SARAGU íbirigu ha meha ígirubalin hageira lun houdin áluagua houngua lidan amu ageiraü, giribuhaña hárigoun hageiroun. Ladüga línsiñe Heowá hama gürigia houn, águyaaña lidoun fulasu le ñein lubéi hemegeirúa apurichihatiña (Mat. 22:37-39). Ka sákürifisiu hadügübei ani ida liña labiniruniña Heowá? Lun wasubudiruni, teni wamá lun ageiraü Kamerún, aban ageiraü Áfürika.

Lidan irumu 1998, aba láguyun aban íbiri le gíribei Onésime Kamerúnguñe, fulasu le ñein lubéi lagüriahóua. Wínwanti lidan amu ageiraü 14 irumu. Aban weyu, lidan adamuridaguni, aba laganbun aban hénpulu luáguti apurichihani. Ariñagati íchuguti yanu: “Anhein hóuchahaña lubéi bián umadagu lidan ámuñegueinarügü fulasu, ani gíbetimati ladigin aban luéi le aban, ma lídiba umadaü le lóuguabei adigi lidoun fulasu le ñein lubéi lóuchaha lumada?”.

Adügati hénpulu le lun lasaminarun Onésime lagiribudun Kamerúoun, lun líderaguniña íbirigu ha ñéinbaña apurichiha houn saragu gürigia ha busenbaña haturiahanu Bíbülia. Gama lumoun, nidiheriti meha. Gayaraabei san léchudun awinwanda Kamerún lárigiñe saragu irumu awinwanda lidan amu ageiraü? Lun lasubudiruni anhein gayaraabei lubéi lagiribudun awinwanda ñein, aba lidin Onésime Kamerún luagu sisi-hati. Lárigiñe, lidan irumu 2012, aba láguyun ñeinhin.

Abahüdahati Onésime: “Mosu meha néchudun luagu lárouga luma ligaburi lawinwandun ñein. Mósuya meha néchudun añuura luagu lidere haláü tidan Luban Adamuridaguni”. Ariñagati ahayacheina: “Íbini ítara, dan létima netenirun lun adamuridaguni aba abulieideina nani haláü ñuluti le tídanbei amu Luban Adamuridaguni”.

Lidan irumu 2013, aba lamarieidun Onésime tuma Géraldine, aban íbiri to meha agiribuduboun Kamerúoun lárigiñe meha tawinwandun nefu irumu lidan ageiraü Faransu. Ida liña labiniruniña Heowá ladüga súdinitimati lan heseriwidun lun lidan sun habagari? Ariñagati Onésime: “Ñǘdüntiwa tidan Leskuela houn Apurichihatiña Larúeihan Bungiu úara ani seriwitiwa meha giñe Betelirugu úara. Lidan irumu le ásügürübei, badiseihaña 20 aturiahatiña Bíbülia ha lídanbaña wani damuriguaü. Guentó, sandiguatina nungua anahein lan lidan fulasu le buídubei lun hadügǘn disipulugu” (Mar. 1:17, 18). Ariñagatu giñe Géraldine: “Resibitina lóugiñe abiniruni le nagurabubei”.

Meriga meha tawinwanda Judith, gama lumoun busentu meha taganwoundagüdüni teseriwidun lun Heowá. Ariñagatu: “Sagü meha lárigiñe nabisidahaniña niduheñu Kamerún, aba meha nayahun ladüga mosu meha nígiruniña ha úmabaña nagumesera aturiahoun Bíbülia”. Lau sun lira, ásuhatu meha Judith lun tagiribudun awinwanda Kamerún. Fáyeiti meha tuadigimari ani ñéingiñe tagañeihei lárani túguchi le meha Kamerúnbei. Íbini ítara, aba tíchuguni Judith tafiñen luagu Heowá, aba táguyun Kamerúoun. Ariñagatu áluga  tan luagu saragu katei buiti le Merigabei. Furíeitu lun Heowá lun líderagunu lun téchudun luagu ibagari le Kamerúnbei, ani ruti aban óunigiruti sirkuitu tuma lani weiriou dǘgüdaguaü tun.

Dan le tasaminarun Judith luagu ligaburi léibugun katei lárigiñe háguyun Kamerúoun, aba tariñagun: “Lidan ǘrüwa irumu, aba níderagun gádürü gürigia lun habadiseirun”. Gumesetu Judith eseriwida kei prekursora espechalitu. Uguñe weyu, teseriwiduña úara luma tani weiriei, Sam-Castel lidan lounigirún sirkuitu. Kati asuseredubei lun túguchi Judith? Tuguya hama tiduheñu, daritiña meha aban háspitali lidan amu ageiraü to meha afayeirubalin libugún túguchi. Buiti meha láfuridun túguchi lídangiñe libugún.

Aba meha lidin aban íbiri le gíribei Victor awinwanda Kanadá. Lárigiñe laliihan aban arütíkulu tidan Garüdia Awisahatu luáguti furendei íñuti, aba lagumeserun asaminara luagu aturiahani le laturiahabei tidan luba furendei íñuti. Aba lígiruni laturiahan tidan luba furendei íñuti lun lafurendeirun aban fisiu. Ariñagati: “Íderagua lumutina lun nadarirun aban wadagimanu furese, luma lun nadügüni le meha nabusenrubei nadügün lúmagiñe saragu dan, neseriwidun kei prekursoru”. Dan lárigiñe, aba lamarieidun Victor tuma Caroline, aba habisidahani ageiraü Kamerún. Dan le meha habisidahabarun sukursáli Kamerún, aba hínchahaniña fiu íbirigu lun hasaminarun lun heseriwidun Kamerún. Ariñagati Victor: “Úati meha ni kata le eredehatiwa lun wariñagun uá, ladüga míbeti meha wámati, ligíati aba wánharun lun agunbirahani”. Lau sun gaturobulin tan meha Caroline luma tátuadi, anúadiratiña lun houdin awinwanda Kamerún.

Gumeseti Victor tuma Caroline eseriwida kei prekursoru, gayara láamuga hetenirun houn gürigia ha busenbaña haturiahanu Bíbülia. Buídurügüti meha seinsu le hareidahabei lun mawadigimaridun hamá fiu dan lárigiñe hachülürün. Lárigiñe átiri dan, aba hagiribudun Kanadáoun awadigimarida luagu fiu hati, lun gayara lan hagiribudun hárigoun eseriwida kei prekursorugu Kamerún. Ka abiniruni heresibirubei? Ñǘdüntiña tidan Leskuela houn Apurichihatiña Larúeihan Bungiu, seriwitiña keisi prekursorugu espechalitiña, ani guentó heseriwiduña lidan tábunawagun muna to burí ayusurúboun lun láhudurawaguniwa lun Heowá. Ariñagati Victor: “Kei ígira wamaali lan meha lubuidun wadaani, mosu meha wafiñerun luagu Heowá, ani góunigi lumutiwa”.

Lidan irumu 2002, aba laliihanu Alain, aban íbiri le meha aturiahabei tidan tuban furendei íñuti ageiraü Yámani, tratadu Joven, ¿qué harás con tu vida?. Ínchaha lumuti ariñahani le tídanbei tratadu tuguya lun lanúadiruni le labusenrubei ladügün lidan libagari. Lidan irumu 2006, aba lidin tidan Leskuela to Aransehabaliña íbirigu lun aban Ministeriu Espechaliti, ani aba lóunahoun Kamerúoun, fulasu le ñein lubéi lagüriahóua.

Nadagimeinti meha Alain fiu weyu lidan dimaasu. Dan lárigiñe, aba ladarirun aban wadagimanu le fáyeiti, gama lumoun nidiheriti meha siñabei lan ladügün saragu lidan lani ministeriu. Ligíati, dan le lagunbirahóubei lun leseriwidun kei prekursoru espechaliti, másuhanti lun lánharun. Ariñagati lábuti lun, liñurubei lan lufayeiti, gama lumoun máhati Alain, ani aba lagumeserun eseriwida kei prekursoru espechaliti. Danya lárigiñe, aba lamarieidun Alain tuma Stéphanie, ani wínwantu meha Stéphanie lidan ageiraü Faransu luagu saragu irumu. Ka lénrengunga úmabei tagagibudagua lárigiñe tidin awinwanda Kamerún?

Ariñagatu stéphanie: “Aba lagumeserun nátuadi áribada, gama lumoun daritina árani le  íderagubalina”. Biní lumutiña Heowá luagu hawandun lidan heseriwidun. Abahüdaguati Alain: “Dan le wapurichihabei lidan aban aüdü le díseti, le gíribei Katé, daritiwa fiu gürigia ha meha busenbaña haturiahanu Bíbülia. Dan lárigiñe, aturiaha wamutu Bíbülia hama luéigiñe gágamuru. Badiseitiña bián hádangiñe, ani gumesewati aban sétanu lidan aüdü ligía”. Ariñagatu giñe Stéphanie: “Úati ni kata íchuguti ugundani kei bíderagun gürigia lun hederegeruni habagari lun Heowá. Sandí wamaali ugundani le saragu wéiyaasu lidan weseriwidun ya”. Uguñe weyu, leseriwiduña Alian tuma Stéphanie lidan lounigirún sirkuitu.

Badiseitu meha Gisèle Italia, dan le meha taturiahabei lun surusia tan. Wéiritu meha tanigi luagu mibe lan hámati aban feru maríeitiña, prekursorugu ha meha aturiahabarun Bíbülia tuma, ani adügati lira lun busén tan lun taganwoundagüdüni tani ministeriu. Aba tagumeserun Giséle eseriwida kei prekursoru lau sun anuhagua lan meha aturiaha lun surusia tan.

Busentu meha Giséle tagiribudun Kamerúoun lun taganwoundagüdüni teseriwidun lun Heowá ñein, gama lumoun nidiheritu meha. Ariñagatu: “Neferidiruboun meha nigaradan to Italiana ani disebadina hawéi numadagu luma hawéi niduheñu ha meha awinwandubaña Italia”. Íbini ítara, aba tagiribudun Giséle awinwanda Kamerúoun lidan gádürü-hati irumu 2016. Fiu dan lárigiñe, aba tamarieidun luma Léonce, ani aba hóunahoun eseriwida Ayos, aban uburugu le ñein lubéi hemegeirua apurichihatiña.

Ida liñati ibagari Ayos? Abahüdahatu Giséle: “Anihein meha dan úa lan leiti luagu saragu dimaasu ani dan le lálüdün lidin aba lásiñarun wayusuruni wagagamurun. Furendeitina ábougua lau watu ani ñǘdüntiwa meha guñoun lau foko luma tau giadi adabura duna dan le meha mibe hama gürigia dúnarugu. Ka íderagubarun Giséle luma tani weiriei awanda? Ariñagatu Giséle: “Íderagua lumutina lani Heowá sífiri, íderagua lumutina giñe nani weiriei luma gurasu le híchugubei waduheñu hama wamadagu woun, ani anihein dan íderagua hamutiwa giñe lau seinsu”.

Gúndaatu san Giséle lau tagiribudun tageiroun? Ariñagatu: “Anha! Gagibuguatiwa meha luma lénrengunga luma íruni, gama lumoun lárigiñe lásügürün sun lira, nuguya luma nani weiriei, sanditiwa adüga wamani le wabusenrubei lun wadügün. Afiñetiwa luagu Heowá ani yarafatimahadiwa lun”. Ñǘdünti Léonce tuma Gisèle tidan Leskuela houn Apurichihatiña Larúeihan Bungiu ani guentó heseriwiduña kei prekursorugu espechalitiña ha eseriwidubaña luagu átiri dan.

Ítara kei óuchahatiña ha arufudubaña ganigi, meberesenga lénrengunga le úmabei hagagibudagua lun hadiahan saragu úduraü, adügatiña ha agiribudubaña hageiroun sákürifisiu lun híderaguniña ha busenbaña tídangiñe sun hanigi hánharun lun uganu luáguti Larúeihan Bungiu. Chóuruti mabulieidun lubaña lan Heowá íbirigu benefatiña ha, ladüga ínsiñeni le harufudubei luagu liri (Neem. 5:19; Ebü. 6:10). Anhein hawinwanduña lubéi lidan amu ageiraü ani mégeiwatiña apurichihatiña lidan ageiraü le ñein lubéi hagüriahoua, gayaraabei hamuga san hagiribudun ñeinhin? Ánhaadün agiribuda, labinirubadün Heowá (Ari. 10:22).