DAGHANG igsoon nga mibiya kaniadto sa ilang yutang natawhan aron manarbaho sa laing nasod ang namauli. Tungod sa ilang gugma kang Jehova ug sa ilang isigkatawo, sila mibalhin sa mga dapit diin gikinahanglan ang dugang magsasangyaw. (Mat. 22:37-39) Unsang mga sakripisyo ang ilang gihimo, ug unsang mga panalangin ang ilang nadawat? Aron mahibaloan, bisitahon nato ang nasod sa Cameroon sa kasadpang Africa.

Niadtong 1998, ang brader nga si Onésime mibiya sa iyang nasod sa Cameroon. Sulod sa 14 ka tuig, mipuyo siya sa laing nasod. Usa ka adlaw niana, panahon sa tigom, nakadungog siyag ilustrasyon bahin sa buluhatong pagsangyaw. Ang mamumulong miingon, “Kon duha ka higala ang nangisda sa lainlaing lugar, ug ang usa mas daghag kuha, dili ba ang gamayg kuha mobalhin sa dapit nga mas daghag kuha?”

Ang maong ilustrasyon nakapahunahuna kang Onésime nga mobalik sa Cameroon, diin daghan ang interesadong magtuon sa Bibliya. Gusto niyang motabang sa mga igsoon didto, pero nabalaka siya. Maka-adjust kaha siya sa kinabuhi sa Cameroon, nga dugay na man siyang nagpuyo sa laing nasod? Aron mahibaloan, mibakasyon si Onésime sa Cameroon sulod sa unom ka bulan. Dayon, pagka-2012, mibalhin na gyod siya didto.

Si Onésime miingon: “Kinahanglan kong mo-adjust sa init nga klima ug sa kahimtang sa kinabuhi dinhi. Sa Kingdom Hall, kinahanglan na sab nakong anaron ang akong kaugalingon nga molingkod sa gahi nga mga bangko.” Dayon, mapahiyomon siyang miingon: “Pero dihang mas nagpokus ko sa tigom, nag-anam ka wala sa akong hunahuna ang komportableng mga lingkoranan.”

Niadtong 2013, si Onésime naminyo kang Géraldine, kinsa mibalik sab sa Cameroon human mopuyo sa France ug siyam ka tuig. Unsang mga panalangin ang ilang nadawat tungod sa pagpokus nila sa pag-alagad kang Jehova? Si Onésime miingon: “Kaming magtiayon nakaeskuwela sa School for Kingdom Evangelizers ug nakaalagad sa Bethel. Sa miaging tuig, 20 ka Bible study sa among kongregasyon ang nabawtismohan. Makaingon ko nga nia na ko sa maayong dapit sa ‘pagpangisda.’” (Mar. 1:17, 18) Si Géraldine midugang: “Mas daghan kog nadawat nga mga panalangin kay sa akong gidahom.”

Si Judith mibalhin sa United States, pero gusto niyang magpalapad sa iyang ministeryo. Siya miingon, “Kada human nakog duaw sa among pamilya sa Cameroon, mohilak ko kay mabiyaan nako ang mga study nga akong nasugdan.” Pero nagduhaduha si Judith sa pagpuyog balik sa Cameroon. Siya may trabaho nga dakog suweldo ug siyay nagbayad sa medikal nga galastohan sa  iyang papa nga naa sa Cameroon. Pero misalig siya kang Jehova ug mipuyog balik sa Cameroon. Miangkon siya nga gimingaw siya sa iyang komportableng kinabuhi sa laing nasod. Miampo siya kang Jehova nga tabangan siyang maka-adjust, ug gipalig-on siya sa usa ka tigdumala sa sirkito ug sa asawa niini.

Si Judith nahinumdom, “Sulod sa tulo ka tuig, nalipay ko nga upat ka tawo ang akong natabangan nga mabawtismohan.” Si Judith nahimong espesyal payunir. Karon, kauban siya sa iyang bana, si Sam-Castel, sa sirkitong buluhaton. Komosta ang papa ni Judith? Si Judith ug ang iyang pamilya nakakitag ospital sa laing nasod nga andam moesponsor sa operasyon sa iyang papa. Ikalipay, malamposon ang operasyon.

Si Victor mibalhin sa Canada. Human siya makabasag artikulo sa Bantayanang Torre bahin sa taas nga edukasyon, nakapamalandong siya. Miundang siya sa unibersidad ug mikuhag mas mubo nga teknikal nga kurso. Siya miingon: “Tungod niana, mas dali kong nakatrabaho, ug nahimo nako ang dugay na nakong gipangandoy​—ang pagpayunir.” Sa ulahi, si Victor naminyo kang Caroline, ug sila mibisita sa Cameroon. Sa dihang mibisita sila sa sangang buhatan didto, gidasig sila sa mga igsoon nga hunahunaon kon puwede ba silang moalagad sa Cameroon. Si Victor miingon, “Wala mi rason nga mobalibad, ug kay gihimo namong simple ang among kinabuhi, puwede namong dawaton ang imbitasyon.” Bisag may mga problema sa panglawas si Caroline, midesisyon sila nga mobalhin.

Si Victor ug Caroline nag-regular payunir aron tabangan ang daghang interesado nga ilang nakaplagan. Sa sinugdan, ang ilang tinigom nakasapar ra sa ilang galastohan. Human niana, mitrabaho sila sa Canada sulod sa pipila ka bulan, mao nga nakabalik sila sa Cameroon ug nakapadayon sa pagpayunir. Unsang mga panalangin ang ilang nadawat? Sila nakaeskuwela sa School for Kingdom Evangelizers, nakaalagad ingong mga espesyal payunir, ug karon mga construction servant. Si Victor miingon, “Kay mibiya mi sa among komportableng kinabuhi, kinahanglan ming mosalig kang Jehova, ug giatiman gyod mi niya.”

Niadtong 2002, si Alain, estudyante sa usa ka unibersidad sa Germany, nakabasa sa tract nga Mga Batan-on​—Sa Unsang Paagi Gamiton Ninyo ang Inyong Kinabuhi? Ang iyang nabasahan nagpalihok niya sa pagbag-o sa iyang mga tumong. Niadtong 2006, mieskuwela siya sa Ministerial Training School ug naasayn sa Cameroon, ang iyang yutang natawhan.

Sa Cameroon, si Alain nakakitag partaym nga trabaho. Sa ulahi, nakakita siyag laing trabaho nga mas dako ug suweldo, pero nabalaka siya kay basig gamay na lang ang iyang panahon sa ministeryo. Busa dihang gidapit siya nga mag-espesyal payunir, gidawat dayon niya kini. Gitanyagan siya sa iyang boss ug mas taas nga suweldo, pero gibalibaran niya kini. Sa ulahi, si Alain naminyo kang Stéphanie, kinsa nakapuyo sa France sulod sa daghang tuig. Unsang mga kalisdanan ang nasinati ni Stéphanie pagbalhin niya sa Cameroon?

Si Stéphanie miingon: “Nagkasakitsakit ko ug nagka-allergy, pero matambalan ra man.” Ang magtiayon gipanalanginan tungod sa ilang paglahutay. Si Alain miingon: “Pagsangyaw namo sa layo kaayong baryo sa Katé, daghan mig nakit-an nga gustong mag-Bible study. Sa ulahi, giestadihan namo sila pinaagi sa telepono. Duha sa  maong mga Bible study ang nabawtismohan, ug naporma ang usa ka grupo sa mga magmamantala.” Si Stéphanie midugang: “Makapalipay kaayo ang pagtabang sa mga tawo nga magpahinungod sa ilang kinabuhi kang Jehova. Sa among pag-alagad dinhi, kadaghan namo naeksperyensiyahi ang maong kalipay.” Karon, si Alain ug Stéphanie nag-alagad diha sa sirkitong buluhaton.

Si Gisèle nabawtismohan samtang siya nag-eskuwela sa usa ka medical school sa Italy. Nakadayeg siya sa simpleng kinabuhi sa magtiayong payunir nga nag-study niya, ug gusto niyang mohimog labaw pa sa ministeryo. Busa, si Gisèle nagregular payunir dihang hapit na siyang mogradwet.

Gusto ni Gisèle nga mobalik sa Cameroon aron mas daghan pa siyag mahimo sa pag-alagad kang Jehova, pero may mga gikabalak-an siya. Siya miingon, “Kinahanglan nakong isakripisyo ang akong legal nga katungod nga mopuyo sa Italy, ug mahilayo ko sa akong mga higala ug pamilya nga nagpuyo didto.” Bisan pa niana, niadtong Mayo 2016, si Gisèle miuli sa Cameroon. Sa ulahi, naminyo siya kang Léonce, ug ang sangang buhatan sa Cameroon misugyot nga mobalhin sila sa Ayos, usa ka lungsod diin gikinahanglan ang mas daghang magsasangyaw.

Komosta ang kinabuhi sa Ayos? Si Gisèle miingon: “Sagad walay koryente sulod sa pipila ka semana, ug dili namo ma-charge ang among mga cellphone maong halos pirme ning naka-off. Nakakat-on ko sa pagluto gamit ang sugnod, ug magdala mig mga kareton ug plaslayt aron sa pagkalos ug tubig sa gabii, diin dili kaayo daghag tawo ang tubod.” Sa unsang paagi nakalahutay ang magtiayon? Si Gisèle miingon: “Nakalahutay mi tungod sa espiritu ni Jehova, pagtinabangay namong magtiayon, ug pagdasig ug usahay, pinansiyal nga tabang gikan sa pamilya ug mga higala.”

Nalipay ba si Gisèle nga mibalik siya sa iyang yutang natawhan? “Oo! Nalipay gyod,” siya miingon. “Sa sinugdan dihay mga kalisdanan ug pagkadismayar, pero dihang nadaog namo ni, gibati namo sa akong bana nga gihimo namo ang kinahanglan namong buhaton. Kami misalig kang Jehova ug mas nasuod kaniya.” Si Léonce ug Gisèle mieskuwela sa School for Kingdom Evangelizers ug karon nag-alagad ingong temporaryong espesyal payunir.

Sama sa mga mangingisda nga nagpakitag kaisog bisan pa sa lisod nga mga kahimtang aron makakuhag daghang isda, kadtong namalik sa ilang yutang natawhan kinabubut-ong mihimog mga sakripisyo aron tabangan kadtong maminaw sa mensahe sa Gingharian. Seguradong hinumdoman ug panalanginan ni Jehova kining kugihang mga magmamantala tungod sa gugma nga ilang gipakita para sa iyang ngalan. (Neh. 5:19; Heb. 6:10) Kon nagpuyo ka sa laing nasod ug nagkinahanglag dugang magmamantala ang imong yutang natawhan, makahimo ka ba sa pagbalik? Kon buhaton nimo kana, panalanginan gyod ka ni Jehova.​—Prov. 10:22.