VANATHU vo tala ava va nga ti rurile ve ya ka matiko mamwani o ganya, va tshumete ve wuya matikoni kwawe, ngu ku susumetwa ngu lirando li va ku nalo ngu Jehovha ni vathu, vona va wile ve ta thuma ka matiko awe a ya ma ku ni txilaveko txa vahuweleli. (Mat. 22:37-39) Ngu yihi mizamo yi ti nga lava ve yi maha? Ngu mahi makatekwa ya va nga ma mana, ti to hi mana tixamulo a hi bhuleni ngu vanathu va va nga wuya ditikoni kwawe ka Camarões di manekako i m’swa ditambo ka Africa.

Ngu 1998 mwanathu wu a dhanwaku ku i Onésime a khukhile Camarões e ya ditikoni kumwani ha a nga ya zumba kudingana 14 wa malembe. Ditshiku dimwani a di mitshanganoni a pfite txifananiso mayelana ni mthumo wo txhumayela. Mwombawombi a wombile tiya, “alakanya vangana vambidi a va va dotako, mmweyo a ka wukhalo wu sihaka si dyelako kasi mmwani a ka wukhalo wu si si dyeliko, ina u alakanya to awule mmwani kha na ku khukha eya ka wule si dyelako ngutu?”

Txifananiso txiya txi mahile Onésime e pimisa ngu ku tshumelela ditikoni kwawe ti to e ya vhuneta ka mthumo wo txhumayela ni vahuweleli wa wukhalo wonewo. Kambe ene a txi kanakana, a txi ti wotisa ti to ina a na ya tolovela dihanyo da diphya, aku a nga ti tolovete ku zumba txilunguni, ti to e tsaniseka a tsute eya zumba kudingana 6 wa mitxima. Se ngu 2012 a tshumelete ditikoni kwawe.

Onésime a womba tiya: “Ti lavile ni tshumela ni tolovela matxelo a ditikoni kwango. Ni di mitshanganoni ti lavile ni tolovela mabhanko o gogonya. Kambe a ku ni nga ti veka mapimo ka mitshangano ni si alakanyi ngu situlo so defaa asi ni nga ti si tolovete.”

Ngu 2013, Onésime a txhadhile ni Géraldine, awu a nga zumba França kudingana 9 wa malembe e tshumela e wuya ditikoni kwawe Camarões. Ngu yahi makatekwa ya va nga ma mana kota patwa ngu kuva va di thangetisile timhaka ta moya? Onésime a womba tiya: “Kota mpatwa hi yite ka txikolwa txa vatxhumayeli va Mfumo ni ku hi thuma Bhetele. Ka dilembe di di nga guma 20 wa vahuweleli va dibanzani kwathu va bhabhatisilwe. Ni tipfite ti to ni ‘dota’ ka wukhalo wu sidyelako.” (Marku 1:17, 18) Géraldine nene a womba tiya: “Ni mani makatekwa o nem ni si khali ku ma alakanya.”

Judite a rurile eya Estados Unidos kambe a txi lava ku andisa mthumo wakwe wo txhumayela. Ene a womba tiya: “Mbimo yi ni nga ti tiya Camarões, ni txi wuya ni txi dila ni txi khumbula sigondo si ni nga txi si siya si ni nga ti si khatile.” Hambiketo Judite a txi kanakana ku tshumela eya  zumba Camarões. Ene a ti ni mthumo wu wu nga ti muholela kha kwati, a wu wu nga ti mvhuna ku e khatalela dihanyo da tate wakwe a wu a nga ti zumba Camarões. Kambe ngu ku themba Jehovha Judite a tshumelete ditikoni kwawe. Ene a womba ti to ti mu karatete ku leka txilunguni mu a nga ti ku tolovete. Ene a khongete ka Jehovha e kombela txivhuno, se muwoneleli wa txigava ni msikati wakwe va mtsanisile.

Judite a mani makatekwa o tala, ene a womba tiya: “Ngu malembe mararu ni vhunile vathu ti to ve bhabhatiswa.” Judite a khatile ku thuma kota nyaphandule wo sawuleka, nyamsi ene a thuma kumweko ni mwamna wakwe Sam-Castel awu i ku mwoneleli wa txigava. Kambe ku mahekile txani ngu tate wa Judite? Ene ni mwaya wakwe ti kotekile ku veya ka txibhejela txa hahanze ka ditiko a ha a nga ya maha operasawu yi yi nga txi laveka. Txo tsakisa ngu ti to ti di ya tsimbila kwati.

Mwanathu wu a dhanwako ku i Victor a rurile ditikoni kwawe Camarões eya zumba Canada. Msana ko a di lerile to kari ka Muwoneleli mayelano ni ti gondo ta hombe a alakanyisisile ngu ti to a nga maha txani. Hahanze ko tsula Universidade ene a mahile curso yo koma. Ene a womba tiya: “Yona yi ni vhuni ni kuluveta ni mana mthumo ni ku hokelela a ti ni nga ti ti navela, to va nyaphandule.” Ngu ku tsimbila ka mbimo Victor a txhadhile ni Caroline, se ve gwita ve ya pfuxela ditikoni kwawe Camarões. Mbimo yi va nga ya pfuxela Bhetele va ti ya kuzetwa ti to ve wuya ve ta thumela Camarões. Victor a khene: “Hi si nga ni txivangelo txo lamba ku wuya hi ta thuma nguko ku si nga ni txi txi nga txi hi vhalela.” Hambiku Caroline a nga ti ni txikarato txa dihanyo vona va sungile ku wiya ditikoni kwawe Camarões.

Victor ni Caroline va khatile ku thuma kota vanyaphandule va mbimo yotshe ti to ve vhuneta ka mthumo wo txhumayela. Kasi ku ve wona to ina va na sikota ku ku thuma kota vanyaphandule na va siyi mthumoni, va zumbile mbimonyana va txi phandula va txi thumisa male yile va nga ti yi sengeletile. Msana keto va thumile mitximanyana kona khe Canada kasiko ve kota ku wuya ditikoni kwawe Camarões ti to ve ta simama ve thuma kota vanyaphandule. Ngu yahi makatekwa ya va nga ma mana? Vona va yite ka txikolwa txa vatxhumayeli va Mfumo, ve tshumela ve thuma kota vanyaphandule vo sawuleka, konku va thuma ka mthumo wo aka. Victor a womba tiya: “Ku leka wukhalo wu hi nga ti wu tolovete ti hi mahile hi wona txivhuno txa Jehovha.”

Ngu 2002, Alain, a wu a nga ti gonda Universidade a gondile txiphephana txi txi ku: Jovens—Como Usarão Sua Vida? Ati a nga ti lera ti mmahile e ti vekela makungo. Ngu 2006 a yite ka Txikolwa txa Wuthumeli wa Mfumo, se a gwitile e avelwa ku ya thumela Camarões ditikoni kwawe.

Khe Camarões Alain a tiya mana txigwaza txo thuma masikunyana ngu divhiki. Ngu kutsimbila ka mbimo a mani mthumo a wu wu ndi no muholela kwati. Kambe a woni ti to wu ndi na mtsivela ku e txhumayela nga ti a nga txi ti lavisa tona. Mbimo yi a nga avelwa kuthuma kota nyaphandule wo sawuleka ene a tumete txiavelo txonetxo. Mlungu wakwe a mthembisile to a di na mu engetela muholo, hambiketo Alain kha tumela. Ngu ku tsimbila ka mbimo Alain a txhadhile ni Stéphanie, awu a nga ti hanyile França malembe o tala. Ngu sihi sikarato a si Stéphanie a nga manana naso ngu ku wuya ditikoni kwawe Camarões?

Stéphanie a womba tiya: “Ni txi zumbela ku lwalalwala kambe a ku ni nga ti ni makinina a  malwati angu ni si karateki.” Mpatwa wuwa wu katekisilwe aku wu nga timisela. Alain a womba tiya: “Mbimo yi hi nga ti ya txhumayela ka didhoropa da kule di di dhanwaku ku i Katé hi mani vathu vo tala ava va nga ti lava ku gonda Bhiblia. Ngu kutsimbila ka mbimo hi koti ku tsimbitisa sigondo ngu kuthumisa telefone. Sigondo simbidi si bhabhatisilwe, ni ku ku tutwe mtxawa wa vahuweleli.” Stéphanie a tshumela e womba tiya: “Litsako la hombe ku vhuna vathu ve bhabhatiswa ve thumela Jehovha. Hi mani makatekwa o tala ngu ku va hi di wile hi ta thumela ditikoni kwathu.” Nyamsi Alain a thuma kota muwoneleli wa txigava kumweko ni msikati wakwe Stéphanie.

Gisèle a bhabhatisilwe Italia a mu a nga ti zumba atxi gonda ta wudhokodhela. Ene a tsakisilwe ngu wutomi wo hehuka wa vanyaphandule a va va nga ti mgondela, se nene a lavile ku va nyaphandule. Se Gisèle a tekile wunyaphandule mbimo yi a nga txi hetisa tigondo takwe.

Gisèle a vite ni minavelo yo tshumela eya ditikoni kwakwe, a ya andisa mthumo wakwe ka Jehovha, kambe a ti kanakana. Ene a womba tiya: “Ti txi lva ni leka mwaya wangu ni vangana vangu a va va nga ti zumba Italia.” Hambi keto ngu Maio wa 2016 Gisèle a tshumete e ya ditikoni kwawe Camarões.

Ngu kutsimbila ka mbimo a txhadhile ni Léonce, se Bhetele ya Camarões yi va kuzetile to ve ya Ayos ka didhoropa di ku nga ti ni txilaveko txa hombe txa vahuweleli.

Ngu sihi sikarato sa hombe a si mpatwa wu wu nga ti tshangana naso? Gisèle a womba tiya: “Hi txi zumba mavhiki o tala hi si nga ni magezi, se hi si nga ni wukhalo wo txatxa mafoni. Hi txi heta mbimo hi sithumi. Hi gondile kubhika ngu tikhuni ni ku ya reka mati ni wusiku ngu diwilibhali nguko ku ti tala govani.” Jehovha a va vhunisile kutxani? Gisèle a womba tiya: “Moya wa Jehovha wu hi vhuni hi tsanisela, ani ni mwamna wangu hi txi vhunana, mwaya ni vangana va txi hi tsanisa ni ku hi vhuna ngu male.”

Ina Gisèle a mani makatekwa nguko wuya ditikoni kwakwe? Ene a womba tiya: “Ina ni ma mani hambi ku ti nga lava ni wonisana ni sikarato ni dikhodho kambe ni si xute. Ani ni mwamna wangu hi ti pfisisile ti to a tiya ngu ti hi nga ti fanete kumaha. Hi veka themba yathu ka Jehovha ni ku hi ni wuxaka wo tsana nayo.” Léonce ni Gisèle va yite ka Txikolwa txa Vatxhumayeli va Mfumo, ni ku konku va thuma kota vanyaphandule vo sawuleka va mbimoanyana.

Kufana ni mdoti wa sihaka a wu a mananaku ni sikarato so hambana-hambana ti to e mana sihaka a va va tshumelelako ditikoni kwawe va maha mizamo ti to ve vhuna a va va tsakelako didungula da mfumo. Tihakubasani ti to Jehovha a na mbi divala mthumo ni lirando a li vanathu va nga li kombisa ngu kona ha ka ditina dakwe. (Neh. 5:19; Vaheb. 6:10) Ngako u txi hanya ka ditiko dimwani kuve ditikoni kwako ku ni txilaveko txa vahuweleli va Mfumo ti ngo txani u tshumela? Ngako u txi maha toneto, u na mana makatekwa o tala.—Mav. 10:22.