BAHAT do sanina botou na domma marantou hinan hu nagori-nagori Barat, mulak use hu nagori ni sidea. Halani mangkaholongi Jahowa ampa halak na legan, ra do sidea pindah hu ianan na mamorluhon bahat parbarita. (Mat. 22:37-39) Pengorbanan aha ma na ibahen sidea anjaha pasu-pasu aha ma na dapot sidea? Laho mambotoh balosni ai pardiateihon hita ma piga-piga pangalaman ni sanina botou na mangidangi i Kamerun, sada nagori i Afrika bagian barat.

Bani tahun 1998, Sanina Onésime pindah hun Kamerun hu nagori na legan, janah 14 tahun ma ia tading ijai. Bani sada ari sanggah martumpu ia, itangar ma sada ambilan pasal horja parambilanon. Dong sada limbaga na isaritahon siparambilan ai. Nini do, “Dong dua halak na marhasoman laho mangkail. Palegan-legan do ianan ni sidea mangkail. Na sada halak mandapot buei dengke, tapi na sahalak nari otik dassa mandapot dengke. Tontu na mandapot otik ai sihol mangkail hu ianan ni hasomanni ai.”

Dob manangar limbaga ai, gabe tarpingkir ma si Onésime mulak use hu Kamerun halani mambotoh bahat do ijai halak na ra marlajar Bibel. Jadi sihol ma ia mangurupi parbarita ijai. Tapi bahat do na porlu ipingkirhon ia. Umpamani, halani domma dokah tading i luar nagori, haru ma uhurni sonaha holi ia boi mambahen penyesuaian ijai. Halani ai, laho ma ia hu Kamerun janah tading ijai sadokah onom bulan. Ujungni, bani tahun 2012 pindah ma ia hu Kamerun.

Si Onésime mansaritahon, “Halani mongkap janah sunsah do hagoluhan ijon, maningon bahat ma ahu mambahen penyesuaian. Maningon hupasomal-somal ma use hundul i kursi na karas i Balei Harajaon.” Lanjar tarsirom nini use, “Tapi anggo dear ahu manangar acara partumpuan, lang sai hudingat-dingat be kursi na karas ai.”

Bani tahun 2013, marhajabuan ma si Onésime pakon si Géraldine. Ongga do si Géraldine tading i Prancis sadokah siah tahun. Tapi mulak do use ia hu Kamerun. Pasu-pasu aha ma na dapot sidea halani palobeihon horja parambilanon ibagas goluhni? Nini si Onésime ma, “Iontang ma hanami padua hu Sikolah bani Parbarita Harajaon. Dob ai mangidangi i Betel ma hanami. Satahun na parpudi on, dong 20 halak na ididi i kurianami. Jadi pangahapku on ma ianan na ‘bahat dengkeni.’” (Mrk. 1:17, 18) Si Géraldine mangkatahon, “Pasu-pasu na dapotnami lobih humbani na ibayangkon hanami.”

Pindah do si Judith hu Amerika Serikat. Tapi sihol do uhurni mambere lambin bahat panorang ibagas pangidangion. Ia mansaritahon, “Tiap mulak ahu hu Kamerun manjumpahi kaluargangku, tangis do ahu sanggah mulak use hu Amerika halani  manadingkon parlajar Bibel na dapot ahu sadokah i Kamerun. Hassi pe sonai, bungbang ope ia pindah hu Kamerun halani domma dear horjani i Amerika. Janah boi homa ia mangurupi partambaran ni bapani. Tapi marpangunsandeian bani Jahowa do ia. Halani ai iputuskon ia ma pindah hu Kamerun. Iakui ia sunsah do mungkahni pangahapni halani gati idingat ia sonang goluhni sanggah i Amerika. Halani ai martonggo ma ia bani Jahowa mangindo pangurupion ase boi mambahen penyesuaian. Janah iojur sintua kaliling ampa istrini do homa ia.

Mardingat ganupan ai, ihatahon si Judith ma, “Malas tumang do uhurhu halani ibagas tolu tahun dong ompat parlajar Bibelhu na ididi.” Dob ai gabe perintis istimewa ma ia. Sonari, rap mangidangi do ia pakon si Sam-Castel, suamini, na gabe sintua kaliling. Sonaha ma baritani bapa ni si Judith? Dapot sidea ma i luar nagori rumah sakit na ra manambari bapani, janah gratis. Ijai ioperasi ma bapani, janah domma sehat.

Sanina Victor pindah hu Kanada. Dob mambasa sipasingat pasal parsikolahan i Menara Pengawal, iputuskon ia ma soh humbani parkuliahanni. Dob ai, kursus ma ia. Nini ma, “Halani ai, gabe podas do ahu dapot horja. Janah boi ma ahu merintis songon na hucita-citahon hinan.” Ujungni marhajabuan ma ia pakon si Caroline. Dob ai irohi sidea ma kantor cabang i Kamerun. Sanggah ai, dong ma piga-piga sanina na mangojur sidea ase pindah hu Kamerun. Si Victor mangkatahon, “Dob ipareksa hanami situasinami, ibotoh hanami ma boi do hanami pindah hujai.” Hassi pe dong naboritni si Caroline, tapi totap do sidea pindah hu Kamerun.

Mungkahni mangidangi gabe perintis biasa ma sidea ase boi mangurupi bahat halak na ijumpahi sidea. Igunahon sidea ma tabunganni laho manggoki haporluan siganup ari. Dob ai, mulak ma sidea hu Kanada laho marhorja ijai sadokah piga-piga bulan. Dob sungkup duitni, mulak ma use sidea hu Kamerun merintis. Pasu-pasu aha ma na dapot sidea? Iontang ma sidea hu Sikolah bani Parbarita Harajaon, gabe perintis istimewa, janah sonari dihut do sidea pajongjongkon bangunan ni organisasi. Nini si Victor, “Tongon sunsahan do goluhnami sonari on marimbangkon hinan. Tapi halani marpangunsandeian bani Jahowa, iahapkon hanami ma tongtong do iurupi Jahowa hanami.”

Bani tahun 2002, si Alain na kuliah i Jerman mambasa sada risalah na marjudul Kaum Muda—Bagaimana Kalian Akan Menggunakan Kehidupan Kalian? Dobkonsi ai, gabe mubah ma cita-citani. Bani tahun 2006 dihut ma ia bani Sekolah Pelatihan Pelayanan, janah itugaskon ma ia hu Kamerun, nagori asalni.

Sanggah i Kamerun, dapot horja ma ia. Dob ai dapot ia ma use horja na bahatan gajini marimbangkon horjani na parlobei ai. Tapi pangahapni, gabe hurang ma panorangni ibagas pangidangion halani horjani ai. Jadi sanggah iontang ia gabe perintis istimewa, mintor ijalo ia ma ai. Hassi pe ihatahon bosni laho ipanaik gajini, totap do lang ra ia. Dob ai, marhajabuan ma ia pakon si Stéphanie. Ongga do si Stéphanie tading i Prancis sadokah piga-piga tahun. Tantangan aha ma na roh bani si Stéphanie dob pindah ia hu Kamerun?

Nini si Stéphanie, “Dong piga-piga naboritku, janah hona alergi do homa ahu. Tapi domma tarahap dobkonsi taratur ahu martambar.” Bahat do pasu-pasu na ijalo pasangan ai halani martahan sidea. Si Alain mangkatahon, “Ongga do  hanami mangidangi hu huta-huta bagas. Das ma hanami i huta Katé. Ijai bahat do halak na ra marlajar Bibel pakon hanami. Dob ai itoruskon hanami ma marlajar pakon sidea marhitei telepon. Dong ma dua halak sidea na ididi. Dob ai ibahen ma kalompok i huta ai.” Nini si Stéphanie use, “Malas tumang uhur halani boi mangurupi halak marlajar Bibel ronsi ididi. Ijon do bahat dapotnami pangalaman sisonai.” Sonari mangidangi gabe sintua kaliling ma sidea.

Ididi do si Gisèle sanggah kuliah kedokteran ope ia i Italia. Sapasang perintis do na mangajarisi marlajar Bibel. Janah marosuh tumang ia mangidah sidea halani ipalobei sidea do pangidangion ibagas goluhni. Gabe tarojur ma si Gisèle merintis. Jadi, merintis ma ia hassi pe lape tamat kuliahni.

Sihol tumang do uhurni mangidangi hu Kamerun. Tapi dong piga-piga na mambahen haru uhurni. Nini do, “Holi anggo pindah ahu, lang boi be ahu gabe warga Italia. Anjaha gabe daoh ma ahu humbani hasoman ampa kaluargangku.” Hassi pe sonai bani bulan Mei 2016, pindah do ia hu Kamerun.

Dobkonsi ai, marhajabuan ma ia pakon si Léonce. Dob ai, iojur kantor cabang ma ase pindah sidea hu kota Ayos halani porlu do bahat parbarita ijai.

Sonaha ma hagoluhan ni sidea i Ayos? Nini si Gisèle ma, “Ra do marminggu-minggu matei lampu ijon. Jadi lang boi icas hanami henponnami. Halani ai lang boi hanami marhenpon. Maningon huparlajari ma marmasak mamakei soban. Gati do hanami laho hu aek borngin-borngin halani lang bahat halak ijai sanggah ai. Iboan hanami ma sorong ampa senter.” Aha ma na mangurupi sidea ase boi martahan? Nini si Gisèle use, “Hanami boi martahan halani iurupi Jahowa. Leganni ai, totap do hanami na dua marsipatoguhan. Janah sipata dong do hasoman ampa kaluarga na mangirim duit bennami.”

Ai manosal do si Gisèle pindah hu nagori asalni? Nini do, “Lang ongga manosal ahu. Tongon mungkahni dong do piga-piga tantangannami, janah sipata ra do maretek ni uhur hanami. Tapi dobkonsi boi idalani hanami ai, gabe ibotoh hanami ma domma topat haputusannami. Gabe lambin toguh ma haporsayaonnami bani Jahowa janah lambin orot pakon-Si.” Ujungni, iontang ma sidea hu Sikolah bani Parbarita Harajaon. Anjaha sonari mangidangi gabe perintis istimewa sementara ma sidea.

Songon sijala dengke na ra manaron hasunsahan ase boi mandapot buei dengke, sonai ma homa na ibahen sanina botounta ai. Ra do sidea mulak hu nagori asalni ase boi mangurupi halak na ra manangar barita Harajaon. Tontu tongtong do idingat Jahowa pambahenan ampa holong na ipatuduh sidea bani goran-Ni. (Neh. 5:19; Heb. 6:10) Anggo nasiam tading i luar nagori sonari, tapi itangar ham porlu ope bahat parbarita Harajaon i nagori asalmu, ai ra do ham mulak hujai? Anggo mulak ham, tontu bahat do pasu-pasu na laho bereon ni Naibata bamu.​—Pod. 10:22.