ATEʼ nim erman ma tzikʼ ambʼil in che anqʼin toj juntl tnam jatumel jaku kambʼet mas kypwaq xjal, pero o che meltzʼaj toj kytnam. Tuʼnju o chʼiy kykʼujlabʼil tiʼj Jehová ex kyiʼj xjal, o kubʼ kyximen tuʼn kyxiʼ ajbʼel jatumel kyaj erman onbʼil (Mat. 22:37-39). ¿Alkyeqe chʼixpubʼil bʼant kyuʼn ex tzeʼn o che tzaj kʼiwlaʼn tuʼn Jehová? Jun techel tiʼj jlu, aju in bʼaj Camerún, jun tnam te África.

Toj 1998, xiʼ ermano Onésime te Camerún anqʼil 14 abʼqʼi toj juntl tnam. Jun qʼij, ajbʼen jun techel tuʼn jun ermano toj jun chmabʼil tuʼn tyolin tiʼj pakbʼabʼil. Tqʼama jlu: «Qo ximen kyiʼj kabʼe xjal kyamiw kyibʼ ex in che jyon kyiʼj pescad toj junxichaq lugar. Jun kye, in kanet mas pescad tuʼn twitz juntl. ¿Mlaypelo txiʼ xjal mintiʼxix in che kanet pescad tuʼn toj lugar jatumel taʼ tamiw?».

Tej tok tbʼiʼn Onésime techel jlu, kubʼ t-ximen tuʼn tmeltzʼaj Camerún jatumel kyaj erman onbʼil tuʼn t-xi qʼet xnaqʼtzbʼil kye xjal tiʼj Tyol Dios. Pero tzaj bʼaj tkʼuʼj tuʼnju kubʼ t-ximen qa mlaytoq naqʼet juntl maj toj ttnam. Tuʼntzunju, tuʼn tok tkeʼyin qa jaku tzikʼx tuʼn, xiʼ anqʼil qaq xjaw atz Camerún ex toj 2012, xiʼ anqʼil atz.

In tzaj tqʼamaʼn Onésime jlu: «Ok tilil wuʼne tuʼn nnaqʼete tiʼj kyaq ex tiʼj kyanqʼibʼil xjal. Ax ikx in naqʼete tuʼn nkubʼ qeʼye kyibʼaj qʼuqbʼil nya bʼunin toj Ja te Chmabʼil». Ex tqʼamatl jlu tukʼil tzalajbʼil: «Pero tej tok nqʼoʼne mas nwiʼye tiʼj chmabʼil, ya mintiʼxix in ximane kyiʼj tbʼanel qʼuqbʼil jatumel otoq chin tene».

Toj 2013, kubʼ mojeʼ Onésime tukʼil Géraldine te Camerún aju anqʼin bʼeljaj abʼqʼi Francia. ¿Tzeʼn e tzaj kʼiwlaʼn tuʼn Jehová tuʼnju kubʼ kyqʼoʼn tajbʼil tnejel toj kyanqʼibʼil? In tzaj tqʼamaʼn Onésime jlu: «Junx o xiʼye toj Xnaqʼtzbʼil kye Pakbʼal tiʼj Tkawbʼil Dios ex in qo ajbʼene toj Betel. Toj abʼqʼi ma kyaj, jaw aʼ kywiʼ 20 xjal toj kʼloj okslal jatumel atoʼye. Jaʼlo, in kubʼ nnaʼne qa atine toj jun tbʼanel lugar jatumel jaku che tzyet xjal ik tzeʼn in che tzyet pescad» (Mar. 1:17, 18). Tqʼamatl Géraldine jlu: «Mintiʼ kubʼ nximane qa tuʼn ttzaj nkʼamoʼne nim kʼiwlabʼil».

Xiʼ Judith anqʼil atz Estados Unidos ex tajtoq tuʼn tpakbʼan mas ambʼil. Tqʼama jlu: «Aj in chinxtoqe visitaril kye toj njaye atz Camerún, in chin oqʼtoqe aj nmeltzʼaje Estados Unidos tuʼnju in che kyaj nqʼoʼne nim xjal otoq txi tzyet kyxnaqʼtzan tiʼj Tyol Dios». Maske ikju, naʼmxtoq tkubʼ t-ximen tuʼn tmeltzʼaj Camerún. Attoq jun tbʼanel taqʼun ex jakutoq  chjet tqʼanbʼil tman tuʼn. Noqtzun tuʼnj, ok qeʼ tkʼuʼj tiʼj Jehová ex meltzʼaj toj ttnam. El tnikʼ tiʼj qa at maj tzaj tbʼis tiʼj tkyaqilju kyaj tqʼoʼn Estados Unidos. Pero xi tqanin onbʼil te Jehová tuʼn tnaqʼet juntl maj atz Camerún ex xi qʼuqbʼaʼn tkʼuʼj tuʼn jun ansyan in bʼet kyojele Ja te Chmabʼil tukʼil t-xuʼjil.

¿Tzeʼntzun ok? Tqʼama Judith jlu: «Tej tikʼ oxe abʼqʼi, ya otoq chin onine kyiʼj kyaje xjal tuʼn tjaw aʼ kywiʼ ex tuʼn jlu kubʼ nnaʼne nim tzalajbʼil». Ax ikx, xi qʼoʼn toklen te precursora especial. Yajxitl, kubʼ mojeʼ tukʼil Sam-Castel. Atzun jaʼlo, junx in najbʼen tukʼil te ansyan in bʼet kyojele Ja te Chmabʼil. ¿Tiʼtzun bʼaj tiʼj tman? Kanet jun spital te juntl tnam tuʼn Judith kyukʼil toj tja jatumel noq kukx ok operarin tman. Ex tbʼanel ela operación.

Ax ikx xiʼ ermano Víctor anqʼil atz Canadá. Tej tjaw tuʼjin jun xnaqʼtzbʼil toj uʼj Aju Xqʼuqil jatumel in yolin tiʼj xnaqʼtzbʼil toj universidad, kubʼ t-ximen tuʼn tkyaj ttzaqpiʼn t-xnaqʼtzbʼil ex xi tzyet tuʼn t-xnaqʼtzan tiʼj jun xnaqʼtzbʼil jatumel jaku bʼant juntl aqʼuntl tuʼn. Tqʼama jlu: «Noq tuʼn jlu, mas jun rat kanet jun waqʼune ex bʼant tuʼn woke te precursor ik tzeʼn otoq kubʼ nximane». Tej tikʼ chʼintl ambʼil, kubʼ mojeʼ tukʼil Caroline ex i eʼx atz Camerún. Akux ateʼtoq atz, i eʼx visitaril ninja qʼil twitz aqʼuntl ex xi qʼamaʼn kye tuʼn tkubʼ kyximen tuʼn kyajbʼen toj tnam aju. Tqʼama Víctor jlu: «Mintiʼ jun tiquʼn tuʼn t-xi qqʼamaʼne qa mlaytoq bʼant quʼne. Ex tuʼnju in qo anqʼine kyukʼil nya nim tiʼchaq, tzaj qkʼamoʼne txokbʼil». Maske attoq junjun yabʼil tiʼj Caroline, xi kybʼinchaʼn aju otoq kubʼ kyximen.

Xi tzyet tuʼn tajbʼen Víctor ex Caroline te precursor regular tuʼntzun kyonin kyiʼj xjal kyaj tuʼn tel kynikʼ tiʼj Tyol Dios. Tnejel, e anqʼin tukʼil kypwaq otoq txi kykʼuʼn, tej tikʼ chʼintl ambʼil, i eʼx aqʼunal junjun xjaw atz Canadá tuʼntzun kymeltzʼaj juntl maj Camerún ex tuʼn kukx kyajbʼen te precursor. ¿Tzeʼn e tzaj kʼiwlaʼn tuʼn Jehová? I eʼx toj Xnaqʼtzbʼil kye Pakbʼal tiʼj Tkawbʼil Dios ex e ajbʼen te precursor especial, atzun jaʼlo, in che ajbʼen tuʼn kyjaw bʼinchet Ja te Chmabʼil. In tzaj tqʼamaʼn Víctor jlu: «Tej qetze toj tbʼanel tnam jatumel in qo anqʼine, ok qkeʼyine tzeʼn onin Jehová qiʼje».

Toj 2002, in xnaqʼtzantoq jun ermano Alain tbʼi toj universidad te Alemania. Pero tej tjaw tuʼjin tratado Joven, ¿qué harás con tu vida?, onin tiʼj tuʼn t-ximen tiʼj tzeʼn jakutoq tzʼajbʼen mas te Jehová. Toj 2006, xiʼ toj Xnaqʼtzbʼil kye Onil kye ansyan ex xi samaʼn ajbʼel atz Camerún, aju ttnam.

Atztzun, kanet jun taqʼun toj chʼin ambʼil. Yajxitl, kanet juntl taqʼun jatumel jakutoq tzaj qʼoʼn mas twi tkʼuʼj, pero tzaj bʼaj tkʼuʼj tuʼnju kubʼ t-ximen qa jakutoq tzʼel tiʼn ambʼil tiʼj ex ya mlaytoq tzʼok tilil tuʼn toj pakbʼabʼil. Tuʼntzunju, tej ttzaj qʼoʼn txokbʼil tiʼj tuʼn tok te precursor especial, mintiʼ kubʼ t-ximen kabʼe maj. Xi tqʼamaʼn tpatrón te tuʼn t-xi tqʼoʼn mas twi tkʼuʼj, pero xi tqʼamaʼn Alain qa mlay. Yajxitl, kubʼ mojeʼ tukʼil Stéphanie, aju otoq tzʼanqʼin atz Francia. ¿Alkye junjun nya bʼaʼn ok weʼ Stéphanie twitz tej tpon Camerún?

In tzaj tqʼamaʼn Stéphanie jlu: «Tzaj junjun yabʼil wiʼje ex nim alergia, pero kanet qʼanbʼil tiʼj ex onin jlu wiʼje». Tzaj tkʼiwlaʼn Jehová mejebʼleʼn lu tuʼnju kukx ok tilil  kyuʼn. In tzaj tqʼamaʼn Alain jlu: «Tej qxiʼye pakbʼal toj jun lugar Katé tbʼi ex najchaq taʼ, e kanet nim xjal quʼne kyajtoq tuʼn kyxnaqʼtzan tiʼj Tyol Dios. Bʼant tuʼn t-xi qqʼoʼne xnaqʼtzbʼil kye xjal toj teléfono. Jaw aʼ kywiʼ kabʼe xjal ex xi tzyet jun tal kʼloj okslal atz». In tzaj tqʼamaʼn Stéphanie jlu: «Mintiʼ juntl tzalajbʼil jaku kanet quʼn ik tzeʼn aj qonin kyiʼj xjal tuʼn tok kyojtzqiʼn Jehová ex tuʼn kyajbʼen te. Nim maj o kubʼ qnaʼne tzalajbʼil lu tzalu Camerún». Toj ambʼil jaʼlo, in najbʼen Alain te ansyan in bʼet kyojele Ja te Chmabʼil tukʼil t-xuʼjil.

Jaw aʼ twiʼ Gisèle akux in xnaqʼtzantoq tuʼn tok te doctora atz Italia. Jaw labʼin tiʼj kyanqʼibʼil mejebʼleʼn xi qʼonte xnaqʼtzbʼil te tiʼj Tyol Dios tuʼnju in che anqʼintoq kyukʼil nya nim tiʼchaq. Ax ikx, tajtoq tuʼn tpakbʼan mas ambʼil. Tuʼntzunju, ok te precursora regular akux in xnaqʼtzan.

Tajtoq Gisèle tuʼn tmeltzʼaj Camerún tuʼntzun tpakbʼan mas ambʼil, pero tzaj xobʼ. Tqʼama jlu: «Kʼeleltoq qʼiʼn ambʼil weye tuʼn wanqʼine atz Italia ex iltoq tiʼj tuʼn tkyaj nqʼoʼne qe wamiwe ex qe toj njaye ateʼtoq atz». Maske ikju, meltzʼaj Camerún toj mayo te 2016. Tej tikʼ ambʼil, kubʼ mojeʼ tukʼil Léonce, ex xi tqʼamaʼn ninja qʼil twitz aqʼuntl kye tuʼn kyxiʼ ajbʼel toj tnam Ayos, jatumel mintiʼxix pakbʼal at.

¿Tzeʼntoq kyanqʼibʼil xjal at toj tnam aju? In tzaj tqʼamaʼn Gisèle jlu: «Nim maj, in xiʼtoq luz toj nim seman ex in kubʼtoq bʼaj tcarga qcelulare. Tuʼntzunju, chʼixmi tkyaqil maj, yuptzʼan qe qcelulare. Ajbʼen siʼ wuʼne tuʼn tbʼant qwaye, ex te qonikʼen in qoʼxtoqe iqil aʼ toj carreta tukʼil qlinternaye tuʼnju nya nim xjal in che pon toj or aju». In tzaj tqʼamaʼn Gisèle tiʼ onin kyiʼj tuʼn tikʼx kyuʼn: «Ikʼx jlu quʼne tuʼnju onin xewbʼaj xjan qiʼje, tuʼnju bʼaj qonin qibʼe ex tuʼnju tzaj qʼuqbʼan qkʼuʼje kyuʼn qamiwe ex kyuʼn toj qjaye, axpe ikx, tzaj kyqʼoʼn pwaq tuʼn kyonin qiʼje».

¿Tzalajpe Gisèle tuʼnju meltzʼaj toj ttnam? In tzaj tqʼamaʼn jlu: «Nim in tzalaje. Tnejel, o ok weʼye twitz junjun nya bʼaʼn ex tzaj bʼaj qkʼuʼje. Pero tej qexe twitz, el nnikʼe tiʼj tukʼil nchmile qa xi qbʼinchaʼne aju iltoq tiʼj tuʼn tbʼant quʼne. Ok qeʼ qkʼuʼje tiʼj Jehová ex kubʼ qnaʼne qa mas nqayin atoʼye ttxlaj». I eʼx Léonce ex Gisèle toj Xnaqʼtzbʼil kye Pakbʼal tiʼj Tkawbʼil Dios, atzun jaʼlo in che ajbʼen te precursor especial toj chʼin ambʼil.

Tuʼn tkanet tbʼanel pescad kyuʼn xjal, in che ok weʼ twitz junjun nya bʼaʼn ex in che ex twitz, ax ikx kye erman in che meltzʼaj toj kytnam in nikʼx junjun nya bʼaʼn kyuʼn noq tuʼn kyonin kyiʼj xjal tuʼn tel kynikʼ tiʼj Jehová. Jaku tzʼok qeʼ qkʼuʼj tiʼj qa tzul tnaʼn Jehová aju in bʼant kyuʼn ex qa che xel tkʼiwlaʼn tuʼnju in kubʼ kyyekʼin kykʼujlabʼil tiʼj tbʼi (Neh. 5:19; Heb. 6:10). Qa atz in nanqʼin teya toj juntl tnam ex bʼiʼn tuʼna qa kyaj erman onbʼil jatumel tzajniya, ¿jakupe meltzʼaja? Qa ma bʼant jlu tuʼna, jaku tzʼok qeʼ tkʼuʼja tiʼj qa tzul kʼiwlaʼna tuʼn Jehová (Prov. 10:22).