BENE-BERHU na bali-berhu balihamire omu bindi bihugo eju y’okulonza efuranga, bali bagaluka omu bihugo byabo by’akaburhano. Obuzigire bakaba bagwerhe eju ya Yehova n’ababo bantu, buli bwabashunika bahamire omu maeneo makenere abahubiri b’Obwami. (Mt. 22:37-39) Bichi balichiyimire omu kujira ntyo, na migisho mihe Yehova alibahere? Yi rhumenya nka gurhe, rhushambalage ku chihugo chiguma ch’omu Afrike chiyirikirwe Cameroun.

Mwene-werhu Onésime arhengaga omu chihugo chage ch’akaburhano che Cameroun omu mwaka gwa 1998. Amala myaka 14 ey’arhali mw’echola chihugo. Lusiku luguma abere ali oku mbuganano, ayunva mufano muguma gulolere akasi k’okuhubiri. Omwigiriza aderha ntya: “Nka bera babiri barhali barhegera haguma, aliko muguma anayirha fi zinene kulusha owabo, k’oyola wahinire, arhakaja emunda owabo ayirhiraga zinene si?”

Ogola mufano gwarhuma Onésime awaza gurhe akagaluka omu Cameroun bulala bantu banene eyola munda basimire kuyiga Ebiblia, y’arhabala abahubiri ba mw’echola chihugo. Aliko aligwerhe ngangane zinene. Akachigalire kukomera akalamo k’omu chihugo chage ch’akaburhano n’obola alimalire myaka minene ey’arhali mo si? Y’agala kujira ntyo, arhanga kulamabagirira omu Cameroun mu myezi ndarhu. Omu mwaka gwa 2012, ahamira yo loshi.

Onésime aderhere ntya: “Byalibihemere nkomere ehali y’echuka chinene n’okuntu abantu balamire. Byalimpemere nshube nkomere kuyikala oku bichumbi by’empaho omu Chumbi ly’Obwami. Ashubire kuderha ntya ey’anamwemweseze: okunaliri naseza obwenge oku nyigirizo zili zagera, kunanaliri nayibagira ebichumbi binja naliri nayikalako omu mandi Machumbi m’Obwami.”

Omu mwaka gwa 2013, Onésime ashaba Géraldine, wagalukaga omu Cameroun ey’agwerhe myaka mwenda omu France. Bulala balihebere akasi k’okuhubiri oku nafasi y’oburhanzi omu kalamo kabo, nka gurhe Yehova alibagishire? Onésime aderhere ntya: “Nyono na mukani, rhwaja oku Masomo m’Abayeneza Eyinjili y’Obwami, n’okukolera oku Beteli. Hanola hofi-hofi, enyuma wa mwaka muguma ntya, banafunzi berhu be Biblia 20 b’omu chibaga cherhu babatizwa. Nkola nchiyunvirhe nka ndi ahantu hakwanene omu ‘kurhega.’” (Mk. 1:17, 18) Géraldine ayongerere ntya: “Napatire migisho minene kulusha nk’okunaliwazize.”

Judith ahamiraga omu États-Unis aliko aligwerhe enyorha y’okukola binene omu kasi ka Yehova. Aderhere ntya: “Buli mango nakazaga lambagirira abantu b’omulala gwani omu Cameroun, eyi bakansezere, nakazaga kulaka bulala nalisimire kubera haguma n’abantu basimire kuyiga Ebiblia.” Aliko Judith aligwerhe engangane z’okuhamira  omu Cameroun. Aligwerhe akasi ka mushahara gunene kaliri kamurhabala abukise eshe waliri omu Cameroun. Aliko Judith Alangalira Yehova, anava ahamira omu Cameroun. Aderhere oku hali binene ayibukire aliri apata omu États-Unis. Asalira Yehova amurhabale akomere, na mwimangizi muguma na mukage bamuheba omurhima.

Judith ayibukire gurhe ebintu byaliri omu Cameroun amango agaluka mo, ashambere ntya: “Mu myaka esharhu namamala mu chinola chihugo, namaburha bana bane b’ekiroho.” Judith aba painiya ominuzize. Zene, bakala bali bagenda n’eba Sam-Castel omu kasi k’okulambagirira ebibaga. Aliko si, gurhe byaliyinjire kubera eshe wa Judith? Judith n’omulala gwage bapata ebindi bitaro omu chindi chihugo byayemeraga kumubera n’okumulipira ebitaro. Echisimisize, kulikubona oku bamubera bwinja.

Mwene-werhu muguma oyirikirwe Victor ahamiraga Ekanada. Amango asoma mwazi muguma omu Munara g’Omulanzi guderhere eju y’amasomo m’enyanya, arhondera kuwaza eju y’amasomo mage. Ava aleka kusoma eyiniversite n’okurhondera kuyiga akasi k’efune kakamurhabala. Aderhere ntya: “Ebila byantabala okupata akasi juba-juba, nanakola ebi nalonzaga kujira kurhenga mira; k’okuderha kuba painiya.” Buzinda, Victor ashaba Caroline, banaja kulambagirira omu Cameroun bombi. Eyola munda, amango bajaga kulambagirira ebiro by’omurhabi, babahira omurhima n’okuhwanza kuwaza gurhe bakakolera omu Cameroun. Victor aderhere ntya: “Rhurhapataga chiro empanvu y’okulahira, bulala rhwabaga rhwayoroheze akalamo kerhu, rhwayemera eyola mpamagalo.” Chiro akaba oku hali obulwala Caroline alilwere, chirhabuzaga barhahigirira okuhama.

Victor na Caroline baba bapainiya b’okukahunda yi barhabala bantu banene basimire kuyiga Ebiblia. Babaga babikire furanga zinene z’okubarhabala n’echola charhuma barhakenera okupata akasi juba-juba. Zahwere, bashuba kugaluka Ekanada kukola mu myezi migeke, n’echola chashuba kubarhabala bagaluke omu Cameroun yi bagenderera n’obupainiya bwabo. Migisho mihe bapatire? Baja oku Masomo m’Abayeneza Eyinjili y’Obwami, baba bapainiya baminuzize, na zene bakala bali omu kasi k’okuyumbaka. Victor aderhere ntya: “Bulala rhwalekere akalamo kerhu kakwirire, rhwalangalira Yehova, naye arhulagako.”

Omu mwaka gwa 2002, Alain waliri wasoma eyiniversite omu Alemanye, asoma etragite Vijana—Mtatumiaje Maisha Yenu? Eby’asomaga byamurhabala arhole omuhigo guhyahya. Omu mwaka gwa 2006, asoma Amasomo m’Akasi k’Obwami [EFM] banamubwira aje kukolera omu Cameroun, chihugo chage ch’akaburhano.

Alain apata akasi k’okukola sa zigeke omu Cameroun. Apata akasi kenja, na buzinda amango bamubwira oku ahwanze kukola nka painiya ominuzize, omukulu wage w’akasi amubwira oku amuyongerera efuranga. Bulala akola kasi kalimurholere bisanzi binene, byalimukomerere okuchiseza oku kasi kage k’obupainiya. Che charhumaga ayemera buzira ngangane kuba painiya ominuzize n’okulahira ezola furanga omukulu wage w’akasi amubwiraga oku amuyongerera. Ahola lero, nta chintu chakachimuhugisize kukolera Yehova. Alain ayinja kushaba Stéphanie, naye walilamire myaka minene omu France. Bibazo bihe Stephanie alihurene nabyo enyuma y’okuhamira omu Cameroun?

Stéphanie aderhere ntya: “Nayinja kupata echibazo ch’amagala, n’omubiri gwani gwaliri gwalahira ebilyo na bindi bintu bilebe, aliko nagendera kunywa obufumu nanaluha nafuma.” Oyola mulume  na mukage balipatire emigisho eju y’okulembera kwabo. Alain ashambere ntya: “Amango rhuja kuhubiri omu lugo [village] lwa hale luyirikirwe Katé, rhwabona bantu banene balisimire kuyiga Ebiblia. Rhwanagenderera kuyiga nabo kugerera etelefone. Babiri mw’abola banafunzi babatizwa, rhwanarhonderesa echigusho ch’abahubiri.” Stéphanie ayongerere ntya: “Ntacho chilerhere omwishingo gunene bwenene nk’okurhabala abantu bahike amango bahana akalamo kabo emwa Yehova. Mango manene rhwachibwenere ogola mwishingo omu kukolera hanola.” Zene, Alain na Stéphanie bali bakola akasi k’okulambagirira ebibaga.

Gisèle abatizwaga amango aliri asoma amasomo m’echinganga omu Itali. Alisimisizwe n’akalamo kayanguhire painiya na mukage bamuyigirizaga Ebiblia baligwerhe, analilonzeze kujira binene omu kasi k’okuhubiri. Bobola Gisèle amalire amasomo, aba painiya w’okukahunda.

Gisèle alisimire kugaluka omu Cameroun y’ajira binene omu kasi ka Yehova, aliko aliri agangana. Aderhere ntya: “Ebiratasi byani byalirhumire nalama omu Itali byakafire busha, nakalekere bera bani n’abantu b’omulala gwani balilamire omu Itali.” Chiro akaba ntyo, omu Mwezi gwa 5, 2016, Gisèle ahamira omu Cameroun. Buzinda, Léonce amushaba, n’ebiro by’omurhabi bye Cameroun byabarhuma baje kukolera omu vile ye Ayos, yalikenere bwenene abahubiri b’Obwami.

Gurhe si akalamo kaliri omu Ayos? Gisèle ashambere ntya: “Buli boso ekura enazigana kubulwa, rhwaliri rhwabula gurhe rhwasharje amatefone merhu. Mango manene abantu b’omola barhakazaga kola. Nayiga kuvuyira oku shali, n’okulema naja kudoma ebudufu n’okulerha amagurde omu mburuweti, bulala abantu baliri baba bagehere mw’ezola sa oku lwinji.” Bichi byarhabalaga oyola mulume na mukage balembere eyola hali? Gisèle aderhere ntya: “Eroho lichesibwa lya Yehova, lye lyaliri lyarhurhabala rhulembere, chiro na rhwembi bani rhwaliri rhwarhabalana, n’abantu b’omulala gwerhu na bera berhu baliri barhuheba omurhima, hanali okuntu baliri barhurhabala n’olufuranga.”

Gisèle analipatire omwishingo bulala aligalukire omu chihugo chage ch’akaburhano si? Ashubize ntya: “Nechi! Ntangangane. Eyola munda, hali kurhwaliri rhwapata bibazo bilebe n’okuyunva rhuvunikire omurhima, aliko eyi rhubihima, rhwembi bani rhwanabona oku kweri rhwajirire ebi rhwalikwanene kujira. Rhwalilangalire Yehova n’okuyunva rhuli eburhambi bwage.” Léonce na Gisèle basoma Amasomo m’Abayeneza Eyinjili y’Obwami, na zene bakola bali bapainiya baminuzize ba siku zigeke.

Kuguma n’abashana bagwerhe obushiru bali bachihangana bayirhe efi chiro akaba hali ebibazo, bene-berhu na bali-berhu bali bagaluka omu bihugo byabo by’akaburhano, bali tayari kuchihana yi barhabala balala basimisizwe n’oburhumwa b’Obwami. Kweri Yehova arhakayibagira akasi k’obushiru abola bahubiri bali bakola omu kuyerekana obuzigire bagwerhe eju y’ezino lyage. (Ne. 5:19; Ebr. 6:10) Akaba olamire omu chindi chihugo n’echihugo chawe ch’akaburhano chikenere abahubiri b’Obwami, orhakagalukamo si? Okajira ntyo, wapata migisho minene.​—Mez. 10:22.