MUTTENGO mwinjene wa abali vamodha na arogoraya amwalele dhilabo dhofuma wi avede ganyo, ahiyelela dhilabo dhawa dhobaliwa. Sabwa ya omukwela wawa Yehova vamodha na attu akwawa awene ahimwalela mirudda dhajombeliwa anamalaleya a Omwene. (Mt. 22:37-39) Dhosakula gani dhorutxa dhikosilani vina mareliho gani attuviwani? Wi niziwe yowakula ya nivuzo ntti, ndoweni none dhipadduwile o Camarões mpaddi wa elabo ya África.

Yaka ya 1998 mbali dhahi onittaniwa Onésime ohimwala elabo yaye yobaliwa, o Camarões. Iyene ohikala vyaka 14 elabo ya weddela. Siku dhahi bali omatugumanoni Okristu iyene wahiwa musibo mwaha wa mabasa a olaleya. Namakosa epaddiya walogile dhahi: “Akala amarho eli anottadda mimburho dhottiyana, mmodha opaga oba gwé, oku mukwaye ahipaga, ole ohimpa kandowa okala vakuvi na mukwaye?”

Musibo obu ohimuttukulela Onésime ogana wiyelela o Camarões wi akamihedhe anamalaleya a owaniwe sabwani wahikala nikuru na mabasa a ottadda dhomuyani. Mbwenye iyeneya wanova wiyela. Agawodhile dhavi olemela mikalelo dha elabo yaye, na vyaka esi dhotene dhikalileye muweddani? Iyene wahigana yokosa; Onésime wahidhowa o Camarões bakalawo mweri mitanu na mmodha. Mmalelani, yaka ya 2012, bamwala-wene, bagakala wenewo.

Onésime ohiloga: “Miyo ddanfwanyela ovisaddulela sabwa ya oviha wa elaboya na mikalelo dhina dhokalawo. O Numbani ya Omwene, ddahiroma ogilatela wili mabanko owoma.” Iyene ohiloga na emwerumweru wi: “ddanfwaseyela ovuruwana matugumanoya vina na mudhidhiya ddahiroma odduwala kadera dhorofowa dhagilatelaga miyo.”

Yaka ya 2013, Onésime wahimutela Géraldine, weyeleli o Camarões bamalile okala o França vyaka tanu na nai. Mareliho gani akelile atelani aba sabwa ya ozuzumela okosa mabasa a omwene mwigumini mwawa? Onésime ohiloga: “Mmalelihu otelana, nihikosa Eskola ya Anamalaleya a Omwene vina nihilaba o Betel. Yaka evirile anamasunza a Bibilia 20 a mmulogoni mwehu ahibatizwa. Ovano ddinona wi ddihifwanya mburho wapama wa ‘othadda.’” (Mk. 1:17, 18) Géraldine owenjedha: “Miyo ddihakela mareliho menjene vaddiddi ahobuwelimi wi ddigahakela.”

Judith wahimwalela o Amerika; mbwenye wahikana efunelo enddimuwa vaddiddi ya mabasa aye a olaleya. Iyene bela “Omagomelo wa oleddo wakosimi wa odhowa wawoona anamudhi o Camarões, ddanunla sabwani ddanattiya attu enjene aromile omusunza Bibilia na miyo.” Masiki dhawenevi, Judith wanova wiyelela o Camarões. Iyene wahifwanya ganyo yamuttabiriha venejene, dhayene  wanwodha opitxela mirobwe dhaja babe wenewo o Camarões. Txibarene sabwa ya omukuluvela Yehova Judith wahimwala-wene. Iyene onorumela wila elabo yaliye kajombeliwa elo. Wahimukumbirha Yehova munlobeloni wila amukamihedhe olemela mikalelo esile dhiswa; wahidha-wene okamihedhiwa na nipangarhazo nakelileyi na nameddelela milogo vamodha na mwadhiye.

Judith ohiloga wi “Mwari mwa vyaka esi ttaru ddifwanya wagalala mwaha wa okana ayima omuyani.” Judith ohiroma olaba ninga pionera wavawoka. Ddabuno iyene vamodha na mamune Sam-Castel anlaba mabasa a weddelela milogo. Ovano txini empadduwele babi wa Judith? Iyene vamodha na anamudhi enna ahiwodha ofwanya numba ya egumi egawodhiwe babe okosiwa operesão ogapitxele awene muttengo mung’onovi. Mowagalaliha-mwene operasãuya okosiwa pama.

Mbali onkuweliwa Victor wahimwalela o Canadá. Mmaleliye omwengesa A Sentinela waloga mwaha wa masunzo a vadhulu, iyene ohitamela oziwelamo mwaha wa masunzoya abale. Iyene ottiya okosa kursu dha vadhulo bakosa dhing’ono. Vasogorhova ohiloga wi: “Eji ehiddikamihedha ofwanya ganyo momaguva, vina ehiddiwodhiha okosa ejile yafunetximi—okala pionero.” Vasogorhova, Victor omutela Caroline, mmalelani adhowa waredha o Camarões. Mudhowelani woona Betel enddimuwa y’o Camarões, ahikokomeziwa wila atanalele akala egakala yowodheya olaba elabo ejile. Victor ohiloga: “Iyo kanaana mwaha w’okodda, nona nahitamela oluluviha egumi yehu wila nirumele niwobo ntti.” Masiki Caroline vaniye makattamiho a egumi, iyene wahirumela yogana ya mwazambo nona ahimwala.

Victor na Caroline ahiroma olaba ninga apionero wila akamihedhe abale anna efunelo ya omusunza Bibilia. Awene avisapelana na korowa yakoyilani. Vasogorhova awene ahidhowa olaba o Canadá mweri dhing’onovi; mmalelani ahiyelela o Camarões bagalabavi ninga apionero. Mareliho gani akele awene? Awene ahikosa Eskola ya Anamalaleya a Omwene, alaba ninga apionero avawoka, ovano anlaba ninga anamamaga. Victor bela, “Otiya egumi yehu ya ofwasa, ehinikosiha wakela nikamihedho na Yehova.”

Yaka ya 2002 Alain, namasunza wa universidade ya Alemanya wahengesa folheto Jovens—Como Usarão a Sua Vida? Mazuya alimo amuttukulela iyene okosa dhogana dhiswa. Yaka ya 2006, iyene wahidhowa okosa masunzo a Eskola ya Maswagiho a Adhari Okamihedha mmaleliye ohittomeliwa olabaga o Camarões, elabo yabaliwiye.

O Camarões, Alain ofwanya ganyo ya mudhidhi mung’onovi. Vasongorova wahifwanya ganyo yottambirhiha korowa dhinjene, mbwenye iyeneya wanubuwela wi egahimuttukulela okanela owarala mabasa a olaleya. Nona mwawobeliweyi olaba ninga pionero wavawoka wahirumela momaguva-mwene. Muzugu waye wahiloga wila agahenjedhedhavo korowaya, mbwenye masiki na ejene Alain kattile yogana yaye. Vasongorova Alain wahimutela Stéphanie, wakalile vyaka ngasi o França. Makattamiho gani agumanilena awene mmwalelani o Camarões?

Stéphanie ohiloga: “Ddahiroma okana makattamiho a egumi, vina dhoja dhina dhandditota alergia, nona ddahiroma oja mirobwe makattamihoya ahivuguwa.” Atelani aba ahakela mareliho mwaha wa ovilela wawa. Alain onowubuwela: “Moromeli iyo olaleya murudda dhahi wolapela watxemeriwa Katé, nahafwanya attu enjene anna efunelo enddimuwa ya omusunza Bibilia. Nahidha oroma weddiha masunzo a Bibilia na  muttitto. Mwa anamasunzaya eli ahibatiziwa, nenji nahita nikura na anamalaleya.” Stéphanie onowenjedhedhavo dhahi: “Elobo yottabiha vaddiddi wakamihedha attu ofiyedha omperhekela Yehova egumi yawa. Olaba okuno ohiddifwanyiha wagalala winjene.” Ovano Alain na Stéphanie anlaba ninga anameddelela milogo.

Gisèle obatiziwe akosaga masunzo a egumi elabo ya Itália. Iyene wahitikina na egumi yovevuwa yana atelani ali apionero amusunzihile Bibilia, nona wahifuna wenjedheda mabasa aye a olaleya. Mugomihedhiye masunzo aye, Gisèle ohiroma olaba ninga pionera wa mudhidhi wotene.

Gisèle wahikana efunelo enddimuwa ya omukosela Yehova venjene, nona wanfuna wiyelela o Camarões, mbwenye iyene wahikana dhowaganyedha dhinjene. Iyene bela, “Miyo ddahiyelela numbaga o Itália vina wattiya amarho na anamudhi akala wenewo.” Masiki dhawene mweri wa Mayu yaka ya 2016, Gisèle wahiyelela o Camarões.

Musongoromwa wahimutela Léonce, vina Betel yo Camarões yahakokomeza atelani aba omwalela o Ayos, katti yana ofuneya onndimuwa wa anamalaleya a Omwene.

Dhilobodha dhali dhavi o Ayos? Gisèle ohiloga: “Mfiyedhewo iyo kawali maluz mwari mwa sumana dhing’onovi, nona kanawodha okaregar muttitto dhehu. Vahivira mudhidhi nihikosaga mabasa ehu. Ddahisunza opiya na kuni, vina nanttukula karinya ya mmadani na lanterna wila naruge manje na mattiyu mudhidhi wahakaletxa attu vatxelani.” Txini yakamihedhi atelani aba ovilela? Gisèle ohiloga: “Muya wokoddela wa Yehova okamihedha matelo ehu, vina ohinipangarhaza, anamudhi na amarho anivaha korowa ya ogulana dhanijombela.”

Gisèle ohifwanya wagalala sabwa ya wiyelela elabo yaye yobaliwa? Dhologa dha mwinya dhinowakula nivuzona; iyene bela: “Txibarene! Ninoziwa wi vamaromo dhahikalawo dhanirutxa vang’onovi, vina nakala ninga nafuna okumuwa, mbwenye muwodhelehu okwaranya, nihifiyedha woona wila txibarene nikosile ejile yafwanyelihu wira. Nihimukuluvela Yehova vina nikala wofiyedheya na iyene.” Léonce na Gisèle akosa Eskola ya Anamalaleya a Omwene, ovano awene anlaba ninga apionero avowaka a mudhidhi wopimeleliwa.

Dhahene ninga namattadda oba onvilela mikalelo dhotiyana dha mwiko wila ape oba dhapama, abale eyelile elabo yawa yobaliwa akosa guru dhinjene wila akamihedhe abale anrumeela miselu dha Omwene. Kavali waganyedha yawila Yehova onowawubuwela anamalaleya aba ovilibihedha mwaha wa okwela okanelani nzina naye. (Neh. 5:19; Aheb. 6:10) Akala weyo onkala elabo yina venevo buwiwa wila ohikala ojombeliwa wa anamalaleya mwilaboni mwawo, egahiwodheya wiyelela elabo yawo? Ogakosa ejuwene onele wakela mareliho ahajedheliwe.—Gano 10:22.