NƆVÍ e gosin tò yetɔn mɛ bo yì akwɛ ba gbé ɖò tò ɖevo mɛ ɖ’ayǐ lɛ é gegě lɛkɔ wá tò yetɔn mɛ dìn. Wǎn e ye yí nú Jehovah kpo nɔzo yetɔn lɛ kpo é sísɛ́ ye bɔ ye sɛ̀ tɛn yì fí e hudo wɛnjlatɔ́ Axɔ́suɖuto ɔ tɔn sukpɔ́ ɖè lɛ é. (Mat. 22:37-39) Vɔ̌ tɛ lɛ ye ka sá? Nyɔna tɛ lɛ ye ka mɔ? Mǐ ni ɖɔ xó dó tò Cameroun tɔn wu, bá mɔ nǔ jɛ mɛ.

Ðò 1998 ɔ, nɔví sunnu ɖé nɔ nyí Onésime, bo gosin tò tɔn e nyí Cameroun é mɛ. É nɔ gbějí nú xwè 14. É sè ɖò kplé Klisanwun tɔn ɖé jí gbè ɖokpo bɔ è na nǔjlɛdonǔwu ɖé dó wɛnɖagbejijlazɔ́ ɔ wu. Xóɖɔtɔ́ ɔ ɖɔ: “Enyi xɔ́ntɔn we ɖò hweví wlí wɛ ɖò fí vovo, bɔ mɛ ɖokpo ɖò hweví wlí wɛ hú wegɔ́ tɔn ɔ, mɛ e ma ɖò hweví nabi ɖé mɔ wlí wɛ ǎ é na yì fí e wegɔ́ tɔn ɖò hweví gegě wlí ɖè wɛ é à cé?”

Nǔjlɛdonǔwu enɛ zɔ́n bɔ Onésime lin tamɛ bo mɔ ɖɔ emi ɖó na lɛkɔ yì Cameroun, fí e mɛ gegě jló na kplɔ́n Biblu ɖè é, bo d’alɔ wɛnjlatɔ́ e ɖò finɛ lɛ é. Amɔ̌, ado ɖò huhu i wɛ. Ðó é ko nɔ gbějí nú xwè gegě wu ɔ, é ka na sixu lɛ́ huzu sɔgbe xá ninɔmɛ tò tɔn tɔn à? Bonu Onésime na kpɔ́n ɖɔ emi sixu à jí ɔ, é yì Cameroun bo nɔ finɛ nú sun ayizɛ́n. Enɛ gudo ɖò 2012 ɔ, é sɛ̀ tɛn, bo yì cí dɔ̌n bǐ.

Onésime ko nǔ ɖò nu kpá, bo ɖɔ: “Un ɖó na kplɔ́n bɔ yǒzómɛninɔ na má mì, bo na lɛ́ huzu sɔgbe xá lee è nɔ zán gbɛ̀ gbɔn ɖò finɛ é. Ðò Kpléxɔ Axɔ́suɖuto ɔ tɔn mɛ ɔ, un ɖó na kplɔ́n bo na nɔ jinjɔn zinkpo e mɛ è ma nɔ vo ɖè mɔ̌ ǎ lɛ é jí. Amɔ̌, bǎ e mɛ un sɔ́ ayi ɖó tuto ɔ jí yì ɖó é ɔ, bǎ enɛ mɛ wɛ un nɔ wɔn ya nú zinkpo e ɖò Kpléxɔ Axɔ́suɖuto ɔ tɔn ɖevo lɛ mɛ, bɔ è nɔ vo ɖò ye mɛ lɛ é yì ɖó.”

Ðò 2013 ɔ, Onésime wlí alɔ xá Géraldine e nɔ France nú xwè tɛnnɛ bo lɛkɔ wá Cameroun é. Ðó asú kpo asì kpo ɔ sɔ́ ayi yetɔn lɛ ɖó nǔ e nyí nǔjɔnǔ hugǎn lɛ é jí wutu ɔ, nyɔna tɛ lɛ ye ka mɔ? Onésime ɖɔ: “Mǐ yì Wemaxɔmɛ nú Wɛnɖagbejlatɔ́ Axɔ́suɖuto ɔ Tɔn Lɛ ɖó kpɔ́, bo wà sinsɛnzɔ́ ɖò Betɛli. Ðò xwè ɖokpo kpowun vlamɛ ɔ, Biblu kplɔntɔ́ e ɖò agun mǐtɔn mɛ lɛ é 20 bló baptɛm. Un mɔ dìn ɖɔ un ɖò fí ɖagbe ɔ bá wlí ‘hweví.’” (Mak. 1:17, 18) Géraldine ɖɔ: “Un mɔ nyɔna gegě hú lee un ɖó nukún tɔn gbɔn é.”

Judith sɛ̀ tɛn yì États-Unis, amɔ̌ é jló na vlɔ́nkan nú sinsɛnzɔ́ tɔn. É ɖɔ: “Hweɖebǔnu e un yì ba xwédo ce kpɔ́n ɖò Cameroun bo xwè xwé é ɔ, un nɔ y’avǐ ɖó mɛ gegě tíìn bɔ un jɛ Biblu kplɔ́n xá ye jí, bo ka ɖó na jó ye dó.” É ɖò mɔ̌ có, Judith xò nǔ kpɔ́n dó tɛnsisɛ yì Cameroun wu. É ɖó azɔ̌ e kpé kwɛ é ɖé, bɔ enɛ zɔ́n bɔ é nɔ kpé nukún dó  tɔ́ tɔn e ɖò Cameroun é sín lanmɛ wu. Amɔ̌, Judith ɖeji dó Jehovah wu bo sɛ̀ tɛn. É ɖɔ ɖɔ emi jɛ dò vivomɛninɔ gbɛ̀ e emi nɔ zán ɖò États-Unis é tɔn. É xoɖɛ sɛ́dó Jehovah dó byɔ alɔdó, bá huzu sɔgbe xá ninɔmɛ ɔ, bɔ nukúnkpénuwutɔ́ lɛdo tɔn ɖé kpo asì tɔn kpo lɛ́ dó wusyɛn lanmɛ n’i.

Judith kpɔ́n gudo sɛ́dó bo ɖɔ: “Ðò xwè atɔn vlamɛ ɔ, un d’alɔ mɛ ɛnɛ bɔ ye bló baptɛm.” Judith huzu gbexosin-alijitɔ́ titewungbe. Égbé ɔ, é nɔ xwedó asú tɔn Sam-Castel ɖò lɛdo sín azɔ̌ ɔ mɛ. Amɔ̌, nɛ̌ nǔ lɛ ka wá yì gbɔn nú Judith sín tɔ́? É kpo xwédo tɔn kpo kpéwú bo mɔ dotóoxwé e ɖò gbesisɔmɛ, bo na s’axɔ́ bɔ è na w’azɔ̌ nú tɔ́ tɔn é ɖé dó tò ɖevo mɛ. Awǎjijɛ sín nǔ wɛ nyí ɖɔ mɛzizɛ ɔ yì ganji.

Nɔví sunnu ɖé nɔ nyí Victor, bo sɛ̀ tɛn yì Canada. Ee é xà xóta e ɖò Atɔxwɛ mɛ bo ɖɔ xó dó wema kplɔnkplɔn ɖaxó ɖaxó wu é ɖé ɔ, é lin tamɛ dó wemaxɔmɛ e yì wɛ é ɖè é jí. É jó wema e kplɔ́n wɛ é ɖè ɖò kplɔnyiji-alavɔ é dó, bo jɛ alɔnuzɔ́ ɖé kplɔ́n jí. É ɖɔ: “É zɔ́n bɔ un yawǔ mɔ azɔ̌ ɖé, bo mɔ tɛn dó wà nǔ e un jló na wà sín tɛgbɛ é, é wɛ nyí gbexosin-alijitɔ́zɔ́.” Nukɔnmɛ ɔ, Victor wlí alɔ xá Caroline, bɔ ye ɖisa yì Cameroun. Ee ye yì ba alaxɔ e ɖò tò ɔ mɛ é kpɔ́n é ɔ, nɔví ɖé lɛ dó wusyɛn lanmɛ nú ye ɖɔ ye ni lin tamɛ dó sinsɛnzɔ́wiwa ɖò Cameroun jí. Victor ɖɔ: “Mǐ ɖó hwɛjijɔ ɖě bo na gbɛ́ ǎ, ɖó mǐ ko hɛn gbɛzán mǐtɔn bɔkun wu ɔ, mǐ sixu yí gbè.” Caroline sín lanmɛ ɖò ganji ǎ có, ye wá gbeta ɔ kɔn bá sɛ̀ tɛn.

Victor kpo Caroline kpo huzu gbexosin-alijitɔ́ hwebǐnu tɔn, bo na dó d’alɔ mɛ ɖěɖee ba na kplɔ́n Biblu lɛ é. Ye sɛ̀ akwɛ xwè, bɔ é hɛn ye nú táan ɖé. Enɛ gudo ɔ, ye w’azɔ̌ ɖò Canada nú sun yɔywɛ ɖé, b’ɛ nɛ zɔ́n bɔ ye lɛkɔ yì Cameroun bo gbɛkan dó gbexosin-alijitɔ́zɔ́ yetɔn nu. Nyɔna tɛ lɛ ye ka mɔ? Ye yì Wemaxɔmɛ nú Wɛnɖagbejlatɔ́ Axɔ́suɖuto ɔ Tɔn Lɛ, nyí gbexosin-alijitɔ́ titewungbe, bɔ dìn ɔ, ye nɔ ɖ’alɔ ɖò xɔ yɛhwexɔ́suɖuto ɔ tɔn lɛ gbigbá mɛ. Victor ɖɔ: “Vivomɛninɔ gbɛ̀ e mǐ jó dó é zɔ́n bɔ mǐ mɔ alɔdó Jehovah tɔn.”

Ðò 2002 ɔ, Alain e nyí kplɔnyiji-alavɔví ɖé ɖò Allemagne é xà tlati Jeunes gens, qu’allez-vous faire de votre vie? ɔ. Nǔ e é mɔ xà ɖ’emɛ lɛ é sísɛ́ ɛ bɔ é sɔ́ nǔɖe lɛ ɖó nukɔn nú éɖée bá nya gbě yetɔn. Ðò 2006 ɔ, é yì Wemaxɔmɛ Devízɔ́ Kplɔnkplɔn tɔn, bɔ è sɛ́ ɛ dó Cameroun e nyí jɔtɛn tɔn é.

Alain mɔ azɔ̌ hwenu klewun ɖé tɔn ɖò Cameroun. Nukɔnmɛ ɔ, é mɔ azɔ̌ e kpé kwɛ é ɖé, amɔ̌, é ɖò dida kpɔ́n wɛ ɖɔ é ma na ɖè kan kpò nú sinsɛnzɔ́ emitɔn vlafo nɛ. Enɛ wu ɔ, hwenu e è byɔ ɛ ɖɔ é ni wá huzu gbexosin-alijitɔ́ titewungbe é ɔ, é yí gbè ma xò nǔ kpɔ́n. Gǎn tɔn ɖɔ emi na sú i akwɛ gegě có, é tɛ́dó gbeta tɔn wu. Alain wá wlí alɔ xá Stéphanie e nɔ France nú xwè gegě é. Wuvɛ̌ tɛ lɛ Stéphanie ka mɔ hwenu e é lɛkɔ yì Cameroun é?

É ɖɔ: “Un jɛ azɔn wínníwínní ɖé lɛ jɛ jí, bɔ nǔɖe lɛ nɔ yí mì ǎ, amɔ̌, un bló tuto bɔ è nɔ kpé nukún wǔ ce hwɛhwɛ, bɔ un mɔ agbɔ̌n.” Asú kpo asì kpo ɔ mɔ nyɔna gegě ɖó didɛ yetɔn wu. Alain ɖɔ: “Hwenu e mǐ yì Mawuxó ɖɔ gbé ɖò gletoxo e jɛ gblolo, bo nɔ nyí Katé é mɛ ɔ, mǐ mɔ mɛ gegě bɔ ye jló na kplɔ́n Biblu. Mǐ wá kpéwú, bo kplɔ́n Biblu xá ye gbɔn alokan jí. Ye mɛ we bló baptɛm, bɔ è  ɖó kánɖó ɖé ayǐ ɖò finɛ.” Stéphanie ɖɔ: “Nǔɖe sɔ́ nɔ víví nú mɛ sɔ è ni d’alɔ mɛ lɛ bonu ye ni jɛxa bo zé gbɛzán yetɔn jó nú Jehovah ǎ. Azɔn gegě wɛ mǐ mɔ awǎjijɛ mɔ̌hun ɖò fí.” Égbé ɔ, Alain kpo Stéphanie kpo ɖò lɛdo sín azɔ̌ wà wɛ.

Gisèle bló baptɛm hwenu e é ɖò wemaxɔmɛ e nɔ kplɔ́n dotóozɔ́wiwa mɛ é yì wɛ ɖò Italie é. Lee asú kpo asì kpo e kplɔ́n ɛ Biblu é hɛn gbɛzán yetɔn bɔkun gbɔn é jiwǔ n’i, bɔ é jló na wà nǔ sukpɔ́ ɖò sinsɛnzɔ́ ɔ mɛ. Enɛ wu ɔ, Gisèle bɛ́ gbexosin-alijitɔ́ hwebǐnu tɔn hwenu e é fó wemaxɔmɛ é.

Gisèle jló na lɛkɔ wá Cameroon bo na w’azɔ̌ gegě ɖò sinsɛnzɔ́ Jehovah tɔn mɛ, amɔ̌, ado ɖò huhu i wɛ. É ɖɔ: “Un ɖó na jó acɛ e un ɖó bo na nɔ Italie é dó, bo lɛ́ jó xɔ́ntɔn ce lɛ kpo xwédo ce kpo e ɖò Italie é dó.” É ɖò mɔ̌ có, ɖò mai 2016 ɔ, Gisèle lɛkɔ yì Cameroun. Táan klewun ɖé gudo ɔ, é wlí alɔ xá Léonce, bɔ alaxɔ Cameroun tɔn byɔ ye ɖɔ ye ni sɛ̀ tɛn yì Ayos e nyí toxo e mɛ è ɖó hudo wɛnjlatɔ́ Axɔ́suɖuto ɔ tɔn tɔn ɖè hugǎn é.

Nɛ̌ nǔ lɛ ka yì gbɔn ɖò Ayos? Gisèle ɖɔ: “Hwɛhwɛ ɔ, kuláan nɔ ɖè ǎ nú aklunɔzán gbla gegě, bɔ mǐ sixu nɔ cajée alokan mǐtɔn lɛ ǎ. Alokan lɛ nɔ nɔ cící jí nú táan gegě. Un kplɔ́n lee è nɔ sɔ́ nakí dó ɖa nǔ na gbɔn é, bɔ ɖò zǎnmɛ ɔ, mǐ nɔ hɛn agbanbɛ́nú ee nɔ nyí brouette é bo nɔ tá tɔ́ci dó yì dun sin, hwenu e ayǐ mɛ ma fá sɔmɔ̌ ǎ é.” Nɛ̌ asú kpo asì kpo ɔ ka kpéwú gbɔn? Gisèle ɖɔ: “Gbigbɔ mímɛ́ Jehovah tɔn d’alɔ mǐ bɔ mǐ dɛ. Gɔ́ na ɔ, asú ce kpo nyɛ kpo d’alɔ mǐɖée. Xwédo mǐtɔn lɛ kpo xɔ́ntɔn mǐtɔn lɛ kpo lɛ́ dó wusyɛn lanmɛ nú mǐ, bɔ ɖò hweɖelɛnu ɔ, ye nɔ d’alɔ mǐ ɖò akwɛzinzan linu.”

Kɔ e Gisèle lɛ́ yì jɔtɛn tɔn é ka dó awǎjijɛ n’i à? É ɖɔ: “Titewungbe tɔn! Wuvɛ̌ e mǐ nɔ mɔ ɖ’ayǐ lɛ é kpo linlin awakanmɛ kú mɛ tɔn e mǐ nɔ ɖó ɖ’ayǐ lɛ é kpo ɔ, mǐ wá ɖu ɖò ye jí, bɔ asú ce kpo nyi kpo mɔ ɖɔ nǔ e mǐ ɖó na wà é pɛ́ɛ wɛ mǐ wà. Mǐ ganjɛ Jehovah wu, bo mɔ ɖɔ mǐ sɛkpɔ́ ɛ tawun.” Léonce kpo Gisèle kpo yì Wemaxɔmɛ nú Wɛnɖagbejlatɔ́ Axɔ́suɖuto ɔ Tɔn Lɛ, bɔ dìn ɔ, ye nyí gbexosin-alijitɔ́ titewungbe hwenu klewun ɖé tɔn lɛ.

Hwehutɔ́ ɖěɖee wuvɛ̌ lɛ na bo ɖò finɛ ɔ, ye nɔ ɖè akɔ́nkpinkpan xlɛ́ bo na dó wlí hweví gegě é ɖɔhun ɔ, mɛ ɖěɖee lɛkɔ yì jɔtɛn yetɔn lɛ é nɔ sɔ́ jló dó savɔ̌ gegě dó d’alɔ mɛ ayijlɔjlɔnɔ e nɔ yí wɛn Axɔ́suɖuto ɔ tɔn lɛ é. É ɖò wɛn ɖɔ, Jehovah kún na wɔn azɔ̌ syɛnsyɛn e wà wɛ nɔví enɛ lɛ ɖè ɖó wǎn e ye yí n’i é wu ó. (Nɛɛ. 5:19; Ebl. 6:10) Nú a ɖò gbějí bo sè ɖɔ è ɖó hudo wɛnjlatɔ́ Axɔ́suɖuto ɔ tɔn ɖò jɔtɛn towe ɔ, a ka sixu lɛkɔ yì xwé à? Enyi a wà mɔ̌ ɔ, Jehovah na kɔn nyɔna dó jǐ we.—Nǔx. 10:22.