ENTEREM turang senina si mbarenda pindah ku negri si deban guna ndarami sen, dungna mulihken ku negrina sendiri. Perban keleng atena Jahwe bage pe kalak si deban, tersuruh me ukurna pindah ku ingan si merluken terbuen perberita. (Mat. 22:37-39) Pengorbanen kai si iban kalak e janah pasu-pasu kai saja si igejapkenna? Mari sinen piga-piga pengalamen arah turang senina si ngelayani i Kamerun, sada negri i Afrika bagin barat.

Bas tahun 1998, sekalak turang senina si gelarna Onésime pindah arah Kamerun, negri asalna. Lit 14 tahun dekahna ia tading bas negri si deban. Bas sada wari i perpulungen, ibegina sada perumpaman kerna erberita. Bas sada khotbah lit ikataken, “Bayangkenlah lit dua kalak si sangana mancing janah la seri ingan kalak e mancing. Sekalak arah kalak e melala idatna ikan janah sekalak nari sitik ngenca idatna. Emaka pindah me si sekalak nari e ku ingan si melala ikan.”

Kenca ibegi Onésime perumpaman e, mulai me turah ukurna mulihken ku Kamerun perban i je melala kalak si nggit erlajar Pustaka. Isampatina atena perberita-perberita si lit i je. Tapi lit piga-piga si ikuatirkenna. Misalna, perban enggo ndekah ia tading i luar negri, mbiar ia la kari banci ibanna penyesuaien bas negri asalna. Emaka, icubakenna lebe tading bas Kamerun enem bulan dekahna. Dungna bas tahun 2012, iputuskenna tading i je.

Nina Onésime, “Arus kusesuaiken diriku ras cuaca si melas bage pe ras kegeluhen si lit i jenda. Bas Bale Kerajan, arus kubiasaken kundul i bas bangku si piher.” Janahna cirem, nina ka, “Tapi adi tuhu-tuhu kubegiken acara perpulungen, lanai kuukuri kursi si ntabeh ngkundulisa bas Bale Kerajan si mbarenda.”

Bas tahun 2013, erjabu Onésime ras Géraldine, si sempat tading i Prancis siwah tahun dekahna janah bas tahun si lewat mulihken ia ku Kamerun. Kai saja pasu-pasu si ialoken kalak e perban ngelayani Jahwe ibanna si pentingna i bas geluhna? Nina Onésime, “Iundang kami duana ikut Sekolah man Perberita Kerajan janah sempat ka kami ngelayani i Betel. Janah setahun enda, lit 20 kalak si iperidiken bas runggun kami. Gundari iteh kami, maka kami lit i bas ingan si tepat guna ndatken melala ‘ikan.’” (Mrk. 1:17, 18) Nina Géraldine ka, “Melala kel pasu-pasu si kualoken, ndauh asangken si banci kubayangken.”

Judith pindah ku Amerika Serikat. Tapi bas pudi wari, iberekenna atena terbuen man Jahwe i bas pelayanen. Nina, “Tiap kudahi keluargaku i Kamerun, lalap lit piga-piga kalak si kusampati erlajar Pustaka. Emaka sanga mulih kenca aku  ku Amerika, lalap aku ngandung perban arus kutadingken kalak e.” Tangtangna, ragu Judith pindah ku Kamerun. Bas Amerika, mejile pendahinna. Alu bage, banci ibiayaina perawaten kesehaten bapakna i Kamerun. Tapi erkiniteken Judith man Jahwe, dungna iputuskenna pindah ku Kamerun. Iakuina maka tangtangna lalap iingetna kegeluhenna si ntabeh bas Amerika. Ertoto ia man Jahwe gelah banci isesuaikenna dirina ras kegeluhen si lit bas Kamerun. Selain si e, sekalak pertua keliling ras ndeharana mpegegehi ia ka.

Sanga inget Judith mulihi paksa ia mulihken ku Kamerun, nina, “Bas telu tahun saja lit kudat empat anak rohani. Meriah kel ukurku.” Bas pudi wari, mulai Judith ngelayani selaku perintis istimewa. Gundari, ngelayani ia ras perbulangenna si gelarna Sam-Castel i bas pendahin keliling. Tapi uga kerna bapak Judith? Idat Judith ras keluargana rumah sakit i luar negri si nggit mbiayai operasi bapakna, janah berhasil operasi e. 

Sekalak turang senina si gelarna Victor pindah ku Kanada. Kenca ibacana artikel Sora Ermomo kerna pendidiken tinggi, mulai iukurina kerna pendidikenna. Ngadi me ia kuliah janah mulai kursus. Nina, “Reh terna kudat dahin, banci ka aku merintis bagi si kuarapken mbarenda.” Bas pudi wari erjabu Victor ras Caroline, janah mulihken kalak e ku Kamerun. Sanga dahi kalak e kantor cabang si lit i je, iiahken piga-piga turang senina kalak e gelah ngelayani i Kamerun. Nina Victor, “Kenca kuukuri keadan kami, sadar kami maka banci ialoken kami undangen e perban enggo sederhana kegeluhen kami sedekah enda.” Aminna pe Caroline sakit, iputusken kami pindah ku Kamerun.

Mulai me Victor ras Caroline ngelayani jadi perintis biasa guna nampati melala kalak si nggit erlajar Pustaka. Perban enggo sempat kalak e nabung, tangtangna la perlu kalak e erdahin i Kamerun. Bas pudi wari, mulihken kalak e ku Kanada guna erdahin piga-piga bulan dekahna. Kenca enggo bias sen kalak e, mulihken kalak e ku Kamerun janah terus merintis. Kai saja pasu-pasu si ialoken kalak e? Iundang kalak e ikut Sekolah man Perberita Kerajan, sempat ka kalak e ngelayani jadi perintis istimewa, janah gundari ngelayani bas dahin pembangunen. Nina Victor, “Kenca itadingken kami kegeluhen kami si ntabeh, banci tuhu-tuhu igejapken kami penampat Jahwe.”

Bas tahun 2002, Alain, si sangana kuliah i Jerman, mbaca risalah Kaum Muda​—Bagaimana Kalian Akan Menggunakan Kehidupan? E erbanca berubah cita-citana. Bas tahun 2006, ikut ia Sekolah Pelatihan Pelayanan janah itugasken ku Kamerun, kuta kemulihenna.

I bas Kamerun, idat Alain pendahin si banci erdahin setengah wari. Bas pudi wari, idatna pendahin si melala gajina. Tapi kuatir ia reh dekahna pendahin e banci erban ia lanai mereken terbuen bas pelayanen. Emaka, sanga iundang ia jadi perintis istimewa, mis ialokenna. Itawarken bosna me gaji si terbuen. Tapi tetap ipilihna jadi perintis istimewa. Bas pudi wari, erjabu Alain ras Stéphanie, si pernah tading i Prancis piga-piga tahun dekahna. Tentangen kai si iadapi Stéphanie kenca pindah ku Kamerun?

Nina Stéphanie, “Lit piga-piga kali aku sakit tapi labo mekelek, janah alergi ka aku. Tapi kenca rusur ertambar, dungna reh sehatna aku.” Melala pasu-pasu si idat kalak enda perban terus megenggeng. Nina Alain, “Sanga erberita kami i daerah pelosok si gelarna Katé, jumpa kami ras  piga-piga kalak si nggit erlajar Pustaka. Bas pudi wari, arah telepon kalak e erlajar. Dua arah kalak e dungna iperidiken, janah ibentuk me sada kelompok bas kuta e.” Nina Stéphanie ka, “Adi banci sisampati kalak seh ngasa ia iperidiken, meriah kel ukurta. Perban ngelayani i jenda, banci rusur igejapken kami keriahen ukur si bage.” Gundari, Alain ras Stéphanie ngelayani i bas pendahin keliling.

Gisèle iperidiken sanga kuliah kedokteran ia i Italia. Erlajar Pustaka ia ras sepasang perintis. Luar biasa kel iakapna pasangen e perban nggit kalak e nggeluh sederhana, e erbanca tersuruh ukurna mereken terbuen i bas pelayanen. Emaka, iputusken Gisèle jadi perintis biasa janahna kuliah.

Situhuna, merhat Gisèle mulihken ku Kamerun guna ngelayani i je, tapi lit piga-piga si ikuatirkenna. Nina, “Adi pindah aku, lanai kari aku ibere ijin tading i Italia. Arus ka kutadingken teman-temanku ras keluargaku si tading i Italia.” Aminna pe bage, bas bulan Mei 2016, pindah Gisèle ku Kamerun. Bas pudi wari, erjabu Gisèle ras Léonce. Isuruh kantor cabang Kamerun kalak e pindah ku Ayos, kota si merluken terbuen perberita.

Uga nge kegeluhen i Ayos? Nina Gisèle, “Rusur mate listrik erminggu-minggu dekahna, emaka la banci iisi kami batre HP kami. Rusur kel HP kami la terpake. Kupelajari ka erdakan alu ranting. Biasana ibuat kami lau bas berngi wari perban lanai enterem jelma bas mata lau, baba kami beko ras senter ku je.” Kai si nampati kalak e megenggeng? Nina Gisèle, “Banci kami megenggeng perban penampat kesah si badia Jahwe. Selain si e, rusur isemangati perbulangenku aku janah ia pe kusemangati ka. Keluarga ras teman-teman kami pe rusur ndukung kami janah ibereken kalak e kami sen guna ndukung pelayanen kami.”

Menyesal nge Gisèle pindah ku Kamerun? Sitik pe lang. Nina, “Tangtangna memang iadapi kami piga-piga tentangen, janah mon-mon kitik ukur kami. Tapi kenca berhasil kami ngadapisa, tek kami maka enggo iban kami keputusen si tepat. Reh paguhna kiniteken kami man Jahwe janah reh rembakna kami ras Ia.” Ikut Léonce ras Gisèle Sekolah man Perberita Kerajan, janah gundari ngelayani kalak e selaku perintis istimewa sementara.

Bagi nelayan si pang ngadapi tentangen guna ndatken melala ikan, turang senina si mulihken ku negri asalna pe nggit erban pengorbanen guna nampati kalak si tutus atena megiken berita Kerajan. Pasti la pernah ilupaken Jahwe kerja keras kalak e bage pe kekelengen si icidahkenna man gelarNa. (Neh. 5:19; Heb. 6:10) Adi sangana kam tading bas luar negri janah itehndu perlu terbuen perberita bas negrindu, banci nge kam mulihken ku je? Adi mulih kam, pasti melala kel pasu-pasu si ibereken Jahwe man bandu.​—Kua. 10:22.