VANAVAZINYETU ava va dirukilire koyirongo yokoUtokero waAfrika, ngesi va ka tengura koyirongo yawo yomvharerwa. Eharo lyawo lyokuhara Jehova ntani novantu, kwava ninkisa va dirukire komavango oku vana hepa vazuvhisi. (Mat. 22:37-39) Malizambero musinke va tulire po ntani matungiko musinke va gwana? Mokugwana elimbururo, tu demeneni kosirongo saCameroon, esi sa karera koUtokero waAfrika.

Mo-1998, munazinyetu gomugara Onésime kwa dirukire mosirongo sendi somvharerwa, Cameroon. Age kwa ka tungire kosirongo sapeke ure wonomvhura 14. Ezuva limwe kepongo, age kwa zuvhire sifanekeso sokuhamena sirugana sokuzuvhisa. Mugavi siuyungwa kwa uyungire asi: “Nsene asi vakaume vavali kwa kuroverera pomavango gokulisiga, ano gumwe kwa kukwata nomfi dononzi kupitakana mukwawo, ano ogu ana kukwata nomfi dononsesu kapi nye na rundurukira pevango apa ana kukwata mukwawo nomfi dononzi ndi?”

Sifanekeso oso kwa ninkisire Onésime a gazadare ko kutengura koCameroon a ka vatere vazuvhisi. Mokumona asi age kwa ka kere kosirongo sapeke nomvhura dononzi, age kwa kere nosinka nsene asi na ka vhura kuyika ukaro womosirongo somvharerwa zendi. Age kwa zire koCameroon makwedi ntazimwe, yipo a tare nsene kuvhura nga yike ukaro wa ko. Ano mo-2012, yipo ga dirukilire koCameroon.

Onésime kwa tanta asi: “Na hepere kuyika mukarompepo goupyu ntani neparu lyamo. KoSinyanga soUhompa, na hepere kuyika kuhingira poyipundi yoyitji. Nye moomu na litulire mo kupurakena mepongo, kwa vaterere nge ni divare yipundi yoyiwa eyi ngatu hingire kosirongo esi na ka kere.”

Mo-2013, Onésime kwa kwere Géraldine, ogu ga ka tengwire moCameroon konyima zokurugana moFrance nomvhura ntane. Mauwa musinke va gwana valikwali ava morwa kudemenena kosirugana soUhompa? Onésime kwa tanta asi: “Ngovalikwali, ose kwa zire Sikora zoVazuvhisi woUhompa ntani ose kurugana koBeteli. Momvhura tupu zimwe, varongwa wokusika po-20 womombungakriste zetu kwa gwene ekuho. Ame kulizuvha asi ngesi pevango lyewa lyokuroverera na kara.” (Mar 1:17, 18) Géraldine nage kwa gweda ko asi: “Mauwa manzi na gwana na hana kuyindindira.”

Judith kwa dirukilire moAmerika, nye age kwa here kutamununa sirugana sendi sokuzuvhisa. Age kwa tanta asi: “Ame ngani dingura ekoro lyange moCameroon, ano konyima zankenye edinguro, ame ngani lili morwa ngani sigi varongwa vange woBibeli.” Nye nampili ngoso, Judith kwa kere nomasinganyeko gokudirukira koCameroon. Age kwa kere noyirugana  yokutambura yimaliwa yoyinzi ntani yirugana oyo ngayi mu vatere kufuta uhaku wotate vendi ava va kere mo Cameroon. Nye morwa ga huguvarere Jehova, age ga dirukire. Age nga diworoka eparu eli nga hafere apa ga ka tungire moAmerika. Age nga kanderere kwaJehova a mu vatere yipo a yike ntani mutareli gumwe gonombunga namukadendi kwa mu korangedere.

Judith kwa diworokere omu lya fene eparu apa ga dirukilire moCameroon, age kwa tanta asi: “Monomvhura tupu ntatu ame kwa vaterere varongwa vane va gwane ekuho.” Judith kwa tamekere kurugana uzuvhisi wosiruwo nasinye. Ano ngesi age kurugana kumwe namugara gwendi Sam-Castel mosirugana sokudingura nombungakriste. Nye yisinke ya horokerere otate vaJudith? Nage ntani vekoro lyendi va vhulire kugwana sipangero ponze zosirongo esi sa vhulire kufutira otate vendi yipo va va taure. Ano etauro lya gendere po nawa.

Munazinyetu gomugara Victor kwa dirukilire moKanada. Konyima zapa ga mene kuresa Ruhungu oru rwa uyunga kuhamena elirongo lyokuzeruka, ayo kwa mu ninkisire a gazare kuhamena sure ezi nga lirongo. Yipo ga tokwere kulirongera yirugana yokomawoko mevango lyokuza kosure zokuzeruka. Age kwa tente asi: “Ayo ya vaterere nge ni gwane yirugana usimbu ntani ni rugane uzuvhisi wokukarerera.” Konyima zapa Victor va likwere naCaroline, awo kwa ka dingwire Cameroon. Apa va ka dingwire mberewa zomutayi, awo kwa ka va korangedere va gazadare ko kuvatera moCameroon. Victor kwa tanta asi: “Kwato ngano eyi ya tu konderere, mokumona asi ose kwa rerupikire eparu lyetu, ose twa tambwire ezigido olyo.” Nampili ngomu Caroline ga kara noudigu woukanguki, awo kwa dirukire.

Victor naCaroline kwa tamekere kurugana uzuvhisi wokukarerera yipo va vatere vantu wovanzi ava va here kulironga Bibeli. Pomuhowo awo kapi va vhulire kurugana morwa ngava parukire moyimaliwa eyi va pungwire. Konyima awo kwa zire koKanada oku va ka rugene makwedi gomasesu, ano konyima va ya tengwire moCameroon nokutwikira uzuvhisi wokukarerera. Mauwa musinke va gwana? Awo kwa zire koSikora zoVazuvhisi woUhompa, ntani va kere vazuvhisi wosiruwo nasinye, ano ngesi awo kutunga Yinyanga. Victor kwa uyunga asi: “Kudirukira oku va hepa vazuvhisi ya tu vatera tu mone evatero lyaJehova.”

Mo-2002, munazinyetugara Alain ogu nga lirongere posure zokuzeruka moGerman kwa resere sitratate Vadinkantu—Yisinke ngomu rugana neparu lyeni? Eyi ga resere kwa mu tumangedere a litulire po yitambo yopampepo. Mo-2006 yipo ga zire kosure zovakwafimbunga, ano konyima yipo va mu tumine koCameroon, sirongo somvharerwa zendi.

Alain ga gwene yirugana yokurugana mazuva gongandi. Ano konyima yipo ga gwene yirugana yokufuta nawa, nye ga kere nosinka asi kapi nga kara nosiruwo sosinzi sokuzuvhisa. Apa va mu tanterere asi ta kara muzuvhisi gosiruwo nasinye, age kwa tambwire sirugana oso ga hana kulikatakata. Muhona gwendi kwa here asi a rugane ntani mfuto zendi kwa zi zerwire, nye Alain ga kwaterere ketokoro lyendi. Konyima, Alain yipo ga ya kwere Stéphanie, ogu ga tungire nomvhura dononzi moFransa. Maudigu musinke ga ligwanekerere nago Stéphanie konyima zapa ga dirukilire moCameroon?

Stéphanie kwa tanta asi: “Ame kwa tamekere kuvera-vera, nye na gwene uhaku nevatero.” Valikwali owo va gwene matungiko  morwa kulididimikira. Alain kwa tanta asi: “Apa twa zire tu ka zuvhisire momukunda ava tumbura asi Katé, ose kwa ka gwene vantu ava va here kulironga Bibeli. Konyima, ose ngatu lirongo nawo kupitira koterefona morwa mukunda gwawo kwa likere ure noku twa tungire. Ano varongwa vavali yipo va gwene ekuho makura yipo va tulisire po kambunga kovazuvhisi.” Stephanie kwa gweda ko asi: “Kwato ruhafo oru rwa pitakana rokuvatera muntu a ligave kwaJehova. Ose twa limonena ruhafo oro yikando yoyinzi.” Ngesi Alain naStéphanie kuna kurugana sirugana sokudingura nombungakriste.

Gisèle kwa gwene ekuho age opo simpe kuna kulirongera undokotora moItalia. Age kwa mu tetukisire mokumona omu valikwali ava va mu rongere Bibeli va rerupika eparu lyawo ntani age kwa here kutamununa sirugana sendi sokuzuvhisa. Gisèle kwa tamekere kurugana uzuvhisi wokukarerera apa ga mene sure.

Gisèle kwa here kutengura koCameroon a ka karere Jehova momunene nye ga kere nosinka. Age kwa tente asi: “Na hepere kusiga vakaume ntani nekoro lyange ava va tungire moItalia.” Nampili ngoso, mwaKudumonkuru 2016, Gisèle kwa dirukilire moCameroon.Konyima zosiruwo, yipo ga ya kwere Léonce, ano mberewa zomutayi kwa pulire valikwali owo nsene kuvhura va dirukire kodoropa zaAyos, oku va hepere vazuvhisi woUhompa.

Ngapi omu lya kere eparu moAyos? Gisèle kwa tanta asi: “Rorunzi kapi ngaku kara rutjeno ure woyivike ntani kapi ngatu vhuru kutjatja noserefoni detu. Yiruwo yoyinzi ngadi dimi. Na lirongere kuterekera koyitare ntani ngatu zi noyikakiliva nokusimba noramba yipo tu ka vhete mema masiku.” Yisinke ya va vaterere va lididimikire? Gisèle kwa tanta asi: “Mpepo zokupongoka, evatero lyokutunda kwamugara gwange, makorangedo ntani vakaume novanekoro ngava tu korangeda nokutupa ko yimaliwa.”

Gisèle ana hafa kweyi ga tengwire kosirongo sendi somvharerwa. Age kwa tente asi: “Ngatu ligwanekere nomaudigu ntani ngani dompo mutjima, nye ose twa ya fundire po malizuvho ogo, ntani twa lizuvhire asi twa sikisire mo eyi twa here kurugana. Ose kwa huguvara mwaJehova ntani ose ngesi kulizuvha asi elikwatakano lyetu naJehova lyankondopara.” Léonce naGisèle kwa zire koSikora zoVazuvhisi woUhompa, ano ngesi awo vazuvhisi wokuvatera wosiruwo nasinye.

Ngwendi vakwati wonomfi ava ava papara mavango gomawa yipo va kwate nomfi dononzi, vanavazinyetu ava ava tengura koyirongo yawo yomvharerwa kulizambera va vatere wonomutjima donongwa ava va hara mbudi zoUhompa. Jehova kapi nga divara vazuvhisi ava woupampi ntani neharo lyawo lyokuhara edina lyendi. (Neh. 5:19; Heb. 6:10) Ngapi nsene asi ove kwa tunga mosirongo sa hana asi somvharerwa zoge, nye ono dimburura asi mosirongo somvharerwa zoge vana hepa mo vazuvhisi, kuvhura o ka vatere ndi? Nsene oyi rugana, ngo gwanena mo mauwa.—Yis. 10:22.