BAMPANGI mingi yina kwendaka na nsi ya nzenza sambu na kusosa mbongo, me vutukaka na nsi na bo ya kisina sambu na kusamuna. Zola sambu na Yehowa mpi sambu na bantu, pusaka bo na kukwenda kisika yina mpusa kele mingi. (Mat. 22:37-39) Inki bibansa bo salaka mpi nki mambote bo me bakaka? Sambu na kubaka mvutu na ngiufula yai beto tubila bampangi ya Cameroun na westi ya Afrika.

Na 1998, mpangi Onésime katukaka na Cameroun mpi kwendaka na bwala mosi ya nzenza. Yandi zingaka kuna bamvula 14. Kilumbu mosi na lukutakanu, mutubi pesaka mbandu mosi ya me tala kisalu ya kusamuna. Yandi tubaka nde: “Kana bantu zole ke loba, mosi ke loba na kisika yina yandi ke kanga bambisi mingi, keti nduku na yandi yina ke kanga bambisi fioti ta kwenda ve kuloba na kisika yina bambisi kele mingi?”

Mbandu yina sadisaka mpangi Onésime na kuvutuka na nsi na bo na cameroun, kisika yina yandi lenda kanga bambisi mingi na kisalu ya kusamuna. Kansi, mambu ya nkaka vandaka kuyangisa yandi. Keti yandi ta kuka kuzinga diaka na nsi na yandi, na nima ya kusala bamvula mingi na nsi ya nzenza? Sambu na kuyikama diaka ti nsi na yandi, Onésime kwendaka kusala bangonda 6 na Cameroun. Na nima, na 2012 yandi kwendaka kuzinga kuna kimakulu.

Mpangi Onésime ke tuba nde: “Yo lombaka nde mono yikama diaka ti ntangu ya ngolo mpi luzingu ya cameroun. Na Nzo ya Kimfumu mono kumaka kuvanda diaka na mabaya.” Kansi yandi ke tuba na kiese yonso nde: “Sambu mono kumaka kutula dikebi mingi na malongi, mono yantikaka kuvila bakiti ya kitoko ya nsi ya nzenza.”

Na 2013, Mpangi Onésime kwelaka Géraldine, yina vutukaka mpi na Cameroun na nima ya kuzinga bamvula 9 na France. Inki mambote bo bakaka mutindu bo kudipesaka na kisalu ya Mfumu? Mpangi Onésime ke tuba nde: “Beto kotaka Nzo-Nkanda ya Bansamuni ya Kimfumu ti nkento na mono mpi beto kumaka kusala na Betele. Na bamvula me luta bantu 20 na dibundu na beto bakaka mbotika. Mono kele na kiese mingi mutindu mono ‘ke loba’ na kisika ya mbote na ntangu yai.” (Mar. 1:17, 18) Mpangi Géraldine ke yika nde: “Mono me bakaka balusakumunu mingi kuluta yina mono yindulaka.”

Mpangi Judith kwendaka kuzinga na États-Unis kansi yandi vandaka ti mpusa ya ngolo ya kukuma kusamuna mingi. Yandi ke tuba nde: “Konso ntangu yina mono vandaka kuvutuka na Cameroun sambu na kutala dibuta na beto, mono vandaka kudila sambu mono vandaka kubika bantu yina mono yantikaka kulonguka ti bo Biblia.” Judith vandaka kuwa boma ya kuvutuka sambu na kuzinga na Cameroun. Sambu na États-Unis yandi vandaka ti kisalu yina vandaka kupesa yandi mbongo  mingi, yo vandaka kusadisa yandi na kusansa papa na bo yina vandaka na Cameroun. Ata mpidina, yandi tudilaka Yehowa ntima, Judith vutukaka sambu na kuzinga na Cameroun. Yandi ke tuba nde yandi yambulaka mambu ya nkaka ya kitoko yina yandi vandaka kusepela ti yo na États-Unis. Nkengi ya nziunga mosi ti nkento na yandi pesaka yandi kikesa mingi.

Mpangi Judith ke yibukaka na kiese yonso kisalu na yandi. Yandi ke tuba nde na bamvula tatu ya me luta, yandi zwaka bana ya kimpeve. Mpangi Judith kumaka mupasudi-nzila ya nene. Bubu yai, yandi ti bakala na yandi Sam-Castel kele na kisalu ya nziunga. Kansi, nki kuminaka papa na yandi? Mpangi Judith ti dibuta na yandi solulaka ti lopitalu mosi na mputu, yina ndimaka kufuta mbongo sambu na kusansa papa na yandi. Bo salaka papa na yandi operasio mpi yo lutaka mbote.

Mpangi Victor kwendaka na Canada. Na nima ya kutanga disolo ya Nzozulu ya Nkengi yina tubilaka banzo-nkanda ya nda, yandi yindulaka banzo-nkanda yina yandi vandaka kusala. Yandi katukaka na iniversite mpi bakaka formasio mosi ya nkufi. Yandi ke tuba nde: “Yo sadisaka mono na kuzwa kisalu nswalu mpi yo pesaka mono dibaku ya kusala kisalu yina mono ke zolaka mingi, kisalu ya kimupasudi-nzila.” Na nima, mpangi Victor kwelaka Caroline mpi bo zole kwendaka kutala Cameroun. Ntangu bo kwendaka kutala Betele, bampangi ya Betele siamisaka bo na kusala na Cameroun. Mpangi Victor ke tuba nde: “Beto monaka ve kikuma ya kubuya mpi banda pana beto kumisaka luzingu na beto pete mpi beto ndimaka kusala na Cameroun.” Ata mpangi Caroline vandaka kubela, bo kwendaka kaka kusala na Cameroun.

Mpangi Victor ti Caroline kumaka bapasudi-nzila sambu bo kwendaka kupesa maboko na kisika yina mpusa vandaka mingi. Na nsungi ya ntangu fioti bo bumbaka mbongo na nima ya kusala kisalu na Canada mwa bangonda, yo sadisaka bo na kuvutuka na Cameroun mpi kulanda kusala kisalu ya kimupasudi-nzila. Inki mambote bo bakaka? Bo kotaka Nzo-Nkanda ya Bansamuni ya Kimfumu, na nima bo kumaka bapasudi-nzila ya nene. Bubu yai, bo ke tungaka bisika ya lusambu. Mpangi Victor ke tuba nde: “Sambu beto yambulaka luzingu ya kitoko yina beto vandaka na yo, Yehowa me sakumunaka beto.”

Na 2002, mpangi Alain yina vandaka na iniversite na Allemagne, tangaka trakiti, Baleke—Inki Mutindu Beno Tasadila Luzingu na Beno? Yo pusaka yandi na kubaka balukanu ya mbote sambu na luzingu na yandi. Na 2006, yandi kotaka Nzo-Nkanda ya Kimfumu mpi bo tindaka yandi na kusala na Cameroun, nsi na yandi ya kisina.

Na Cameroun, mpangi Alain zwaka kisalu mosi yina vandaka kubaka yandi ve bantangu mingi. Na nima, yandi zwaka kisalu ya mbote kibeni yina zolaka kupesa yandi mbongo mingi kansi yandi bakisaka nde kisalu yina zolaka ve kubikila yandi ntangu ya kusamuna mingi. Yo yina, ntangu bo bingaka yandi na kusala kisalu ya kimupasudi-nzila ya nene, yandi ndimaka nswalu. Mfumu na yandi zolaka kumatisa salere na yandi kansi mpangi Alain buyaka mpi yandi kumaka mupasudi-nzila ya nene. Na nima, yandi kwelaka mpangi Stéphanie, yina zingaka bamvula mingi na France. Inki mambu ya mpasi mpangi Stéphanie kutanaka ti yo ntangu yandi vutukaka na Cameroun?

Mpangi Stéphanie ke tuba nde: “Mono kumaka kubela-bela mpi bima na bo ya nkaka vandaka kubedisa mono, kansi mono landaka kubaka lusansu mpi mono kumaka mbote.” Bankwelani yai bakaka mambote sambu bo kangaka ntima. Mpangi Alain ke tuba nde: “Ntangu beto kwendaka kusamuna na bwala mosi, Katé, beto zwaka bantu  mingi yina ndimaka kulonguka Biblia. Na nima, beto kumaka kulonguka ti bo na telefone. Bantu zole na kati na bo bakaka mbotika mpi beto kangulaka kimvuka mosi ya bansamuni.” Mpangi Stéphanie ke yika nde: “Kulonguka ti bantu tii na mbotika ke pesaka kiese mingi. Kusala awa na Cameroun me natilaka beto kiese ya mutindu yai mbala mingi.” Bubu yai, mpangi Alain ti Stéphanie kele na kisalu ya nziunga.

Mpangi Gisèle bakaka mbotika ntangu yandi vandaka kusala nzo-nkanda ya minganga na Italie. Mpangi mosi ti nkento na yandi yina vandaka bapasudi-nzila, vandaka kulonguka Biblia ti yandi. Bo vandaka ti luzingu ya kukonda mindondo. Yo yitukisaka Gisèle mingi yo yina yandi bakaka mpi lukanu ya kusamuna mingi. Ntangu yandi manisaka nzo-nkanda, yandi kumaka mupasudi-nzila ya ntangu yonso.

Mpangi Gisèle kumaka ti mpusa ya kuvutuka na Cameroun sambu na kusala mingi na kisalu ya Yehowa kansi mambu ya nkaka vandaka kuyangisa yandi. Yandi ke tuba nde: “Mono vandaka kuwa boma nde na Italie, bo ta ndima mono diaka ve bonso muntu ya nsi na bo mpi mono ta kabwana ti banduku na mono mpi bantu ya dibuta na mono yina ke zingaka na Italie.” Ata mpidina, na Mayi 2016, mpangi Gisèle vutukaka na Cameroun.

Ntangu fioti na nima, bo kwelanaka ti mpangi Léonce mpi Betele ya Cameroun lombaka bo na kukwenda kusala na Ayos, mbanza mosi yina mpusa ya bansamuni vandaka mingi.

Inki mutindu luzingu vandaka na Ayos? Mpangi Gisèle ke tuba nde: “Mbala mingi kura vandaka ve bamposo mingi mpi mpila ya kutula batelefone na charge vandaka ve. Beto vandaka kusadila ve mingi batelefone na beto. Mono kumaka kulamba na bankuni mpi beto vandaka kubaka masa na mpimpa na bapusu-pusu ti bamwinda sambu na mpimpa bantu vandaka ve mingi na masa.” Inki sadisaka mpangi Gisèle ti bakala na yandi? Mpangi Gisèle ke tuba nde: “Mono bakaka lusadisu ya mingi na nzila ya mpeve ya Yehowa, bakala na mono, mbongo yina bantu ya dibuta mpi banduku vandaka kutindila beto mpi kikesa yina bo vandaka kupesa beto.”

Keti mpangi Gisèle kele na kiese mutindu yandi me vutukaka na nsi na yandi ya kisina? Yandi ke tuba nde: “Ee. Mono kele na kiese. Na luyantiku, mambu ya nkaka vandaka kupesa beto mpasi mpi beto lembaka nitu kansi na nima, beto nungaka yo. Mono ti bakala na mono me bakisaka nde beto me salaka kibeni mambu yina beto vandaka na mfunu ya kusala. Beto ke tudilaka Yehowa ntima mpi beto me kumaka banduku na yandi ya ngolo.” Mpangi Léonce ti Gisèle kotaka Nzo-Nkanda ya Bansamuni ya Kimfumu mpi bubu yai, bo kele bapasudi-nzila ya nene.

Bonso balobi-mbisi yina ke kutanaka ti bampasi mingi na kisalu na bo, bampangi yina ke vutukaka na bansi na bo, ke salaka mpi bikesa mingi sambu na kusadisa bantu ya ntima-masonga yina ke ndima nsangu ya Kimfumu. Ntembe kele ve nde Yehowa ta vila ve bikesa ya bansamuni yai ya ke sala ngolo mpi zola yina bo ke monisa sambu na zina na yandi. (Neh. 5:19; Baeb. 6:10) Kana nge ke zingaka na nsi ya nzenza kansi na nsi na beno ya kisina mpusa ya bansamuni kele mingi, keti nge ta sepela kuvutuka kuna? Kana nge sala mpidina, nge ta baka balusakumunu mingi.—Bing. 10:22.