ARU nga wawwaragi tam i dati nga nagabroad tapenu magaleg tu kuartu ngem nanoli ngana ira sangawe ta dati nga lugar nga nikeyanakadda. Aya kani Jehova anna ta kasittoleda i namaguyu nira nga magali nu sitaw egga i pakawagan para ta mas aru nga mallayyagayya. (Mat. 22:37-39) Anni ira i nisakrifisioda? Anni ira nga bendision i nalawada? Usattam nga angngarigan i nasion na Cameroon ta western Africa tapenu matabbag danatun.

Nanaw si brother Onésime ta Cameroon turi 1998. Katorse dagun yayya ta abroad. Naginnana ta study i tadday nga ilustrasion meyannung ta trabahu nga pallayyagayya. Kinagi na mappalappa, “Nu egga i makkofun nga nagimmanango ta madduma nga lugar tapus mas aru i magafu na kofunna, ari kari nga magali yari tadday ta dianna tapenu aru gapa i magafuna?”

Megafu tatun nga ilustrasion, nanono ni Onésime nga manoli ta Cameroon nu sitaw aru i maya nga maggigiammu tu Biblia. Kayàna nga uffunan i wawwaragi tari. Ngem mavurung yayya megafu ta nabayag ngana yayya ta abroad. Awayyana nga nanonona nu mawayyana kari paga tamma sangaw i makibagay ta Cameroon? Tapenu mammuanna yatun, nappasiar labbi yayya tatun tu annam nga vulan. Tapus ta 2012, naddesision yayya nga permanente nga maddian ngana tatun.

Niyistoria ni Onésime: “Kawagakku i mapenam ta mapatu nga tiempo anna ta maziga nga klase na pattolay. Matagga mana uli i pagitubangngammi ta Kingdom Hall.” Ngem agga-ngizzi nga kinagina, “Nu nakafokus ngà ta study, sisinu nga makattamakku i dati nga malapo nga pagitubangngan.”

Ta 2013, inatawa ni Onésime si Géraldine. Naddian gapa yayya ta France tu siam nga dagun nigena nga nanoli ta Cameroon. Anni ira nga bendision i nalawada megafu ta nipoppolluda i passerbi kani Jehova? Kunnaw i kinagi ni Onésime: “Naggigiammu kami ta School for Kingdom Evangelizers tapus nasserbi kami ta Bethel. Ta nappasa nga dagun, 20 nga Bible study ta kongregasiommi i nabawtisowan. Ammù tu egga ngà ta fustu nga lugar tapenu ‘magimmanango.’” (Mar. 1:17, 18) Kinagi gapa ni Géraldine: “Mas aru i bendision nga nalawa ku anne ta nanono ku.”

Nagali si Judith ta United States ngem ikayana nga palawan i ministeriona. Istorianna: “Kada bisitakku i familià ta Cameroon, tumangi ngà ta panolì ta Amerika megafu ta panawakku danuri pinegafuanakku  nga i-Bible study.” Ngem magalangan si Judith nga manoli ta Cameroon megafu ta dakal i suelduna ta Amerika. Kawaganna yari tapenu pagan i papporu na yamana ta diadda. Ngem nammakatalo si Judith kani Jehova anna nanoli yayya ta Cameroon. Inaminna tu kanappanna i komfortable tu pattolena ta Amerika. Ngem nakimallo yayya kani Jehova tapenu maka-adjust yayya anna pinagaram gapa yayya na manangngal ta sirkito anna na atawana.

Turi ta egga ngana si Judith ta Cameroon, kinagina: “Ta tallu laman nga ragun, magayayya ngà megafu ta appa i noffunakku nga mabawtisowan.” Nasserbi gapa si Judith bilang espesial payunir. Sangawe, vulunanna ngana i atawana nga si Sam-Castel ta sirkito nga trabahu. Anni gapa i nesimmu ta yama ni Judith? Nakaleg ira na familiana tu tadday nga hospital ta tanakuan nga nasion nga maya nga mappaga ta magastu ta operasion na yamana. Pia ngana laman ta makasta i resulta na operasion.

Nagali ta Canada si brother Victor tapenu maggigiammu nakuan ta unibersidad. Ngem kabalinna nga nabibbig i artikulo ta Passifusifutan meyannung ta mas atannang nga edukasion, nanonona nga manga ngana laman yayya tu ababba nga kurso tapenu mapeggan yayya tu skill. Kinagina: “Nakapattrabahu ngà insigida gafu ta skill-ku. Tapus nakuà i planò nga mappayunir.” Ta pappasa na tiempo, inatawa ni Victor si Caroline anna nabbisita ira ta Cameroon. Turi ta egga ira ta panga nga ofisina, nepagaram nira nga pannonopan nu mawayyada i masserbi tatun. Kinagi ni Victor: “Awan mabba tu rason tapenu ari kami nga masserbi tatun. Simple mabba i pattolemi yari tu inalawa mi yatun.” Maski nu egga i problema ta gawa-gawayyan ni Caroline, nagali lagapa ira.

Nasserbi da Victor anni Caroline bilang regular payunir tapenu uffunan danuri interesadu ta Biblia. Ta ollu, makalanno i nonnugda. Ngem nattrabahu ira uli tu piga vulan ta Canada tapenu metuloy i pappayunirda ta Cameroon. Anni i nalawada nga bendision? Naggigiammu ira ta School for Kingdom Evangelizers, tapus naasayn ira bilang espesial payunir. Construction servant ngana ira sangawe. Kinagi ni Victor: “Turi ta binattammi i komfortable nga pattolemi, natageno mi i panguffun ni Jehova.”

Magiskuela si Alain ta unibersidad ta Germany. Ta 2002, nabibbigna i tract nga Youths​—What Will You Do With Your Life? Megafu tatun, inulina i planona ta pattolena. Ta 2006, nagiskuela yayya ta Ministerial Training School tapus neyasayn yayya ta Cameroon, i lugar nga nikeyanakanna.

Nakapap-part-time si Alain ta Cameroon. Tapus nakaleg yayya tu trabahu nga mas dakal i sueldu ngem mamroblema yayya gafu ta baka baddi ngana laman i tiempona nga mallayyagayya anna manuddu. Yatutta turi ta nembitan yayya nga magespesial payunir, insigidana nga inalawa yatun. Inoferan yayya na boss-na tu mas dakal nga sueldu ngem nammanaki si Alain. Ta pappasa na tiempo, inatawa ni Alain si Stéphanie nga naddian ta France tu piga nga dagun. Anni ira nga problema i inarubang ni Stéphanie turi ta nagali ira ta Cameroon?

 Kinagi ni Stéphanie: “Turi ta nagali ngà tatun, aru i problema ta gawa-gawayyakku tapus nagallergic ngà. Ngem regular ngà nga mappadoktor anna iddaddà tu uru.” Nabendisionan i magatawa ta pagattattamda. Niyistoria ni Alain: “Turi ta nallayyagayya kami ta unu-unag nga bario na Katé, aru i naleg mi tu interesadu. Ari nabbayag, ni-Bible study mi ira gukaban na cellphone. Dua tatun i nabawtisowan yayya nga nakabuu kami tu tadday nga grupo.” Kinagi paga ni Stéphanie: “Daka-dakal i pagayayya ta panguffun ta totolay nga maddedika kani Jehova. Namippiga mi yatun nga naekspiriensa ta passerbi mi tawe.” Sangawe, massesserbi ngana da Alain anni Stéphanie ta sirkito nga trabahu.

Turi ta maggigiammu si Gisèle tu kurso nga medisina ta Italy, nabawtisowan yayya. Daka-dakal i efekto nisa na simple nga pattolay na magatawa nga payunir nga nangi-Bible study nisa. Yayya nga nanonona gapa nga palawan i ministeriona. Maski nu magiskuela paga si Gisèle, nappayunir yayya.

Kakayà ni Gisèle nga mas paga nga passerbian si Jehova ta Cameroon ngem mavurung yayya. Kinagina, “Italian resident ngà ngem mawag tu igive up ku yatun tapus meyarayyu ngà ta kokkofun anna kafamilià.” Maski kunna, nanoli si Gisèle ta Cameroon turi Mayo 2016. Ari nabbayag, nakitawa yayya kani Léonce. Tapus nirekomenda na panga nga ofisina ta Cameroon nga magali ira ta ili na Ayos nu sitaw mas dakal i pakawagan.

Kunnasi i pattolay ta Ayos? Kunnaw i kagian ni Gisèle: “Mamippiga nga awan tu light-mi ta piga ligguan. Tapus kammi meyusa i cellphone-mi ta ari kami makapa-charge. Nagigiammù i mallutu ta kayu. Gabi i aggangemi nga mattagag tapenu awan kuruga tu tolay. Maf-flashlight kami tapus usammi i karatera nu umay kami mattagag.” Kunnasi nga nakapagattam i magatawa? Kunni Gisèle: “Nakapagattam kami megafu ta espiritu ni Jehova anna nakka-uffu-uffukkami. Pinagaram kami na kokkofun anna kafamiliami. Nu mittan, uffunaddakami gapa ta finansial.”

Magayayya kari si Giselle ta nanoli yayya ta diadda? Kunna: “Hoo. Kitessaya ngà!” Niyammunna paga: “Narigatakkami ta olluna anna nakkafi gapa i nono mi. Ngem turi ta narubammi danatun, ammu mi na atawà tu kingngua mi i fustu. Nattalo kami kani Jehova yari tu mas naddukko kami nisa.” Nagiskuela ta School for Kingdom Evangelizers da Léonce anna Gisèle tapus massesserbi ngana ira sangawe bilang temporary special pioneer.

Kagitta na magutu ira nga magimmanango nga iyalegda i lugarda tapenu aru i magafuda, sigga-paran gapa nga massakrifisio danuri nanoli ta nasion nga nikeyanakadda tapenu manguffun ta interesadu ira. Ari nga kattaman ni Jehova i lallappoda anna i aya nga nipasingadda para ta ngaganna. (Neh. 5:19; Heb. 6:10) Nu egga ka ta abroad tapus egga i pakawagan ta lugar nga nikeyanakammu, mawayyam kari i manoli tari? Nu kuammu yatun, siguradu nga bendisionan naka ni Jehova.​—Prov. 10:22.