EDIWAK nditọete emi ẹkekpọn̄de idụt mmọ emi okụk mînen̄ekede idu ẹka ndin̄wana okụk ke idụt en̄wen ẹma ẹfiak ẹnyọn̄ idụt mmọ. Sia mmọ ẹnen̄erede ẹma Jehovah ye mme owo, mmọ ẹma ẹka ẹkedu ke mme itie emi ẹnen̄erede ẹyom mme ọkwọrọikọ. (Matt. 22:37-39) Nso ke mmọ ẹkesana ẹyak man ẹkeme ndiwọrọ n̄ka do? Didie ke Jehovah onyụn̄ ọdiọn̄ mmọ? Yak ikop ito mbon emi ẹkefiakde ẹnyọn̄ Cameroon ke Africa.

Ke 1998, brọda kiet emi ekerede Onésime ama ọkpọn̄ Cameroon aka okodu ke idụt en̄wen ofụri isua 14. Usen kiet, owo emi ọkọnọde utịn̄ikọ ke mbono esop ama ọnọ uwụtn̄kpọ aban̄a ukwọrọikọ. Brọda oro ọkọdọhọ ete: “Ufan iba ẹkpeda ke nsio nsio itie ẹkọ iyak, ndien kiet okụt ke kiet omụm iyak akan imọ, ndi enye emi mîmụmke iyak awak do ikpesịkke ikada ke ebiet emi iyak awakde do itiene ikọ?”

Uwụtn̄kpọ oro ama anam Brọda Onésime etie ekere ndifiak nnyọn̄ Cameroon emi mme owo ẹmade-ma ukwọrọikọ n̄ketiene nditọete do n̄kwọrọ ikọ nnyụn̄ n̄kpep mme owo Bible. Edi enye ama ekere m̀mê emi imọ ima ikodụn̄ ke idụt owo utọ uwak isua emi, m̀mê imọ iyosụk ikan uwem Cameroon do aba. Ntre enye ama ebem kan̄a iso edidu ke ọfiọn̄ itiokiet ese nte n̄kpọ editiede. Ke 2012, enye ama editan̄ n̄kpọ ọnyọn̄ Cameroon ndien.

Onésime ọdọhọ ete: “Uwem ọsọn̄ ke Cameroon akan n̄kan̄ emi n̄kodude, eyo onyụn̄ ofiop, ntre akana mfafiak nyak mme n̄kpọ ntre ẹmehe mi. Akana mfiak ntọn̄ọ n̄kpep nditie ke n̄kpọitie emi fom mîsịneke ke Ufọkmbono Obio Ubọn̄.” Enye ama atuak inua imam ọdọhọ ete: “Edi nte n̄kenen̄erede n̄kpan̄ utọn̄ ke se ẹkpepde, ntre ke n̄kefre mme Ufọkmbono Obio Ubọn̄ eken emi fom esịnede ke n̄kpọitie mmọ.”

Ke 2013, Onésime ama ọdọ Géraldine. Géraldine okoto France ọnyọn̄ edi ke enye ama okodu do ke isua usụkkiet. Ndinam n̄kpọ Jehovah ekedi ata akpan n̄kpọ ke uwem mmọ mbiba. Didie ke Jehovah ọkọdiọn̄ mmọ? Onésime ọdọhọ ete: “Ima isan̄a ntre ika Ufọkn̄wed Mme Ọkwọrọ Obio Ubọn̄, ndien idahaemi ididu ke Bethel. Ndondo emi, owo 20 ke otu mbon emi isikpepde Bible ke esop nnyịn ẹma ẹna baptism ke isua kiet kpọt. Mmenịm ke ndu ke itie emi ‘iyak’ awakde.” (Mark 1:17, 18) Géraldine an̄wan esie ọdọhọ ke Jehovah ọdiọn̄ imọ akan nte imọ ikpekekerede.

Judith ama ọwọrọ okodụn̄ ke United States, edi ama esidọn̄ enye ndisịn idem n̄kwọrọ ikọ n̄kan nte enye ọkwọrọde. Enye ọdọhọ ke kpukpru ini emi imọ ikade ikese ubon imọ ke Cameroon ke ikesitatua idinyọn̄, sia ima isinyọn̄ ikpọn̄ ediwak owo emi imọ ikọtọn̄ọde ndikpep Bible. Kpa ye oro, ama ọsọn̄ enye ndifiak nnyọn̄ Cameroon. Enye ama enyene ata eti utom ke  United States emi akan̄wamde enye ese aban̄a udọn̄ọ ete esie ke Cameroon. Kpa ye oro, enye ama ọbuọt idem ye Jehovah onyụn̄ afiak ọnyọn̄ Cameroon. Enye ọdọhọ ke enyene nte n̄kpọ ekesitiede ndusụk ini, imọ idọhọ ubaha ekpedide isụk idu ke United States. Enye ama ọbọn̄ akam ọnọ Jehovah ete an̄wam imọ yak uwem n̄kan̄ emi emehe imọ. Esenyịn circuit kiet ye n̄wan esie ẹma ẹnyụn̄ ẹnen̄ede ẹn̄wam enye.

Judith ọdọhọ ke nsonso oro imọ inyọn̄de idi, ke ima in̄wam owo inan̄ ẹna baptism ke ufan̄ isua ita. Ẹma ẹdimek enye akpan asiakusụn̄ ke enye ama ọkọdọ ebe. Mfịn enye esitiene Sam-Castel ebe esie emi edide esenyịn circuit asan̄a ese mme esop. Nso ikeditịbe inọ ete esie oro? Judith ye ubon esie ẹma ẹdikụt ufọkibọk ke idụt en̄wen emi ẹkenyịmede ndisiak ete esie idem ke mfọn. Ẹma ẹnyụn̄ ẹsiak ete esie idem n̄kpọ inamke enye.

Brọda Victor ama ọkpọn̄ Cameroon okodu ke Canada. Ke enye ama okokot Enyọn̄-Ukpeme kiet emi etịn̄de n̄kpọ aban̄a uka university onyụn̄ etie ekere, enye ama etre university ọtọn̄ọ ndikpep ubọkutom. Enye ọdọhọ ke oro ama anam imọ isọp ikụt utom inam, inyụn̄ inyene ini inam utom usiakusụn̄ emi ekesidọn̄de imọ ndinam. Nte ini akade, enye ama edidọ Caroline, mmọ mbiba ẹnyụn̄ ẹsan̄a ntre ẹka Cameroon. Ini mmọ ẹkade ẹkese n̄kọk itieutom ke Cameroon, nditọete do ẹma ẹdọhọ m̀mê mmọ ikpamaha ndidi ndidu ke Cameroon n̄kwọrọ ikọ. Victor ọdọhọ ke mmimọ ikekwe ntak ndomokiet emi akpanamde mmimọ isịn ndinyọn̄ Cameroon ndidu, ndien ke sia uwem mmimọ mîkawakke n̄kukọhọ, ke ima inyịme. Kpa ye emi idem Caroline ekesinyenede nte etiede ndusụk ini, mmọ ẹma ẹnyịme ndinyọn̄ n̄ka Cameroon.

Victor ye Caroline ẹma ẹkedu ke Cameroon ẹnam utom usiakusụn̄ ẹnyụn̄ ẹn̄wam ediwak mbon emi ẹkemade ndikpep Bible. Ke nsonso oro, mmọ ikanamke utom, okụk oro mmọ ẹkebọkde ẹnịm ke mmọ ẹkekama ẹdia n̄kpọ. Ekem mmọ ẹma ẹfiak ẹnyọn̄ Canada ẹkenam utom ke ufan̄ ọfiọn̄ ifan̄, ẹn̄wana okụk ẹfiak ẹdinyọn̄ ẹkenam utom usiakusụn̄ ke Cameroon. Didie ke Jehovah ọkọdiọn̄ mmọ? Mmọ ẹma ẹdika Ufọkn̄wed Mme Ọkwọrọ Obio Ubọn̄, ẹdi mme akpan asiakusụn̄, ndien idahaemi mmọ ẹsisan̄a ẹbọp n̄kpọ ẹnọ esop Abasi. Victor ọdọhọ ete: “Nnyịn ndikọkpọn̄ inem uwem ke Canada nnyụn̄ mbuọt idem ye Jehovah anam ikụt ubọk esie.”

Brọda Alain akaka university ke Germany. Ke 2002, enye ama okot tract emi, Mme Uyen—Nso ke Mbufo Ẹdida Uwem Mbufo Ẹnam? Se enye okokotde oro ama anam enye afiak etie ekere se imọ ididade uwem imọ inam. Ke 2006, enye ama aka Ufọkn̄wed Unọ Mme Asan̄autom Ukpep, ndien ẹma ẹnọ enye aka Cameroon obio emana esie.

Alain ama okokụt utom emi enye okosion̄ode-sion̄o usen anam ke Cameroon. Nte ini akakade, enye ama ekenyene utom emi ẹkekpede enye ọfọn akan akpa oko ko, edi ama afịna enye sia idiyakke enye enen̄ede enyene ini ọkwọrọ ikọ. Ntre ini ẹkedọhọde enye edidi akpan asiakusụn̄, enye ama ọsọsọp enyịme. Eteutom esie ama ọdọhọ ke imọn̄ isịn okụk inọ enye, edi enye ama esịn. Nte ini akade, enye ama ọdọ Stéphanie emi ama okodu ke France ke ediwak isua. Nso mfịna ke Stéphanie ekenyene ke Cameroon?

Stéphanie ọdọhọ ete: “Mma ntọn̄ọ ndidọn̄ọ n̄kpri n̄kpri udọn̄ọ, ama onyụn̄ enyene nsio nsio n̄kpọ emi ẹkesisuade mi. Edi mma nsikụt n̄kpri usọbọ nda, enye onyụn̄ afiak efere mi ke idem.” Jehovah ama ọdiọn̄ mmọ nte mmọ ẹkenyenede ime ẹyọ. Alain ọdọhọ ete: “Ini ikakade ikọkwọrọ  ikọ ke esịt esịt obio kiet ntem emi ekerede Katé, ima ikụt ediwak owo emi ẹkemade ndikpep Bible. Ekem ima isidikama fon ida ikpep mmọ Bible. Owo iba ke otu mmọ ẹma ẹna baptism, ẹma ẹnyụn̄ ẹtọn̄ọ otu ke obio oro.” Stéphanie ọdọhọ ete: “Idụhe se inamde esịt enem owo nte ndin̄wam mme owo tutu mmọ ẹyak idemmọ ẹnọ Jehovah.” Enye ọdọhọ ke mmimọ ndidu do n̄kwọrọ ikọ anam ikeme ndin̄wam ediwak owo ẹyak idem ẹnọ Jehovah, onyụn̄ anam imọ ikop idatesịt. Idahaemi Alain edidi esenyịn circuit.

Gisèle akana baptism ke Italy ini enye akade ufọkn̄wed man edidi dọkta. Ebe ye n̄wan emi ẹkekpepde enye Bible ẹkedi mme asiakusụn̄. Ama enem enye ndikụt nte mmọ mîkoyomke ikpọ n̄kpọ. Enye ama onyụn̄ ebiere ndinen̄ede nsịn idem n̄kwọrọ ikọ. Ntre enye ama ọtọn̄ọ utom usiakusụn̄ ini enye ekperede ndikụre n̄wed.

Ama ọdọn̄ Gisèle ndifiak nnyọn̄ Cameroon man ekeme ndinen̄ede nsịn idem nnam n̄kpọ Abasi. Edi ama enyene mme n̄kpọ se ikafịna enye. Enye ọdọhọ ke imọ ndifiak nnyọn̄ Cameroon ekeme ndinam owo inọhọ imọ unen aba ndifiak n̄kodụn̄ ke Italy, ke imọ idinyụn̄ ikwe mme ufan imọ ye mbon ubon imọ emi ẹdude ke Italy. Kpa ye oro, ke May 2016, enye ama afiak ọnyọn̄ Cameroon. Nte ini akade enye ama edidọ Léonce, ndien n̄kọk itieutom ke Cameroon ẹma ẹdọhọ yak mmọ ẹka ẹkedu ke Ayos ẹkwọrọ ikọ, sia nditọete iwakke do.

N̄kpọ eketie didie ke Ayos? Gisèle ọdọhọ ete: “Ima isitie ediwak urua owo inọhọ ikan̄, nnyịn inyụn̄ ikemeke ndi-charge fon nnyịn. Ata ediwak ini fon nnyịn ẹkesinyụn̄ obono ntre, inyeneke ufọn. Mma n̄kpep ndikama ifia ntem udia. Ima isinyụn̄ ikama wheelbarrow ye torch ika idịm ikokoi mmọn̄ okoneyo sia ini oro owo isiwakke.” Nso ikan̄wam mmọ ẹka iso ẹyọ? Gisèle ọdọhọ ete: “Spirit Jehovah ama an̄wam nnyịn, ndien ekesidi ami n̄n̄wam ebe mi, ebe mi an̄wam mi n̄ko. Mbon ubon nnyịn ye mme ufan nnyịn ẹma ẹsisọn̄ọ nnyịn idem, ndien ndusụk ini mmọ ẹma ẹsinọ nnyịn n̄kpọ ekpat.”

Ndi enem Gisèle nte enye akafiakde ọnyọn̄ obio emana esie? Enye ọdọhọ ete: “Enem mi tutu! Ntuaha n̄kpọfiọk ndomokiet ntem. Ke nsonso oro ikesimemke, ama esinyụn̄ oyom ndidorode nnyịn. Edi ke n̄kan̄ oro ama ekefịt ebe, ami ye ebe mi imedikụt ke ikanam nnennen se akpanade inam. Ibuọt idem ke Jehovah, imonyụn̄ inen̄ede ikpere enye.” Léonce ye Gisèle ẹma ẹka Ufọkn̄wed Mme Ọkwọrọ Obio Ubọn̄, ndien idahaemi mmọ ẹdi mme akpan asiakusụn̄ ibio ini.

Ukem nte mme ọkọiyak ẹsinyenede uko ẹnam se mmọ ẹkekeme man ẹkụt ediwak iyak ẹmụm idem ke ini enyọn̄ mîfọnke, mmọn̄ onyụn̄ etịmerede, nditọete emi ẹnyịmede ndifiak nnyọn̄ obio emana mmọ man ẹken̄wam mbon emi ẹnyenede eti esịt ẹkop etop Obio Ubọn̄ Abasi ẹsiyak ediwak n̄kpọ atak mmọ. Mmọ ẹnam kpukpru emi ke ntak emi mmọ ẹmade Jehovah. Imenen̄ede inịm ke Jehovah idikpọn̄ke mmọ. (Neh. 5:19; Heb. 6:10) Ekpedi afo odụn̄ ke idụt en̄wen, ndien edi ke ẹyoyom mme ọkwọrọikọ ke idụt mbufo, ndi eyekeme ndifiak nnyọn̄? Edieke anamde, Jehovah eyenen̄ede ọdiọn̄ fi.—N̄ke 10:22.