HETA ermáno ha ermána ova vaʼekue hetãgui ótro paíspe ombaʼapo ha oganave hag̃ua pláta, péro koʼág̃a ova jey hikuái hetãme. Ohayhu rupi Jehovápe ha hapichakuérape, ova hikuái umi lugár ifaltavehápe opredika vaʼerã (Mat. 22:37-39). ¿Mbaʼe sakrifísiopa ojapo raʼe hikuái? ¿Ha mbaʼe vendisiónpa ohupyty upe haguére? Jaikuaa hag̃ua upéva jahechami mbaʼépa oiko Camerúnpe, oĩva Áfricape.

Áño 1998-pe peteĩ ermáno hérava Onésime ova hetã Camerúngui, ha 14 áñore oho oiko ótro paíspe. Peteĩ díape rreunión aja, haʼe ohendu peteĩ ehémplo oñeʼẽva predikasiónre. Pe diskursánte heʼi: “Ñamoĩ chupe mokõi oñoamígova opeskaha hína diferénte lugárpe, ha peteĩva oity hetave pira pe ótrogui, ¿ajépa pe saʼive oitýva ováta pe lugár pe iñamígo oityhápe hetave pira?”.

Pe ehémplo omopensa Onésimepe ova jey hag̃ua Camerúnpe, oĩháme heta hénte ostudiaséva la Biblia, ha oipytyvõ hag̃ua umi ermáno oĩvape upépe. Péro oipyʼapy kuri chupe heta mbaʼe. ¿Ojepokuaa jeýnepa oiko Camerúnpe, oiko rire heta áñore ótro paíspe? Oikuaa hag̃ua upéva, Onésime oho oiko Camerúnpe 6 mésere. Upéi 2012-pe haʼe ovaitéma voi upépe.

Onésime omombeʼu: “Ajepokuaa vaʼerã kuri aiko jey kuarahy akúre ha aiko umi hénte oikoháicha. Salónpe ajepokuaa jey vaʼerã aguapy umi vánko atã ári”. Péro haʼe opukavy ha heʼi: “Amáske añatende umi mbaʼe ojeʼévare rreunionhápe, saʼivéntema chemanduʼa umi sílla iporãitéva oĩ vaʼekuére umi ótro Salónpe”.

Áño 2013-pe Onésime omenda Géraldine rehe, oho jey vaʼekue Camerúnpe oiko rire 9 áño Fránciape. ¿Mbaʼéichapa Jehová ovendesi chupekuéra ojapo haguére ivolunta ha omotenonde haguére upéva hekovépe? Onésime heʼi: “Roho kuri oñondive pe Eskuéla de Evanhelisadórpe ha roservi hína Betélpe. Pe áño ohasa vaʼekuépe, ore kongregasiónpe ojevautisa 20 estudiánte. Che añandu koʼág̃a aĩha pe lugár iporãvehápe japeska hag̃ua” (Mar. 1:17, 18). Ha Géraldine heʼive: “Che ningo ni naimoʼãi kuri Jehová peichaite peve chevendesitaha”.

Judith ova vaʼekue Estados Unídospe péro haʼe siémpre ojapose hetave mbaʼe Jehová servísiope. Haʼe omombeʼu: “Aha jave avisita che hentekuérape Camerúnpe cherasẽ jepi, pórke aheja vaʼerã hetaiterei persóna añepyrũ vaʼekuéndi astudia la Biblia”. Péro Judith oduda ova jey hag̃ua Camerúnpe. Haʼe oreko kuri peteĩ traváho ogana porãháme, ha péicha ikatu vaʼekue opaga peteĩ tratamiénto médiko itúa oikotevẽva Camerúnpe. Upéicharõ jepe okonfia Jehováre ha ova jey hetãme. Haʼe orrekonose ohechagaʼuha umi  komodida oreko vaʼekue oikórõ guare Estados Unídospe. Upévare haʼe oñemboʼe Jehovápe oipytyvõ hag̃ua chupe ojepokuaa jey hag̃ua, ha Ñandejára ojevale umi ermánore omokyreʼỹ hag̃ua chupe, umíva apytépe peteĩ superintendéntere ha hembireko.

Judith imanduʼa: “Avyʼaiterei ikatu haguére 3 áñope aipytyvõ 4 persónape ojevautisa hag̃ua”. Judith oñepyrũ vaʼekue oservi de prekursóra espesiál, koʼág̃a haʼe omoirũ iména Sam-Castélpe haʼéva superintendénte de sirkuíto. ¿Péro mbaʼépa oiko raʼe Judith túagui? Haʼe ha ifamília otopa kuri peteĩ ospitál ótro paíspe ikatútava oopera itúape okovraʼỹre chupekuéra mbaʼeve. Ha ovyʼaiterei hikuái osẽ porãmba haguére la operasión.

Peteĩ ermáno hérava Victor ova vaʼekue Canadápe. Olee rire peteĩ artíkulo rrevísta Ñemañaháme oñeʼẽva pe edukasión ijyvatevévare, haʼe opyta opensa porã pe ijestúdiore. Haʼe oheja pe iñuniversida ha oñepyrũ ostudia peteĩ kúrso mbykyvévante oreko hag̃ua peteĩ ofísio. Haʼe heʼi: “Upéicha rupi akonsegi pyaʼeve che travahorã, ha ajapo pe ymaite guivéma ajaposetéva: Ajapo che prekursorádo”. Upéi Victor omenda Caroline rehe ha oho hikuái ovisita Camerún. Upépe ohórõ guare ovisita Betel, oĩ umi ermáno omokyreʼỹva chupekuéra opensa hag̃ua ikatúnepa ou oservi hikuái Camerúnpe. Victor omombeʼu: “Ndorotopái mbaʼeve orejoko vaʼerã rojapo hag̃ua upéva. Ha rojepokuaa rupi roiko sensillomínte, ikatu kuri roasepta pe invitasión”. Caroline hasykatuʼíramo jepe, lomímonte odesidi hikuái ova Camerúnpe.

Victor ha Caroline oñepyrũ oservi de prekursór rregulár pórke oĩ kuri hetaiterei hénte oikuaasevéva la Biblia omboʼéva. Haʼekuéra oñongatuʼimi kuri pláta, upévare natekotevẽi ombaʼapo oñepyrũrõ guare oservi upépe. Péro upéi oho jey hikuái Canadápe ombaʼapo unos kuánto mésere. Upéva oipytyvõ chupekuéra oho jey hag̃ua Camerúnpe ha osegi oservi de prekursór. ¿Mbaʼe vendisiónpa ohupyty raʼe hikuái? Haʼekuéra oho Eskuéla de Evanhelisadórpe, oservi de prekursór espesiál ha koʼág̃a oiko chuguikuéra siérvo de konstruksión. Victor heʼi: “Rohejapa rupi umi komodida roreko vaʼekue ikatu roñandu mbaʼéichapa Jehová oñangareko orerehe”.

Áño 2002-pe, Alain peteĩ estudiánte universitário oĩva Alemániape, olee pe tratádo Joven, ¿qué harás con tu vida?, ha upe informasión omomýi chupe okambia hag̃ua umi mbaʼe ohupytyse vaʼekue hekovépe. Áño 2006-pe haʼe oho pe Eskuéla de Entrenamiénto Ministeriálpe ha oñeasigna chupe Camerúnpe, pe país haʼe onase haguépe.

Camerúnpe haʼe otopa peteĩ traváho ombaʼapo hag̃ua médio tiémponte. Upéi oñepyrũ ombaʼapo peteĩ lugár ojepaga porãvehápe chupe, péro haʼe ojepyʼapy kuri naitiempovéirõ g̃uarã opredika ha oporomboʼe hag̃ua anteve guaréicha. Upévare oñeinvitárõ guare chupe oservi hag̃ua de prekursór espesiál, haʼe ndodudái oasepta hag̃ua. Ipatrón heʼi Aláinpe opaga porãvetaha chupe, péro haʼe orrechasa upéva ha oiko chugui prekursór espesiál. Upéi Alain omenda Stéphanie rehe, oiko vaʼekue heta áñore Fránciape. ¿Mbaʼe situasión ijetuʼúvapa ombohovái vaʼekue Stéphanie ovárõ guare Camerúnpe?

Stéphanie heʼi: “Chéve ningo chejagarra vaʼekue heta mbaʼasyʼi ha alérhia. Ha asegi rupi  umi tratamiénto ikatu kuri ajalivia”. Jehová ovendesi ko matrimóniope oaguanta haguére hikuái. Alain omombeʼu: “Ore rohórõ guare ropredika peteĩ lugár opytávape mombyry hérava Katé, rotopa hetaiterei hénte ostudiaséva la Biblia. Upéi rostudia hendivekuéra por teléfono, ijapyteguikuéra mokõi estudiánte ojevautisa ha oñeforma upépe peteĩ grúpo”. Stéphanie heʼive: “Javyʼaiterei ningo ñaipytyvõ jave umi héntepe oñemeʼẽ hag̃ua Jehovápe. Ndaipóri voi ótra kósa ñanembovyʼavéva upévagui. Ha roservi rupi koʼápe heta vésema roñandu peichagua vyʼa”. Koʼág̃a Stéphanie omoirũ iména Aláinpe haʼéva superintendénte de sirkuíto.

Gisèle ojevautisa vaʼekue oho aja eskuéla de medisínape Itáliape. Chupe ningo omboʼe vaʼekue la Biblia peteĩ matrimónio oservíva de prekursór, ha Gisèle ohecharamoiterei mbaʼéichapa haʼekuéra oiko sensillomínte. Iñehemplokuéra omokyreʼỹ chupe ojaposeve hag̃ua predikasiónpe. Upévare oñepyrũ oservi de prekursóra rregulár otermina rire ijestúdio universidápe.

Gisèle ohose jey vaʼekue Camerúnpe ombaʼapove hag̃ua Jehová servísiope, péro oĩ umi mbaʼe oipyʼapýva chupe. Haʼe heʼi: “Che arekopáma kuri che dokumentokuéra aiko hag̃ua Itáliape, ha koʼág̃a aheja vaʼerã upéva. Avei ajesepara vaʼerã kuri che família ha che amigokuéra oikóvagui Itáliape”. Upéicharõ jepe, Gisèle ova jey Camerúnpe mayo de 2016-pe. Tiémpo rire haʼe omenda Léonce rehe. Ha Betel oĩva Camerúnpe omokyreʼỹ chupekuéra ova hag̃ua Ayóspe, peteĩ siuda oñekotevẽhápe hetave puvlikadór.

¿Mbaʼéichapa oiko vaʼekue hikuái Ayóspe? Gisèle omombeʼu: “Sapyʼánte heta semánare ndoroguerekói lus ha ndaikatúi rokarga ore selulár, upévare pyʼỹinte ndaikatúi roipuru. Aaprende akosina hag̃ua jepeʼápe, ha rogueroja vaʼerã y peteĩ ykuágui, péro upépe siémpre oĩ hetaiterei hénte. Upévare rohómante vaʼerã pyharekue ha roipuru karretílla ha lintérna”. ¿Mbaʼépa oipytyvõ raʼe ko matrimóniope oaguanta hag̃ua? Gisèle heʼi: “Jehová espíritu orepytyvõ ani hag̃ua roñentrega. Avei mokõivéva rojoapoja, ha umi ore hénte ha ore amigokuéra oremokyreʼỹ ha sapyʼánte omeʼẽ avei oréve hikuái pláta”.

¿Ovyʼápa Gisèle oho jey haguére hetãme? Haʼe heʼi: “¡Si, ni michĩmi voi nambyasýi! Ñepyrũrã ijetuʼu kuri oréve ha roñedesanima, péro rojerovia Jehováre ha roñandu roñemoag̃uive hague hese. Rogueropuʼaka rire umi provléma, che ha che ména roñandu rojapo hague upe rojapónte vaʼerã voi kuri”. Léonce ha Gisèle oho kuri Eskuéla de Evanhelisadórpe, ha koʼág̃a oservi hína hikuái de prekursór espesiál temporál.

Umi peskadór ningo ohasa ha oaguanta vaʼerã heta mbaʼe ijetuʼúva ikatu hag̃uáicha oity heta pira, upéicha avei umi oho jeýva hetãme kyreʼỹme ojesakrifika oipytyvõ hag̃ua umi ipyʼaporãvape ohenduséva umi notísia porã. Jehová ningo katuete imanduʼa porãta koʼã ermáno iguapoitévare, pórke ohechauka hikuái ohayhuha héra ipyʼaite guive (Neh. 5:19; Heb. 6:10). Oiméramo nde reiko hína ótro paíspe ha oñekotevẽterei opredika vaʼerãre ne retãme voi, ¿ikatúnepa reho jey upépe? Rejapóramo upéva rehupytýta hetaiterei vendisión (Prov. 10:22).