MUAJ coob tus kwvtij nkauj muam uas yav tas los mus khwv nyiaj txiag nyob rau lwm lub tebchaws, nimno rov qab los rau lawv qub teb qub chaw. Lawv tsiv mus nyob rau tej qhov chaw uas tsis muaj cov tshaj tawm coob vim lawv hlub Yehauvas thiab hlub tibneeg. (Mathais 22:37-39) Lawv tso dabtsi tseg thiab Yehauvas foom koob hmoov li cas rau lawv? Cia peb tham txog cov kwvtij nkauj muam hauv tebchaws Kamaloos (Cameroon) uas nyob Afika sab hnub poob.

Xyoo 1998, tus kwvtij Ua-xi (Onésime) tsiv tawm tebchaws Kamaloos. Nws mus nyob lwm tebchaws tau 14 lub xyoos. Muaj ib hnub tom kev sib txoos nws hnov ib zaj lus piv txwv tias: “Muaj 2 tug phoojywg mus nuv ntses, nkawd nyias mus nuv nyias ib qho chaw. Ib tug nuv tau ntses ntau heev tiamsis ib tug nuv tsis tau li, koj xav tus nuv tsis tau ntses puas yuav txav mus rau qhov chaw uas nuv tau ntses ntau dua?”

Zaj lus piv txwv ntawd ua rau Ua-xi xav rov qab mus tebchaws Kamaloos uas muaj neeg coob xav kawm Vajlugkub. Tiamsis nws txhawj tias nws puas yuav rov mus nyob taus hauv Kamaloos dua. Nws thiaj sim mus nyob li 6 lub hlis. Xyoo 2012, nws mam li tsiv mus nyob Kamaloos.

Ua-xi hais tias: “Yeej nyuaj rau kuv kawg rau qhov tebchaws Kamaloos sov heev thiab kuv yuav tau hloov kev noj kev nyob. Thaum mus tom Tsev Nceeg Vaj los tsis yoojyim rau kuv zaum cov rooj tawv tawv.” Nws hais luag ntxhi tias, “Thaum kuv ua zoo mloog cov lus qhuab qhia xwb ces kuv tsis nco qab cov rooj zooj zooj lawm.”

Tus muam Zeledees (Géraldine) mus nyob Fab Kis teb tau 9 lub xyoos, nws mam rov qab los Kamaloos. Xyoo 2013, Ua-xi thiab Zeledees nkawd sib yuav. Nkawd tau txais koob hmoov li cas los ntawm Yehauvas vim nkawd muab Yehauvas tes haujlwm tso ua ntej hauv nkawd lub neej? Ua-xi hais tias: “Wb mus Kev Kawm Rau Cov Qhia Lub Nceeg Vaj thiab ua haujlwm hauv Npe-ee. Xyoo tas los, muaj 20 tus kawm Vajlugkub hauv peb lub koom txoos ua kevcai raus dej. Zaum no kuv paub tias kuv nyob rau qhov chaw uas muaj neeg nyiam kawm Vajlugkub heev lawm.” (Malakaus 1:17, 18) Zeledees hais tias: “Kuv tau txais koob hmoov ntau heev los ntawm Yehauvas.”

Ntsudiv (Judith) tsiv mus nyob U.S.A. tiamsis nws xav ua Yehauvas tes haujlwm kom ntau dua qub. Nws hais tias: “Txhua zaus kuv mus xyuas kuv tsev neeg hauv Kamaloos mas kuv yeej quaj thaum kuv yuav rov los tsev rau qhov kuv yuav tau tso cov uas kuv nyuam qhuav pib kawm Vajlugkub nrog tseg.” Txawm li ntawd los Ntsudiv tseem ua xyem xyav tias  xyov nws puas yuav rov mus nyob Kamaloos vim nws muaj haujlwm zoo pab them nws txiv tej nqi kho mob. Tiamsis nws tso siab rau Yehauvas thiab rov mus nyob Kamaloos. Nws hais tias nws yeej tsis xav tso lub neej tau zoo hauv U.S.A. tseg li. Nws thiaj thov Yehauvas pab nws. Nws kuj tau txais kev txhawb zog los ntawm tus kwvtij saib xyuas thaj tsam thiab nws tus pojniam.

Ntsudiv xav txog thaum nws nyuam qhuav rov mus nyob Kamaloos. Nws hais tias: “Li 3 lub xyoos xwb, kuv pab tau 4 tug los ua kevcai raus dej.” Ntsudiv pib ua ib tug tho kev tshwj xeeb. Nimno nws nrog nws tus txiv Xeekhaxatau (Sam-Castel) uas yog ib tug saib xyuas thaj tsam mus xyuas cov koom txoos. Tiamsis ho ua li cas rau Ntsudiv txiv lawm? Ntsudiv thiab nws tsev neeg nrhiav tau ib lub tsev kho mob nyob lwm tebchaws uas pab them nws txiv tej nqi kho mob. Zoo siab uas lawv kho tau nws txiv tus mob lawm.

Kwvtij Vivtawm (Victor) uas tsiv mus nyob Kanada hais tias thaum nws nyeem ib Phau Tsom Faj txog kev kawm ntawv qib siab tag, nws tso tseg tsis kawm ntawv qib siab lawm thiab mus kawm ua haujlwm lawm xwb. Nws hais tias: “Kuv ua li no, kuv thiaj nrhiav tau haujlwm sai thiab ua tau ib tug tho kev li kuv twb xav ua ntev los lawm.” Tom qab ntawd, Vivtawm thiab Kalaulais (Caroline) nkawd sib yuav. Thaum nkawd mus xyuas Kamaloos thiab ceg Npe-ee, ib co kwvtij nrog nkawd tham seb nkawd puas mus pab tau lawv hauv Kamaloos. Vivtawm hais tias: “Wb yeej ua tau rau qhov wb tsis muaj dabtsi khuam tes khuam taw.” Txawm tias Kalaulais muaj ib tug mob los nkawd txiav txim siab tsiv rov mus rau Kamaloos.

Vivtawm thiab Kalaulais nkawd ua 2 tug tho kev thiab qhia Vajtswv Txojlus rau cov nkawd ntsib uas xav kawm Vajlugkub. Nkawd tseg tau mentsis nyiaj kav nkawd ib nyuag ntu. Nkawd rov mus ua haujlwm hauv Kanada li ob peb lub hlis kom tau nyiaj ntxiv mam li rov mus tho kev rau hauv Kamaloos. Nkawd tau txais koob hmoov li cas? Nkawd tau mus Kev Kawm Rau Cov Qhia Lub Nceeg Vaj, tau ua 2 tug tho kev tshwj xeeb, thiab nimno nkawd ua haujlwm pab cov ua vaj ua tsev rau lub koom haum. Vivtawm hais tias: “Vim wb tso lub neej tau zoo tseg thiab tso siab plhuav rau Yehauvas, Yehauvas yeej saib xyuas kom wb tsis tu ncua ib yam dabtsi.”

Xyoo 2002, Alees (Alain) uas yog ib tug tub kawm ntawv qib siab nyob tebchaws Ntsaws Mes Nis nyeem daim ntawv tseb Cov Hluas, Nej Yuav Ua Lub Neej Zoo Li Cas? (Youths​—What Will You Do With Your Life?) Daim ntawv no ua rau nws xav ua Yehauvas tes haujlwm ntau ntxiv. Xyoo 2006, nws tau mus ib txojkev kawm rau cov kwvtij uas leg haujlwm (Ministerial Training School) thiab nws raug xa mus rau Kamaloos uas yog lub tebchaws nws yug.

Thaum Alees mus txog Kamaloos nws nrhiav tau ib txoj haujlwm me me ua. Tom qab ntawd, nws nrhiav tau ib txoj haujlwm them nyiaj ntau dua tiamsis nws ho ntshai tsam nws ua tsis tau Yehauvas tes haujlwm li qub lawm. Thaum lub koom haum caw nws mus ua ib tug tho kev tshwj xeeb nws lees hlo ua. Nws tus los pav yuav them nyiaj ntau dua qub rau nws tiamsis nws tsis kam. Tom qab no Alees yuav ib tug muam hu ua Xatefanis (Stéphanie) uas nyob Fab Kis teb tau ntau xyoo lawm. Puas nyuaj rau Xatefanis tsiv rov mus rau Kamaloos?

Xatefanis hais tias: “Muaj ntau yam tsis haum kuv thiab kuv pib muaj mob mentsis kuv  yuav tau noj tshuaj pab kuv tas mus li.” Yehauvas muab nqi zog rau nkawd rau qhov nkawd ua siab ntev ua nkawd tes haujlwm. Alees hais tias: “Thaum wb mus tshaj tawm hauv lub zos Kates uas nyob deb heev, wb mus ntsib ib co uas xav kawm Vajlugkub. Thaum wb rov los, wb hu xov tooj kawm Vajlugkub nrog lawv. Thaum muaj 2 tug txivneej uas wb kawm Vajlugkub nrog ua kevcai raus dej ces lawv muaj 5 tug mus tshaj tawm lawm.” Xatefanis hais ntxiv tias: “Hauv Kamaloos wb pab tau coob tus los teev tiam Yehauvas. Tsis muaj ib qho uas ua rau wb zoo siab tshaj qhov uas wb pab tau tibneeg li no.” Nimno Alees thiab Xatefanis ua tes haujlwm saib xyuas thaj tsam.

Ntsixees (Gisèle) ua kevcai raus dej thaum nws tseem kawm kho mob hauv tebchaws Ithali. Thaum nws pom ob niam txiv uas qhia Vajlugkub rau nws coj lub neej yoojyim ua rau nws xav mus tshaj tawm kom ntau. Ntsixees thiaj pib ua ib tug tho kev thaum nws kawm yuav tas.

Ntsixees xav tsiv rov mus nyob Kamaloos, nws thiaj ua tau Yehauvas tes haujlwm ntau ntxiv, tiamsis nws txhawj txog ntau yam. Nws hais tias: “Yog kuv rov qab mus Kamaloos ces kuv yuav tsis muaj cai rov tuaj nyob tebchaws Ithali lawm thiab kuv yuav tau tso kuv tsev neeg thiab cov phoojywg tseg.” Txawm li ntawd los lub 5 Hlis xyoo 2016, Ntsixees tsiv rov mus nyob Kamaloos lawm. Ib ntus tom qab ntawd, nws yuav ib tug kwvtij hu ua Lis-oos (Léonce). Ceg Npe-ee hauv Kamaloos xav kom nkawd mus rau lub nroog Ayos uas tsis muaj cov tshaj tawm coob.

Zoo li cas xwb thaum nkawd mus nyob hauv Ayos? Ntsixees hais tias: “Tej thaum tsis muaj hluav taws xob li ob peb lub limtiam thiab sam tsis tau roj rau wb 2 lub xov tooj ntawm tes. Ntau zaus wb 2 lub xov tooj twb tsis ua haujlwm li. Kuv xyaum rauv taws ua zaub mov noj. Thaum hmo ntuj uas tsis muaj neeg coob lawd, kuv taws teeb thawb laub mus thauj dej tom kwj deg.” Ua li cas nkawd thiaj ua tau li ntawd? Ntsixees hais tias: “Muaj Yehauvas lub hwj huam dawb huv pab wb. Wb ib leeg txhawb ib leeg thiab wb tsev neeg thiab cov phoojywg kuj txhawb wb thiab xa nyiaj tuaj pab.”

Ntsixees puas zoo siab thaum nws tsiv rov mus nyob nws qub teb qub chaw? Nws hais tias: “Kuv zoo siab heev!” Nws hais ntxiv tias: “Thaum xub thawj yeej nyuaj thiab qaug zog kawg tiamsis tsuas yog ib nyuag ntu xwb. Wb ua li wb ua tau thiab tso siab rau Yehauvas. Nimno wb hajyam muaj kev sib raug zoo nrog nws.” Lis-oos thiab Ntsixees nkawd tau mus Kev Kawm Rau Cov Qhia Lub Nceeg Vaj thiab nimno nkawd yog 2 tug tho kev tshwj xeeb.

Zoo ib yam li cov neeg nuv ntses, tsuav yog tau ntses xwb ces txawm nyuaj heev los lawv yeej tsis ntshai mus. Cov uas rov mus lawv qub teb qub chaw zoo siab hlo tso ntau yam tseg mus pab cov uas xav paub txoj xov zoo txog Vajtswv lub Nceeg Vaj. Yehauvas yuav nco ntsoov lawv txiaj ntsig. (Nehemis 5:19; Henplais 6:10) Yog koj mus nyob txawv tebchaws lawm tiamsis koj lub qub teb qub chaw ho cheem tsum cov tshaj tawm, koj puas yuav rov mus pab tau lawv? Yog koj mus tau, Yehauvas yeej yuav foom koob hmoov ntau heev rau koj.​—Pajlug 10:22.