VANDUMBWETU vavavulu vaze vayilenga kumafuchi eka nakutonda mwakuyoyela, vanakinduluka kumafuchi avo. Kuzanga Yehova navatu, chikiko chinavalingisa vayenga kuvihela kuze kuli nakusakiwa vaka-kwambulula Wangana vavavulu. (Mateu 22:37-39) Uno vyuma muka valisuuwile kulinga, kaha Yehova navakisula ngachilihi? Hakusaka kukumbulula vihula kana, tushimutwilenu halifuchi lyaCameroon lyamuno muAfrica.

Mu 1998 ndumbwetu Onésime afumine muCameroon nakuya kulifuchi lyeka kuze akatwamine myaka 14. Likumbi limwe omu apwile kukukunguluka, muka-kuhanjika chihande ahanyine chakutalilaho chakutalisa kumulimo wakwambulula. Ambile ngwenyi, “Kachi nge vasepa namutu vali nakulovela muvyau vyakulihandununa, kaha umwe ali nakulova vaishi vavavulu kuhambakana mukwavo, kutala uze ali nakulova vaishi vavandende keshi kuya kuze kuli sepa lyenyiko tahi?”

Chakutalilaho kana chakafwile Onésime ashinganyeke kukinduluka kuCameroon kuze kwapwile vatu vazangile kulinangula muchano, mangana akazachile hamwe navandumbwenyi vakulifuchi kana. Oloze alizakaminyine ngwenyi, pamo keshi kukahasa kwijilila chiyoyelo chakulifuchi kuze afumine lyehiko. Hakusaka kutachikiza kanawa, ayile nakutwama kuCameroon hatukweji 6. Ngocho kuheta mu 2012, alukile jino nakutwama.

Onésime ambile ngwenyi: “Hakavanga changukaluhwilile mwomwo kwapwa kuzuma, kaha nawa chiyoyelo chapwa chachikalu. Kaha nawa changukaluhwililenga kutwama havitwamo vyamapulanga muZuvo yaWangana.” Amwesele kukanwa nakuhanjika cheka ngwenyi: “Oloze omu ngwahakilenga mangana kukukunguluka, ngwaputukile kuvulyama navitwamo vyamwaza vyakuze ngwafumine.”

Kuheta mu 2013, Onésime ambachile Géraldine, uze akindulukile kuCameroon hanyima yakutwama myaka 9 muFrance. Uno Yehova avakiswile ngachilihi hakulisuula chavo kuhaka vyuma vyakushipilitu kulutwe? Onésime ambile ngwenyi: “Ami napuwami vatusanyikile kuShikola yaVaka-Kwambulula Wangana. Kufumaho twazachilile haMbetele. Mukalinwomu ngana, muchikungulwilo chetu vambapachisanga vatu 20 mumwaka umwe kaha. Nguli jino nakwivwa ngwami nguli muchihela chamwaza chakufuchila vatu.” (Mako 1:17, 18) Puwenyi Géraldine nawa ambile ngwenyi: “Yehova nangukisula mwamunene chikuma kuhambakana nomwo ngwashinganyekele.”

Judith alukilile kuUnited States, oloze afwilililenga kuzata chikuma mulimo wakwambulula. Ambile ngwenyi: “Shimbu jimwe ngwejilenga kuCameroon nakutala vausoko wami. Kaha hakusalisa  ngwalililenga mwomwo yakushinganyeka havatu vavavulu ngwasezelenga, vaze ngwaputukile kunangula Mbimbiliya.” Chipwe ngocho, chamukaluhwilile kuya nakutwama kuCameroon. Apwile nakuzata mulimo wajimbongo jajivulu jize jamukafwilenga kuzakama Ise uze apwile nakuviza muCameroon. Kufwelela Yehova chamulingishile alukile kuCameroon. Ambile ngwenyi anukilenga chiyoyelo chamwaza chakuUnited States. Ngocho alombele Yehova amukafwe ejilile chiyoyelo chakwimbo, kaha nawa vamukolezezele kuli kalama wakujinguluka napuwenyi.

Mukuhita chalwola Judith ambile ngwenyi, “Ngwawahililile mwomwo mumyaka yitatu kaha, ngwanangwile vatu vawana vapwenga tumbaji.” Omu asombokele aputukile kuzata upayiniya wakulipwila hamwe nalunga lyenyi Sam-Castel. Oholyapwa lunga lyenyi apwa kalama wakujinguluka, ngocho veji kuzachilanga hamwe. Jino iya apwile nakuzakama ise? Judith navausoko wenyi vawanyine chipatela chakulifuchi lyeka chize chalisuwile kuka ise hawana wakanyombo. Kaha ise ayoyele.

Ndumbwetu Victor ayile nakutwama kuCanada. Omu apwile kuze, atangile chihande chimwe chamuKaposhi Kakutalila chize chapwile nakuhanjika hajishikola jahelu, kaha vyuma atangile vyamukwachile kumuchima. Ngocho echele kutangila hayunivesiti, nakulinangulako kamulimo kawashi kakumukafwa kuwana mwakuyoyela. Ambile ngwenyi: “Ngwawanyine kamulimo kaze kangukafwile nguzate upayiniya.” Kutwala muze Victor ambachile Caroline, kaha vatambukilile lifuchi lyaCameroon. Likumbi limwe vayile nakutala haofesi yamutango, kaha vavalwezele ngwavo vezenga muCameroon mwomwo mwapwile nakusakiwa vaka-kwambulula. Ambile ngwenyi: “Kakwapwile chuma chakutuhonesako. Kaha hakuwana nge twashiwishile chiyoyelo chetu ngocho twalukile.” Numba tuhu Caroline apwile nakuvizaviza, oloze valisuwile kuya kuCameroon.

Hakusaka kukafwa vatu vavavulu valinangule muchano, Victor naCaroline vaputukile kuzata upayiniya washimbu yosena. Hakavanga vapwile nakuzachisa jimbongo vafumine najo kuCanada. Kahomu jakumine vayile cheka kuCanada nakutonda jikwavo hatukweji vavandende, mangana vatwaleho kuzata upayiniya muCameroon. Uno Yehova avakiswile ngachilihi? Vavasanyikile kuShikola yaVaka-Kwambulula Wangana, nakuzata upayiniya wakulipwila, kaha oholyapwa vapwa vaka-kutunga vashimbu yosena. Victor ambile ngwenyi: “Kuseza chiyoyelo chetu chamwaza chinalingisa Yehova atukafwe.”

Mu 2002, Alain, uze apwile nakutangila hayunivesiti muGermany, atangile talakiti yakwamba ngwavo, Enu Vakweze—Mujila Muka Namuzachishilamo Kuyoya Chenu? Vyuma atangile vyamulingishile alumuneko vyuma alitomenene kulinga mukuyoya. Kuheta mu 2006 vamusanyikile kuShikola Yakulinangula Milimo YamuLiuka. Kufumaho, vamutumine kuya nakuzachila mulifuchi lyenyi muCameroon.

Omu ahetele muCameroon, awanyine mulimo wakuzata makumbi amandende. Kutwala muze awanyine mulimo wajimbongo jajivulu, oloze alizakaminyine ngwenyi naumuhonesa kuzata chikuma mulimo wakwambulula. Kahomu vamutongwele kupwa payiniya wakulipwila, etavilile chakuzeneka kukwata kumashinde. Mukulwane wamilimo amulwezele ngwenyi mwamuhakilako jimbongo, oloze ikiye akanyine. Mukuhita chalwola, Alain ambachile Stéphanie uze atwamine myaka yayivulu muFrance. Uno ukalu muka amwene Stéphanie mwomwo yakwalukila kuCameroon?

 Stéphanie ambile ngwenyi: “Ngwaputukile kuviza tumisongo twatundende twatuvulu, oloze ngwawanyine vitumbo vyakungukafwa.” Yehova akiswile ava valunga napwevo hamuchima wavo wakulisuula. Alain ambile ngwenyi: “Omu twayile nakwambulwila kuKaté, kungalila yakwakusuku, twawanyine vatu vavavulu vaze vasakile kulinangula Mbimbiliya. Kufumaho twaputukile kuvanangwilanga hashinga. Havatu kana, vambapachishileho vavali, kaha vatungile lizavu lyavaka-kwambulula vatanu.” Stéphanie ambile ngwenyi: “Kakweshi chuma chinahase kutwivwisa kuwaha chikuma, kuhambakana kukafwa vatu valihane kuli Yehovako. Kwiza nakuzachila kuno, chinatulingisa tupwenga vakuwahilila.” Oholyapwa Alain naStéphanie vali nakuzata mulimo wakujinguluka.

Gisèle vamumbapachishile omu apwile kushikola yakulinangula vyavitumbo muItaly. Vapwevo nalunga vaze vapwile nakumunangula Mbimbiliya vashiwishile chiyoyelo chavo. Echi chamulingishile naikiye afwile kwazana chikuma mumulimo wakwambulula. Ngocho aputukile kuzata upayiniya washimbu yosena omu apwile kwakamwihi nakukumisa shikola.

Gisèle afwililile kukazachila chikuma Yehova muCameroon, oloze alizakaminyine. Ambile ngwenyi, “Changukaluhwilile kufuma muItaly, nakuseza nawa vausoko wami vaze vapwile mulifuchi kana.” Chipwe ngocho, kuheta muMay 2016, Gisèle akindulukile muCameroon. Kutwala muze asombokele kuli Léonce, kaha ofesi yamutango wamuCameroon yavalwezele kuya nakuzachila kuAyos kuze kwapwile nakusakiwa vaka-kwambulula Wangana.

Uno chiyoyelo chapwilenga ngachilihi muAyos? Gisèle ambile ngwenyi: “Kakavulu kakwapwilenga kakahya kakeziko havyalumingo vyavivulu, kaha jishinga jetu japwilenga jakujima halwola kana. Ngwalinangwile kutelekela hajiko, kaha twayilenga najingolofwana namanongo kulishima nakuswita meya naufuku, mwomwo musana kwapwilenga chikuma vatu.” Uno vyuma muka vyavakafwile vapwenga vakumika? Gisèle ambile ngwenyi: “Vyuma vyatukafwile shina shipilitu yaYehova, nakuzachila hamwe nalunga lyami, namazu akutukolezeza aze vahanjikilenga vausoko namasepa najimbongo vatuhanyinenga lwola lumwe.”

Kutala Gisèle apwa wakuwahilila hakuwana nge akindulukile kulifuchi lyenyi tahi? Ambile ngwenyi: “Ngwapwa nguwakuwahilila chikupu. Numba tuhu hakuputuka twamwenenga ukalu nakuhomba, oloze omu twomikile muukalu kana, ami nalunga lyami twatachikijile ngwetu twalingile vyuma twatelelele kulinga. Twafwelela Yehova nakupandama chikuma kuli ikiye.” Léonce naGisèle vavasanyikile kuShikola yaVaka-Kwambulula Wangana, kaha oholyapwa vapwa vapayiniya vakulipwila vashimbu yayindende.

Vaka-kuta vaishi veji kulisuulanga kufwa chishika, nakumona ukalu weka mangana vakwate vaishi vavavulu. Navandumbwetu vaze veji kukindulukanga kumafuchi avo, veji kulisuulanga kuya nakukafwa vatu vamwaza michima, vaze vasaka kwivwa mujimbu waWangana. Yehova keshi kukavulyama ava vandumbwetu vatwima, hazangi vanasolola yakuzanga lijina lyenyiko. (Nehe. 5:19; Hepe. 6:10) Kachi nge mwatwama mulifuchi lyeka, kutala munahase kukinduluka mulifuchi lyenu muze muli nakusakiwa vaka-kwambulula Wangana vavavulu tahi? Nge namulinga ngocho, kaha Yehova mwamikisula mwamunene.—Vishi. 10:22.