NALUNAAJAASOR­PAS­SUIT nunagisar­tik qimal­lugu aningaasarsioriar­torlutik nunamut al­lamut nuus­simasut nunamin­nut utersimap­put. Jehovamik inoqatimin­nil­lu asan­nin­ner­tik kajumis­sis­sutigalugu oqaluus­sisar­tunik pisariaqar­titsif­fiunerusumut nuup­put. (Matt 22:37-39) Sunik pil­liuteqar­pat, qanorlu pil­luaq­quneqar­pat? Taman­na paasiumal­lugu Camerounimiut, Afrikap kip­pasis­sor­taani najugal­lit, misigisalik­kersaar­teriar­tigit.

Onésime, qatan­ngut angut, 1998-imi nunagisani Camerouni qimal­lugu al­lamut nunasiar­tor­poq. Ukiuni 14-ini nunami al­lamiip­poq. Ilaan­ni ataatsimiin­nermi as­sersuusiaq oqaluus­sinermut tun­ngasoq tusar­paa. Oqalugiar­toq ima oqar­poq: “Ikin­ngutigiit sumiif­fin­ni as­sigiin­ngitsuni aalisar­til­lutik aap­paa pisaqar­nerup­pat pisakin­nerusoq pisaqar­nerujumal­luni aap­parmi aalisarfianut nuus­san­ngin­ner­pa?”

As­sersuusiaq taman­na pis­sutigalugu Onésimep oqaluus­sisar­tut Camerounimiit­tut Biibilimik soqutigin­nit­tor­pas­suaqarfiusumiit­tut ikioriar­torlugit nuus­sanerluni eq­qarsaatigiler­paa. Nangaas­suteqar­porli. Sior­natigut nunagisani ukior­pas­suar­ni qimaq­qareerlugu utis­saguni naleq­qus­sarsin­naas­sanerluni eq­qarsaatigaa. Taman­na paasiumal­lugu qaam­matini arfinilin­ni Camerounimeeq­qaar­poq. Taava 2012-imi nuuvip­poq.

Onésime ima oqalut­tuar­poq: “Silap kian­nera inooriaaserlu al­latut it­toq naleq­qus­sarfigisariaqar­pak­ka. Naalagaaf­filersaarfim­mi is­siaviit qisuin­naat is­siavigiuminaatsut sungiun­niaq­qit­tariaqar­pak­ka.” Qungujul­lunilu ima nangip­poq: “Saq­qum­mius­sanul­li tusar­naaq­qis­saaleraangama is­siaviit maavaar­tut eq­qarsaatigival­laarun­naar­tar­pak­ka.”

2013-imi Onésimep Géraldine, ukiuni qulingiluani Frankrigimi najugaqareerluni Camerounimut utersimasoq, nuliar­taaraa. Inuunermin­ni anersaak­kut it­tut pingaar­ner­paatik­kamik­kit Jehovamit qanoq pil­luaq­quneqar­pat? Onésime ima oqalut­tuar­poq: “Kristumiunut Oqaluus­sisar­tunut Ilin­niarfim­mi ilin­niarlutalu Betelimi kif­far­torsimavugut. Ukiup kingul­liup ingerlanerani ilagiitsin­ni Biibilimik atuaq­qis­saaqatigineqar­tar­tut 20-t imermut morsutsitaap­put. Maan­na misigivunga aalisarfis­saq­qis­sumiil­lunga.” (Mark 1:17, 18) Géraldine ima oqar­poq: “Taama pil­luaq­qusaatiginis­sara takorloorsiman­ngisaan­nar­para.”

Judith USA-mi nunasisimasoq oqaluus­sinerorusungaar­poq. Ima oqalut­tuar­poq: “Ilaqut­tak­ka Camerounimiit­tut tikeraareerlugit  utileraangama qiasar­punga Biibilimik atuaq­qis­saaqatigilersimasak­ka arlal­lit qimat­tariaqar­tarak­kit.” Camerounimul­li nuun­nis­sani Judithip nangaanar­toqar­tip­paa. Sulif­fim­mini akis­sarsiaris­saarami ataatami Camerounimiit­tup katsorsar­neqar­nera akilersin­naasar­paa. Jehovali tatigalugu nuup­poq. Nas­suer­poq ilorrisimaar­nar­tumik inooriaaseqarsimanini maqaasisarlugu. Naleq­qus­sarsin­naaq­qul­luni Jehovamut qinuvoq, ilagiin­nil­lu nak­kutil­liisup nuliatalu qiim­mas­saanerat iluaqutigaa.

Judith ima eq­qaamasalik­kersaar­poq: “Ukiut pingasut ingerlaneran­ni sisamanik anersaak­kut meerar­taar­punga.” Specialpionerin­ngor­poq. Ul­lumik­kut uini, Sam-Castel, ilagiin­nik nak­kutil­liisuusoq angalaqatigisar­paa. Judithim­mi ataataa? Nunami al­lami nap­parsim­mavim­mik akeqan­ngitsumik taas­suma pilatsif­figisin­naasaanik ilaqutaasa nas­saas­sup­paat. Qujanar­tumil­lu pilatsin­nera iluatsip­poq.

Qatan­ngut Victor Canadami nunasisimavoq. Qaf­fasis­sumik ilin­niagaqar­neq pil­lugu Napasuliaq Alapernaarsuiffik-mi al­laaserisaq atuareerlugu nam­mineq ilin­niar­nini eq­qarsaatigiler­paa. Universitetimi atuarun­naarluni sivikin­nerusumik ilin­niagaqar­nis­sani siun­niup­paa. Ima oqar­poq: “Sulif­fit­taajaar­nerusin­naaler­punga sivisuumil­lu kis­saatigisimasat­tut pionerin­ngorsin­naalerlunga.” Kingusin­nerusuk­kut Caroline nuliar­taaraa, marluul­lutil­lu Camerouni tikeraar­paat. Im­mik­koor­tor­taqarfik takor­nariaramik­ku Camerounimi kif­far­torsin­naanerlutik eq­qarsaatigeq­qul­lugu kajumis­saar­neqar­put. Victor ima oqalut­tuar­poq: “Naaggaar­nis­satsin­nut pis­sutis­saqan­ngin­nat­ta pilimanian­ngitsumil­lu inooriaaseqarat­ta akuersivugut.” Caroline peq­qiil­liuteqaraluar­toq nuun­nis­sar­tik aalajangiup­paat.

Biibilimik soqutigin­nit­tor­pas­suit oqaluus­sif­figiumal­lugit Victor aam­ma Caroline pionerin­ngor­put. Aningaasat toq­qor­tatik inuus­sutigeriarlugit qaam­matialun­ni Canadamut aningaasarsioriar­tor­put Camerounimilu oqaluus­seq­qin­niarlutik uterlutik. Pil­luaq­quneqaatigalugu Kristumiunut Oqaluus­sisar­tunut Ilin­niarfim­mi ilin­niarsimap­put, specialpioneriusimap­put maan­nalu sanaar­toqataasarlutik. Victor ima oqar­poq: “Ilorrisimaar­nar­tumik inooriaaseqarun­naarat­ta Jehovap tapersersuinera misigisin­naaler­par­put.”

Alain universitetimi Tysklandimiit­tumi atuar­tuuvoq, 2002-milu naqitaaraq Hvad vil du med dit liv? atuar­paa. Tas­sani atuak­kani kajumis­sis­sutigalugit nutaanik anguniagaqaler­poq. 2006-imi Kif­far­tor­tut Toq­qak­kat Ilin­niarfian­ni ilin­niareerami inun­ngorfim­minut Camerounimut kif­far­toriar­toq­quneqar­poq.

Alain Camerounimi ul­lup af­faa sulisaler­poq. Kingusin­nerusuk­kut akis­sarsiaris­saarfiunerusumik sulif­fit­taar­poq, kif­far­tor­nerminul­li sun­niuteqarsin­naanera isumakuluutigaa. Specialpionerin­ngorsin­naanerluni aperineqarami nangaanani akuersivoq. Sulisitsisumi akis­sarsiani qaf­fak­kumal­lugit neqeroorfigigaluaraani itigar­til­lugu specialpionerin­ngor­poq. Kingusin­nerusuk­kut Alainip Stéphanie, ukiuni arlalin­ni Frankrigimi najugaqarsimasoq, nuliar­taaraa. Stéphanie Camerounimut nuuk­kami qanoq ajor­nar­torsiuteqaler­pa?

Stéphanie ima oqalut­tuar­poq: “Arlalin­nik nap­paataaloqalerlungalu timik­kut sapigaqaler­punga, iluaqutigisan­nil­li katsorsar­neqar­tar­punga.” Aap­pariit taak­kua piner­tusaar­ner­tik  pil­luaq­quneqaatigaat. Alain ima oqalut­tuar­poq: “Il­loqarfeeq­qamut avin­ngarusimasumut Katémik taaguutilim­mut oqaluus­siar­torat­ta inuit arlal­lit Biibilimik atuaq­qis­saarusut­tut nas­saarivavut. Kingusin­nerusuk­kut taak­ku oqarasuaatik­kut Biibilimik atuaq­qis­saaqatigisaler­pavut. Taak­kulu ilaat marluk imermut morsutsitaap­put, oqaluus­sisar­toqatigiin­nil­lu pilersitsisoqar­poq.” Stéphanie ima nangip­poq: “Inuit Jehovamut tun­niul­luin­narsin­naaq­qul­lugit ikiuinermit nuan­ner­nerusoqan­ngilaq. Maani kif­far­tor­nitsin­ni taamaat­tunik misigisaqar­taqaagut.” Ul­lumik­kut Alain aam­ma Stéphanie ilageeqatigiin­ni angalasar­tutut kif­far­tor­put.

Gisèle Italiami peq­qis­saanermik ilin­niarfim­mi ilin­niar­tuutil­luni imermut morsutsitaavoq. Aap­pariit pionerit im­minik Biibilimik ilin­niar­titsisut pilimanian­ngitsumik inooriaasiat kil­lin­neqaatigalugu oqaluus­sinermi iliuuseqar­nerorusuler­poq. Ilin­niar­nerminil­lu naam­mas­siler­nermini pionerin­ngor­poq.

Gisèle Camerounimut uterluni Jehovamut kif­far­tor­nermi iliuuseqar­nerorusup­poq, nangaas­suteqar­porli. Ima oqar­poq: “Nuus­saguma Italiami najugaqarsin­naatitaanera an­naasariaqar­para, aam­ma ikin­ngutik­ka ilaqut­tak­kalu Italiami najugal­lit qimat­tariaqar­pak­ka.” Taamaak­kaluar­toq 2016-imi maajimi Gisèle Camerounimut uter­poq. Kingusin­nerusuk­kut Léonce uitaaraa, Camerounimilu im­mik­koor­tor­taqarfim­miit kajumis­saar­neqar­put Ayosimut, il­loqarfim­mut oqaluus­sisar­tunik pisariaqar­titsif­fiunerusumut, nooq­qul­lugit.

Ayosimi inuuneq qanoq ip­pa? Gisèle ima oqalut­tuar­poq: “Sapaatit-akun­nerini arlalin­ni in­naal­lagiaqar­neq ajor­pugut, mobilivul­lu bat­teriilersorsin­naasan­ngilavut. Pif­fis­sap an­ner­tunersaani mobilivut at­taveqar­neq ajor­put. Qisun­nik ikum­mateqarlunga iganeq ilik­kar­para, un­nuk­kut imer­tar­tarfiup inukin­nerani qaam­mar­tar­tulerluta tril­lebøril­lu atorlugit imer­tar­tar­pugut.” Aap­pariit taak­ku qanoq naam­magit­tarsimap­pat? Gisèle ima oqalut­tuar­poq: “Jehovap anersaavata piner­tusaarsin­naatip­paatigut. Aam­ma uigalu tapersersoqatigiip­pugut. Aam­mat­taaq ilaqut­tavut ikin­ngutivulu qiim­mas­saasar­put ilaan­nik­kul­lu aningaasatigut ikiuisarlutik.”

Gisèlep nunamut inun­ngorfim­minut uter­nini nuan­naarutigaa? Ima oqar­poq: “Aap, nuan­naarutigingaar­para! Aal­laq­qaam­mut ajor­nar­torsiuteqar­pugut nikal­lungasarlutalu, tamak­kuli anigoratsigit uigalu misigivugut ilior­tariaqar­nitsitorluin­naq iliorluta. Jehova tatigalugulu qanil­lineruar­put.” Marluul­lutik Kristumiunut Oqaluus­sisar­tunut Ilin­niarfim­mi ilin­niar­put maan­nalu specialpioneriugal­larlutik.

Soorlu aalisar­tut pisaqarluarumal­lutik ajor­nar­torsiuteqaraluarlutik sapiitsuusar­tut, taamatut­taaq nunamut inun­ngorfim­min­nut uter­tut kajumil­lutik eq­qor­tumik isigin­nit­taaseqar­tunik ikiuiumal­lutik pil­liuteqar­tar­put. Jehovap atini pil­lugu asan­nit­tuliorlutil­lu nikal­lujuil­lutik oqaluus­siuar­tut taak­ku puior­navian­ngilai. (Neh 5:19; Hebr 6:10) Nunami al­lami najugaqaruit nunamilu inun­ngorfin­ni oqaluus­sisar­tunik pisariaqar­titsisoqar­pat tas­sunga utersin­naavit? Taamaalioruit pil­luaq­qusaangaas­saatit. – Uss 10:22.