KÄ KWATI te ja mräkätre nünanbare juta jondron bökäne krubäte yekänti ye kwati ja töi mikani nikenta ja käite. Tätre Jehová aune nitre mada tarere yekwe töi mikani niken nüne nitre kukwe driekä ribeta bäri yekänti (Mat. 22:37-39). ¿Kukwe meden meden namani nuaindre ietre aune Jehovakwe kukwe meden kwin mikanina nemen bare kräketre? Kukwe ye mikakäre gare jai, ani blite juta Camerún nemenkä África occidental yebätä.

Kä 1998 yete, ja mräkä kädekata Onésime nünanka Camerún ye nikani nüne kä 14 te juta madate. Bati, niara nämäne Ju Ja Ükarakrö yete ngwane, ja mräkä iti nämäne blite kukwe drie yebätä käkwe kukwe ne bämikani: “Ni nibu ja ketamukore tädre gwakite kä jene jene te ye bämike ja töite aune iti tä gwa gain bäri ere iti ye kräke. Meden ñan tä gwa gain krubäte ye rikadre ja ketamuko kwe känti, ¿ñan ererea?”.

Kukwe bämikani ye Onésime kukwe nuani ngwane, niara rikadre gwa gain ñö okwä bäri kwin te Camerún yebätä namani töbike. Kä yekänti ja mräkätre tä ja di ribere krubäte nitre töta nemen kukwe Bibliabätä mikai gare jai ye tötikakäre. Akwa kä kwati te niarakwe nünanbare juta madate yebätä raba nemen nuäre kräke nünankäre ja käite o ño yebätä namani töbike krubäte. Aisete mikakäre gare jai nikani sö krä ti te nüne Camerún aune biti kä 2012 yete nikaninta nüne ja täte Camerún.

Onésime tä niere: “Nünandre ño kä ngirete yebätä rababa ja kitadre tie aune Ju Ja Ükarakrö yete tikwe ja töi mikabata täketa jäme täkärä ribibiti”. Biti kötare kwärä tä niere: “Akwa dre dre kukwe nua nämä tikwe yebätä ti nämä ja töi mike bäri ngwane täkärä bä drebebiti ti nämä täke käne ye ñan nämä nüketa törö tie”.

Meri kädekata Géraldine abokän nünanbare kä kwä ökän te Francia ye ja töi mikani nikenta Camerún abokän ben Onésime ja mäkäninte kä 2013 yete. ¿Sribi Ngöbökwe ye mikani nuaindre käne kwetre jai ye köböire Jehovakwe kukwe meden kwin mikani nemen bare kräketre? Onésime tä niere: “Nun janama Kwela Nitre Gobran Ngöbökwe Kukwei Driekä kräke yebätä aune nunkwe sribiba Betelte. Kä känente ni 20 ja tötikaka Bibliabätä konkrekasion nunkwe te käkwe ja ngökaba ñöte. Kä kwin gwakitakäre yete tita ruin tie” (Mar. 1:17, 18). Aune Géraldine tä niere: “Kukwe kwin keta kabre rabai tikwe ye ti ñan nämä nütüre jire jakrä”.

Judith ye nämäne nüne Camerún nikani nüne Estados Unidos arato, akwa tö namani kukwe driei bäri. Niara tä niere: “Ti nämä niken Camerún ti mräkätre tuinbiti batire batire ngwane muare kwärä ti nämä nikenta ja jiebiti ñobätä ñan aune nitre ruäre nämä kite ja tötike Bibliabätä tibe abokän ben ti ñan nämä ja tuinta mada”. Akwa yebiti ta, ñan nämäne ja töi mike nikenta ja käite. Sribi  kwin nämäne kwe ye köböire nämäne rün dimike ja kräkäi mike Camerún. Akwa tö ngwani kwe Jehovai aune ja töi mikani kwe nikenta ja käite. Niara nämäne nüne bäri kwin Estados Unidos ye nämäne nüketa törö ie nieta kwe. Akwa ja di ribebare kwe Jehovai nüna nämäne ño Camerún ye erere nüne aune ni circuito tuabitikä bätä muko kwe kukwe ütiäte niebare ie käkwe dimikani krubäte.

¿Dre namani bare? Judith tä niere: “Kä komä te tikwe nitre nibokä dimikaba ja ngökö ñöte ye käi juto tibätä. Ne madakäre, niara kädekani prekursora especial aune nengwane tä näin muko kwe Sam-Castel yebe circuito tuinbiti”. ¿Aune dre namani bare rün kwe yebätä? Rün kwe ye operadre aune hospital raba operación ye ütiä bien ye kwani Judith aune mräkä kwe ie juta madate aune operación namani bare kwin krubäte.

Ja mräkä kädekata Victor ye nikani nüne Canadá. Niara nämäne ja tötike universidad yete. Täräkwata Ni Mikaka Mokre yebätä kukwe keteiti nämäne blite ja tötikata kwela krite yebätä, yebätä niara ñäkäbare ye bitikäre ja töi mikani kwe universidad ye tuenmetre aune curso técnico yebätä ja tötike sribi bäri nuäre nuainkäre. Niara tä niere: “Kukwe rababa gare tie ye köböire, sribi kwanba bäri jötrö tie aune käre ti törbaba sribi meden ie ye rababa tikwe ye abokän sribi prekursor”. Ye bitikäre ja mäkäninte kwe Caroline ben aune nikanintre Camerún. Nämänentre Camerún ngwane nikanintre sukursal mike gare jai aune yete niaratre töi mikani sribi Ngöbökwe nuainne Camerún. Victor tä niere: “Nun nämä nüne jondron braibebiti yebätä kukwe ñaka nämä nun kisete sribi ye ka ngäbitikäre”. Bren ruäre nämäne Carolinebätä bäkänä, akwa yebiti ta ja töi mikani kwetre kukwe meden diani nuaindre kwetre jai ye nuainkäre jankunu.

Victor aune Caroline ja töi mikani sribi prekursor regular ye nuainne, nitre tö nämäne kukwe Bibliabätä mikai gare jai ye tötikakäre. Kä ruäre te ja ngübabare kwetre ngwian ükaninkrö jai kwetre yebiti, akwa biti nikanintre Canadá sribikäre sö ruäre te sribi prekursor ye nuainkäre jankunu Camerún. ¿Jehovakwe kukwe meden kwin mikani nemen bare kräketre? Niaratre janamane Kwela Nitre Gobran Ngöbökwe Kukwei Driekä kräke yebätä, sribi prekursor especial ye nuainbare kwetre aune nengwane tätre Ju Ja Ükarakrö ye sribere siba. Victor tä niere: “Nun nämä nüne kwin aune jäme ye nunkwe tuanmetreba ye köböire kä rababa nunye sribi Jehovakwe ye nuainkäre bäri”.

Ja mräkä kädekata Alain nämäne ja tötike universidate juta Alemania yete, akwa kä 2002 yete täräkwata chi kädekata Joven, ¿qué harás con tu vida? yebätä ñäkäbare kwe, yekwe töi mikani kukwe mada bäri kwin ye den nuaindre jai. Kä 2006 yete, niara janamane Kwela Känti Nitre Tötikata Sribi Ngöbökwe Jie Ngwankäre yebätä aune niara juani ja käite juta Camerún yete.

Sribi köbö ruäre te ye kwani ie yete. Ye bitikäre, sribi känti raba ngwian ganaine bäri ere ye kwani ie, akwa ye ñaka raba niara tuenmetre kukwe driere bäri yekwe mikani töbike. Ye ngwane, niara nübaibare arato sribi prekursor especial ye nuainkäre aune niarakwe bengwairebe kani ngäbiti. Jefe kwe käkwe sribi ütiä biain bäri ie ne kwe ñaka sribi tuanemetre kwe yekäre, akwa Alain ñakare niebare ie. Ye bitikäre, ja mäkäninte kwe Stéphanie abokän nünanbare kä ruäre te Francia yebe. ¿Stéphanie nikaninta nüne Camerún ngwane ja tuani kukwe ño ño ben kwe?

Stéphanie ta niere: “Bren ruäre aune alergia keta kabre rababa tibätä, akwa tratamiento meden bäri kwin ti kräke ye rababa tikwe aune ja rababa ruin bäri kwin tie”. Niaratre kä ngwani nüke jai yebätä Jehovakwe kukwe kwin mikani nemen  bare kräketre. Alain tä niere: “Kä kädekata Katé ye nemenkä mobe jateta yete nun janama kukwe driere ngwane, nitre kwati törbaba ja tötikai Bibliabätä ye kwanba nunye. Nunkwe niaratre tötikaba Bibliabätä telefonobiti. Nitre nibu ja tötikaka ye ja ngökani ñöte aune grupo keteiti ükaninte kä yekänti”. Stéphanie tä niere: “Nitre mada dimikadre Jehová mike gare jai aune ja denkä mento kräke ye tä kä mike bäri juto nunbätä. Camerún nete bä kabre kä namanina juto nunbätä kukwe yebätä”. Nengwane Alain aune Stéphanie tä circuito tuinbiti.

Gisèle nämäne ja tötike kräkäbätä juta Italia ye ngwane ja ngökani ñöte kwe. Nitre prekursor nämäne niara tötike Bibliabätä ye nämäne nüne jondron braibebiti ye nämäne niara töi mike niä aune niara tö namani kukwe driei bäri arato. Aisete ja mikani kwe prekursora regular nämäne ja tötike ye ngwane.

Gisèle tö namani näinta Camerún kukwe driekäre bäri, akwa kukwe ruäre nämäne niara mike töbike krubäte. Tä niere: “Residencia bianba tie nünankäre Italia ye riaite tikän, ye köböite ja ketamuko tikwe aune ti mräkätre nämä nüne Italia yebe tikwe ñan ja tuai mada arato”. Akwa yebiti ta, sö mayo kä 2016 yete nikaninta Camerún. Kä nikani ta ye bitikäre, ja mäkäninte kwe Léonce ben aune niaratre rikadre sribi Ngöbökwe nuainne juta Ayos ye sukursalkwe niebare ietre, yete ni kukwe driekä ribe nämäne krubäte.

¿Aune nüna nämäne ño juta yekänti? Gisèle tä niere: “Bä kabre, ñotra nämä niken bämän kabre te, ye köböite nun ñan nämä teléfono cargare jai. Aisete bäsi käre teléfono nunkwe nämä ötani. Unkwe riadre ñukwäbiti ye rababa gare tie aune dibire ta nun nämä niken ñö den carretillabiti aune focobiti nitre ñan nämä krubäte ye ngwane”. Dre käkwe niaratre dimikani kä ngwen nüke jai ye Gisèle tä mike gare. Tä niere: “Üai deme Jehovakwe köböire nunkwe kä ngwanba nüke jai, nunkwe ja dimikaba kwärikwäri, nun mräkätre bätä ja ketamuko nunkwe nämä kukwe kwin niere nunye aune niaratre nämä ruäre ngwane ngwian bien nunye”.

¿Gisèle nikaninta nüne ja käite ye käi jutobätä? Niara tä niere: “Ti raba jän niere töi kwatibebiti. Kenanbe, kukwe ruäre ñan nuäre ben nunkwe ja tuaba aune nun jataba di nekä yebe nunkwe ja tuaba. Akwa nunkwe ñaka ja töi mikaba kukwe yebätä mada ngwane, dre nuaindre nunkwe erere nunkwe nuainba ye rükaba gare tie aune ti muko ie. Nunkwe tö ngwanba Jehovai aune ja rababa ruin bäri niara ken nuen”. Léonce aune Gisèle janamane Kwela Nitre Gobran Ngöbökwe Kukwei Driekä kräke yebätä aune nengwane tätre sribi prekursor especial nuainne kä braibe te.

Nitre gwakitaka tä ja tuin kukwe keta kabre ben gwa ere kakäre, ye erere ja mräkätre tä nikenta ja käite ye tä kukwe keta kabre nuainne nitre dimikakäre kukwe kwin Gobran Ngöbökwe ye ka ngäbitikäre. Erametre, ja mräkätre ne tä Jehová kä ye tarere krubäte bämikanina kwetre ye ñaka kä rikwitaikä Jehovabiti aune niarakwe kukwe kwin mikai nemen bare kräketre (Neh. 5:19; Heb. 6:10). Mätä nüne juta madate aune mä käite ni kukwe driekä ribeta krubäte ngwane, ¿mä raba nikenta ja käite sribi Ngöbökwe nuainkäre? Mäkwe nuaindi ngwane, erametre Jehovakwe kukwe kwin mikai nemen bare mä kräke rabadre gare mäi (Prov. 10:22).