INIEVO buobu nọ i no orẹwho rai nọ ẹgaga ọ rrọ kpohọ erẹwho nọ a be jọ reakpọ kuoma a zihe kpohọ orẹwho rai no. A kwa kpohọ eria nọ iwhowho-uvie e rrọ tere he nyae ta usi uwoma fiki uyoyou nọ a wo kẹ Jihova gbe erivẹ rai. (Mat. 22:37-39) Eme inievo nana a kpairoro vrẹ re a sai ru onana, kọ eghale vẹ i te rai? Re ma sae riẹ uyo onọ nana, joma ta kpahe inievo nọ i no erẹwho efa ziọ Cameroon nọ o rrọ orẹwho rai.

Evaọ 1998 oniọvo-ọmọzae nọ a re se Onésime ọ kwa no orẹwho riẹ nọ o rrọ Cameroon kpohọ orẹwho ofa nọ ọruẹriọ ọ rrọ. Ikpe ikpegbene soso ọ jọ ukane. Ẹdẹjọ nọ ọ jọ ewuhrẹ, oniọvo jọ nọ ọ be kẹ ovuẹ ọ tẹ kẹ oriruo jọ kpahe usi uwoma ota na. Oniọvo na ọ ta nọ, “Otẹrọnọ egbẹnyusu ivẹ e rrọ ọvuọ oria riẹ bi kpe iyei, nọ ọjọ o je bi kpe vi ọnọ o kiọkọ gaga, kọ ọnọ o bi kpe tere he na ọ gbẹ te nyabru ogbẹnyusu riẹ evaọ oria nọ o bi jo kpe ziezi na?”

Oriruo yena ọ lẹliẹ Brọda Onésime jiroro nọ o re zihe kpobọ Cameroon nọ a be jọ kpe iyei ziezi, koyehọ nọ ahwo a be jọ kurẹriẹ ziezi re o fiobọhọ kẹ inievo nọ e rrọ obei. Rekọ ọ jẹ dina ruawa eware jọ. Kọ uzuazọ obọ Cameroon u ti gbe kiehọ iẹe oma nọ ọ rria orẹwho ofa ikpe buobu no na? Re Brọda Onésime ọ sae ruẹ oghẹrẹ nọ o te jọ, o te kpobọ Cameroon nyae rria emerae ezeza. Kẹsena evaọ 2012, ọ tẹ kwa zihe kpohọ obei okwa ovo.

Brọda Onésime ọ ta nọ: “Ọdha ọgaga ọ rrọ obọ Cameroon, yọ akpọ ọ nwane lọhọ tere he. Ekpala egaga ma rẹ keria evaọ obọ Ọgwa Uvie.” Kẹsena ọ tẹ ta avọ unu ohwohwẹ nọ: “Rekọ mẹ tẹ tẹrovi oware nọ ma bi wuhrẹ na, mẹ rẹ gbẹ kareghẹhọ egbara elọlọhọ nọ mẹ jẹ keria evaọ obonọ me no ze he.”

Ukpe 2013, Brọda Onésime avọ Sista Géraldine a tẹ ruọ orọo. Obọ France Géraldine omariẹ ọ jọ vẹre ikpe izii, kẹsena o te ti zihe ziọ obọ Cameroon. Eghale vẹ i te ọzae-avọ-aye nana fikinọ a rọ iruo Jihova karo? Onésime ọ ta nọ: “Mẹ avọ aye mẹ ma kpohọ Isukulu Rọkẹ Etausiuwoma Uvie Na, ma tẹ jẹ jọ Ebẹtẹle ru iruo. Evaọ ukpe nukpo na ọvo, ahwo udhe soso ae a họ-ame evaọ ukoko mai. O rrọ omẹ oma nọ obọnana mẹ rrọ oria nọ mẹ be jọ ‘ruẹ iyei kpe ziezi.’” (Mak 1:17, 18) Géraldine omariẹ ọ ta nọ: “Eghale nọ i te omẹ obọ no, a rẹ ruẹ unu gbiku rai hi.”

Oniọvo-ọmọtẹ jọ nọ a re se Judith nọ ọ kwa kpobọ America ọ gwọlọ nọ o re ru vi epanọ o bi ru evaọ iruo usi uwoma ota na. Ọ ta nọ: “Oke kpobi nọ me zihe kpobọ Cameroon nyae ruẹ ahwo mẹ, nọ me te bi zihe kpobọ America, aro o re su omẹ ame nọ mẹ tẹ  kareghẹhọ ahwo nọ me mu uwuhrẹ Ebaibol họ kugbe nọ me bi ti kpo seba.” Rekọ o jẹ ruọ Judith oma tere he re ọ kwa zihe kpobọ Cameroon. O wo emamọ iruo evaọ obọ America nọ a be jọ hwae osa ziezi. Yọ ere ọ be sae rọ ruẹ ugho hwa igho ẹsipito kẹ ọsẹ riẹ nọ oma o ga ha nọ ọ rrọ obọ Cameroon. Ghele na, Judith ọ kwa zihe kpo keme o fievahọ Jihova. Ọ ta nọ u wo eware jọ nọ i ru akpọ lọhọ kẹe evaọ obọ America nọ ọ nya seba. Ọ lẹ se Jihova re o fiobọhọ kẹe, re uzuazọ obọ Cameroon o ruẹse reriae oma. Ọsẹro okogho jọ avọ aye riẹ a tẹ jẹ tuduhọ iẹe awọ gaga re.

Judith ọ ta nọ: “Evaọ ikpe esa ọvo nọ mẹ rọ kwa zihe no, me fiobọhọ kẹ imane soso kurẹriẹ ziọ ukoko na.” Judith o te ti mu iruo ọkobaro obọdẹ họ. Enẹna, avọ ọzae riẹ, Sam-Castel a rrọ iruo ọsẹro okogho. Kọ eme ọ via kẹ ọsẹ Judith nọ oma o ga ha na? Judith avọ ahwo uviuwou riẹ a tẹ te ruẹ ẹsipito jọ evaọ orẹwho ofa nọ a rọwo nọ a re ru obẹrọ kẹ ọsẹ riẹ ọvọvẹ. Eva e were rai gaga inọ a ru obẹrọ na ababọ ẹbẹbẹ.

Oniọvo-ọmọzae jọ nọ a re se Victor ọ kwa kpobọ Canada. Nọ o se uzoẹme Uwou-Eroro jọ ẹdẹjọ nọ o ta kpahe isukulu ilogbo, o te bi roro kpahe isukulu nọ ọyomariẹ ọ rrọ. Kẹsena o te no yunivasiti nọ ọ jọ, o te kpohọ isukulu efa nọ ọ rẹ sae jọ wuhrẹ iruo nọ e te raha oke tere he. Ọ ta nọ: “Onana u ru nọ mẹ rọ kaki mu iruo họ, kẹsena me te mu iruo ọkobaro nọ e be were omẹ anwẹdẹ na họ.” Uwhremu na, Brọda Victor avọ Sista Caroline a tẹ ruọ orọo. Aimava a te kpobọ Cameroon nyae ruẹ ahwo rai. Nọ a jọ obei, a te kpobọ uwou ogha, kẹsena a tẹ jọ obei nọ ae sọ a sae kwa ziọ Cameroon ti ru iruo Uvie na. Victor ọ ta nọ, “U wo oware ovo nọ u re ru omai se he. Fikinọ ma gbobọnẹ eware buobu no anwẹdẹ, ma rọwo oke nọ a zizie omai.” Dede nọ oma o nwane ga Caroline tere he, aimava a kwa nya.

Victor avọ Caroline a te mu iruo ọkobaro oke-kpobi họ re a sae ta usi uwoma na kẹ ahwo buobu nọ a gwọlọ yo ovuẹ Uvie na. Evaọ omoke jọ, ugho nọ a kokohọ no anwẹdẹ a jẹ rọ rẹrote omarai. Kẹsena a te kpobọ Canada nyai ru iruo emerae jọ re a ruẹsi kru ugho họ obọ. A te zihe ziọ obọ Cameroon re a sae ruabọhọ iruo ọkobaro rai. Eghale vẹ i te rai? Aimava a kpohọ Isukulu Rọkẹ Etausiuwoma Uvie Na, a tẹ jẹ jọ ekobaro obọdẹ, yọ obọnana a rrọ iruo ebabọ ukoko na. Victor ọ ta nọ, “Fikinọ ma nyasiọ oria nọ akpọ ọ jọ lọhọ kẹ omai ba je fievahọ Jihova, o bi fiobọhọ kẹ omai.”

Evaọ 2002, oniọvo-ọmọzae nọ a re se Alain ọ jọ yunivasity evaọ obọ Germany. Nọ o se omobe-ovẹvẹ nọ uzoẹme riẹ o rrọ, Izoge​—Eme Wha te Rọ Izuazọ Rai Ru?, oware nọ o se u duobọtei gaga te epanọ ọ rọ jiroro nọ ọ rẹ gbẹ daoma viere evaọ iruo Jihova. Evaọ 2006, o te kpohọ Isukulu Ewuhrẹ Odibọgba. Nọ o nwrotọ no, a te vi ei kpobọ Cameroon nọ o rrọ orẹwho riẹ.

Nọ Alain o zihe kpobọ Cameroon, ọ tẹ ruẹ iruo ubroke. Uwhremu na ọ tẹ ruẹ iruo efa nọ a rẹ jọ hwae okposa. Rekọ o jẹ kẹe uye inọ o ti gbe wo oke nọ ọ rẹ rọ ta usi uwoma na te epanọ ọ gwọlọ họ. Fikiere, nọ a zizie ei re ọ jọ ọkobaro obọdẹ, ọ tẹ nwane rọwo. Ọga iruo riẹ ọ ta kẹe nọ o re fihọ osa riẹ, rekọ ọ rọwo vievie he. Uwhremu na, Brọda Alain avọ Sista Stéphanie a tẹ ruọ orọo. Stéphanie ọ rria obọ France ikpe buobu taure o te ti zihe kpobọ Cameroon. Ebẹbẹ vẹ o wo nọ o zihe kpobọ Cameroon?

 Sista Stéphanie ọ ta nọ: “Mẹ jẹ hae mọ kuẹkuẹkuẹ yọ eware buobu e jẹ hai kiehọ omẹ oma ha. Rekọ mẹ jẹ hae rehọ imu nọ i re ru oma na kpotọ.” Eghale buobu i te ọzae-avọ-aye nana fiki akothiho rai. Alain ọ ta nọ: “Nọ ma kpohọ ẹmẹwho jọ nọ o siomano nọ a re se Katé nyae ta usi uwoma, ma nyaku ahwo buobu nọ a gwọlọ wuhrẹ Ebaibol. Uwhremu na, ma tẹ jẹ rehọ ifonu wuhrẹ Ebaibol kugbe ai. Imava evaọ usu ahwo nana a nyaharo te epanọ a rọ họ-ame, kẹsena iwhowho-uvie isoi e tẹ jẹ hae jọ oria na kokohọ ru iwuhrẹ.” Stéphanie ọ ta nọ: “O rẹ kẹ evawere kẹhẹ nọ who te fiobọhọ kẹ ahwo te epanọ a rọ roma mudhe kẹ Jihova. Obonẹ nọ ma nyaze na u ru nọ ma ro wo evawere itiena unuẹse buobu no.” Enẹna, Alain avọ Stéphanie a rrọ iruo ọsẹro okogho.

Gisèle ọ họ-ame evaọ oke nọ ọ jọ isukulu nọ ohwo ọ rẹ rọ jọ edọkita evaọ obọ Italy. Ọzae-avọ-aye nọ a je wuhrẹ Ebaibol kugbei na yọ ekobaro, a tẹ jẹ jọ ahwo nọ a kpairoro vrẹ eware buobu evaọ uzuazọ. Onana u duobọte Sista Gisèle gaga, ọ tẹ gbaemu nọ ọ rẹ gbẹ daoma ziezi evaọ iruo usi uwoma ota na. Fikiere, Gisèle omariẹ o te mu ọkobaro oke-kpobi họ evaọ oke nọ ọ joma nwrotọ no.

Gisèle ọ gwọlọ nọ o re zihe kpobọ Cameroon nyai ru iruo Uvie na ziezi, rekọ u wo eware jọ nọ ọ jẹ ruawa rai. Ọ ta nọ: “Me te zihe, me gbe ti wo obe-udu nọ mẹ sae rọ rria Italy hi. Yọ onana u ti ru nọ mẹ te rọ nyasiọ egbẹnyusu mẹ gbe ahwo uviuwou mẹ nọ a rrọ obọ Italy ba.” O make jọ ere na, evaọ Asoi 2016, Gisèle ọ tẹ kwa zihe kpobọ Cameroon. Nọ oke jọ o vrẹ no, Gisèle avọ Brọda Léonce a tẹ ruọ orọo. Kẹsena uwou ogha obọ Cameroon o tẹ vuẹ ae nọ a sae kwa kpobọ Ayos, keme a jọ obei gwọlọ iwhowho-uvie gaga.

Ẹvẹ eware e jọ kẹ ae evaọ obọ Ayos? Gisèle ọ ta nọ: “Eka buobu ma re wo ikpẹ hẹ, yọ ma jẹ sae chaje ifonu mai hi. Onana o rẹ whae ze nọ ifonu mai i re ro fu no. Ire me re ro there emu, yọ etọche avọ iwhibaro ma rẹ wha nyai ro vo ame evaọ irioke ilogbo nọ ahwo a re nyaziọ unueri na tere he.” Ẹvẹ ọzae-avọ-aye nana a sae rọ rria etẹe? Gisèle ọ ta nọ: “Jihova ọ rọ ẹzi riẹ fiobọhọ kẹ omai. Mẹ avọ ọzae mẹ ma jẹ hai fiobọhọ kẹ ohwohwo. Ahwo uviuwou mai gbe egbẹnyusu mai a jẹ hae tuduhọ omai awọ re, je vi ugho se omai ẹsejọ.”

Kọ eva e be were Gisèle inọ o zihe kpohọ orẹwho riẹ? Ọ ta nọ: “Ee, eva e be were omẹ gaga. Nọ mẹ kaki zihe, eware e ginẹ jọ omẹ oma thọhọ thọhọ, rekọ nọ obonẹ ọ reria omai oma no, o tẹ jọ omẹ avọ ọzae mẹ oma nọ oware nọ u fo nọ ma re ru oye ma ru na. Ma fievahọ Jihova, usu mai kugbei o tẹ jẹ kpekpe gaga no.” Léonce avọ Gisèle a kpohọ Isukulu Rọkẹ Etausiuwoma Uvie Na, yọ a rrọ ekobaro obọdẹ ubroke enẹna.

Okuori ọ rẹ ruẹ uye re ọ sai kpe iyei ziezi. Epọvo na re, inievo nọ u no eva ze inọ a re zihe kpohọ orẹwho rai re a sae ta usi uwoma na ziezi a re thihakọ eware jọ. Inievo nana nọ i bi kru obọ ga ziezi evaọ iruo na a te thọrọ Jihova ẹro ho fiki uyoyou nọ a wo kẹe. (Neh. 5:19; Hib. 6:10) Otẹrọnọ whọ be rria orẹwho ofa yọ a gwọlọ iwhowho-uvie evaọ orẹwho ra, kọ whọ sae kwa zihe kpo? Who te ru ere, who ti wo eghale buobu.​—Itẹ 10:22.