TUN hmaa mahni pianna ram aṭanga Khawthlang lam rama pêm lût unau engemaw zât chu an pianna ramah an kîr leh a. Jehova leh unaute hmangaihnain a chêttîr avângin Lalram thuchhuahtu mamawh zualna hmunahte an insawn a ni. (Mt. 22:37-39) Eng inpêknate nge an neih a, eng malsâwmnate nge an dawn? Chumi hriat nân, Africa khawthlang lama awm Cameroon ram chungchâng hi i lo en ang u.

Kum 1998 khân, unau Onésime-a chuan a pianna ram Cameroon chu a chhuahsan a. Ram dangah kum 14 chhûng a awm a ni. Ni khat chu, inkhâwmnaah thu hrilh rawngbâwlna chungchânga tehkhin thu pakhat a hria a. Thusawitu chuan, “Ṭhian dûn pahnih chu hmun inang lovah sangha man tûrin an kal a, pakhat zâwk chuan a ṭhian pa aia a man tam zâwk a nih chuan, a man tlêm zâwk chu sangha tamna hmunah a insawn dâwn lâwm ni?” tiin a sawi a.

Chu tehkhin thu chuan unau Onésime-a chu Bible zir duhtu tam tak awmna Cameroon rama kîr leh a, chuta thuchhuahtute ṭanpui chu a ngaihtuahtîr a ni. Mahse, lungkhamna a nei deuh va. Ram danga kum tam tak a awm hnuah, a pianna ram dinhmun milin a insiamrem thei tak tak ang em? Chumi hre tûrin, unau Onésime-a chu Cameroon ramah thla ruk chhûng châm tûrin a va zin a. A hnu kum 2012-ah awm hlen tûrin a kîr leh ta a ni.

Unau Onésime-a chuan: “Khaw lum leh mite nunphung mila ka insiamrem a ngai a. Kingdom Hall-a thing ṭhutthlêngseia ṭhut chu ngaia ka neih leh a ngai a ni. Mahse, inkhâwma rilru ka pêk poh leh, Kingdom Hall danga ṭhutthlêng nuam takte chu ka theihnghilh telh telh a ni,” tiin nui chungin a sawi a ni.

Kum 2013 khân unau Onésime-a chu France rama kum kua a awm hnua Cameroon rama kîr leh unaunu Géraldine-i nên an innei a. Thlarau lam thiltihnaa an nun an hman avângin, eng malsâwmnate nge an dawn? Unau Onésime-a chuan: “Kan nupain Lalram Chanchin Ṭha Puangtute School kalin, Bethel-ah rawng kan bâwl a. Kum kal ta khân, kan kohhranah Bible zirlai mi 20-in baptisma an chang a. Tûnah chuan, ‘sangha manna’ hmun dik taka awm niin ka inhria,” tiin a sawi. (Mk. 1:17, 18) Unaunu Géraldine-i pawhin: “Ka rin phak bâka nasain malsâwmnate ka dawng a ni,” tiin a sawi belh bawk.

Unaunu Judith-i chu United States-ah insawn mah se, a rawngbâwlna zauh a duh a. Ani chuan, “Cameroon rama ka chhûngte tlawha ka zin apiangin, ka châm chhûnga ka neih Bible zirpui mi engemaw zât chu ka hawsan a ngaih avângin ka ṭap ṭhîn,” tiin a sawi a. Mahse, unaunu Judith-i chuan Cameroon rama kîr leh chu a hreh deuh va. Ani chuan Cameroon rama a pa dam lo enkawl  nâna mamawhte phuhru thei hna ṭha tak a nei a. Chuti chung pawhin, unaunu Judith-i chu Jehova rinchhanin an ramah a kîr leh a. Ram danga nuam taka a awm laite chu a ngaihzia a sawi ṭhîn. Insiamrem thei tûrin Jehova hnênah a ṭawngṭai a, bial kantu leh a nupui hnên aṭanga a dawn fuihna chuan a tichak a ni.

Unaunu Judith-i chuan a han thlîr lêt leh chuan, heti hian a sawi: “Kum thum chhûngin thlarau lam fa pali ka neih avângin ka hlim hle,” tiin. Ani chuan special pioneer a thawk ṭan a. Tûnah chuan a pasal Sam-Castel-a nên bial kantu niin rawng an bâwl a ni. A nih leh, unaunu Judith-i pa chu engtin nge a awm tâk zêl? Amah leh a chhûngte chuan ram dangah man chawi lova a pa zai theitu damdawi in pakhat an hmu fuh a. Lâwmawm takin, inzaina pawh a hlawhtling a ni.

Unau Victor-a chu Canada ramah a insawn a. Zirna sâng chungchânga Vênnainsâng thuziak a chhiar hnu chuan, a inngaihtuah a. University-a kal tawh lovin, hun rei lo tê chauh pêk ngai inzirnaah a kal ta zâwk a. “A hnu lawkah hna ka hmu nghâl a, ka thawh châk êm êm pioneer pawh ka thawk thei bawk,” tiin a sawi. A hnuah, unau Victor-a chu unaunu Caroline-i nên an innei a, an nupain Cameroon ramah an zin a. Chuta branch office an va tlawh chuan, unaute’n Cameroon rama rawng an bâwl theih dâwn leh dâwn loh ngaihtuah tûrin an fuih a. Unau Victor-a chuan: “Hnialna tûr chhan kan nei lo, chu bâkah, samkhai taka kan nun avângin, sâwmna chu kan pâwm nghâl a ni,” tiin a sawi. Unaunu Caroline-i chuan hrisêlna lamah harsatna nei deuh mah se, chuta insawn tûrin thu tlûkna an siam ta a ni.

Unau Victor-a leh unaunu Caroline-i chuan thlawhhmaa tuina neite ṭanpui tûrin regular pioneer an thawk a. Hun engemawti chhûng chu an sum khâwl sa ringin an khawsa thei a. Chumi hnuah, Canada ramah thla rei lo te chhûng an va inhlawh a, Cameroon rama kîr lehin pioneer an thawk zawm leh a ni. Eng malsâwmnate nge an dawn? Lalram Chanchin Ṭha Puangtute School an kal a, special pioneer a ni a, tûnah chuan, insakna lamah thawkin rawng an bâwl a ni. Unau Victor-a chuan, “Nun nuam tak kalsanna chuan Jehova ṭanpuinate min dawntîr a ni,” tiin a sawi.

Kum 2002-ah, German rama university zirlai unau Alain-a chuan Youths—What Will You Do With Your Life? tih tract a chhiar a. A thu chhiar chuan thiltum thar insiam tûrin a chêttîr a ni. Kum 2006-ah, Ministerial Training School a kal a, a pianna ram, Cameroon-a rawngbâwl tûra tih a ni.

Cameroon ramah, unau Alain-a chuan hunbi neia hnathawh tûr a hmu a. A hnuah, hna ṭha zâwk hmu mah se, chu chuan a rawngbâwlna hun a lâk pênsak a hlau a ni. Chuvângin, special pioneer nia rawngbâwl tûra sâwm a nih chuan, hreh miah lovin a pawm nghâl a. A hnathawhna pu chuan hlawh tam zâwk pêk a tiam chung pawhin, a hnâwl a. A hnuah, unau Alain-a chu France rama kum tam tak lo awm tawh unaunu Stéphanie-i nên an innei a ni. A nih leh, unaunu Stéphanie-i chuan Cameroon rama a insawn avângin eng harsatnate nge a tawh?

Unaunu Stéphanie-i chuan: “Ka hrisêlna a ṭha vak lo va, thil ngeih lohte pawh ka nei a; mahse, ka inenkawl a, ka ṭha chho ve leh zêl a ni,” tiin a sawi. An chhelna avângin an nupa chuan malsâwmna an dawng a. Unau Alain-a chuan: “Katé tia an koh hmun hlaa awm khaw pakhat kan va tlawh chuan Bible zir duh tam tak kan hmu a. A hnuah, chûng mite nên chuan phone hmangin Bible kan zir thei a ni. An zînga Bible zirlai pahnih chuan baptisma an chang tawh a, thuchhuahtu dangte pawh an  awm a, group din a ni ta a ni,” tiin a sawi. Unaunu Stéphanie-i chuan: “Jehova hnêna inpumpêk tûra mite ṭanpui aia hlimna nasa zâwk a awm thei lo. Heta rawng kan bâwlna avâng hian chutiang hlimna chu vawi tam tak kan nei,” tiin a sawi belh a. Tûnah chuan, an nupain bial kantu niin rawng an bâwl a ni.

Unaunu Gisèle-i chuan Italy rama doctor ni tûra a zirlaiin baptisma a chang a. Amah Bible zirpuitu pioneer nupa tuakte chu samkhai takin an nung tih a hmuh chuan, chu chuan a rilru a hneh êm avângin, rawngbâwlnaa tam lehzuala tel a duh ta a. Chuvângin, ani chuan doctor ni tûra inzir zâwm zêl chungin regular pioneer a thawk ṭan ta a ni.

Unaunu Gisèle-i chuan Cameroon rama kîr leh a, Jehova rawngbâwlnaa tam lehzuala inhman a duh a; mahse, lungkhamna a nei a. Ani chuan, “Italy rama dân anga ka awm theihna leh chumi rama ka ṭhiante leh chhûngte chu kan chhuahsan a ngai,” tiin a sawi. Chuti chung pawhin, unaunu Gisèle-i chu May 2016 khân, Cameroon-ah a kîr leh a ni. A hnu rei vak lo vah, unau Léonce-a nên an innei a, Cameroon branch office chuan an nupa chu Lalram thu hriltu mamawh zualna khaw pakhat, Ayos-a insawn tûrin a ti a.

Ayos khuaa nun chu eng ang nge ni? Unaunu Gisèle-i chuan: “Chawlhkâr engemawti chhûng current neih loh châng kan nei a, phone-te pawh kan charge thei lo. Phone hman theih loh hun chu a tam zâwk a ni. Thinga chaw chhum dân kan zir a, tuikhura tui chawi an tlêm lai, zânahte nawrlîr nên torchlight kengin tui kan chawi ṭhîn,” tiin a sawi. Engtin nge chhel taka an tawrh chhuah theih? Unaunu Gisèle-i chuan: “Jehova thlarau thianghlim te, kawppui ṭha tak te, fuihna te, leh a chânga chhûngte leh ṭhiante hnên aṭanga ṭanpuina sum kan dawnte chuan tuar chhuak tûrin min ṭanpui a ni,” tiin a sawi.

Unaunu Gisèle-i chu a pianna rama a kîr leh avângin a hlim em? Ani chuan, “Hlim teh meuh mai!” tiin a sawi. “A tîr chuan harsatnate leh lunghnualnate kan nei a; mahse, chûngte kan paltlang hnu chuan, kan nupain kan tih tûr rêng ti ni hian kan inhria a. Jehova kan rinchhan a, amah nên inhnaih lehzual ni hian kan inhria,” tiin a sawi. Unau Léonce-a leh unaunu Gisèle-i chuan Lalram Chanchin Ṭha Puangtute School an kal a, tûnah chuan temporary special pioneer thawkin rawng an bâwl a ni.

Sangha tam tak an man theih nâna dinhmun harsa tak tak hmachhawn ngamtu sangha mantute angin, mahni pianna rama kîr lehte chu Lalram thuchah chhâng lêttu thinlung ṭha pu mite ṭanpui tûrin inhuam takin an inpe a. Jehova chuan a hming chunga hmangaihna lantîrtu chûng thuchhuahtu taima takte chu a theihnghilh ngai lo vang tih a chiang a ni. (Neh. 5:19; Heb. 6:10) Ram danga chêng i nih a, i pianna ramah Lalram thuchhuahtute mamawh a nih chuan, i kîr leh thei ang em? I kîr leh a nih chuan, malsâwmna tam takin a lo hmuak ang che.—Thuf. 10:22.