AME thene la itre trejin ka fek a tro kowe la itre xaa nöj ka hetre mo, alanyimu la itre ka bëek kowe la sipu nöje i angatr. Pine nemen? Pine laka tru la ihnimi angatr koi Iehova me koi itre xan, matre hnei angatr hna bëek troa cainöj ngöne la itre nöj ka aja ixatua. (Mat. 22:37-39) Nemene la itre ewekë hnei angatr hna nue? Nge nemene la itre manathith hnei angatr hna kapa? Tro sa ce wang la hna melën hnene la itre trejin ka bëek a tro Cameroun, ketre nöj e Afrique centrale.

Ame lo 1998, hnei Onésime hna fek qa Cameroun, sipu nöje i nyidrë. Hnei nyidrë hna mel ngöne la ketre nöj koi 14 lao macatre. Ame ngöne la ketre icasikeu, hnei nyidrë hna drenge la ketre ceitun. Önine la ka cile fë cainöj: “Pane mekune jë laka, lue sinee a thiny ngo isa götrane i nyidroti kö. Tiqa hnei ie hna ea hnei ketre. Hapeu, tha tro jë kö lai ketre a tro kowe la hna thiny hnene la sinee i angeic?”

E cili, hnei Onésime hna mekun troa bëek kowe la itre “götran hnë nyi ie” e Cameroun, matre troa xatuane la itre trejin. Ngo hetre hnei nyidrëti hna hnehengazon. Hapeu, atreine kö Onésime troa saze aqane mel, ngacama itre macatre ne lapa nyidrë ngöne la ketre nöj? E cili, hnei nyidrëti hna mekun troa pane lapa koi 6 lao treu. Nge ame hë lo 2012, hnei nyidrë hna lapa huti e cili.

Öni Onésime: “Loi e tro hmaca ni a majemine kowe la mel e celë ke, kola hedredrei nge tha tru kö hnei mo. Ame ngöne la Uma Ne Baselaia, eni hmaca a lapa të hune la itre sine ita. Ngo eni a drenge hnyawa la porogarame ne la icasikeu, matre tha mekune hë hi lo itre cea ka lolo ngöne la ketre ekalesia.”

Ame lo 2013, hnei Onésime hna faipoipo me Géraldine. Hnei angeice fe hna bëek e Cameroun, thupene la 9 lao macatre ne lapa angeic e Faras. Nemene la itre manathith hnei nyidroti hna kapa qa ngöne la hna kuca la aja i Iehova? Öni Onésime: “Hnei nyio hna ce sine lo Ini Koi Itre Ka Cainöj me huliwa ngöne la Bethela. Ame lo ketre macatre, traqa koi 20 lao ka ini tus ka xomi bapataiso. Eje hi, eni hnyawa hi ngöne la nyipi götran ‘hnë troa nyi ie.’ ” (Mar. 1:17, 18) Ketre, öni Géraldine: “Tha hnenge kö hna mekun laka, tro ni a kapa la itre manathithi celë.”

Ame Judith ke, ka mel eahlo e Etazini, ngo aja i eahlo troa catre huliwa koi Iehova. Öni eahlo: “Hnenge palahi hna tro troa wang la faming e Cameroun. Ngo ame lo eni a tro, eni palahi a treij ke, eni a nue la itre ka nyiqane ini tusi me eni.” Hnei Judith hna luelu troa bëek e Cameroun. Ka lolo la huliwa i Judith  e Etazini, matre ijije hi tro eahlo a nyithupene la itre drösinöe ne la keme i eahlo ka mel e Cameroun. Ame pe, hnei eahlo hna mejiune koi Iehova me bëek a tro Cameroun. Öni eahlo ka hape, jole koi eahlo lo xötrei, nge hnei eahlo hna mekun la mel e Etazini. E cili, hnei eahlo hna sipo ixatua koi Iehova matre troa kapa la mele i eahlo ka hnyipixe, nge hna ithuecatre koi eahlo hnene la ketre atre thupëne la sirkoskripsio me föe i nyidrë.

Öni Judith: “Eni a madrin ke, köni macatre thupen, eni a ini tusi memine la foa lao atr, nge kösë itre neköng angatr. Ame enehila, Judith a ce huliwa memine la föi eahlo, Sam-Castel, ngöne la huliwa ne thupëne la sirkoskripsio. Ngo tune kaa la keme i eahlo? Hnei Judith me itre fami eahlo hna öhne la ketre pital ka ajane troa nyithupene la hnei nyidrëti hna troa ixöj. Nge loi hë la meci nyidrë.

Hnei Victor hna fek a tro Canada. Ngo hnei angeic hna e la ketre Ita Ne Thup göne la troa sine la itre ini ka tru. E cili, hnei angeic hna nue la ini me tro pena troa inine la ketre huliwa. Öni Victor: “Celë hi ka aijijë ni troa canga öhnyi huliwa, me xome la huliwa ne pionie.” Thupene lai, hnei Victor hna faipoipo me Caroline, nge hnei nyidroti hna tro Cameroun. Ame lo nyidroti a ihamë ngöne la Bethela, hnene la itre trejin hna ithuecatre koi nyidro troa hane huliwa i Iehova e Cameroun. Öni Victor: “Pëkö ka ajolë nyio troa hane cainöj e cili. Nge pine laka, hnei nyio hna ahmaloeëne la mele i nyio, matre tha jole kö tro nyio a canga kapa la ihë.” Ngacama kola wezipo hnei Caroline, ngo hnei nyidroti hna fek qa Canada.

Hnei Victor me Caroline hna xome la huliwa ne pionie lapa. Hnei nyidroti hna ini tus memine la ite atr ka hetre hni ne aja. Ame lo xötrei, hnei nyidroti hna mel memine la manie hnei nyidroti hna amë acon. Ngo thupëne lai, hnei nyidroti hmaca hna tro Canada matre troa huliwa koi itre treu hi, me aijijë nyidro troa sisedrëne la huliwa ne pionie lapa e Cameroun. Nemene la itre manathith hnei nyidroti hna kapa? Hnei nyidroti hna ce sine la Ini Koi Itre Cainöj, nge lue pionie huti hë nyidro. Ketre, hna upi nyidro troa huliwa ngöne la hnë xupi Uma Ne Baselaia. Öni Victor: “Hnei nyio hna saze aqane mel, ngo öhne hi nyio la ixatua qaathei Iehova.”

Ame lo 2002, hnei Alain hna ini ngöne la ketre uma ne ini ka tru e Allemagne. Ame la ketre drai, hnei angeic hna e la tarak, Jeunes gens, qu’allez-vous faire de votre vie? Celë hi ka xatua angeic troa saze aqane mekun. Ame lo 2006, hnei angeic hna sine la Ini Thatraqane La Itre Trejine Trahmanyi Ka Tha Faipoipo Kö. E cili, hna upi angeic e Cameroun, sipu nöje i angeic.

Ame e Cameroun, hnei Alain hna huliwa ngöne la sine la drai. Thupene lai, hnei angeic hna öhnyi huliwa hna nyithupene hnyawa, ngo angeic a xou wanga troa ajolë angeic troa cainöj. Celë hi matre, ame la kola upi angeic troa pionie hut e Cameroun, hnei angeic hna canga kapa. Öni maseta ka hape, troa elëne la thupe i angeic ngo tha hnei angeice kö hna kapa. Thupene lai, hnei Alain hna faipoipo me Stéphanie, ka mel e Faras. Nemene la itre jol hnei Stéphanie hna cile kow e Cameroun?

Öni Stéphanie: “Hna anyimua tithi ni hnei mec, ngo hnenge hna canga nyinyin.” Eje hi,  hna amanathithine la aqane catre xomihni nyidro. Öni Alain: “Hnei nyio hna cainöj ngöne la ketre tribu hna hën ka hape, Katé. Alanyimu la itre atr ka pi ini tus, matre hnei nyio hna nyiqane ini tusi me angatr jëne telefon. Ame e thupen, hnene la lue xan hna xomi bapataiso, nge hetre ketre neköi gurup hë e cili.” Öni Stéphanie: “Ketre madrin ka tru la troa xatuane la ketre atr troa nue la mele i angeic koi Iehova. Nyimutre la itre manathith hnei nyio hna kapa e celë.” Ame enehila, Alain me Stéphanie a xome la huliwa ne thupëne la sirkoskripsio.

Hnei Gisèle hna xomi bapataiso e Italie, nge angeic a inine troa ketre droketre. Angeic a haine la aqane hmaloi la mele ne la lue trefën ka pionie, ka hamë ini koi angeic. Ketre, aja i angeic troa cainöj. Celë hi matre, ame lo angeic a afenesine la ini angeic troa droketre, hnei angeice fe hna xome la huliwa ne pionie lapa.

Hnei Gisèle hna mekun troa bëek e Cameroun matre troa catre cainöj, ngo hetre hnei angeic hna hnehengazon. Öni Gisèle: “Maine tro ni a tro Cameroun, tha tro hë ni a lapa e Italie. Tro hë ni a nue la itre sineeng me faming.” Ngo ame lo Mei 2016, hnei Gisèle hna tro Cameroun. Thupene lai, hnei angeic hna faipoipo me Léonce. Hnene la filial ne Cameroun hna upi nyidroti a tro Ayos, ketre traon ka aja ixatua.

Tune kaa la mel e Ayos? Öni Gisèle: “Ame itre xaa wiik, pëkö tirisite matre tha ijije kö troa sane la itre telefone hun. E cili, tha hne huni kö hna huliwane la itre mobilis. Ketre, hnenge hna inine troa athieë matre troa kuci xen. Nge eahuni a xomi buruet me sine laam, matre troa tha tim e jidr ke, tha tru kö hnei atr.” Nemene la ka xatuane la lue trefën? Öni Gisèle: “Uati hmitrötr la ka xatua nyio, nge hnei nyio fe hna ithuecatrekeu. Ketre, hnene la itre sinee me fami nyio hna hamë ithuecatre me lii manie koi nyio.”

Hapeu, madrine kö Gisèle troa bëek kowe la sipu nöje i angeic? Öni Gisèle: “Eje hi! Ame lo xötrei, hnei nyio hna cile kowe la itre jol matre nyio a nango kucakuca. Ngo madrine catre nyio ke, hnei nyio hna atreine cile kowe itre ej. Nyio ha catre mejiune koi Iehova me easenyi catr koi Nyidrë.” Hnei Léonce me Gisèle hna sine la Ini Koi Itre Ka Cainöj, nge lue pionie huti hë nyidro enehila.

Eje hi, itre ka nyi ie a cile kowe la nöjei pengöne jol matre troa ea la itre ie. Ketre tune fe, itre trejin a nue la mele i angatr ekö me itre xaa ewekë, matre troa bëek kowe la sipu nöje i angatr, me xatuane la itre ka ajane la maca ne la Baselaia. Nyipici, tha tro jë kö Iehova a thëthëhmine la itre hnei angatr hna kuca me ihnimi angatr kowe la ëje i Nyidrë. (Neh. 5:19; Heb. 6:10) Maine epuni a mel ngöne la ketre nöj, nge kola aja ixatua ngöne la sipu nöje i epun, hapeu, tro kö epuni a bëek matre troa cainöj? Maine eje hi, nyimutre la itre manathith hnei epuni hna troa kapa!—Ite edomë 10:22.