AANAHỊ lụmẹ-lụmẹ ịlẹ kị rụ bwu ẹpwụma nyịlaa la ụka ọkẹkpẹ nyọka mwahị nya okpoko ẹ-ẹpwụma ọkịla nyà tịrẹkpẹ wẹ ẹpwụma nyịlaa lẹẹlẹẹ lẹ. Ọháha ọlẹ kị la ẹ-ẹga nya iJihova bala angịnyị gwaa gbịla nyọka mwụ rụ ka ẹga ká ọbaba nya angị kpa ẹrụ ọnyịịla nya Ịpyị-Adịrahụ pyẹ ji. (Mat. 22:37-39) Ányị ị tị́ chịlaa imyi kpẹpwụ? Ányị iJihova à tị́ bwu wahị kụrwaa ịnyịnyị? Nyọka ye ọwẹwẹ, ahị kụ ẹhị yẹ ẹpwụma nya Cameroon wẹẹ.

La ẹka nya 1998, ọọnahị ọlẹng ọhẹ ká ẹnyị nyamwụ ri Onésime rụ bwu ẹpwa nyamwụ ọla Cameroon. Ọ kụ ẹpwụma ọkịla lala ẹka iwo kụrụ ine myị́ lẹ. Ẹnẹhẹ ọọjịra-jịra, ọ ke ụrụ wo ẹla ọ-chụ pwokwita ọhẹ u-uhye nya ụkụrwọ nya ẹrụ ọnyịịla ọ-kpa pyẹ. Ọngọlẹ kọ da ẹla ọọwa wụlẹ tọ ịtọ ẹla wo yẹkẹẹ, “Kori ká aligu imiiye-é ja durwe enyi ẹ-ẹga ọdatị-datị, ká ọngọhẹ-ẹ́ juwa wu iyenyi gụ ọngọkịla, ọngọlẹ kọ ye wu gbuu ka á ka rụ ka ẹga nya ọngọlẹ kọ laa wu iyenyi lụmẹ-lụmẹ kaa?”

Ẹla ọ-chụ pwokwita ọwẹ dudu ká Onésime dọmwụ nyọka kụ irya nyọka tịrẹkpẹ ka Cameroon, ẹga ká angịnyị lụmẹ-lụmẹ tịtọ nyọka jẹ́ ịBayịbụụ, chajị kọ ka da aanahị ịkịla ịlụwa ụbwọ. Ẹla ọhẹ tị ri uko ọchịchị nyamwụ. Ọhịhị ọla Cameroon ka jẹ́-ẹ bọọ ahị myịmyị nyọlẹ kọ kụ ẹpwụma ọkịla lụka ọtata lẹ wẹ? Nyọka mọọ yẹ kori kọ ka họọ myị́, Onésime rụ kele kaka kụ Cameroon pwụ ọya ịrwọnyẹ ene. Ọọwa ọ nyà tịrẹkpẹ ka ụwa ọlam-ọlam la 2012 lẹlẹ.

O yẹkẹẹ: “M̀ nwụ họ chajị ká ọhịhị ọlụwa bala ẹnụ ọchịchị ọlụwa ka bam ahị. M̀ maga ịnyịnyị chajị ká ekeji ịlọngịrị-lọngịrị ịla Ube nya Ịpyị-Adịrahụ ka bam ahị la ọhụhụ myị́myị́.” O ya la ụmwẹhụ nyori, “jaabwọ kam tị wẹẹ ya irya nyam wuu nọ u-uhye nya ang ọlẹ kị wẹẹ mẹjẹ, ịnyịnyị m deeri hi ekeji ịnyịịla-ịnyịịla ịlẹ kahị kaa hụhụ e-Ebe nya Ịpyị-Adịrahụ ịkịla lẹ.”

La 2013, Onésime ye Géraldine kọ nyà tịrẹkpẹ wẹ Cameroon ịnyịnyị, nyọlẹ kọ hụ France lala ẹka ihikichu myị́. Ahị ọwawa iyina ahụ bala ọrụ ịwẹ à tị́ ye nyọlẹ kị hu irya nya iJihova ọhọhọ kụ ịlahị ẹ-ẹpwụ nya ọhịhị nyaa? Ọrụ yẹkẹẹ: “Ahị ka Ube-Ụpwụ nya Angị Kaa Kpa Ẹrụ Ọnyịịla Pyẹ bala ọ-họ ụkụrwọ ị-ịBẹtẹlụ lawụlẹ. Ẹ-ẹpwụ nya ẹka ọlẹ kọ kam wẹ, ọjịra-jịra nyahị mẹ ịBayịbụụ jẹ angịnyị kpụ angị iwo imiiye hu enyi Ohe. M̀ yẹ nyori m̀ juwa ẹ-ẹga ọlẹ kọ pwokwu nyọka ‘durwe’ ugbẹnyị lẹ.” (Mak. 1:17, 18) Ahụ nyamwụ ya ịnyịnyị yẹkẹẹ: “M̀ ye ahị ọwawa lụmẹ-lụmẹ ịlẹ kam dọmwụ yẹ ahị me ka.”

Judith mwụ rụ ka United States, ọ tị tịtọ nyọka họ ụkụrwọ ha iJihova gụ ọọwa ịnyịnyị. O yẹkẹẹ: “Ụka myị́ ụka kam ka Cameroon ka yẹ alugbiyegu nyam kam tị ja ka rụ tịrẹkpẹ, m̀ kaa jida nyọlẹ kam wẹẹ ka rụ hi iru nya angịnyị ịlẹ kam dọmwụ nya  ịBayịbụụ ọjẹ́jẹ bala.” Judith tị họ atịmẹ pyịnyẹng nyọka tịrẹkpẹ ka Cameroon. Ọ la ụkụrwọ ọlẹ kị kaa nwọọ uri ọlam-ọlam du kọ jẹ́-ẹ ye ang du kịla adamwụ nyọka họ utoji ịị Cameroon. Ma ọ dahịhile iJihova, lẹ ọ tịrẹkpẹ ka Cameroon ẹẹ. O ya nyori ịlẹhị lẹ, iwoo nya ọhịhị ọla United States nyị kaa wu ọwa ụka ọhẹ. Ọ raabwọ bịlẹ iJihova kọ ka dọọ ụbwọ bọhụ myị́, ọ tị ye ọhụ ojuju bwu ẹga nya ọngọ kpẹhị rịrị iSekut ọhẹ bala ahụ nyamwụ.

Ụka ká Judith ja kpịtịya jaabwọ ká ang la ụka kọ nyà tịrẹkpẹ ka Cameroon, o yẹkẹẹ: “M̀ chị ọkẹkẹnị nyọlẹ kam da angịnyị angị ine ụbwọ nyọka hu ẹnyị Ohe ẹ-ẹpwụ nya ẹka ịta.” Judith wẹ ka ri ọngọ kaa kpa ụka nyamwụ wuu ya ẹrụ ọnyịịla. Lẹẹlẹẹ, ọ kaa kpa ẹrụ ọnyịịla pyẹ bala ọrụmwụ ká ẹnyị nyamwụ ri Sam-Castel, ko ri ọngọ kpẹhị rịrị iSekut lẹ. Ẹlịyẹ à tị́ họ tọ adịda nya Judith mẹ? Judith bala alugbiyegu nyamwụ jẹ́ ye ube-utoji ọhẹ ẹ-ẹpwụma ọkịla ọlẹ kọ nwụlanọ nyọka họ adaa utoji la ịwa ọ-ka nwụ uri ọhẹ-lọhẹ ka. Ọ kpịpyọ lụmẹ nyori adaa há gụ lẹ.

Ọọnahị ọhẹ ká ẹnyị nyamwụ ri Victor mwụ ka Canada. Nyọlẹ kọ wa egbeju nya ẹla ọhẹ ẹ-ẹpwụ nya Ẹpwang ọ-Kụ Gbeji kọ ya ẹla u-uhye nya ube-ụpwụ ọlịlahị ọkaka, ọ kụ irya u-uhye nya ube-ụpwụ ọkaka nyịlọmwụ. Ọọwa ọ hwabwọ la ube-ụpwụ ọgbẹgbịlẹ ọkaka lẹ, ọ dọmwụ nya ụkụrwọ nya ụbwọ ọjẹ́jẹ lẹlẹ. O yẹkẹẹ: “Ọọwa dam ụbwọ nyọka ye ụkụrwọ ahyaahị bala ọ-ya iwe ham nyọka họ ang ọlẹ kọ mam ma nyọka họ lụka ọtata lẹ, ko ri ọ-ka ye ịlahị nya ụgbẹyị.” Nyọlẹ kọ nọ pyịnyẹng, Victor ye Caroline, ịwa angị imimiiye ka anyị ka Cameroon. Ụka ọlẹ kị ju egbeju-ẹpwa ọla Cameroon ụga, aanahị ịhyẹ jwaa ọhụ nyọka kụ irya u-uhye nya ọ-nyà tịrẹkpẹ wẹ Cameroon nyọka kpa ẹrụ ọnyịịla pyẹ. Victor yẹkẹẹ: “Ịngịngịhyẹ-ẹ́ ji nyọka wuhi kpa la ọ-ye ẹlẹwẹ myị ka, nyọlẹ kahị tị hu ọhịhị nyahị hukee ene-ene wẹẹ, ọ chịkpẹẹ hahị nyọka kpa ẹla ọwẹ họ ụkụrwọ.” Nanana nyori Caroline á la ogogo nwà ka, ị cheje nyọka nyà tịrẹkpẹ.

Victor bala Caroline dọmwụ nyọka ye ịlahị nya ụgbẹyị chajị kị ka jẹ́-ẹ da angịlẹ wuu kị tịtọ nyọka jẹ́ ịBayịbụụ ụbwọ. Ụka nya ọgbanyẹ, ị́ họ ụkụrwọ ka chajị ị jẹ́ ya okpoko nọ ang pyịnyẹng ene. Ku ẹkpẹ nyọọwa, ị họ ụkụrwọ la ọya ịmanyị-manyị ịị Canada dudu kị jẹ́ nyà tịrẹkpẹ wẹ Cameroon ka kịnyaa la o-ye ịlahị nya ụgbẹyị. Ahị ọwawa iyina ị tị́ ye? Ị ka Ube-Ụpwụ nya Angị Kaa Kpa Ẹrụ Ọnyịịla Pyẹ, ị wẹ ka ri angị kpa ụka nyaa wuu ya ẹrụ ọnyịịla, bala ọ-kaa họ ụkụrwọ nya ẹga ọgbịgba ọnwụ́nwụ́ lẹẹlẹẹ. Victor yẹkẹẹ: “Nyọlẹ kahị tụụbwọ hi ọhịhị ọkpịpyọ ọlẹ kahị la ene, ahị kpụnịrọ iJihova, ahị tị ye ụbwọ ọdada nyamwụ.”

La 2002, Alain kọ kaa ka ube-ụpwụ ọgbẹgbịlẹ ịị Germany, wa ịtrakị ọlẹ ká egbeju nyamwụ ri, Youths​—What Will You Do With Your Life? Ẹla ọlẹ kọ wa bwu ụwa gwoo gbịla nyọka dọmwụ nya ọ-ku ang onyeewe. La 2006, ọ ka Ministerial Training School, lẹ ị yọọ du ka Cameroon ko ri ẹpwụma nyamwụ lẹlẹ.

Alain ye ụkụrwọ ọhẹ ọlẹ kọ kaa chịchịịchị họ ịị Cameron. Ọ ka nọ chẹẹ, o ye ụkụrwọ ọkịla ọlẹ kị kaa nwọọ uri ọlam-ọlam, ma ọ chuko nyori ọ́ ka ye ụka kpa ẹrụ ọnyịịla pyẹ bala ọ-mẹ ang jẹ jaabwọ kọ kaa họ ene-ene ka. Lẹ, ụka ọlẹ kị wụrwọọ nyọka ri ọngọhẹ ẹ-ẹpwụ nya angịlẹ kị kaa kpa ụka nyaa wuu ya ẹrụ ọnyịịla, ọ ye myị ahyaahị. Olegbeju nyamwụ ọla ọlụkụrwọ myị ọnụ nyọka nwọọ uri ọtụka-ọtụka, ma Alain pwa, ọ wẹ ka ri ọngọ kpa ụka nyamwụ wuu ya ẹrụ ọnyịịla. Ọ ka nọ chẹẹ, Alain ye Stéphanie kọ kụ France la ẹka lụmẹ-lụmẹ ịnyịnyị. Akama iyina à tị́ wẹ chọọ ọgụ nyọlẹ kọ mwụ ka Cameroon kpá?

 Stéphanie yẹkeẹ: “Ẹdụrụ ọpyịnyẹng-pyịnyẹng kaa jụm hyaa-hyaa bala ẹga ọ-myịm ka, ma ị kaa họm utoji ụka myị́ ụka kpụ m lịlọm.” Ahụ bala ọrụ ịwẹ ye ahị ọwawa nyọlẹ kị bọhụ. Alain ya nyori: “Ụka ọhẹ kahị ka epweji ọlụru-lụrụ ọhẹ kọ ri Katé ka kpa ẹrụ ọnyịịla pyẹ ụ-ụwa, ahị yẹ angịnyị lụmẹ-lụmẹ ịlẹ kị tịtọ nyọka jẹ́ ịBayịbụụ. Ku ẹkpẹ nyọwẹ, ahị jẹ́ mẹ ịBayịbụụ jẹ angịhyẹ nyaa bwu ifon ụka ọhẹ bala ụka ọkịla. Angị imiiye nyaa hu enyi Ohe, ị myịmyị la ebwo nya angị ya ẹrụ ọnyịịla ụ-ụwa lẹ.” Stéphanie ọwa yẹkeẹ: “Ịngịngịhyẹ-ẹ́ ji kọ ka ya ọkẹkẹnị ha ọngịnyị gụ ọ-da angịkịla ụbwọ hu ịlaa ju iJihova ụ-ụbwọ kaka. Ahị ye ọkẹkẹnị ụma ọlịnyị ụka lụmẹ-lụmẹ nyọlẹ kahị dọmwụ nya ọ-kpa ẹrụ ọnyịịla pyẹ ẹgẹlẹ.” Lẹẹlẹẹ, Stéphanie kaa bajẹ bala Alain ọrụmwụ họ ụkụrwọ nya ọngọ kpẹhị rịrị iSekut lẹ.

Gisèle hu enyi Ohe ụka ọlẹ ko juwa u-ube-ụpwụ nya angị họ utoji ụ-ụwa Italy. Ọhịhị ohukee nya ahụ bala ọrụ i-ye ịlahị nya ụgbẹyị ịlẹ kị mẹ ịBayịbụụ jọ́ọ myọọ lẹhị yẹẹyẹẹ, ọ tị tịtọ kọ ka kpa ẹrụ ọnyịịla pyẹ gụ ọọwa ịnyịnyị. Lẹ, Gisèle dọmwụ nyọka ye ịlahị nya ụgbẹyị ụka ọlẹ kọ wẹẹ ka họ ube-ụpwụ kpá.

Ọ tịtọ kọ ka rụ tịrẹkpẹ ka Cameroon ka họ ụkụrwọ ha iJihova gụ ọọwa, ma ẹla ọhẹ tị ri uko ọchịchị nyamwụ. O yẹkẹẹ: “M̀ ka pehi iwe ọlẹ kam la nyọka ri ala Italy bala ọ-chị ebwo hi aligu bala alugbiyegu nyam ịlụwa.” Ọlịnyị odu lẹ, Gisèle rụ tịrẹkpẹ ka Cameroon la Ọya Ọharụ nya 2016. Ọ ka nọ chẹẹ, ọ rụrwọ Léonce. Ị-ịlahị nyọọwa, egbeju-ẹpwa ọla Cameroon yọọ bala ọrụmwụ du ka epweji ọlẹ kọ ri Ayos, ká ọbaba nya angị kpa ẹrụ ọnyịịla pyẹ ji yẹẹyẹẹ.

Ányị ọhịhị olepweji ọwẹ à tị́ la? Gisèle yẹkẹẹ: “Ụka lụmẹ-lụmẹ, ila á kaa ji ka lala epwihi ịmányị tị́, lẹ ahị jẹ́-ẹ ya ifon nyahị ku ila ka. Ọọwa du ka ifon nyahị kaa họ ụkụrwọ ka ụka lụmẹ-lụmẹ. M̀ kaa kpụ́ ang la ịwụ, bala ọ-kaa kpa wheelbarrow la ịtọọchị kaka chị enyi la epwoodu ụka ká angịnyị ka lụmẹ ka.” Ịyẹ à tị́ da ahụ bala ọrụ ịwẹ ụbwọ nyọka bọhụ myị́? Gisèle yẹkẹẹ: “Olegu ịgọgọ nya iJihova, ụbwọ ọdada nya ayịbam, bala ọhụ ojuju tụ́ ụbwọ ọdada ẹ-ẹga nya okpoko ụka ọhẹ bwu ẹga nya aligu bala alugbiyegu nyahị dahị ụbwọ nyọka bọhụ.”

Gisèle chị ọkẹkẹnị nyọlẹ kọ nyà tịrẹkpẹ ka ẹpwụma nyịlọmụ? Ee! O ya gbagbịla yẹkẹẹ: “Ịlẹhị lẹ, ahị la akama ịhyẹ bala ọ-la ọkịlẹtụ ọ-kpụ enyi ụka nya ọgbanyẹ, ma ụka ọlẹ kahị kụrụ akama ịwẹ myị́, am bala ayịbam yẹ nyori ahị họ ẹla ọlẹ kahị baba nyọka họ kpangga. Ahị dahịhile iJihova bala ọ-tụ jwoo chwẹẹ gụ ọwọwa.” Léonce bala Gisèle ka Ube-Ụpwụ nya Angị Kaa Kpa Ẹrụ Ọnyịịla Pyẹ, ị tị chwaa nya angị kpa ụka nyaa wụụ ya ẹrụ ọnyịịla kịnọọ lẹẹlẹẹ lẹ.

Lala angị durwe enyi ịlẹ kị kaa ju ugbodu ẹ-ẹpwụ nya iwe-ahụrụ olujwo chajị kị ka jẹ́-ẹ wu iyenyi myang-myang, angịlẹ kị tịrẹkpẹ ka ẹpwụma nyịlaa nwụlanọ nyọka chịlaa imyi kpẹpwụ ịnyịnyị, chajị kị ka jẹ́-ẹ da angị la ọkịlẹtụ ọnyịịla ịlẹ kị ke ụrụ wo ẹrụ ọnyịịla nya Ịpyị-Adịrahụ ụbwọ. IJihova ka jẹ́-ẹ kpịtịya nya angị ya ẹrụ ọnyịịla la ila ọchịchị ịwẹ ụ-ụgbẹyị ọnyịịla pyii lẹ, chajị nya ọháha ọlẹ kị mẹjẹ ẹ-ẹga nya ẹnyị nyamwụ. (Neh. 5:19; Hib. 6:10) Kori ka juwa ẹ-ẹpwụma ọkịla, ká ọbaba nya angị ya ẹrụ ọnyịịla tị ji ẹ-ẹpwụma nyang, à ka jẹ́-ẹ nyà tịrẹkpẹ myị́? Kori ka họ ịnyị, a ka ye ahị ọwawa ịtụka-ịtụka bwu ẹga nya iJihova.​—Etu 10:22.