RAWT jat ai sinna mungdan ni de htawt mat wa ai hpunau nauna law law gaw dai daw buga de bai wa ma ai. Yehowa hte masha ni hpe tsawra ai myit a majaw, hkaw tsun masha grau ra ai shara ni de htawt wa ai re. (Mat 22:37-39) Gara sak jaw ai lam ni galaw wa ai kun? Gara shaman chyeju ni hpe dan la lu ai kun? Sinna Ahprika, Kemarun mungdan a lam hpe yu yu ga.

1998 hta, hpunau Onizim gaw Kemarun kaw nna kaga mungdan de htawt mat wa ai 14 ning daram rai sai. Lani mi na zuphpawng hta, hkaw tsun magam hte seng ai ga shadawn langai hpe na lu ai. Mungga htawn ai wa ndai hku tsun ai: “Manang lahkawng gaw n bung ai shara hta nga hkwi ai. Marai langai gaw nga law law lu hkwi ai. Dai shara de kaga langai mung sa na n re i?”

Dai ga shadawn gaw Chyum Laika chye mayu ai ni nga ai Kemarun de bai wa nna, buga na hkaw tsun masha ni hpe karum ya na matu, Onizim hpe shadut ya ai. Raitim, shi myit tsang ai. Maigan mung hta shaning law law nga wa ai majaw, shi a buga hta chye nga na kun? Dai hpe chye mayu ai majaw, Kemarun de shata 6 daram sa nga yu ai. 2012 hta, gaja wa htawt wa ai.

Onizim ndai hku tsun dan ai: “Ngai gaw kahtet ai du hkra ladaw hte galai shai mat ai nga sat nga sa hta chye nga hkra shakut ra ai. Nawku Htingnu hta, n manu ai dunghkum galu hta kalang bai dung ra ai. Raitim, lamang ni hpe myit maju jung dat ai shaloi, n manu ai dunghkum hpe n myit mat sai.”

2013 hta, Onizim gaw, Pyintit mungdan hta 9 ning daram sa nga wa ai Jerodin hte hkungran ai. Shan yan gaw wenyi lam hpe myit maju jung ai majaw, gara shaman chyeju ni lu la ai kun? Onizim ndai hku tsun dan ai: “An gaw Kabu Gara Shiga Hkaw Tsun Ai Ni A Matu Jawng hpe lu lung nna, Behtela hta magam gun lu ai. Lai wa sai shaning hta, anhte a nawku hpung kaw nna Chyum ga sharin marai 20 hkalup hkam la ai. Ya, ngai gaw nga hkwi na matu htap htuk ai shara hpe mu tam ai ngu hkamsha ai.” (Mrk 1:17, 18) Jerodin ndai hku tsun ai: “Ngai myit mada da ai hta grau nna shaman chyeju lu la ai.”

Judat gaw Amerikan de htawt mat wa ai. Raitim, shi gaw hkaw tsun magam hta grau nna shang lawm mayu ai. Shi ndai hku tsun dan ai: “Kemarun hta nga ai nta masha ni hpang de sa chyai nna bai wa shagu ngai hkrap ai. Chyum ga sharin hpang da ai ni hpe kau da ra ai majaw re.” Raitim, Kemarun de bai wa na matu gaw htingnut nga ai. Shang gumhpraw kaja ai bungli lu da ai majaw, Kemarun hta nga  ai kawa a tsi jahpu hpe jaw lu ai. Raitim, Yehowa hpe kamhpa ai myit hte Judat gaw Kemarun de bai htawt wa ai. Maigan kaw nga ai shaloi na nga manu ai prat nkau hpe gaw marit ai ngu yin la ai. Galai shai lu hkra, karum ya na matu Yehowa kaw akyu hpyi ai majaw, hpung kawan yan la kaw nna n-gun jaw lam lu la ai.

Lai wa sai shaning ni hta, “3 ning laman marai 4 hpe hkalup hkam lu hkra karum ya lu ai majaw grai kabu ai” ngu Judat tsun dan ai. Laksan ningshawng hku nna magam gun lu ai. Ya gaw madu wa Sem-Kesate hte arau hpung kawan magam hta shang lawm nga ai. Judat a kawa gaw gara hku kun? Shi hte shi a nta masha ni gaw kawa hpe ga tsi lajang ya mayu ai kaga mungdan na tsi rung langai hpe mu tam ai. Kabu hpa gaw ga tsi lajang ai lam awng dang ai.

Hpunau Bikta gaw Kaneda mung de htawt mat ai. Madang tsaw hpaji hte seng nna ka da ai Sin Langchyi sumhpa hpe hti ngut ai hpang, shi sharin la nga ai jawng hpaji hte seng nna bai myit yu ai. Dakkasu lung ai hpe jahkring kau nna, jak ladat hpaji hpe aten kadun mi sharin la ai. “Kade n na yang, bungli lu wa nna, ngai galaw mayu ai ningshawng bungli hpe lu galaw ai” ngu tsun ai. Kerolin hte hkungran ngut ai hpang Kemarun de sa chyai ai. Gin jaw garan rung de sa chyai ai shaloi, hpunau nkau gaw Kemarun hta magam gun lu na kun? ngu ai hpe myit na matu n-gun jaw ai. Bikta ndai hku tsun ai: “Nyet kau na lam hpa mung n nga ai. Anhte a prat hpe asan sha tawn ai majaw, saw shaga ai hpe hkap la lu ai.” Kerolin hta hkamja lam hte seng nna manghkang nkau nga tim, htawt na matu dawdan ai.

Shan gaw aten galu ningshawng galaw nna Chyum Laika myit lawm ai masha ni hpe karum ya ai. Nnan hta gaw mahkawng da ai gumhpraw hte lu galaw ai. Dai hpang Kaneda de wa nna shata loi mi bungli sa galaw dat, Kemarun de bai wa nna ningshawng bungli matut galaw dat shakut ra ai. Hpa shaman chyeju ni lu la ai kun? Kabu Gara Shiga Hkaw Tsun Ai Ni A Matu Jawng lu lung nna, laksan ningshawng hku nna magam gun lu ai. Ya nga yang, gawgap bungli hta magam gun nga ai. “An gaw nga manu ai prat hpe kau da ai majaw, Yehowa a madi shadaw lam lu la ai” ngu Bikta tsun ai.

2002 hta Jamani kaw dakkasu lung nga ai Ala gaw Ramma Ni​—Nanhte A Prat Hpe Gara Hku Akyu Jashawn Na Kun? ngu ai garan laika hpe lu hti ai. Dai gaw bandung nnan ni jahkrat mayu hkra shadut ya ai. 2006 hta, Magam Shaman Shakyang Jawng hpe lu lung nna, shi a buga Kemarun hta lit ang ai.

Kemarun hta, Ala gaw aten kadun bungli mu tam ai. Hpang hta shang gumhpraw grai kaja ai bungli hpe mu tam ai. Raitim, hkaw tsun bungli hta aten loi mi sha shang lawm lu na hpe myit tsang ai. Dai majaw, laksan ningshawng hku nna magam gun na matu saw shaga ai shaloi, n htingnut ai sha hkap la dat ai. Bungli madu gaw gumhpraw jat jaw tim, laksan ningshawng sha matut galaw ai. Dai hpang, Pyintit hta shaning law law nga wa ai Stethpani hte hkungran ai. Kemarun de htawt ngut ai hpang shi gara mayak mahkak ni hkrum wa ai kun?

Stethpani ndai hku tsun ai: “Ngai hta hkam n kaja ai lam kaji kajaw byin wa ai. Raitim, ayan na tsi tsi ai majaw, hkyam sa wa ai.” Shan shakut ai majaw shaman chyeju lu la ai. Ala ndai hku tsun  ai: “San san byin nga ai Kate kahtawng de hkaw tsun sa ai shaloi, Chyum Laika hkaja mayu ai masha law law hpe mu wa ai. Hpang de, phone hte Chyum Laika sharin galaw lu ai. Chyum ga sharin marai 2 gaw hkalup hkam la nna, hkaw tsun masha hpung kaji hpe mung hpawng de lu wa ai.” Stethpani ndai hku bai tsun ai: “Yehowa kaw shanhte hkum shanhte apnawng lu hkra, karum ya lu ai hta grau kabu ai lam n nga sai. Ndai shara kaw magam gun ai majaw, kabu gara lam law law lu la ai.” Ya, shan gaw hpung kawan magam hta shang lawm nga ai.

Yizela gaw Itali hta tsi jawng lung nga ai shaloi, hkalup hkam la ai. Shi hpe Chyum Laika sharin ya ai ningshawng yan la a asan sha re ai prat hpe ra sharawng mat ai. Dai majaw, shi mung hkaw tsun bungli hta grau shang lawm mayu wa ai. Jawng ngut mat ai shaloi, aten galu ningshawng galaw hpang ai.

Kemarun de bai wa nna Yehowa a magam hta grau nna shang lawm mayu tim myit tsang ai. Shi ndai hku tsun ai: “Ngai gaw Itali hta tara shang nga lu ai ahkang hpe mung sum kau ra na, manang ni hte nta masha ni hpe mung kau da ra na re.” Raitim, 2016, May hta Kemarun de bai wa ai. Dai hpang shi gaw Liyun hte hkungran ai. Kemarun ginjaw garan rung gaw shan hpe hkaw tsun masha grau ra ai mare Ayo mare de htawt na matu hpaji jaw ai.

Ayo hta nga ai prat gaw gara hku kun? Yizela ndai hku tsun dan ai: “Law malawng hku nna, dai shara kaw bat hku na hkra myi hprap wan n lu ai. Dai majaw, phone ni hpe n-gun n lu bang ai. Phone mung n lu shaga ai. Hpun hte gara hku shadu ai hpe sharin la ra ai. Hka shi hta, masha nau n nga ai shana aten kaw dat wan shatu nna leng hte hka sa ja ai.” Shan gara hku hkam jan lu ai kun? “Yehowa a wenyi gaw hkam jan lu na matu karum ya ai. Shada da madi shadaw hkat ai. Nta masha ni hte manang ni gaw n-gun jaw ya ai. Kalang lang gumhpraw madi shadaw ya ai” ngu Yizela tsun ai.

Shi a mungdan de bai wa ai majaw Yizela pyaw ai kun? “Grai pyaw ai ngu tsun ai. Nnan hta gaw yakhkak ai lam ni nga ai. Myit daw ai. Raitim, dai ni hpe tawt lai ngut ai hpang an gaw galaw ra ai lam ni hpe teng sha galaw wa ai ngu hkamsha ai. Yehowa hpe kamhpa nna shi hte grau ni htep wa ai ngu nna hkamsha ai.” Kabu Gara Shiga Hkaw Tsun Ai Ni A Matu Jawng lu lung nna, ya nga yang aten kadun laksan ningshawng galaw nga ai.

Nga law law lu na matu, yakhkak ai lam ni nga tim, nden marai hte galaw ai nga hkwi ai ni zawn, Mungdan shiga madat mayu ai myit dingman ai ni hpe karum ya na matu, dai daw buga de bai wa ai ni mung sharawng awng let sak jaw nga ma ai. Yehowa gaw shi a mying ningsang a matu, tsawra myit hte shakut shaja let galaw nga ai hkaw tsun masha ni hpe galoi mung n malap ai. (Neh 5:19; Heb 6:10) Nang gaw maigan mung hta nga nga nna, na a mungdan hta hkaw tsun masha grau ra taw ai nga yang bai wa lu na kun? Rai yang, Yehowa nang hpe shaman chyeju jaw na re.​—Gsh 10:22.