ABUI ya ba be nga ke nyiñe mañe yat na ba ke jeñe moné e maneya beta bulane si jap. Nye’an ba nye’e Yéhôva a bôte bevok ô nga tindi be na be ke su’u ésaé vôm bekañete mbamba foé ba jemban. (Mt. 22:37-39) Mam mevé be nga nyume bebien, a bibotane bivé be nga bi? Bi tame zu kobô ajô si ya Afrika ba loene na Cameroun.

Onésime a nga kôlô Cameroun mbu 1998. A nga bo mimbu 14 si fe. Nde môs éziñ a nga wô’ô mojañ a nyoñe’e mbamba éve’ela ésulan a lat a ésaé nkañete. Mojañ ate a nga jô na: “Bi tame jô na bemvôé bebaé be ne minop, môt ase a yobe’ ato’o dé. Éyoñ éte nje wua a bi tene abui kos. Nga mvôé jé jé kôlô vôme ja yobe na a ke koene nye?”

Jam ete e nga bo na Onésime a fas aval avé a ne bulane Cameroun na a ke su’u ésaé nkañete wôé. Ve jam éziñ é mbe é tyelé’é nye nleme yôp. A mbe a sili’ émiene nge é fo’o beta bo ngule ya nyiñe Cameroun. Nde a nga tyi’i na a taté zu kpwañe Cameroun tañe ngon ésaman. Nde mbu 2012, a nga ka’a bikpwaé bié a bulane si jé.

Onésime a jô na: “E nji be tyi’ibi na me beta yemban ayôñ a ayet ényiñ. E kôme beta tabe ayete bito ya Meba m’Éjôé ya Cameroun a nji be tyi’ibi jam asu dam.” A bo mon éngbwañ éyoñ a kate bia jam é nga volô nye: “Éyoñe me mbe me kôme’e tu’a baa alo ésulan, me mbe me vuane bibubute bito ya vôm ma so.”

Onésime a nga lu’u Géraldine mbu 2013. Géraldine fe a nga taté nyiñe mimbu ébule France. Bibotane bivé Onésime ba ngal be nga bi amu be nga telé mame ya nsisim ôsu ényiñe jap? Onésime a jô na: “Bia minga wom bi nga tabe Sikôlô bekañete mbamba foé ya Éjôé a saé Béthel. Mbu ô nga man, beyé’é Bible 20 ya akônda dangan be nga duban. Teke vaa nge beté, me tele fo’o ato’o da yian asu ‘minop.’” (Marc 1:17, 18) Géraldine ki a beté na: “Ma bu’uban avale bibotan me nji ve’ele bunane de môs éziñ.”

Judith nye a nga ke nyiñ Amelka. Ve a mbe a kômbô’ô nene ésaé nkañete jé. A jô na: “Éyoñ ése me mbe me kele’e mewo’one Cameroun, me mbe me bula’an Amelka me yônô’ amu me mbe me yiane’e kandan a bôte bia be be bi nga kaa meyé’é.” Ve jam éziñ é mbe é bo’o na Judith a kate ji’a nyoñe ntyi’ane ya bulane Cameroun. Ésaé a mbe a bo’o Amelka é mbe é va’a nye abui moné, moné ate ki a mbe a volô’ô na a kus ésaa wé mebiañ. Ve Judith a nga kee Yéhôva jam ete, a bulane si jé. A meme na ényiñ  é nji beta bo nye tyi’ibi aval é mbe Amelka. A nga ye’elane Yéhôva na a volô nye, njome mekônda éziñ ba minga wé fe be nga ve nye ngule nyul.

Judith a simesane bibotan a nga bi Cameroun a jô’ô na: “Mvuse mimbu milal, me mbe me biya bone ya nsisim benyin!” Judith a nga su’ulane bo nkpwa’a mefan a ne ngum aval. Ve den, ba nnôme wé Sam-Castel ba bu’uban ésaé ya jome mekônda. Ésaa wé ki? Judith ba nda bôte jé be nga tôkane mengul asu na be bi mvolane ya nda biañ éziñ ya nlam mintangan. Nda biañ éte é nga kañese sal ésaa zezé. Ôsal ôte ô nga bobane nya mvo’é.

Victor nye a nga ke nyiñe Canada. Nkume mmombô a bete éziñ a nga volô nye na a fas ajô ya beta besikôlô. Ane a nga kôlô université a ke yé’é mon ésaé. A jô na: “Ntyi’an ôte ô nga volô ma na me ji’a yene bisaé a tôé nsôñane ya bo nkpwa’a mefan.” Mvuse ya valé Victor a nga lu’u Caroline, nde a nga zuu nye Cameroun mewo’on méziñ. Ba nye be nga ke yene Béthel, ane bobejañe ya Béthel be nga lebe be na be tame fas nge be vo’o zu su’u ésaé Cameroun. Victor a jô na: “Bi nji be ve ben amu valé bi tatéya na bia nyume biabebiene mam asu ésaé Yéhôva.” Akusa bo Caroline a nji dañe bo mvo’é minsôn, nye’e fe a nga kañese.

Victor ba ngal be nga taté ke ôsu a ésaé nkpwa’a mefane ya éyoñ ése amu be mbe be kômbô’ô volô bôte ba wô’ô évé ya yem benya mejôô. Moné be mbe be tôkaneya a nga volô na be bo ésaé éte ôbe nté teke jeñe bisaé bife. Ve mvuse mon éyoñ, be nga beta ke saé Canada tañe bone bengon asu na be bo ngule ya kee ésaé nkpwa’a mefane jap ôsu Cameroun. Bibotane bivé be nga bi? Be nga tabe Sikôlô bekañete mbamba foé ya Éjôé, be bo bekpwa’a mefan be ne ngum aval, dene ki ba su’u bisaé melôñe ya Éjôé. Victor a jô na: “Ntyi’ane bi nga nyoñe na bia nyume biabebiene mam ô nga volô bia na bi yeme mfi ya bete mise be Yéhôva, a Yéhôva a nji samele bia môs éziñ.”

Mbu 2002, Alain a mbe université si Jaman. Nde môs éziñ a nga lañe tract a ne nlô ajô na Jeunes gens, qu’allez-vous faire de votre vie ? Ane a nga tyendé minsôñane mié. Mbu 2006 a nga tabe École de formation ministérielle, a éyoñe sikôlô a maneya, be nga lôme nye jale dé Cameroun.

Éyoñ a kuiya Cameroun, Alain a nga bi bone bisaé. Ve mvuse ya valé, a nga yen asu ésaé afe é mbe é va’a nye benya bemoné; ve Alain a mbe a yene’e na asu ésaé éte ja bo na a kate kôme jalé ésaé nkañete jé. Ajô te éyoñe be nga sili nye nge a ne bo nkpwa’a mefan a ne ngum aval, a nga yebe jam ete été été. Mbôle masa wé a nji be a kômbô’ô kandane nye, a nga ka’ale nye na nge a kele ésaé ôsu, é kô’ôlane nye moné. Ve Alain a nga ben. Alain a nga su’ulane lu’u Stéphanie. Stéphanie fe a nga bo mimbu mimbu a nyiñe’e France. Minju’u mivé a nga tôbane mie éyoñ a nga zu nyiñe Cameroun?

Stéphanie a jô na: “Bidi biziñ bi mbe bi ndeñele’e ma, ve me nga saéban.” Yéhôva a nga botane be amu be nga bo mbane ya kañe nye si jap akusa bo minjuk. Alain a jô na: “Bi nga bi angôndô ya abui meyé’é  éyoñe bi nga ke kañete Katé, mone nlame ya Cameroun. Bi nga kee meyé’é mete ôsu a zene ya téléfôn. Ane bôte bebaé ya nlam ôte (befam) be nga su’ulane duban, mon angôs a téébane ke wôé.” Stéphanie ki a jô na: “Teke jam afe é ne soo mbo ésaé Yéhôva mevak ane éyoñ a kôme volô môte na a ve émiene ngumba be Yéhôva a duban. Ésaé bia bo va ja volô bia na bi jaé bu’uban avale meva’a ete.” Den Alain ba Stéphanie ba jome mekônda.

Gisèle a nga duban Italie valé a bo’o sikôlô bedokita. Sita a mbe a bo’o nye ayé’é ba nnôm be mbe bekpwa’a mefan. Éve’ela jap é nga nambe Gisèle angôndô, ane nye’e fe a nga kômbô nene ésaé nkañete jé. Nde a nga nyoñ ésaé nkpwa’a mefan memane ya sikôlô bedokita.

Gisèle a mbe a kômbô’ô ke bo ésaé nkpwa’a mefane jé Cameroun, ve jam éziñ é mbe é tyelé’é nye nleme yôp. A jô na: “Jam ete e nga ye bo na me bo teke beta bi ôva’a ngule ya nyiñ Italie, a na me kandan a bemvôé bam a bibu’a ya nda bôte jam bia nyiñe wôé.” Ve akusa bo nalé, Gisèle a nga bulane si jé Ngone tane ya mbu 2016.

Mvuse mon éyoñ ba Léonce be nga lu’an, ane Béthel a nga lebe be na be ke su’u mon akônda ya Ayos, tisone ya Cameroun.

Ényiñ é mbe be aya Ayos? Gisèle a jô na: “Bi mbe bi lôte’e besondô teke courant. Betéléfôn be tabe’e bia mindiman. Me nga yé’é ane ba yame nduane nja’a, bi mbe bi kele’e labe mendim anjeñ alu, bi bili ômes, amu bi nji be bi yii na bi ke tebe minnoñ.” Jé é nga volô be? Gisèle a jô na: “Nsisime Yéhôva, nnôme wom, nda bôte jangan a bemvôé bangan be nga ve ma ngule nyul angôndô. É mbe fe é kui biyoñe biziñ na bibu’a ya nda bôt a bemvôé bangan be lôme bia mone moné.”

Ye Gisèle a jôbane ntyi’an a nga nyoñe na a bulane Cameroun nga? Momo. A jô na: “Me bili benya meva’a! E ne été na bi nga tôbane fo’o abui minjuk a bili ate’e biyoñe biziñ, ve bia nnôme wom bia kôme wô’ôtane na, ésaé bia bo le é ne ji bia yiane bo, teke vaa nge beté. Bi too Yéhôva mebun a bia yeme na a ne bia bebé.” Léonce ba Gisèle be nga tabe Sikôlô bekañete mbamba foé ya Éjôé, a den be ne bekpwa’a mefan be ne ngum aval.

Fo’o ve ane da sili ñyobe kos ayo’o nlem asu na a bo ngule ya bi abui kos akusa bo ésaé éte é ne bo ayaé biyoñe biziñ, bobejañ ba bulane si jap na ba ke su’u ésaé nkañete ba nyume bebien abui mam. Teke môs éziñ Yéhôva a ne vuane beta ésaé biwôlô Bekristen bite bia bo a nye’ane ba liti nye. (Néh. 5:19; Beh. 6:10) Ye wo nyiñ éza si? Ye ô ne fo’o bulane si jôé na ô ke su’u ésaé wôé? Nge ô bo de, Yéhôva é botane wo.​—Min. 10:22.