ABALI na arongola anjinji enao athamenle muvilambo vyofuma tatosakula welela muvilambo vyawaniwa. Mwasa omdhiveliwana Yohova naatu, aliwa tanosakula thamela muvilambo vinofuneela anamalaleya a Umwene. (Mat. 22:37-39) N’nga aliwa tate a-vi? Mbamaraeli-o a-vi awachenle aliwa? Ira nizindiyele dhoweni nioneni vifwanafwani-o vyaabali enango a Kameroni, ilambo ya mavirelo wadhuwa wa Afrika.

Yawa ya 1998, bali unoongiwa Onésime atokuma ilambo yawaniwa Ukameroni liye mala vyawa 14 ilambo yaundhe. Dambo n’nango angali migumanoni atovwa ifwanafwani-o yo-inda rima vinjinji yoonga basa lolaleela. Namaonga mwasa aongile ira: “Axamwali ambinli tameza matanda o-iyana. M’mbo-i anomeza somba dhinjinji mo-iyana na fwee. N’nga chini yafwanela ira m’mbo-ula wenio akonda a-meza somba dhinjinji? Kaakale pama liye dhowa vali fwee-i?”

Ifwanafwani-o yei yatommwiri-a Onésime thuulela vyofuna welela waniwa Ukameroni, neri-a weo basa “lomeza” atu lanowenda vinjinji. Mbwenye liye atokala okumbanya. N’nga liye angaodile kaatheya pama ilambo yawaniwa, masiki angalive ira utomala hora injinji angali ilambo yaundhe? Ira nizindiyele Onésime atothuulela vyodhowa mamala medi 6 ilambo yawaniwao Ukameroni. Adhaire ee-no yawa ya 2012 liye atothamelao.

Onésime unoonga ira: “Miyo ndanofwanela lemeela vi-a namakalelo aingumi ailambo yawani-u. Nyumbani ya Umwene miyo ndafwanela kaathedha okoka mipando yokoma.” Mbwenye liye unoonga motheya ira: “Vanokala miyo ndivuruwanechechanga migumano thuulela mipando yofewa yakaathedhecha miyo unokala uvunguwanga.”

Yawa ya 2013 Onésime atothelana na rongola Géraldine. Rongolula ali airanga welelao wene Ukameroni vanduli vomala vyawa 9 angali ilambo ya Frasa. Aliwa ta-edhi basa lauzimu valimburo loroma vaingumi yiwa. N’nga banjali liwachenle maraeli-o oi a-vi? Onésime unoonga ira: “Natokaana ngari yodhowa Xikola la Anamalaleya a Umwene, no laba Beteli. Yawa ivirile anamafunjedha Bibilya okwakwana 20 apingoni mwi-u tatobadiziwa. Ee-ni ndinovivwa ira ndili valimburo lofwanelela ‘meza’” (Marku 1:17, 18) Géraldine thitho unoonga ira: “Nditowachela maraeli-o oi miyo kandaathuulela.”

Judith atothamela ilambo ya Estados Unidos, mbwenye liye anofuna laba vinjinji muurumiwini. Liye unoonga ira: “Fendo dhothene dhadhowa miyo maapandha anamabalanga Ukameroni ndawelanao mi-odi yola, ali vyorucha vinjinji i-yachi anamafunjedha Bibilya aromi-idhe miyo.” Masiki  angalive ee-no Judith kaana iroromelo yoira unooda welelao Ukameroni. Liye anowachela kobiri injinji yoi yanomkami-a pagali mirombwe ya xipitali ya babee Ukameroni. Vomnyindela Yohova Judith atosakula vyowelela waniwa Ukameroni. Liye unoonga ira atoluza vyongo vyapama vyana liye Estados Unidos. Ira aode lemeela waniwao atovepa dhela mulobelo pedhelo la Yohova, thitho liye atolimbi-iwa na namaing’anela isa vambo-i na i-yanee.

Judith unothuulela ira: “Vyawa viraru nditokala waimwerumweru vokami-a anamafunjedha an’nai kala anamalaleela.” Judith utolaba ninga painiya wavakundu thitho vapeeno liye vambo-i na man’nee, Sam-Castel, mbaanamaing’anela isa. N’nga babee Judith uli a-vi? Xipitali ya ilambo inango yatozindiyela vyom’mwira operasau vyova-a imwerumweru ira operasau yatoireya pama.

Bali unoongiwa Victor athamele ilambo ya Kanada. Vanduli voleri Nsanja ya Namaing’anela yoonga funja wavadhulu. Liye atoroma thuulela vyofunja vyee atosakula i-yachi funja ufakulidadi ira arome funja vyautekiniko. Victor unoonga ira vyevyi vitondikami-a ira ndiode ona basa mombaranya volaba vyongo vyafuna miyo vinjinji ninga—painiya. Vasogolo viwa Victor tatothelena na Caroline, ambilene tatodhowa Ukameroni. Vyadhowile aliwa maona Beteli tatolimbi-iwa vothuulela dhowa malaba Ukameroni. Victor atoonga ira: “I-yo kanana mwasa ofuna ongela ira ‘kaninafuna’ voi ingumi yi-u yali yo-ofuna vinjinji ninooda rumela mwitanula.” Masiki angalive ira Caroline atokaana marenda banjali latosakula ira machinjo.

Numero yaatu anjinji enao tana ifunelo yofuna idhiwa imbarimbari tatom’mwiri-a victor vambo-i na Caroline roma laba ninga apainiya okaatheya. Vira wa hora aliwa tanooda visamalila vo-indi-edha basa kobiri dhiwa, mbwenye ira tadhowenave laba ninga apaniya Ukameroni tatowelela Ukanada ira tamalabe medi yoyeva. N’nga tawachenle maraeli-o oi a-vi? Aliwa tatodhowa Xikola ya Anamalaleya a Umwene, tatolaba thitho ninga apainiya avakundu vachineneeva anolaba basa lomanga. Victor unoonga ira: “I-yachi tatamwi-u yapama utoniiri-a ona pedhelo la Yohova.”

Yawa ya 2002 Alain wenuo ali fakulidadi yailambo ya Alemanya, atotukula tratado loi Achinyamata—Kodi Moyo Wanu Mudzaugwiritsa Ntchito Bwanji? Tratado leli latomkami-a ira akaena mathuulelo mapya. Yawa ya 2006, liye atodhowa xikola lofunjedha urumiwi thitho atorumiwa ira amalabe Ukameroni ilambo yawaniwa.

Ukameroni Alain atofwanya basa la hora yoyeva, adhaire ee-no atofwanya basa lopagali pama. Mbwenye liye ali osukwala voona ira basalo linomwimwanani-a urumiwee. Ngumwasiwa angavepiwile ira amaire upainiya wavakundu Alain kaathuulele fendo winli. Boisee atoonga ira unooda m’mwenjedhela kobiri yatambilecha liye vamwedi mbwenye liye atodhowanave kaana mathuulelo enao kaachinjile, adhaire ee-no Alain tatothelana na Stéphanie, rongola wenio ali wu Frasa vyawa vingaasi. N’nga taguman’nena nyarwa dhoi a-vi tangathamele Ukameroni?

Stéphanie, unoonga ira: “Ndatokaana urenda wa alergia mbwenye ndanowachela mirombwe thitho ndatoila.” Yohova atoraeli-a vilela wabanjali Alain unoonga ira: “Volaleela Ukate tatamo yorambuleleya anamalaleya, natooda kaana anamafunjedha Bibilya anjinji vasogolo viwa nanooda funjia dhela va telefonini, ambinli mwaanamafunjedhala  tatobadiziwa thitho gawo latokaathi-iwa weo.” Stéphanie, unawenjedhela onga ira: “Kavali imwerumweru injinji yo-iyanana kami-a atu enango vivelela wa Yohova, laba uno nitokaana imwerumweru ya hora injinji.” Vapeeno Alain na Stéphanie, anolaba ninga anamaing’anela isa.

Gisèle abadiziwile afunjanga fakulidadi ya ufirimero ilambo ya Italiya. Liye imbarimbari afunjedhile na banja linango laira upainiya, liye atodabwa vinjinji na ingumi yo-ofuna vinjinji yana aliwa. Ifwanafwani-o ya banjali yatomlimbi-a ira alabe vinjinji muurumiwini. Ee-no Giséle atoroma upainiya vyamari-a liye funja fakulidadi.

Giséle anofuna vyowelela waniwa Ukameroni ira alabe vinjinji mu basa la Yohova. Vatokala vyongo vinango vyamsukwali-a, liye unoonga ira: “Miyo ndanofwanela i-yachi ufulu wana miyo okala Italiya. Thitho i-yachi abalanga afwanga akala weo, masiki na vyorucha vyevyi Gisèle atowelela ilambo ya Kameroni mwedi wa maio mu 2016.

Vanduli viwa Giséle tatothelena na Léonce. Beteli ya Kameroni yatowalimbi-a ira tathamele ilambo ya Ayos, sidade weo wafuneya anamalaleya anjinji.

N’nga ingumi yali a-vi ilambo ya Ayos? Giséle unoonga ira: “Wali i-yo kwaali maluju thitho masumana manjinji matelefoni-u kanachaji-a. Hora dhinjinji matelefoni-u takalecha otimene. Thitho miyo ndatofunjedha piya namulo mo-indi-edha basa kuni, thitho nanofwanela dhowa marunga ma-inje djigoni, voi vaisimenivo vanodhalecha atu anjinji nadhowecha nama-iyu namakarinya vo-indi-edha basa latherina. N’nga aliwa taodile a-vi limbanana nyarwa dhedhi? Giséle unoonga ira: “Zimu wa Yohova watonikami-a dhowanave kala o-otekenyeya volaba basa ladhowele i-yo. Miyo na Léonce nanokami-ana unango na fwee thitho nanowandela atu enango vowalimbi-a. Hora dhinango nanokami-iwa naatu enango thangani-avo afwi-u.”

N’nga Giséle unovivwa kala waimwerumweru vowelela ilambo yawaniwa? Liye ekene unorumela ira: “Ee! Mo-okaikela maromelo natokaana vyorucha vyevyo vyaniiri-a kala osukwala, mbwenye vomnyindela Yohova ninovivwa kala duzi vinjinji na liye ningavilenle nyarwa miyo vambo-i na Léonce ninovivwa ira natoirana vyevyo vyafuneeleya ira niviirena.” Léonce na Giséle tatodhowa Xikola ya Anamalaleya a Umwene vapeeno aliwa anolaba ninga apainiya avakundu a hora yoyeva.

Namameza somba unokala olimba rima vofuna gumana vyorucha vofuna ira ameze somba dhinjinji. Sawasawa naatu ale anowelela muilambo yawaniwa vofuna ira taire vinjinji ira “tameze” atu anaifunelo ya milanyu ya Umwene. Yohova mwaimwerumweru unothuulela vivelela wiwa nanguru dhaanamalaleela na udhivela uoni-idhe aliwa vadhinalee. (Nee. 5:19; Aeb. 6:10) Akala nyo munokala ilambo inango mbwenye ilambo yawaninyu unofuneya anamalaleya anjinji, mungaodile welela ilambo yawaninyu? Akala munoira ee-no, Yohova unodha uva-ani fuma ya maraeli-o!—Sang. 10:22.