MANADA del diaton maga hermano y hermana de antes quien ya anda na otro nacion para busca trabajo el ya bira na diila mismo nacion. Por causa na diila amor para con Jehova y na diila projimo, ya anda sila na otro lugar onde tiene mas grande necesidad. (Mat. 22:37-39) Cosa maga sacrificio sila ya hace y cosa maga bendicion sila ya ricibi? Para sabe, man focus kita na nacion de Cameroon parte oeste del Africa.

Del 1998, el un hermano que si Onésime ya sale na Cameroon. Ya queda le na otro nacion por 14 año. Un dia, na un miting na congregacion, ya oi le con el un ilustracion acerca con el trabajo predicacion. El speaker ya habla, “Si tiene dos man amigo quien ta pesca na dos diferente lugar y mas manada ta cuji el uno contra na otro, aquel ba ta cuji poco pescao gendeh anda na lugar onde mas manada le puede cuji pescao?”

Este ilustracion ya manda pensa con Onésime que bira otravez na Cameroon donde manada gente el quierre estudia con el Biblia para puede ayuda con el maga publisher alla. Pero tiene le maga lingasa. Puede gaha le man adjust na Cameroon despues queda por cuanto año na otro nacion? Para sabe, ya visita si Onésime na Cameroon por seis meses. Despues del 2012, ya bira ya le alla permanente.

Si Onésime ya habla: “Necesita yo man adjust na caliente clima y na manera de vida aqui. Na Kingdom Hall, necesita yo otravez man anad sinta na maga duro bangco. Pero si mas ta concentra yo na programa,” ya habla le mientras tan smile, “mas ta ulvida yo con el maga comfortable bangco na otro Kingdom Hall.”

Del 2013, ya casa si Onésime con Géraldine, quien ya bira tambien na Cameroon despues queda na France por nueve año. Cosa maga bendicion sila ya ricibi cay yan focus sila na maga teocratico actividad? Si Onésime ya habla: “Como un maridable, ya atende kame na School for Kingdom Evangelizers y ya sirvi na Bethel. Del ya pasa año, 20 Bible study na diamon congregacion el ya bautiza. Ahora ta sinti yo que taqui ya yo na justo lugar onde ‘pesca.’” (Mar. 1:17, 18) Si Géraldine ya omenta: “Nuay gayot yo imagina que hay ricibi yo este maga bendicion.”

Ya anda si Judith na United States pero quierre le hace mas na de suyu ministerio. Ele ya habla: “Cada vez acaba el de mio visitada na de mio familia na Cameroon, ta llura yo cay necesita yo deja con el cuanto individual con quien ya principia ya yo man Bible study.” Pero, tan alang-alang si Judith bira permanente na Cameroon. Grande el de suyu sueldo na de suyu trabajo que ta puede ayuda con ele para paga con el medical necesidad del de suyu tata na Cameroon. Pero, ya  confia si Judith con Jehova y ya bira alla. Ya admiti le que tan miss le con el de suyu comfortable vida cuando talla pa le na United States. Ya reza le con Jehova que ayuda con ele man adjust. Ya puede tambien ayuda con ele cuando ya anima con ele el circuit overseer y el mujer de este.

Si Judith ya habla, “Adentro lang del tres año, ya tiene yo alegria que incuntra cuatro espiritual anak.” Ya principia le sirvi como un special pioneer. Ahora, ta sirvi le junto con el de suyu marido, si Sam-Castel que un circuit overseer. Pero cosa ya sucede con el tata de Judith? Ele y el de suyu familia ya puede incuntra hospital na otro nacion quien conforme paga con el operacion del de suyu tata. Enbuenamente lang el operacion.

El un hermano que si Victor ya cambia na Canada. Despues le un articulo na El Torre de Guardia acerca na alto educacion, ya pensa le acerca na de suyu curso. Nuay mas le entra na universidad, sino ya saca le vocational course que mas corto. “Ya puede dayun yo trabaja despues de ese,” ya habla le, “y ya hace el cosa yo bien quierre hace—man pioneer.” Despues, ya casa si Victor con Caroline y ya visita sila na Cameroon. Durante el diila visitada na branch office alla, ya anima kanila el maga hermano que sirvi na Cameroon. Si Victor ya habla, “Ciendo ya mentena kame un simple vida, nuay kame razon para gendeh acepta con el invitacion.” Maskin pa si Caroline tiene cuanto problema na salud, ya decidi sila bira alla.

Si Victor y Caroline ya principia sirvi como maga regular pioneer cay manada sila interesao ya incuntra na diila teritorio. Del primero, tiene sila bastante sen poreso nuay sila trabaja. Cuando ya acaba ya se, ya anda sila na Canada para trabaja por cuanto meses y despues, ya bira na Cameroon para continua man pioneer. Cosa maga bendicion sila ya ricibi? Ya atende sila na School for Kingdom Evangelizers, ya sirvi como maga special pioneer y ahora ta sirvi como maga construction servant. Si Victor ya habla, “Cay ya deja kame con el diamon comfortable vida, ya experiencia kame con el suporta de Jehova.”

Del 2002, cuando estudiante pa si Alain na un universidad na Germany, ya le ele con el tract Youths​—What Will You Do With Your Life? El maga informacion alla ya manda move con ele para tiene maga nuevo goal. Del 2006, ya atende le na Ministerial Training School y yan assign con ele na Cameroon, el nacion onde le ya nace.

Na Cameroon, ya incuntra si Alain un part-time trabajo. Despues del cuanto tiempo, ya incuntra le otro trabajo que mas grande el sueldo. Pero yan lingasa le que baka mas poco ya el cosa le puede hace na ministerio. Poreso, cuando ya invita con ele para sirvi como un special pioneer, nuay le man alang-alang acepta con ese. El de suyu amo ya ofrece con ele mas grande sueldo, pero nuay cambia si Alain con el de suyu decision. Despues, ya casa si Alain con Stéphanie quien ya queda na France por cuanto año. Cosa maga dificultad ya experiencia si Stéphanie despues sila cambia na Cameroon?

Si Stéphanie ya habla: “Ya tiene yo cuanto maga problema na salud y allergy pero ya queda lang yo bueno.” Ya bendici con el man maridable cay ya aguanta sila. Si Alain ya habla: “Cuando ya anda kame predica na Katé que un lejos barrio, ya puede kame incuntra cuanto maga individual quien quierre estudia con el Biblia. Despues de ese, ya puede kame conduci Bible study kanila por medio na telefono. Dos Bible study el ya  bautiza y ya forma un grupo de maga publisher alla. Si Stéphanie ya omenta: “Nuay onde puede compara con el alegria que ayuda con el maga gente que dedica con el diila vida con Jehova. Cay ya sirvi kame aqui, ya experiencia kame con ese alegria manada beses.” Ahora, ta sirvi si Alain como un circuit overseer junto con Stéphanie.

Ya bautiza si Gisèle cuando ta entra pa le escuela na un medical school na Italy. Bilib gayot le con el simple vida del man maridable pioneer quien ya enseña con ele el Biblia y quierre le hace pa mas na ministerio. Poreso, ya principia sirvi si Gisèle como un regular pioneer mientras ta hace le acaba el de suyu escuela.

Quierre bira si Gisèle na Cameroon para hace mas na servicio con Jehova, pero tan lingasa le. Ele ya habla, “Hay perde el de mio derecho que queda na Italy y hay queda yo separtao na de mio maga amigo, amiga y familia. Pero maskin pa ansina, del Mayo 2016, ya bira si Gisèle na Cameroon. Cuanto tiempo despues, ya casa le con Léonce y el branch office na Cameroon ya anima kanila que cambia sila na Ayos, un sitio que tiene grande necesidad.

Quetal el vida na Ayos? Si Gisèle ya habla: “Ta alcanza maga cuanto semana que nuay corriente y gendeh kame ta puede man charge diamon cellphone. Poreso, gendeh kame ta puede usa con ese. Ya aprende yo cuci usando maga leña y ta usa kame maga cariton y flashlight para saca agua llega el noche cuando poco lang el maga gente.” Cosa ya puede ayuda con el man maridable? Si Gisèle ya habla: “El espiritu de Jehova ya ayuda kanamon para aguanta. Yan ayudajan tambien kame man maridable. Y el diamon maga familia, amigo y amiga ya anima kanamon y tiene vez, ta ayuda sila kanamon na financial.”

Alegre ba si Gisèle que ya bira le na nacion onde le estaba? “Si! Nuay gayot duda,” ya habla le. “Del primero, tiene kame maga dificultad y ya sinti kame luya, pero cuando ya puede kame quel enfrenta, ya sinti kame man maridable que ya hace kame con el cosa kame necesita hace. Ta confia kame con Jehova y ta sinti kame que ta queda kame mas cerca con ele.” Si Léonce y Gisèle ya atende na School for Kingdom Evangelizers y ahora ta sirvi sila como maga temporary special pioneer.

Igual con el maga pescador quien con animo ta enfrenta maga dificil condicion para puede cuji pescao, aquellos quien ta bira na nacion onde sila estaba conforme hace maga sacrificio para ayuda con el maga tiene justo condicion de corazon quien ta acepta con el mensaje del Reino. Asigurao que hay acorda gayot si Jehova con este maga publisher quien ta dale mira amor na de suyu nombre. (Neh. 5:19; Heb. 6:10) Si ta queda tu na otro nacion y tiene necesidad na de ustedes nacion, hay bira ba tu? Si hace tu se, hay bendici gayot contigo si Jehova.—Prov. 10:22.