MADAMO nga kauturan nga nagkadto sa iban nga pungsod para mag-obra ang nagbalik sa ila pungsod. Bangod sang ila gugma kay Jehova kag sa ila isigkatawo, nag-alagad sila sa mga lugar nga nagakinahanglan sang dugang nga manugbantala sang Ginharian. (Mat. 22:37-39) Ano nga mga sakripisyo ang ila ginhimo, kag paano sila ginpakamaayo ni Jehova? Para masabat ini, binagbinagon naton ang pila ka eksperiensia sang mga kauturan nga naghimo sini sa pungsod sang Cameroon sa Africa.

Sang 1998, ang brother nga si Onésime nga taga-Cameroon nagsaylo sa iban nga pungsod, kag nag-istar sia didto sing 14 ka tuig. Isa ka adlaw, sa miting sang kongregasyon, may gingamit nga ilustrasyon ang speaker parte sa pagbantala. Ang speaker nagsiling: “Ibutang ta nga nagpangisda ang duha ka mag-abyanay pero lainlain ang ila ginpuestuhan. Kon mas madamo nga isda ang nahulik sang isa sa iya puesto, indi bala nga magasaylo didto ang iya abyan nga diutay lang ang nahulik?”

Nagpalig-on ini kay Onésime nga hunahunaon nga magbalik sa Cameroon para buligan ang mga manugbantala kay madamo gid sang interesado didto. Pero nabalaka sia kay basi mamag-uhan sia sa iya natawhan nga pungsod kay dugay na sia nagaistar sa iban nga pungsod. Gani nagdesisyon si Onésime nga magbakasyon didto sing anom ka bulan. Dayon sang 2012, nagdesisyon sia nga sa Cameroon na sia maistar.

Si Onésime nagsiling: “Kinahanglan ko mag-adjust sa mainit nga klima kag sa mga sitwasyon nga bag-o sa akon. Sa Kingdom Hall, kinahanglan ko nga maanad liwat nga magpungko sa matig-a nga pulungkuan.” Dayon, nagyuhum sia kag nagsiling, “Pero sang gintinguhaan ko nga magpokus sa mga bahin sa miting, wala ko na ginapangita ang komportable nga pulungkuan.”

Sang 2013, napangasawa ni Onésime si Géraldine. Nakaistar sa France si Géraldine sing siam ka tuig, pero nagbalik na sia sa Cameroon. Paano sila ginpakamaayo ni Jehova bangod gin-una nila sa ila kabuhi ang paghimo sang iya kabubut-on? Si Onésime nagsiling: “Nakaeskwela kami nga mag-asawa sa School for Kingdom Evangelizers kag nag-alagad kami sa Bethel. Sang nagligad nga tuig, 20 ka Bible study sa amon kongregasyon ang nabawtismuhan. Para sa akon, maayo gid ini nga lugar para ‘magpangisda.’” (Mar. 1:17, 18) Si Géraldine nagsiling, “Madamo gid nga pagpakamaayo ang nabaton ko, kag ang iban sini wala ko gid ginpaabot.”

Nagsaylo si Judith sa United States, pero gusto gid niya nga dugangan ang iya ginahimo nga pag-alagad kay Jehova. Nagsiling sia: “Nagabakasyon ako sa Cameroon para magbisita sa akon pamilya. Pero kada magbalik ako sa United States, nagahibi ako kay kinahanglan ko bayaan ang akon mga Bible study.” Nagaduhaduha si Judith nga  magbalik sa Cameroon. Daku ang iya sueldo sa iya trabaho kag sia ang nagabayad sa gasto sa pagpabulong sang iya amay sa Cameroon. Pero nagsalig sia kay Jehova kag nagbalik sia sa Cameroon. Nagsiling sia nga ginapangita niya ang iya komportable nga kabuhi sa United States, gani nangamuyo sia kay Jehova nga buligan sia nga maka-adjust. Dayon, ginpalig-on man sia sang manugtatap sang sirkito kag sang iya asawa.

Si Judith nagsiling, “Sa sulod sang tatlo ka tuig, nalipay gid ako nga mabuligan ang apat ka interesado nga magpabawtismo.” Nag-alagad si Judith bilang espesyal payunir. Kag subong, ginaupdan niya ang iya bana nga si Sam-Castel sa pag-alagad sa sirkito. Pero kamusta na ang amay ni Judith? Nakakita si Judith kag ang iya pamilya sang ospital sa iban nga pungsod nga handa nga mag-opera sa iya amay nga wala sing bayad. Nalipay gid sila nga maayo ang resulta sang operasyon.

Ang isa ka brother nga si Victor nagsaylo sa Canada. Pagkatapos niya mabasa ang isa ka artikulo sa Ang Lalantawan parte sa pag-eskwela sa unibersidad, ginpamensaran niya ini. Nag-untat sia sa pag-eskwela sa unibersidad kag nagkuha sia sang kurso nga mas madasig sia nga makagradweyt. Nagsiling sia: “Bangod sini, nakakita ako dayon sang obra. Dayon, nagpayunir ako nga madugay ko na nga gusto himuon.” Sang ulihi, napangasawa ni Victor si Caroline kag nagbakasyon sila sa Cameroon. Sang nagkadto sila sa branch office, ginpalig-on sila sang pila ka kauturan nga hunahunaon ang pag-alagad sa Cameroon. Si Victor nagsiling: “Wala kami sang nakita nga rason nga indi namon ini mahimo. Kag bangod simple ang amon kabuhi, puede gid kami makaalagad didto.” Bisan pa may masakit si Caroline, nagdesisyon sila nga magsaylo sa Cameroon.

Nagregular payunir si Victor kag si Caroline kay madamo gid sing interesado sa ila teritoryo. Sa umpisa, gingamit nila ang ila sinuptan para indi nila kinahanglan nga mag-obra. Sang ulihi, nagbalik sila sa Canada para mag-obra didto sa sulod sang pila ka bulan. Pagkatapos sini, nagbalik sila liwat sa Cameroon kag nagpadayon sa pagpayunir. Ano nga mga pagpakamaayo ang nabaton nila? Nakaeskwela sila sa School for Kingdom Evangelizers, nakaalagad sila bilang mga espesyal payunir, kag mga construction servant sila subong. Si Victor nagsiling: “Ginbayaan namon ang amon komportable nga kabuhi, gani kinahanglan namon nga magsalig kay Jehova. Wala gid niya kami ginpabay-an.”

Sang 2002, ginbasa sang isa ka brother nga si Alain ang tract nga Mga Pamatan-on—Ano ang Himuon Ninyo sa Inyo Kabuhi? Nagaeskwela sia sadto sa isa ka unibersidad sa Germany. Ang iya nabasa nagpalig-on sa iya nga bag-uhon ang iya mga gusto nga himuon sa iya kabuhi. Sang 2006, nag-eskwela sia sa Ministerial Training School kag gin-asayn sia sa Cameroon nga amo ang iya natawhan nga pungsod.

Sang ara na sia sa Cameroon, nag-obra sia sing part-time. Sang ulihi, nakakita sia sang obra nga mas daku ang sueldo. Pero nabalaka sia nga basi mabuhinan sini ang iya tion para sa pagbantala kag pagtudlo sa iban. Gani sang ginpangabay sia nga mag-alagad bilang espesyal payunir, ginbaton niya ini dayon. Nagsiling ang iya boss nga dugangan niya ang iya sueldo. Pero wala gid nagbag-o ang desisyon ni Alain. Sang ulihi, napangasawa ni Alain si Stéphanie nga madugay na nga nagaistar sa France. Ano nga mga kabudlayan ang naeksperiensiahan ni Stéphanie sa Cameroon?

Si Stéphanie nagsiling: “Gin-allergy ako kag nagmasakit. Pero nagpabulong ako gani nag-ayo man ako.” Ginpakamaayo gid sila nga mag-asawa bangod sang ila pagbatas. Si Alain nagsiling: “Sang  nagbantala kami sa malayo nga baryo nga ginatawag Katé, may mga naistorya kami nga gusto magtuon sang Biblia. Sang ulihi, nag-Bible study kami sa ila paagi sa telepono. Duha sa ila ang nabawtismuhan, kag sang ulihi may grupo na sang mga manugbantala didto.” Si Stéphanie nagsiling: “Indi gid matupungan ang kalipay nga mabatyagan mo kon mabuligan mo ang iban nga magdedikar kay Jehova. Paagi sa pag-alagad diri, madamo na nga beses nga nabatyagan namon ini nga kalipay.” Subong, nagaalagad sa sirkito si Alain kag si Stéphanie.

Nabawtismuhan si Gisèle sang nagaeskwela sia sa isa ka medical school sa Italy. Nagdayaw gid sia sa simple nga kabuhi sang payunir nga mag-asawa nga nagtudlo sang Biblia sa iya, kag gusto niya nga dugangan ang iya ginahimo nga pag-alagad kay Jehova. Gani nagregular payunir si Gisèle samtang ginatapos niya ang iya pag-eskwela.

Gusto ni Gisèle nga magbalik sa Cameroon para madamo sia sing mahimo sa iya pag-alagad kay Jehova. Pero nabalaka sia. Nagsiling sia, “Indi na ako mangin isa ka legal nga residente sang Italy kag mapalayo na ako sa akon mga abyan kag pamilya nga nagaistar sa Italy.” Bisan pa amo ini ang matabo, nagbalik si Gisèle sa Cameroon sang Mayo 2016. Sang ulihi, napamana niya si Léonce. Ginrekomendar sang branch office sa Cameroon nga magsaylo sila sa banwa sang Ayos nga nagakinahanglan sang dugang nga manugbantala sang Ginharian.

Kamusta ang kabuhi nila sa Ayos? Si Gisèle nagsiling: “Sa masami, sinemana nga wala sing kuryente. Indi namon ma-charge ang amon mga cell phone, gani talagsa lang namon ini magamit. Natun-an ko nga magluto nga kahoy ang ginagamit nga gatong. Gab-i kami nagakadto sa tuburan kay diutay lang ang nagapanag-ub. Gani nagadala kami sang flashlight kag ginakarga namon sa wheelbarrow ang amon ginasag-ub.” Ano ang nakabulig sa ila nga magbatas? Si Gisèle nagsiling: “Ginbuligan kami sang balaan nga espiritu ni Jehova kag nagabuligay man kami nga mag-asawa. Ginapalig-on man kami sang amon mga pamilya kag mga abyan, kag kon kaisa ginapadalhan nila kami sing kuarta.”

Nalipay bala si Gisèle kay nagbalik sia sa iya natawhan nga pungsod? “Huo, nalipay gid ako,” siling niya. “Nabudlayan man kami sa umpisa kag may mga tion nga naluyahan kami. Pero nasarangan namon ini. Gani masiling gid namon sang akon bana nga ginhimo namon ang dapat namon himuon. Nagsalig kami kay Jehova gani nagsuod kami sa iya.” Nag-eskwela si Léonce kag si Gisèle sa School for Kingdom Evangelizers, kag subong nagaalagad sila bilang temporaryo nga mga espesyal payunir.

Bisan pa maglain ang tiempo, padayon nga nagapangisda ang isa ka mangingisda bangod gusto niya nga madamo ang iya makuha nga isda. Handa man nga magsakripisyo ang mga kauturan nga nagbalik sa ila natawhan nga pungsod kay gusto nila buligan ang mga interesado sa mensahe sang Ginharian. Nahamuot gid si Jehova sa sining mapisan nga mga manugbantala kag indi gid niya pagkalimtan ang gugma nga ginpakita nila para sa iya ngalan. (Neh. 5:19; Heb. 6:10) Kon nagaistar ka sa iban nga pungsod, gusto mo bala magbalik sa imo natawhan nga pungsod nga nagakinahanglan sang dugang nga manugbantala sang Ginharian? Kon himuon mo ini, pakamaayuhon ka gid.—Hulu. 10:22.