long mitufala, mo mitufala i stap givgivhan long mitufala, mo ol famle mo fren we oli enkarejmen mitufala mo samtaem oli halpem mitufala long saed blong mane, hemia i mekem se mitufala i naf blong stanap strong.”

?Olsem wanem? ?Gisèle i hapi we hem i gobak long hom kantri blong hem? Hem i talem se: “!Yes! Mi hapi tumas. I tru se long stat i had mo mitufala i harem se tingting i foldaon smol, be taem mitufala i winim ol samting ya, mitufala i filim se mitufala i mekem stret samting we mitufala i mas mekem. Mitufala i trastem Jehova mo harem se mitufala i stap klosap long hem.” Léonce mo Gisèle i joen long Skul Blong Ol Man Blong Talemaot Kingdom, mo naoia tufala i mekem wok blong spesel paenia blong smoltaem.

Ol man blong pulum fis oli rere blong fesem ol defren hadtaem, blong oli save kasem ol fis. Long sem fasin, olgeta we oli gobak long hom kantri blong olgeta, oli rere blong mekem ol sakrefaes, blong halpem ol man we oli akseptem mesej blong Kingdom. I sua se Jehova bambae i rimemba ol pablisa ya we oli wok had from we oli lavem nem blong hem, mo bambae Hem i mekem i gud long olgeta. (Neh. 5:19; Hib. 6:10) Sipos yu yu stap long wan kantri ovasi, mo i nidim man blong talemaot Kingdom long hom kantri blong yu, ?bambae yu naf blong gobak? Sipos yes, bambae yu kasem plante rij blesing.—Prov. 10:22.